San Mateo 7
7
Jesús otemachtij ika se xkitocaroua tetlajtlakolmakas
(Lc. 6.37-38,41-42)
1’Maka kaman xkintlajtlakolmakakan oksekimej, para Dios no xmechtlajtlakolmakas, 2pampa tla nemejuamej nentetlajtlakolmakaskej, Dios no mechtlajtlakolmakas. Niman on kech ika nentetlajtlakolmakaskej, Dios no ichkich mechtlajtlakomakas. 3¿Kenijki tej, ueli tikita on keski tlajtlakojli yejuan kichiua sen mokniu niman xtikita on miyek tlajtlakojli yejuan tejua tikchiua? 4Noso, ¿kenijki ueli tikijlia mokniu: “Ma nimitskajkaualti on keski tlajtlakojli”, ijkuak tejua tikpiya miyek tlajtlakojli? 5¡Omexayakyej! Achtopa xkajkaua on miyek tlajtlakojli yejuan tikpiya, niman ijki uelis tikajkaualtis mokniu on keski tlajtlakojli yejuan yejua kipiya.
6’On tlen chipauak maka xkinmakakan on tlakamej yejuan sanoyej* xkuajkualtin ipan inyojlo, pampa yejuamej ken chichimej yejuan nemopan uajnokuepaskej, niman mechkuajkuaskej. Niman on tlen ueyi kijtosneki maka xkinmakakan on tlakamej yejuan ken pitsomej, para maka yej ipan chojcholoskej.
Jesús otemachtij ika Dios kitemakas on tlen kitlajtlaniliskej
(Lc. 11.9-13; 6.31)
7’Xtlajtlanilikan Dios on tlen mechpoloua, niman yejua mechmakas. Xtejtemokan on tlen mechpoloua, niman nenkinextiskej. Xtetepinikan on tsakuiljyotl*, niman Dios mechtlapouilis. 8Ijkon xchiuakan, pampa yejuan kitlajtlani kiselia, niman yejuan kitejtemoua kinextia, niman yejuan kitetepinia on tsakuijlotl, kitlatlapouiliaj.
9’¿Tlen yakaj nemi nemotsajlan yejuan noyolchikauas para kimakas ikoneu sen tetl ijkuak kitlajtlanilis sen tlaxkajli? 10¿Noso kimakas sen kouatl ijkuak kitlajtlanilis sen michin? 11Aman tej, tla nemejuamej yejuan xnenkuajkualtin tlakamej nenkimatij ken nenkinmakaskej nemokoneuan on tlajtlamach* tlen kuajli, sanoyej pantlannestikaj ika nemoTajtsin iluikak chanej* mechmakas on tlen kuajli yejuan nenkitlajtlaniliskej.
12’Ijkon tej, xkinchiuilikan oksekimej on tlajtlamach* tlen nemejuamej nenkinekiskiaj ma mechchiuilikan, pampa nochi on itlanauatil Moisés niman nochi on yektlajkuilotin yejuan on tiotlajtojkej okijkuilojkej, yejua tlanauatia.
Jesús okixtij sen ejemplo itechkopa on ome ojtli
(Lc. 13.24)
13-14’Onkaj sen ojtli yejuan teuika ne miktlan kampa tetlajyouiltiloyan, niman okse yejuan teuika ne iluikak kampa onkaj nemilistli yejuan para nochipa. Ne kampa peua on ojtli yejuan teuika miktlan onkaj sen tsakuijlotl* yejuan patlauak, niman on ojtli no patlauak. Niman miyekej kalakij ipan on tsakuijlotl patlauak niman kinejnemij on ojtli patlauak. Pero pitstik on tsakuijlotl yejuan onkaj ne kampa peua on ojtli yejuan teuika ne kampa onkaj nemilistli, niman on ojtli pitsauak. On ojtli pitsauak ouijtikaj* para kinejnemij, niman xmiyekej kinextiaj on tsakuijlotl para ompa kalakiskej. Pero nemejuamej xkalakikan ipan on tsakuijlotl yejuan pitstik, niman xuiyan ipan on ojtli yejuan pitsauak.
Jesús otemachtij kenijki se uelis kixmatis on tlakatl yejuan kuajli temachtia itlajtol Dios
(Lc. 6.43-44)
15’Xpiyakan cuidado de on tlakajkayajkej tiotlajtojkej yejuan kijtouaj tenojnotsaj ikan itemachtil Dios. Yejuamej uajlauij nemotech, niman nesij ken kuajli tlakamej, pero kinekij kixoxotoniskej nemotlaneltok. 16Nemejuamej uelis nenkintaskej tla tlakajkayajkej noso ka ika on tlen kichiuaj. Tej, xkaman noteki uvas ipan on uitskojtin, nion higos ipan on xikojuitstin. 17Ijkon tej, nochi tlen kuajli kojtlakijlotl kipiya kuajli itlakyo, niman nochi tlen xkuajli kojtlakijlotl kipiya xkuajli itlakyo. 18On kuajli kojtlakijlotl xuelis kipiyas xkuajli itlakyo, nion on xkuajli kojtlakijlotl xuelis kipiyas kuajli itlakyo. 19Niman nochi kojtlakijlotl yejuan xkuajli kipiya itlakyo, kitsontekij niman kitlatiaj. 20Yejua ika tej, uelis nenkintaskej tla tlakajkayajkej noso ka ika on tlen kichiuaj.
Jesús otemachtij ika xnochimej ueliskej kalakiskej ne iluikak kampa Dios tlamandaroua
(Lc. 13.25-27)
21’Xnochimej on yejuan nechijliaj: “NoTEKO, noTEKO”, kalakiskej ne kampa noTajtsin iluikak chanej* tlamandaroua, yej san yejuamej on yejuan kichiuaj on tlen kineki noTajtsin iluikak chanej. 22Ijkuak yejkos on tonajli para Dios kitlaxtlauilis nochi tlakatl, miyekej nechijliskej: “NoTEKO, noTEKO, tejuamej otitemachtijkej ikan motokatsin, niman ikan motlanauatil otiktekixtilijkej on xkuajkualtin espíritus, niman ikan motokatsin otikchijkej miyek milagros.” 23Pero ijkuakon nikimijlis: “Xkaman onemechixmat. Xnechtlalkauikan nemejuamej yejuan nenkichiuaj on tlen xkuajli.”
Jesús otemachtij itechkopa on ome kajli
(Lc. 6.47-49; Mr. 1.22)
24’Nochimej on yejuan nechkakij niman kichiuaj on tlen nejua nikijtoua, yejuamej ken on tlakatl tlajmatki yejuan okichijchiu ikal ipan sen ueyi tetl yejuan chikauak. 25Opeu kiaui chikauak, ouejueyiyakej on ríos, niman temojtij oajakak ipan on kajli. Pero on kajli xouets, pampa ipeuyan on kajli onkatka ipan on ueyi tetl. 26Pero nochimej on yejuan nechkakij niman xkichiuaj on tlen nejua nikijtoua, yejuamej ken sen tlakatl on xtlajmatki yejuan okichijchiu ikal ipan xajli. 27Opeu kiaui chikauak, ouejueyiyakej on ríos, niman temojtij oajakak ipan on kajli. On kajli ouets, niman sanoyej temojtij ken oxoxoton.
Jesús otemachtij xken on temachtijkej ikan tlanauatijli
28Jesús otlan tlajtlajtoua niman on tojlamej sanoyej pakatlachayaj ika on tlen yejua kinmijliaya, 29pampa yejua temachtiaya ikan ipoder Dios, niman xijki ken on temachtijkej ikan tlanauatijli.
Sélection en cours:
San Mateo 7: nguNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 1987, 2012 Wycliffe Bible Translators, Inc. All rights reserved.