Lukas 24

Yexus Sawv Huv Qhovtuag Rov Lug

(Mathais 28:1-10; Malakaus 16:1-8; Yauhaas 20:1-10)

1Nubkaaj thaus kaajntug txoog, cov quaspuj txawm nqaa tej tshuaj tswqaab kws puab tub npaaj tau lawm coj moog tom lub qhovntxaa. 2Puab pum dlaim laagzeb kws npug lub rooj ntxaas tub dlov rua ibcaag lawm, 3puab txawm nkaag moog rua huv, tabsis tsi pum Tswv Yexus lub cev lawm. 4Thaus puab tseem xaav tsi thoob txug tej nuav, taamsim ntawd muaj ob tug txivneej kws naav rigtsho ci ntsaa-ab lug sawv ntawm puab ib saab. 5Cov quaspuj ntawd ntshai kawg le, puab txhaj nyo taubhau rua huv aav, tabsis ob tug txivneej ntawd has rua puab tas, “Ua lecaag mej txhaj nrhav tug tuabneeg caj huv cov tuabneeg tuag? 6Nwg tsi nyob ntawm nuav; Nwg tub sawv lug lawm! Ncuntsoov tej lug kws Nwg tau has rua mej thaus Nwg tseem nyob rua peg Kalilais: #Math 16:21; 17:22-23; 20:18-19; Malak 8:31; 9:31; 10:33-34; Lukas 9:22; 18:31-33 7‘Tuabneeg Leejtub yuav raug nteg coj moog rua cov tuabneeg txhum muab ntsa rua sau ntoo khaublig, hab nub thib peb, Nwg yuav sawv rovqaab lug.’ ”

8Cov quaspuj ntawd txawm ncudlheev txug Yexus tej lug, 9tes puab txhaj tawm huv lub qhovntxaa rov lug qha tej ntawd rua kaum-ib tug thwjtim hab rua txhua tug kws nrug puab nyob. 10Cov quaspuj kws pav tej xwmtxheej nuav rua cov timthawj yog Malis Madalas, Yau-aanas, Malis kws yog Yakaunpaus nam, hab lwmtug quaspuj kws nrug puab nyob ntawd. 11Tabsis cov timthawj xaav tas tej kws cov quaspuj ntawd has tsi muaj qaabhau dlaabtsi, puab txhaj tsi ntseeg cov quaspuj ntawd. 12Tabsis Petus cale sawvtseeg dlha moog rua tom lub qhovntxaa; nwg nyo ntshis moog xauj, uacav tsi pum dlaabtsi le, tsuas pum cov ntaub kws qhwv Yexus lub cev nyob huv xwb. Tes nwg txawm rovqaab lug tsev hab xaav tsi thoob rua tej kws nwg pum ntawd.#24:12: Tej phoo ntawv qub kws xuas teg sau, tsi muaj nqai 12.

Taug Kev Moog Peg Lub Zog Ema-us

(Malakaus 16:12-13)

13Tuabnub ntawd muaj ob tug thwjtim taabtom taug kev moog rua peg lub zog Ema-us kws nyob nrug dleb ntawm lub nroog Yeluxalees kwvlaam le 11 kilumev. 14Obtug tseem taabtom sisthaam txug tej xwmtxheej kws tau muaj lug. 15Thaus obtug tseem sisthaam hab sisnug, Yexus txawm txaav zog lug nrug obtug taug kev; 16obtug yeej pum Nwg, tabsis sov yog uacaag obtug cim tsi tau Nwg le. 17Yexus nug obtug has tas, “Meb pheej thaam txug dlaabtsi taug kev?”

Obtug txawm nreg ua ntsejmuag mluagmlob. 18Muaj ib tug kws hu ua Khle-upas, txawm nug Yexus has tas, “Tshuav koj tuableeg kws nyob huv lub nroog Yeluxalees nuav txhajle tsi tau paub txug tej xwm kws nyavnyuas muaj tau ob-peb nubnua xwb lov?”

19Yexus nug has tas, “Tej ntawd yog dlaabtsi?”

Obtug teb tas, “Tej ntawd yog tej xwm kws tau lug raug rua Yexus kws yog tuabneeg Naxalev ntaag. Nwg yog ib tug xwbfwb cev Vaajtswv lug; Vaajtswv hab tej tuabneeg suavdlawg puavleej pum tas Nwg tej lug muaj fwjchim hab Nwg ua tau tej txujci tseemceeb. 20Peb cov thawj povthawj hlub hab cov numtswv tau muab Nwg rautxim tuag, hab muab Nwg ntsa rua sau ntoo khaublig. 21Peb tub casab has tas Nwg yog tug kws yuav lug tso cov Yixalayees ntaag! Tsi taag le ntawd xwb, tej xwm ntawd tub muaj tau peb nub rua nubnua lawm.

22“Cov quaspuj kws nyob rua huv peb paab, muaj qeeleej tau ua rua peb xaav tsi thoob le; thaus kaajntug txoog puab moog rua tom lub qhovntxaa, 23tabsis puab tsi pum Yexus lub cev lawm. Puab rov lug qha rua peb has tas puab tau pum timtswv ceebtsheej, hab cov timtswv ntawd tau qha rua puab has tas Yexus tub rov muaj sa lawm. 24Peb cov phoojywg muaj qeeleej tau moog saib kag lub qhovntxaa hab pum tas yeej muaj lawvle cov quaspuj ntawd has tag, tabsis puab tsi pum Yexus.”

25Tes Yexus has rua obtug tas, “Uacaag meb yuav ruag ualuaj le, hab uacaag meb tsi ntseeg tej kws cov xwbfwb cev Vaajtswv lug tau qha tseg lawm! 26Puas yog tug Mexiyas yeej yuavtsum raug tsimtxom hab tomqaab ntawd, Nwg yuav tau txais tug tshwjchim kws ci ntsaa-ab?” 27Yexus txawm qha txug tej kws Vaajtswv tej Lug tau has txug Nwg tugkheej, pib ntawm cov phoo ntawv kws Mauxes sau hab tej kws cov xwbfwb cev Vaajtswv lug txhua tug tau sau tseg lawm.

28Thaus puab moog ze lub zog kws puab yuav moog ntawd, Yexus txawm uatxuj ua le kws Nwg yuav moog kuas dlhau plawg. 29Tabsis obtug cheem heev-heev has tas, “Koj cale nrug wb su ntawm nuav xwb, ruaqhov tub yuav tsausntuj.” Tes Yexus txhaj moog nrug obtug su. 30Thaus Yexus nrug obtug nyob noj mov ntawm rooj, Nwg muab ib lub ncuav lug ua Vaajtswv tsaug hab muab faib rua obtug noj. 31Thaus ntawd, obtug lub qhovmuag txawm pumkev tseeb tuaj lawm, obtug txhaj paub tas yog Yexus, tabsis Yexus cale pluj ndlais ntawm obtug qhovmuag moog lawm. 32Obtug maamle sisthaam has tas, “Thaus peb taug kev tuaj, Nwg nrug wb thaam hab pav Vaajtswv tej Lug rua wb noog, mas yeej ua rua wb lub sab kublug cuag le suavtawg hlawv xwb puas yog?”

33Tes obtug txawm sawvtseeg taamsim ntawd rovqaab moog rua nraag lub nroog Yeluxalees. Obtug moog nrhav tau 11 tug thwjtim hab lwmtug kws tuaj nyob uake rua ntawd, 34puab tseem taabtom sisthaam has tas, “Tug Tswv tub sawv rov lug lawm tag-tag le! Nwg tub lug tshwm rua Ximoos pum lawm!”

35Obtug txhajle pav rua puab noog has tas thaus obtug taug kev moog ntawd muaj dlaabtsi tshwmsim, hab thaus Yexus muab ncuav ndlais faib rua obtug noj, obtug maam paub tas yog Yexus tag.

Yexus Lug Tshwm Rua Nwg Cov Thwjtim Pum

(Mathais 28:16-20; Malakaus 16:14-18; Yauhaas 20:19-23; Tegnum 1:6-8)

36Thaus obtug tseem taabtom pav txug tej nuav, taamsim ntawd tug Tswv txawm lug sawv huv plawv ntawm puab hab has rua puab tas, “Thov kuas mej tau zoo nyob kaajsab lug.”#24:36: Tej phoo ntawv qub kws xuas teg sau, tsi muaj hab has rua puab tas, “Thov kuas mej tau zoo nyob kaajsab lug.”

37Puab poobsab hab ntshai kawg, puab xaav tas yog puab pum dlaab. 38Tabsis Yexus has rua puab tas, “Mej ntshai ua dlaabtsi? Uacaag mej lub sab tseem ua xyemxyaav hab? 39Mej cale saib Kuv txhais teg hab Kuv txhais kutaw, mej txhajle paub tas yog Kuv tag. Mej cale cev teg lug xuas kag Kuv sub mej txhajle paub, ruaqhov dlaab tsi muaj nqaj tsi muaj txhaa le kws mej pum Kuv muaj nuav.”

40Thaus Yexus has le ntawd, Nwg txawm xyaab hlo Nwg txhais teg hab txhais kutaw rua puab saib.#24:40: Tej phoo ntawv qub kws xuas teg sau, tsi muaj nqai 40. 41Puab zoosab kawg hab xaav tsi thoob le, tabsis puab tseem tsi tau ntseeg tag; Yexus txhaj nug puab has tas, “Nyob ntawm nuav mej puas muaj dlaabtsi noj?” 42Puab txawm muab ib dlaim nqaj ntseg ci cev rua Yexus, 43tes Nwg txawm txais moog noj taabmeeg puab suavdlawg.

44Yexus has rua puab tas, “Tej nuav yog tej kws thaus Kuv tseem nrug mej nyob Kuv tub qha taag rua mej lawm has tas, txhua yaam kws sau txug Kuv nyob rua huv Mauxes tej Kevcai, huv tej kws cov xwbfwb cev Vaajtswv lug tau sau tseg, hab huv phoo Ntawv Nkauj, yeej yuavtsum tav xwb.”

45Tes Yexus txawm qheb puab lub sab kuas puab totaub Vaajtswv tej Lug, 46hab Nwg has rua puab tas, “Tub muaj lug sau tseg le nuav lawm has tas, tug Mexiyas yeej yuav raug kev tsimtxom hab peb nub tomqaab ntawd, Nwg yuav sawv huv qhovtuag rovqaab lug, 47txuj kev tso tej kev txhum tseg hab kev zaamtxim yuav raug qha ntawm Nwg lub npe moog rua txhua tsaav tuabneeg, pib huv lub nroog Yeluxalees moog. 48Mej yuavtsum ua timkhawv txug tej nuav rua suavdlawg paub. 49Kuv yeej yuav khaiv yaam kws Kuv Txiv tau coglug tseg lawm lug rua mej. Tabsis mej yuavtsum nyob huv lub nroog tog moog txug thaus kws mej tau txais lub fwjchim kws lug sau ntuj lug.” #Tegnum 1:4

Yexus Moog Sau Ntuj

(Malakaus 16:19-20; Tegnum 1:9-11)

50Yexus txawm coj puab tawm huv lub nroog Yeluxalees moog rua ntawm lub zog Npethanis. Nwg tau tsaa teg foom koobmoov rua puab. 51Thaus Nwg taabtom foom koobmoov rua puab ntawd, Vaajtswv txawm coj Nwg ncaim puab moog rua sau ntuj lawm.#24:51: Tej phoo ntawv qub kws xuas teg sau, tsi muaj moog rua sau ntuj lawm. #Tegnum 1:9-11 52Tes puab txawm pehawm Nwg hab rov moog rua huv nroog Yeluxalees nrug txuj kev zoosab kawg le. 53Puab najnub moog nyob huv lub Tuamtsev qhuas Vaajtswv.

Sélection en cours:

Lukas 24: HNJ2022

Surbrillance

Copier