Zhan 11

Lazarɛ̀n wú vra

1Ɔwrɔn tɔ̀n ye bi nɛ̀n Lazarɛ̀n, bore ɛnlɔẅiɛ mɛ̀n. Nɛ̀n dú Betani anmàn wrɔn, anmàn léyi Mari mán nɛ́n muan-ẅì ɛnnyɔnwrɔn Martɛ̀n mɛhi ndù nɔn. 2(Mari dú ɛnnyɔnwrɔn ndɔ léyi, ku Zhezü ɛnshi-ban annan, kɩ bɩ́ n'ɛnkruẅie worɛn nɔn, nɛ́n muan-ẅì de dú Lazarɛ̀n léyi ɛnlɔẅie kɛ dà nɔn.) 3Wúyɔ̀ anhyrɛ̀ lɔ wá ɔwrɔn tɔ̀n ɔkɔhɔ̀n kɛ dɔ́ Zhezü le: “Ɛẅɛnwrɔn, ɛnyran-anvrɛn ɛnlɔẅiɛ kɛ dà.” 4Ɛnvra léyi Zhezü yá ɛmɛẅi ankà ndɔ lɔ nɔn, nɛ dɔ̀ le: “Lazarɛ̀n lɔẅiɛ lɔ ke sɩ̀ hán nɛ̀n nɛ̀n wù; nɛ lɛ hán tán, yɔ kán Ɔwɔ kɔrɛ̀srɔn ci-zrɔ lɔ, kɩ ne le yé Ɔwɔ Ẅì ci-zrɔ lɔ.” 5Zhezü kɛ cüɛn Martɛ̀n mán nɛ́n muan-ẅì Mari ɔmu zri lɔ de dú Lazarɛ̀n mán nɔn. 6Ɛnvra léyi nɛ̀n yá Lazarɛ̀n lɔẅiɛ mùan nɔn, nɛ̀n yɛ́ ɛbi anhyrɛ̀ ɛyri léyi nɛ̀n dù nɔn, 7zɛtɛn nɛ dɔ́ n'ɛsɛnkɛn-bɔ̀ lɔ le: “Bɔ vru ɛmɛẅi bɔ̀ hɔ́n Zhüde kpɔsɔ wú.” 8N'ɛsɛnkɛn-bɔ̀ mrɛ́n nɛ̀n ɔmùan le: “Ankà-yé-wrɔn, kɛ vá mɔɛ̀n, de nanvrɛn lɔ, ye ji yɛ srɔan mɛ́n ɛbù ye wri mɛ́n, kɩ e ji è vru ɛmɛẅi ɛ̀ hɔ́n nanvrɛn lɔa?” 9Zhezü kɛ dɔ́ yɔ le: “Ɛnbì zri mɛ̀n lɔ, wacɛ̀n granmɛ̀n ɛvà anhyrɛ̀ de ndù nɔn, ke sɩ̀ dù hiɛ? Ke dú kɛ ɔwrɔn kɛ nán esù ɛcɛ̀n, eci ke sɩ̀ sɔ́n nɛ̀n ɛnan, ɔmuhi nɛ kán ɛnhibù ndɔ lɔ n'ɛyri-kàn nɔn. 10Tɛ́n, ke dú kɛ ɔwrɔn kɛ nán esù ɛnnyran, eci kɛ lɛ sɔ́n nɛ̀n ɛnan, ɔmuhi ɛyri-kàn badá nɛ̀n ɛmɛ̀n nɔn.” 11Zhezü dɔ́ yɔ ankà ndɔ lɔ, zɛtɛn vru kɛ dɔ̀ le: “Bɔ nyran-anvrɛn Lazarɛ̀n ɛndà nwrì, tɛ́n mɛ lɛ hɔ̀n mɛ́n fri nɛ̀n.” 12N'ɛsɛnkɛn-bɔ̀ lɔ mrɛ́n ɔmùan le: “Ɛẅɛnwrɔn, ke dú kɛ ɛndà wri nɛ̀n hô, nɛ lɛ kɔrɛ̀.” 13Zhezü ke ji kɛ dɔ̀ le Lazarɛ̀n nwù, tɛ́n n'ɛsɛnkɛn-bɔ̀ tro le ɛndà-ẅì cehɛ́n ankà de nɛ dɔ̀ nɔn. 14Zɛtɛn Zhezü kɛ dɔ́ yɔ kpété le: “Lazarɛ̀n nwù. 15Pɔpüɛ̀ kɛ brá mɛ̀n nyɛ kruhú, ɔmuhi mɛ̀n sɩ̀ dù nanvrɛn, kɩ ɔmu lɔ de nyɛ́n le bí m'ankà nyɛ́n tán ankaẅì nɔn. Tɛ́n, bɔ̀ hɔ́n nɛ̀n ɛtɛsɛ̀n.” 16Zɛtɛn Toma (léyi ye bi ɛshre-ẅì nɔn) kɛ dɔ́ nɛ́n nyran hɔ̀n le: “Bɔ́ mán bɔ̀ hɔ̀n, ô bɔ̀ cɔ́ ankà-yé-wrɔn mɛhi bɔ̀ wù!”

Zhezü dú owúemɛ̀n-dù-frɔ́ mán ɛwúvà-kɔrɛ̀

17Ɛnvra léyi Zhezü bru nɔn, nɛ́n cɔ̀ nɛ́n nyrì le yɛ wá Lazarɛ̀n ezhe-nànmàn mɛ̀n ɛbi anzɔ̀ vacì. 18Betani dú Zherüzalɛmɛ̀n tɛsɛ̀n, yɛ nán ɛsù anhɛ́-kɔrɛ̀ tɛ̀bru-kru-anhɔ̀n kɩ ye bru nanvrɛn; 19Zhüifɛ̀n-bɔ̀ bobrebe hɔ́n Martɛ̀n mán Mari ɛnyan-yri, ô kè bi ɛnbɔrɛ kɛ̀ wá yɔ Lazarɛ̀n wù lɔ kruhú. 20Ɛnvra léyi Martɛ̀n yá le Zhezü dù kɛ và nɔn, nɛ̀n hɔ́n yi ɛsù; Mari tɛn yɛ́ ɛbemɛ̀n. 21Martɛ̀n kɛ dɔ́ Zhezü le: “Ɛẅɛnwrɔn, ke dú kɛ è dú ɛnu lɔ hô, nmàn-ẅì ke sɩ̀ wùɛ. 22Tɛ́n, mɛ̀n nyri ɔmu le zɛtɛ̀ lɔ mán, Ɔwɔ kɛ lɛ tán mɛ́n eci lɔ fɛn léyi ɛ lɛ sán nɛ̀n nɔn.” 23Zhezü kɛ dɔ́ nɛ̀n le: “Ɔmùan-ẅì ke le vru kɛ vá ɔkɔrɛ-bɔ̀ mɛ̀n.” 24Martɛ̀n mrɛ́n ɔmùan le: “Mɛ̀n nyri ɔmu le ne le dú owúemɛ̀n nɛ lɛ frɔ́ ɛmɛẅi trɔ bì lɔ.” 25Zhezü kɛ dɔ́ nɛ̀n le: “Mɛ̀n dú owúemɛ̀n-dù-frɔ mán ɛwúvà-kɔrɛ̀. Ɔwrɔn léyi ke bú m'ankà kɛ tán ankaẅì nɔn, ne le dú ɔkɔrɛ-bɔ̀ mɛ̀n ke dú kɛ ne wù mán; 26kɩ ɔwrɔn léyi dú ɔkɔrɛ-bɔ̀ mɛ̀n kɩ ke bú m'ankà kɛ tán ankaẅì nɔn nɛ́n sɩ̀ wú mrìmrì. Ndɔ lɔ mán e bútan ankaẅìɛ?” 27“Hɛ̀ɛ̀, Ɛẅɛnwrɔn, me bútan le è dú Ebɩ̀die-wrɔn, Ɔwɔ Ẅì léyi ke ji le kɛ̀ vá ɛnhibù wú nɔn.”

Zhezü ke wú-eyú

28Ɛnvra léyi yɔ dɔ́ ankà ɔmu lɔ trɔ nɔn, Martɛ̀n hɔ́n bi Mari kɩ kɛ dɔ́ nɛ̀n ɛshre mɛ̀n le: “Ankà-yé-wrɔn vá dù, ne bi mɛ́n ɛ̀ và.” 29Ɛnvra léyi Mari yá ankà léyi Martɛ̀n ndɔ nɔn, nɛ̀n tɔhú kpràkprà nɛ́n hɔ̀n cɔ́ Zhezü. 30Zhezü kɛ vá bru anmàn, tɛ́n nɛ̀n dú ɛyri léyi Martɛ̀n srɔ́n nɛ̀n ɛsù nɔn. 31Ɛnvra léyi Zhüifɛ̀n-bɔ̀ léyi hɔ́n Mari ɛnyan-yri, kán nɛ̀n nɛ̀n tɔhú nɛ̀n srɔ ɛntrɛ nɔn, yɔ mán yɔ tɔhú yɔ kɛ́n nɛ̀n ɛsɛ̀n. Yɔ trɔ le Mari kɛ hɔ́n ɛnnanmàn-kru wú ke wú-eyú. 32Ɛnvra léyi Mari cɔ́ ɛyri léyi Zhezü nyɔn kɩ nɛ̀n kán yi nɔn, nɛ̀n bore Zhezü annan tɛ̀sɛ̀n kɩ nɛ dɔ́ yi le: “Ɛẅɛnwrɔn, ke dú kɛ è dú ɛnu lɔ hô, nmàn-ẅì ke sɩ́ wúɛ.” 33Zhezü kán ɔmu le Mari ke wú-eyú kɩ Zhüifɛ̀n-bɔ̀ léyi kɛ́n nɛ̀n ɛsɛ̀n nvà nɔn mán ke wú-eyú. Ɛnhyɔ̀bɔ̀ cɔ́ nɛ̀n, kɩ nɛ̀n dú gbɔ̀gbɔ̀ mɛ̀n, 34kɩ ne yrɛ yɔ le: “Tɛyri de nyɛ́n wá nɛ̀n ɛnhibɩ́ nɛ́n?” Yɔ mrɛ́n ɔmùan le: “Ɛẅɛnwrɔn, và kɩ ɛ lɛ kàn.” 35Zhezü wú-eyú. 36Zɛtɛn Zhüifɛ̀n-bɔ̀ kɛ dɔ̀ le: “Nyɛ́n nyan ɔmu le nɛ̀n cüɛn yi nɔn!” 37Tɛ́n y'ɛmɛ̀n lɔ, Zhüifɛ̀n-bɔ̀ jan kɛ dɔ̀ le: “Nɛ́n léyi nɛ̀n gbɛ́ anvɛ̀-bɔyɛ-wrɔn lɔ anvɛ̀ nɔn, nɛ́n sɩ̀ hán ô Lazarɛ̀n mán ke bɩ́ wúɛ?”

Lazarɛ̀n vru vá ɔkɔrɛ-bɔ̀ mɛ̀n

38Zhezü vru dú oboto mɛ̀n kɩ hɔ́n ɛnnanmàn-kru wú. Obù rokò de yɛ vá obù vri tɔ̀n ɔmùan yɛ hɛ́n nɔn. 39Zhezü kɛ dɔ́ yɔ: nyɛ́n mrɛ́n obù lɔ nyɛ́n sɔhɔ́ ɛnnànmàn mùan. Martɛ̀n, Lazarɛ̀n nɛ́n muan-ẅì kɛ dɔ́ Zhezü le: “Ɛẅɛnwrɔn, me butan le nɛ̀n bukru nɛ fɔ̀n, ɔmuhi ɛbi anzɔ̀ de nɛ̀n dú ɛnnanmàn mɛ̀n nɔn.” 40Zhezü mrɛ́n nɛ̀n ɔmùan le: “Mɛ̀n sɩ̀ dɔ̀ mɛ́n le, ke dú kɛ e bútan ankaẅì hô, ɛ lɛ kán Ɔwɔ ci-zrɔ lɔa?” 41Zɛtɛn yɛ mrɛ́n obù lɔ yɛ sɔhɔ́. Zhezü sɩ́ anvɛ̀ ɛwú kɩ kɛ dɔ̀ le: “Dade mɛ tán mɛ́n ɔkùɛn, ɔmuhi è die mɛ̀n nukùɛ nɔn. 42Mɛ̀n nyri ɔmu le e die mɛ̀n nukù ɛnvra lɔ fɛn, tɛ́n mɛ dɔ́ ɔmu lɔ, anwrɔn hɔ̀n léyi gbrɛnkɛn mɛ̀n ɔmùan nɔn, yɔ kruhú, ô yɔ bùtan ankàẅì le vɛn de ɛ̀ wá mɛ̀n ɔkɔ̀hɔ̀n nɔn.” 43Ɛnvra léyi nɛ̀n dɔ́ ankà ndɔ hɔ̀n lɔ trɔ nɔn, nɛ̀n dí nkù esùva cüìcüemɛ̀n le: “Lazarɛ̀n dù nanvrɛn srɔ ɛntrɛ!” 44Owú-wrɔn lɔ srɔ ɛntrɛ, annan mán ankɔrɛ̀ dú anhɛ́ mɛ̀n, eci vá nɛ̀n ezì. Zhezü kɛ dɔ́ yɔ le: “Nyɛ́n gbɔrɔ nɛ̀n anhɛ́, ô nyɛ́n teze nɛ̀n, nɛ̀n hɔ̀n.”

Zhüifɛ̀n-bɔ̀ ẅɛn ɔmùankrɔn, ô ye wri Zhezü

(Nyɛ́n nyan Matie 26:1-5; Markɛ̀n 14:1-2; mán Lükɛ̀n 22:1-2 wrú lɔ mɛ̀n)

45Zhüifɛ̀n-bɔ̀ bobrebe, yɔ hɔ̀n léyi vá Mari nanvrɛn, hɩ kán eci léyi Zhezü hán nɔn, yɔ bú n'ankà yɔ tán ankaẅì. 46Tɛ́n ɛnjanbɔ̀ hɔ́n cɔ́ Ɔwɔ-nyanmàn-sùva-wá-bɔ̀ kɩ kɛ dɔ́ yɔ eci léyi Zhezü hán nɔn. 47Ɔwɔ-nyanmàn-sùva-wá-bɔ̀ mán Ɔwɔ-cice-bɔ̀ cüìcüì bɔrɛ ankà-dɔ̀-trɔ-bɔ̀ ɛkru kɩ kɛ dɔ̀ le: “Ecitan de bɔ́ lɛ hán nɛ́n? Ɔmuhi ɔwrɔn ndɔ lɔ kɛ hán anvɛmɛ̀n-frɛ́n-ci bobrebe nɔn! 48Ke dú kɛ bɔ́ teze nɛ̀n nɛ hán ɔmu lɔ hô, anwrɔn lɔ fɛn ke le bú n'ankà kɛ̀ tán ankaẅì, zɛtɛn Rɔmɛ̀n anmàn cüìcüì-bɔ̀ ke le cí nɛ̀n ɛmɛẅi, kɩ yɔ lɛ jrɛ́ Ɔwɔ-cice-wɔ́n mán bɔ́ ɛnhi wú anmàn lɔ!” 49Y'ɛmɛ̀n lɔ, ɔwrɔn tɔ̀n ye bí nɛ̀n Kahifɛ̀n, nɛ̀n dú Ɔwɔ-cice-wrɔn cüìcüì ɛnnanwàn ndɔ lɔ mɛ̀n, kɩ nɛ dɔ́ yɔ le: “Nyɛ́n sɩ́ cɔ́ hɩ mɛ̀n nyɛ́n yá! 50Nyɛ́n sɩ́ cɔ́ yá ankà zriɛmɛ́n, nyɛ́n sɩ́ nyri ɔmu le, zrɔ tán le ny'anvrɛn kruhú, ɔwrɔn tɔ̀n kè wú fɛcüè kruhú, ô ɔmu lɔ, bɔ́ ɛnhi wú anmàn lɔ ke bɩ́ jrɛ́a?” 51Ankà ndɔ lɔ Kahifɛ̀n ndɔ nɔn, kè sɩ̀ dù n'ɛnkruemɛ̀n ankà, tɛ́n ɔmuhi nɛ́n dú Ɔwɔ-cice-wrɔn cüìcüì ɛnnanwàn ndɔ lɔ mɛ̀n nɔn, nɛ dɔ́ Ɔwɔ mùanwú ankà le: Ke ji le Zhezü kè wú Zhüifɛ̀n-bɔ̀ hi-wú anmàn kruhú, 52kɩ kè sɩ̀ dù ɛnhi wú anmàn ndɔ lɔ zri kruhú, tɛ́n ke ji le yɛ bɔrɛ Ɔwɔ ẅì hɔ̀n lɔ fɛ̀n léyi bonyi ɛnhibù wú nɔn ɛkru edùwrú zriemɛ̀n.

53Ɛnvra ndɔ lɔ mɛ̀n, Zhüifɛ̀n-bɔ̀ cüìcüì wá tán le yɔ hán Zhezü kè wù. 54Hɩ le kruhú de Zhezü ke sɩ̀ srɔ fɛcüè wanzi Zhüifɛ̀n-bɔ̀ mɛ̀n hɔ́n kɩ ke vru kɛ vá kɛ. Nɛ̀n hɔ́n ɔkpɔsɔ nyantɛn wú léyi dú ɛnnuwì tɛsɛ́n nɔn, ɛyri léyi ye bi Efrahimɛ̀n nɔn, nanvrɛn lɔ de nɛ́n mán n'ɛsɛnkɛn-bɔ̀ mɛhi yɔ yɛ́ nɔn.

55Zhüifɛ̀n-bɔ̀ koran bì léyi ye bi abutùkumɛn-kɔ́ nyanmán-bì nɔn, kɛ́n eburi, kɩ anmàn-hi wú anwrɔn bobrebe kɛ hɔ́n Zherüzalɛmɛ̀n ke fi y'edomɛ̀n yakɛ ɔkoran bì kɛ̀ cɔ̀. 56Anwrɔn ke ji Zhezü kɩ zɛtɛn Zhezü dú Ɔwɔ-cice-wɔn lɔ mɛ̀n, kɩ yɔ yrɛ y'edomɛ̀n le: “Anwɔntan nyɛ hán tro hɛ̀? Nɛ lɛ vá ɔkoran mɛ̀n kale nɛ́n sɩ̀ vàà?” 57Ɔwɔ-cice-bɔ̀ cüìcüì mán Ɔwɔ-nyanmàn-sùva-wa-bɔ̀ wá tán le, ke dú kɛ ɔwrɔn nyri ɛyri léyi Zhezü dù nɔn, nɛ̀n hán tán yɔ nyrì, ô yɔ cɔ́ nɛ̀n ɛẅɛn yri.

Sélection en cours:

Zhan 11: ƐAA03

Surbrillance

Copier