Sion 4

Iesu rie lati min ahin tai ten out Sameria keke kei vi Mesaea

1En avong enek, longlongien va rokol Farasi keil keke meatin houlu amusil Iesu mulin koa amusil Sion. Ka alonge emun keke Asuv Iesu vi baptaes en houlu en keil.#Sion 3:22,26 2Ka koanek rovitei anatin veni rovitei Iesu koa vi baptaes en keil, vi meatin keil onen koa amumoni. 3Ka navong Iesu long kilea keke Farasi keil alonglong usil umen koa mumoni, lokovein provins ten out Sudea, ka va ris en provins ten out Kaleli.#4:3 Iesu lei kilea keke Farasi keil avi elu kati, ka en rovattei veah keke vasel vatal min keil. Sakini, va mum en provins sav ten out Kaleli.

4En sise one avaha en out Kaleli, Iesu ka onen keil aka pas provins ten out Sameria koa mul luhu en provins keilu ekek.#Mat 10:5; Luk 9:52; 17:11 5Ka navong amual uva, arokol taon tai en out Sameria, isen Saekar. Saekar mul vesesal en vulioai tai koa Siekob kili ka sani min natnali koa Siosep telamu.#Sen 33:19; 48:22; Sos 24:32 6En taviai, Iesu ka meatin keil onen arokol vulioai onen Siekob enek. Iesu longe aven mah, ka rondan museh vesesal veni.#Sion 4:12 7-8Navong Iesu mul museh, meatin keil onen uva en taon keke avalekat anien ae. Rovitei tuetin, ahin tai ten out Sameria emai keke vaseh oai. Navong rokol vulvul enek, Iesu visi vit, “San tei oai eli minau mamuni.”

9 Ka ahin enek vit kesi vit, “Keik kovi Siu tai ka inau navi ahin Sameria. Ka Siu keil asakras avaanian vituai en pelet vatas vuo avamun vituai en kap vatas vatal min komai. ?Sakini, vensa varei komul kovis nau keke masan tei oai minuk kovamuni?”#Esra 4:3; 9:1—10:44; Luk 9:52-53

10Iesu vit kesi vit, “Koreingeingen asa koa Ahi vit vasani minuk. Ka koreingeingeni keke inau koa navisuk en oai navi isei. Veni munak kovailea eni, kovahis inau keke masan oai ten moulien minuk. Ka inau masani minuk.”#Sion 4:26; 7:37-38; Rev 21:6; 22:17

11Ahin enek viteni mini vit, “Ka asuv, veioai onom tovuol, ka vulvul enek tetaveah, oai teni mul netan vis netan. ?Kiseh oai ten moulien enek en out kave? 12?Mukave? ?Oai koa kovit usili tahos imok mulin oai enek? Veni avu Siekob varei san vulvul ten oai enek min komai. Ka vi oai enek koa kei muni, natnali keil amuni, ka buluk ka sipsip keil osen emun amuni. ?Mukave, komul kovit kovi hetetamen imok mulin avu Siekob?”#Sion 8:53

13Iesu vit risi mini vit, “Koakeil vasi amul amun oai enek, maroro heat ris keil. 14Ka koakeil imun oai koa nisani min keil maroro herkattei mun keil. Oai koa nisani min keil hemai hehi oaisal tai koa houe en tine neim ka hesakin keil imoul lisenges.”#Sion 6:35; 7:38

15Ahin enek viteni mini vit, “!Asuv, san tei li oai enek minau! Hemukonek, maroro herkattei mun inau, ka nirmualtei mun nimai ekonek en avong vasi keke maseh oai.”

16Iesu viteni mini vit, “Kiha, kihise meatin onom, ka milhemai ris.”

17Kei vit, “Meatin onak tovuol.”

Ka Iesu vit risi vit, “Keik koviteni anatin navong kovit meatin onom tovuol. 18Veni kokur meatin elim (5) tuai ka kortetalihetei mun vatal min keil. Ka meatin koa koro vituai ral mini kosa, kortetalihetei vatal mini. Sakini, asa koa koviteni minau anatin.”

19Navong ahin enek longe mukok, mutimanin ka viteni vit, “Asuv, nalesi keke keik kovi provet tai.#Mat 21:46; Sion 7:40; 9:17 20?Sakini kihit kilea minau, out kave varei mal keke meatin keil iha netan min Ahi eni? Veni avu keil telamu onomai, me-Sameria keil, uva netan min Ahi en Vatihou Kerasim ekek. Ka kami, Siu keil, miviteni keke out Serusalem vi out koa mal rovaha netan min Ahi eni.”#Dut 11:29; Sos 8:33; Dut 12:5-14; Sam 122:1-5

21Iesu viteni mini vit, “Naviteni anatin minuk, avong tai hemai koa hervitei tounah tai munak kiha netan min Ahi Tamer en vatihou koanik vuo en out Serusalem vuo en out sav tai. 22Kami, me-Sameria keil, miva netan min Ahi, ka mirkilea revitei kei.#4:22 Me-Sameria keil amusil tus elim koa Mosis mutisi, ka tus sav keil koa mul en Tus Votut arkurtei anatin en keil. Sakini, arkilea revitei Ahi. Ka komai, Siu keil, meva netan min Ahi ka mekilea eni. Veni Ahi san hatkatien min Siu keil keke hesan Mesaea onen hemai, kei koa houtut meatin vasi keil.#Aes 2:3; Rom 9:3-4 23Ka avong tai mul mai keke koakeil avi anatin en Ahi Tata iha netan mini hetal min keihoen onen Ninin Votut ka housil sakien koa vi anatin. Ka avong koanek mai tuai. Ka Ahi mul lekat vati meatin keil koa amukonek keke uva netan mini. 24Ahi rokurtei aven vasuval ir, kei vi ninin. Sakini, koakeil uva netan mini umoni hetal min keihoen onen Ninin Votut ka housil sakien koa vi anatin.”#2Kor 3:17; Plp 3:3

25Ahin enek viteni mini vit, “Nakilea keke Ahi vat kati keke hesan Mesaea onen hemai. Ka navong hemai, hehit kilea tounah vasi min ir keke reheilea eni.”#Sion 1:41; 14:26

26Iesu vit risi vit, “Inau koa namul naselus minuk, inau navi kei.”#4:26 Vahesa selusien enek vahit, “inau NAVI,” koa vi ‘Iahova,’ isen kati onen Ahi (Eks 3:14). #Mak 14:61-62; Sion 9:37

27En hati avong enek, meatin keil onen Iesu umai ris, ka amutimanin houlu navong alesi keke Iesu mul selus ral min ahin tai veni romusiltei sakien keil one. Ka tovuol en keil vahis ahin vahit, “?Em vat sa?” Vuo avahis Iesu avahit, “?Vensa varei komul koselus ral min ahin ekek?”

28Evus, ahin enek lokovein veioai onen mules, va ris en taon, ka vise meatin keil umai vit, 29“!Almai alles meatin koa vit luvat tounah vasi koa namumoni en moulien onak! Vahesa kei vi Mesaea koa Ahi vat kati vit hesani hemai.”#Mat 12:23; Sion 7:26 30Sakini, alokovein taon ka uva ven Iesu.

31Navong ahin enek mul semau en taon, meatin keil onen Iesu aviteni mini avit, “Tiser, kian vis tei mau anien ekek.”

32Ka kei vit risi vit, “Inau nian anien tai koa kami mireingeingeni.”

33Navong alonge mukok, meatin onen keil amul avis ris keil avit, “?Mukave? ?Meatin etai kur anien mai veni tuai?”

34Sakini, Iesu viteni min keil vit, “Navong namul namusil rendemien onen Ahi koa sila nau numai keke num vasi en umen onen, nalonge suval nakanian tuai.#Sion 5:30; 6:38; 5:36; 17:4 35Meatin keil amul avit, ‘Avati hehat (4) heha heli, ka rehesuhut en anien keil oser.’ Ka inau naviteni min kami, mihelele revi hekarahit en ah osen Ahi. Anien teni men revi tuai keke rovasuhut eni.#Mat 9:37; Luk 10:2 36Ka koakeil vasi amul amusuhut en anien teni, Ahi mul ling revi ui umen one. Ka anien enek vi meatin keil koa amul akur moulien ten lisenges. Hesakini, koakeil aluh utite ten selusien onen Ahi en moulien onen meatin keil ka koakeil amul amusuhut en anien teni, keil vasi isi keil ven asa koa amumoni. 37Koanek suval selusien ten meteisauen tai koa vit, ‘Meatin tai luh ah tai, ka meatin sav mul musuhut eni.’#Maek 6:15 38Inau nasila kami keke mivasuhut en anien ten ah tai koa meatin sav keil uva amum ien mulamu en kami. Ka vi kami koa miheles uite ten umen one.”

39Navong Iesu mul veah selus ral min meatin keil onen, me-Sameria keil houlu aka en taon umai. Umai ka akur anatin keke vi Mesaea veni along selusien onen ahin koa vit, “!Almai alles meatin koa vit luvat tounah vasi koa namumoni en moulien onak!” 40Sakini, navong umai veni, apeah Iesu keke vato vatal min keil. Sakini, Iesu ka meatin keil onen aro ral min keil avong elu mun. 41Navong me-Sameria keil along selusien keil onen Iesu, keil houlu emun akur anatin eni keke vi Mesaea. 42Sakini, uva aviten min ahin avit, “Mulamu, komai mekur anatin eni musil asa koa keik koviteni. Ka kosa, mekur anatin eni keke kei vi Mesaea anatin koa houtut meatin vasi keil ten out netan veni melong selusien onen en ralingomai varei.”#1Sion 4:14

43-44Koanek suval koa Iesu varei viteni vit, “Provet tai, avaseini meatin sav keil avouhou mini, meatin keil ten kantri kati onen arvouhoutei mini.” Ka navong ro ral min keil avong elu evus, Iesu ka meatin keil onen uva suk en provins ten out Kaleli.#Sion 4:40

Iesu kulat mesaien ran titan hetetamen tai ten kavmen

45Navong Iesu rokol provins ten out Kaleli, meatin houlu ten out enek akur revi. Houlu en keil umai ris ran Anien ten Mul Laui en out Serusalem, ka ales merikel keil koa Iesu mumoni ekonek. Sakini, e vati avalesi voumon etai ris merikel.#Sion 2:23

46Iesu mual rokol taon ten out Kena, out koa viles oai mai vi uaen.#Sion 2:1-11 En taon enek, hetetamen tai onen asuv houlu Herod ro ien koa kur longlongien keke natnali koa mul en mari taon ten out Kapaniam mesai houlu.#Mat 8:5-6; Luk 7:1-3 47Navong hetetamen enek raengoni keke Iesu ka provins ten out Sudea ka mai tuai en provins koanek ten out Kaleli, kei va veni ka peahi vahi keilu luvaha en taon ten out Kapaniam keke vakulat mesaien ran natnali koa vesesal vamat.

48Iesu viteni mini vit, “!Ekovei! Munak kami mirles etai merikel keil vuo metai sav keil, misakras mivakur anatin enau.”#Dan 4:2,37; Mak 13:22; 1Kor 1:22

49Ka hetetamen enek viteni vit, “O asuv. Lehekalah eli leheha keke natkuli hermattei.”

50Ka Iesu viteni mini vit, “Keik kusil sise onom kiha. Natmali moul tuai.” Navong hetetamen long asa koa Iesu viteni, kur anatin eni ka va.#Mat 8:13; Mak 7:29

51Avong tai mai muli, ka navong hetetamen enek mul veah en sise onen, meatin toumien tei keil onen koa aka Kapaniam avisu mini. Aviteni mini avit, “Natmali moul tuai.”

52Navong hetetamen vis keil avahiten avong kati koa ales natnali moul eni, keil avit kesi avit, “Natmali, aven mutin va vio, rokol wan klok taviai. Evus, mesaien lokoveini ka kei mai ris tahos.”

53Navong aviteni mukok, hetetamen enek mundem kilea keke koanek kistal en hati avong kati koa Iesu viteni mini keke natnali moul tuai. Sakini kei ka onen vasi keil akur anatin en Iesu.#Umen 11:14; 16:14-15,31

54Koanek vi merikel koa elu koa Iesu mumoni en provins ten out Kaleli, navong ka en provins ten out Sudea.#Sion 2:11

Sélection en cours:

Sion 4: pma

Surbrillance

Copier