Jn 1

Ɨŋgam we nɨə ghɨ̀ ni bə̂d jɨg ɨ̀tènɨ̀

1Bɔŋ Ŋwìə̀ nyaʼa sɨə tekɨ ɨsɨg, məd we nɨ mbɨə tɔŋ ənɨ Ɨŋgam nyaʼa fə sɨ i əŋgu. Ɨŋgam we wɨə nyaʼa mbɨ ə Ŋwiə̀. Ɨŋgam we yɨə nyaʼə Ŋwiə̀. 2Məd wɨə nyaʼa i mbɨ ə Ŋwiə̀ bɔŋ Ŋwiə̀ nyaʼa sɨə tekɨ ɨsɨg. 3Ŋwìə̀ nyaʼa chè ənjìm məd tekɨ ɨghɨjìm. Chəi əghɨ ə mɔʼɔ ə mɔʼ nɨ Ŋwìə̀ nyaʼa tekɨ nɨ chəi wɨ̀ nyaʼa chè ənjìm məd bɔŋ tekɨ. 4Ɨ̀tènɨ̀ yɨ rɨ ənɨ Ɨŋgam. Ɨ̀tènɨ̀ wɔ̂ yɨə nyaʼa ɨzeŋɨ zeŋɨ əmbɨ ə bə̂d. 5Ɨzeŋɨ zeŋɨ we wɨə te ɨŋga ɨsɨ firɨ, əne chəi ənɨ tɨ̀ ɨsɨ firɨ nimnɨ #1.5Kɨ kyerɨ. ɨzeŋɨ zeŋɨ we.

6Ŋwìə̀ nyaʼa tom wə̀d mɔʼɔ nɨ ɨkum məd nyaʼə Jɔ̌n. 7Jɔ̌n nyaʼa yeʼe ɨghabɨ zərɨmbin ɨ gha ɨnû ɨmbə̀ʼ ɨzeŋɨ zeŋɨ we. Ɨ wɨə nyaʼə ghà əne ɨmbə̀ʼ bə̂d mɨjìm mbe tɨ̀ mbɨ zu benɨ. 8Kaʼ məd ziə yɨə nyaʼa i ɨzeŋɨ zeŋɨ, àyɨə wɨ̀ nyaʼa yeʼe ɨ gha ɨnû ɨmbə̀ʼ ɨzeŋɨ zeŋɨ we. 9Ɨzeŋɨ zeŋɨ we yɨə nyaʼa ɨzeŋɨ zeŋɨ rəsìʼ we nɨ nyaʼa yeʼe ɨŋga ɨsɨg, bə̀ te ɨgun bə̂d mɨjìm.

10Ɨŋgam we wɨə nyaʼa i ɨŋga ɨsɨg, əne Ŋwìə̀ nyaʼa chè ənjìm məd tekɨ ɨsɨg, àyɨə chəi bə̂d rɨŋga ɨsɨg nyaʼa kyerɨ wə̀d we nɨ məd nyaʼa wɨwən. 11Wɨ̀ nyaʼa wò ɨŋga e əbeŋ, àyɨə chəi bə̂d məd nyaʼa nɨŋ əməd. 12Àyɨə mbɨ mɔʼɔ nyaʼa nɨŋ əməd bə̀ ben ɨnû mbe nɨ wɨ̀ nyaʼə ghàə̀, əne wɨ̀ nyaʼa nàʼ ɨka əmbɨ mɨ̀mə̌d mɨjìm ni mbɨ yeʼ bɔn Ŋwiə̀. 13Chəi mbɨ nyaʼa yeʼ bɔn Ŋwiə̀ ɨchî nɨ wə̀d mɨ̀sɔŋɨchù nyaʼa gywɨ mɨ̀mə̌d, kɨ̀ ɨchî nɨ wə̀d mɨ̀sɔŋɨchù nyaʼa taŋ nùŋɨ̀, kɨ̀ ɨchî nɨ wə̀d mɨ̀sɔŋɨchù nyaʼa kəbɨ. Àyɨə Ŋwìə̀ ziə nyaʼa ghɨ̀ ni mbɨ yeʼ mbi bɔn.

14Ɨŋgam we nyaʼa bèŋ ənɨ ə wə̀d mɨ̀sɔŋɨchù, chub əkaʼ na. Tɨ̀ nyaʼa zə ɨwumnɨ məd nɨ yeʼ ɨwumnɨ we nɨ wɨ̀ nyaʼa berɨ ɨchî nɨ wɨ̀ mei Wan we mɔʼ nɨ Mbǎʼ berɨ. Ɨ̀chɔ̀m mbɨ rəsìʼ nyaʼa swi ɨŋga məd. 15Jɔ̌n we nɨ nyaʼə nàʼ mɨnib nyaʼa gha ɨnû ɨmbə̀ʼ əməd. Ɨ wɨə nyaʼə ghàə̀ rɨ̀kǎ ɨmbə̀ʼ əməd ni, “Wɔ̂ yɨə we nɨ mə̀ nyaʼa gha ɨmbə̀ʼ əməd ni, 'Wə̀d we nɨə yeʼe ənɨ mɨ njìm ə chè əmɨ, ɨmbə̀ʼ ɨghəm nɨ məd wɨə nyaʼa be i əŋgu bɔŋ mbɨ nyaʼa sɨə gywɨ əmɨ.'” 16Ɨ̀chɔ̀m ə swi ɨgwɨ məd, əne ɨ wɨə ghɨ̀ ni tɨ̀ jɨg ɨ̀chɔ̀m we. Ɨ wɨ̀ rəbə naʼ i əbɔrəbɔd naʼ ɨ na ɨghəm jìm. 17Ŋwìə̀ nyaʼa naʼ tɨkə ənjìm ə Mose, àyɨə ɨ̀chɔ̀m mbɨ rəsìʼ nyaʼa yeʼe ənjìm ə Yeso Kristo. 18Chəi wə̀d mɔʼɔ kweʼ zə ə Ŋwiə̀. Àmei Wan we mɔʼ, nɨ yeʼ ɨban ə fîŋ Ŋwìə̀, nɨ fə ghɨ̌ ni bə̂d kyerɨ əməd.

Jɔ̌n we nɨ nyaʼə nàʼ mɨnib nyaʼa tòʼrɨ̀ i ɨnyod.

(Mt 3.1-12; Mk 1.1-8; Lk 3.1-18)

19Bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa chà bə̂d mbàn Ŋwìə̀ mbɨ ə bə̂d mɔʼɔ rɨŋga ɨnəbɨ Levì nɨ nyaʼa rɨ ə Jèrusalèm ni mbɨ biirɨ əmbɨ Jɔ̌n ni, “Àwɔ̀ kɨə we ə?” 20Chəi wɨ̀ nyaʼa ton nɨ wììrɨ̀, əne wɨ̀ nyaʼa ben əsaŋ əsaŋ ni, “Ka mɔ̌ yɨ əmɨ Wə̀d we nɨ Ŋwìə̀ zɔʼɔ.”

21Mbɨ nyaʼa biirɨ ɨ bɔ ni, “Əne, àwɔ̀ kɨə we ə? Àwɔ̀ wa kɨ Èlaijà ə?”

Wɨ̀ nyaʼa wììrɨ̀ ni, “Chə̂, ka mɔ̌ yɨ əmɨ Èlaijà.”

Mbɨ nyaʼa biirɨ ni, “Àwɔ̀ wa kɨə wə̀d ɨ̀kə̀n we nɨ Ŋwìə̀ nyaʼa kàʼi ni tə bɨrɨ tom ə?”

Wɨ̀ nyaʼa wììrɨ̀ ni, “Chə̂.”

22Mbɨ nyaʼa gha ɨ bɔ ni, “Əne, àwɔ̀ kɨə we ə? Naʼ ə̀wììrɨ̀ ɨ na tɨ̀ wò ghà əmbɨ ə bə̂d mbe nɨ tom əwa. À ghà ni tə yɨə we ə?”

23Wɨ̀ nyaʼa nɨŋ ɨŋgam wə̀d ɨ̀kə̀n Ŋwìə̀ Aizayà wììrɨ̀ əmbɨ mɨ̀mə̌d ni,

“Mɔ̌ yɨə we nɨə kyeŋ ɨŋga ɨbad rɨkwàʼi ghàə̀ ni,

'Mbə̀ tekɨ ɨnə̂njɨ̀ əmbɨ Ə̀nùŋɨ̀sɨg.'”

24À yɨ mɨ̀Farisiî nyaʼa tom bə̂d mbe nɨ nyaʼa biirɨ ɨŋgam we əmbɨ Jɔ̌n. 25Mbɨ nyaʼa biirɨ ɨ bɔ ni, “Əton nɨ àwɔ̀ ə nàʼ mɨnib nɨ kaʼ àwɔ̀ yɨ e Wə̀d we nɨ Ŋwìə̀ zɔʼɔ kɨ̀ Èlaijà kɨ wə̀d ɨ̀kə̀n we nɨ Ŋwìə̀ nyaʼa kàʼi, kɨ ni yè ə?”

26Jɔ̌n nyaʼa wììrɨ̀ əmbɨ mɨ̀mə̌d ni, “Mə wɨə nàʼ mɨnib, àyɨə wə̀d mɔʼɔ ə təm əkaʼ nən nɨ chəi mbə̀ kyerɨ əməd. 27Məd wɨə yeʼe ənɨ mɨ njìm, àyɨə chəi mə̀ kuʼ nɨ tɨ̀ mə̀ za mɨniʼ ɨtabɨ məd.”

28Ənû zɔ̂ ə nyaʼa ghɨ̀ ə Betanì, ɨnjin ɨgyɨ̂ Jodàn, əsɨ ze nɨ Jɔ̌n nyaʼə nàʼ mɨnib.

Yeso yɨə Wan njɨ̀g Ŋwìə̀

29À nyaʼa əni ze nɨ beenɨ, Jɔ̌n we nɨ nyaʼə nàʼ mɨnib nyaʼa zə ə Yeso ənɨ nyaʼə yeʼe əsɨ məd. Əne wɨ̀ nyaʼa ghà ni, “Mbə̀ zə, wɔ̂ yɨə Wan njɨ̀g Ŋwìə̀. Məd wɨə ghɨ̀ ni Ŋwìə̀ waʼ ɨnû rɨbɔ̀ŋ bə̂d mbe rɨŋga ɨsɨg! 30Wɔ̂ yɨə we nɨ mə nyaʼa ghà ɨmbə̀ʼ əməd ni, 'Wə̀d we nɨə yeʼe ənɨ mɨ njìm ə chè əmɨ, ɨmbə̀ʼ ɨghəm nɨ məd nyaʼa be i əŋgu bɔŋ mbɨ nyaʼa sɨə gywɨ əmɨ.' 31Mɔ̌, ənɨ mɨ ɨghəm, chəi mə nyaʼa kyerɨ wə̀d we nɨ wɨ̀ yeʼ wɨwən, àyɨə mə nyaʼa yeʼe ɨ naʼ mɨnib ɨmbə̀ʼ mɨ̀Izre kyerɨ əməd.”

32Jɔ̌n nyaʼa ghà ɨnû mbe nɨ wɨ̀ nyaʼa zə ɨmbə̀ʼ əməd ni, “Mə nyaʼa zə Əzwî ənɨ zɨə nyaʼə swiʼi rɨkaŋ ɨghabɨ ə tə̀bə̀ŋə, pè chub ɨgwɨ məd. 33Mɔ̌, ənɨ mɨ ɨghəm, chəi mə nyaʼa kyerɨ ni à yɨə məd, àyɨə Ŋwìə̀ we nɨ nyaʼa cha əmɨ ni mə̀ naʼ mɨnib nyaʼa ghà ɨ num ni, 'Wə̀d we nɨ Əzwî ə swiʼi chub ɨgwɨ məd yɨ we nɨ bɨrɨ naʼ yeʼ ənɨ Əzwî ə Zeŋɨ əmbɨ ə bə̂d.' 34Mə fə zə, əne mə wɨə bə̀ ghà əmbɨ ə bə̂d ni məd yɨə Wan Ŋwìə̀.”

Mə̀mə̀ə̀nɨ̀-ɨnû Yeso rɨtu

35À nyaʼa əni ze nɨ beenɨ, Jɔ̌n nyaʼa yì təm mbɨ mbi mə̀mə̀ə̀nɨ̀-ɨnû mɨbe. 36Wɨ̀ nyaʼa zə ə Yeso ənɨ wɨ̀ nyaʼə yèn i, əne wɨ̀ nyaʼa ghà ni, “Mbə̀ zə, wɔ̂ yɨə Wan njɨ̀g Ŋwìə̀!”

37Mə̀mə̀ə̀nɨ̀-ɨnû mbe mɨbe nyaʼa zu ənû ze, əne mbɨ nyaʼa beenɨ əbɔʼ ə Yeso. 38Yeso nyaʼa bèŋ zə ɨchî nɨ mbɨ nyaʼə beenɨ əbɔʼ ni, əne wɨ̀ nyaʼa biirɨ əmbɨ mɨ̀mə̌d ni, “Mbə kɨə kə̀bə̀ ye ə?”

Mbɨ nyaʼa wììrɨ̀ ni, “Rabàì” (əne yɨ ni Əchwiə̀-ɨnû), “à kɨə chub ə yi ə?”

39Wɨ̀ nyaʼa ghà ni, “Mbə̀ yeʼe zə.” Mbɨ nyaʼa wò zə əsɨ ze nɨ wɨ̀ nyaʼə chub əŋgu. Mbɨ nyaʼa chubɨ mbɨ məd əni ze, ɨmbə̀ʼ ɨghəm nɨ à nyaʼa sɨ ɨghabɨ mɨ̀nyùmə̀ kwè əziə.

40Wɨ̀ mɔʼɔ rəbɔʼ mə̀mə̀ə̀nɨ̀-ɨnû mbe mɨbe nɨ nyaʼa zu ənû ze nɨ Jɔ̌n nyaʼa ghǎ əne beenɨ əbɔʼ ə Yeso yɨə nyaʼə Andrù nɨ nyaʼə aŋgɔb Saimon Pità. 41Ənû nɨ Andrù nyaʼa ghɨ̌ yɨ ni wɨ̀ nyaʼa bè wò zə wi aŋgɔb ghà ɨ bɔ ni, “Tɨ̀ fə zə Wə̀d we nɨ Ŋwìə̀ zɔʼɔ.” (Ɨkum wɔ̂ ənɨ ɨŋgam Grik yɨ ni Kristo). 42Wɨ̀ nyaʼa ghà əne nɨŋ ə Saimòn mbɨ wò əsɨ Yeso.

Yeso nyaʼa nèŋ ə Saimòn ghà ni, “Àwɔ̀ yɨə Saimòn wan Jɔ̌n. Bə̂d bɨrɨ sɨə tɔŋ əwe ni Sefàs.” Ɨkum wɔ̂ ənɨ ɨŋgam Grik yɨ ni Pità. #1.42Sefàs yɨ ənɨ ɨŋgam Aramaìk, Pità yɨ ənɨ ɨŋgam Grik. Əton ənɨ ɨkum wɔ̂ ənɨ mɨŋgam mbɔ̂ yɨ ni “Ɨwɔ̌”.

Yeso nyaʼa tɔŋ ə Filip mbɨ Natanaèl

43À nyaʼa əni ze nɨ beenɨ, Yeso nyaʼa tekɨ ɨŋga i fîŋ ni tə bɨrɨ wo ə Galiliî. Wɨ̀ nyaʼa wò zə ə Filip ghà ɨ bɔ ni, “Beenɨ əbɔʼ num.” 44Filip yɨə nyaʼə rɨ ə Bètsaidà nɨ nyaʼa əsɨ nɨ Andrù mbɨ Pità nyaʼa bə nɔ̀ʼ rəŋgu. 45Filip nyaʼa wò zə ə Natanaèl ghà ɨ bɔ ni, “Tɨ̀ fə zə wə̀d we nɨ Mose mbɨ ə bə̂d ɨ̀kə̀n nyaʼa ŋwàʼnɨ̀ ɨmbə̀ʼ əməd. Məd yɨə Yeso wan Jòsêf. Wɨ̀ yɨ rɨ ə Nazàret.”

46Natanaèl nyaʼa biirɨ ɨ bɔ ni, “Tɨ ənû ə chɔ̀m ə mɔʼɔ ə jwɨ̀ rɨ ə Nazàret ə?”

Filip nyaʼa wììrɨ̀ ɨ bɔ ni, “Yeʼe, zə.”

47Yeso nyaʼa zə ə Natanaèl nɨ nyaʼə yeʼe əsɨ məd, əne wɨ̀ nyaʼa ghà ɨmbə̀ʼ əməd ni, “Mbə̀ zə wɔ̂ yɨ wə̀d Izre rəsìʼ. Chəi əbegrɨ-ənû ɨŋga məd!”

48Natanaèl nyaʼa biirɨ ɨ bɔ ni, “À che rɨ ye kyerɨ əmɨ ə?”

Yeso nyaʼa wììrɨ̀ ni, “Mə kə̀ʼ zə əwe ənɨ à kəʼ chub əton əzed ə fîg, bɔŋ Filip nyaʼa sɨə tɔŋ əwe.”

49Natanaèl nyaʼa wììrɨ̀ ɨ bɔ ni, “Əchwiə̀-ɨnû, àwɔ̀ yɨə Wan Ŋwìə̀! Àwɔ̀ yɨ ɨfɔn mɨ̀Izre!”

50Yeso nyaʼa wiirɨ ɨ bɔ ni, “À benɨ ɨmbə̀ʼ ɨghəm nɨ mə̀ gha ɨ ne ni mə kə̀ʼ zə əwe əton əzed ə fîg ə? À bɨrɨ zə ɨnû kyeŋ nɨ che mbɔ̂!” 51Yeso nyaʼa ghàm əne ghà əmbɨ mɨ̀mə̌d ni, “Mə ghà rəsìʼ ɨ nən ni mbə bɨrɨ zə ɨkaŋ əfìʼə mbɨ mbɨ̀aŋgɨrə̀ nɨə kɔʼə bə̀ swiʼə ɨgun ə Wan Wə̀d.”

Sélection en cours:

Jn 1: mgo

Surbrillance

Copier