Versets bibliques populaires de Matie 5

Partager

Nyiblo 'bʋ 'bɩa 'napɩ, ɛ 'nɩ ꞊jri꞊e lɩ꞊ɩ kɩka 'lu bʋ, kɛɛ, 'kɩ ɛ ꞊tui 'ʋ꞊ʋ dɛ 'lu bʋ, ‑ɛ di꞊e nu, nyibli ‑mʋ', ‑ʋ nɩ 'lɩ 'kayu bʋ, 'ʋ 'mʋ lɛ yru. ‑Tɛ 'napɩ ni wʋnwlɩɩn, 'kɩ 'ʋ nyibli ‑mʋ' ‑mɔ, ‑ʋ nɩ 'lɩ halɔ 'nyɩ, kɛ‑ 'aan nunuklɔ bʋ nu wʋnwlɩɩn, 'kɩ 'ʋ nyibli ye', ‑ɛ di꞊e nu, ꞊haandɛ ‑mʋ', a di nu, ʋ 'mʋ꞊ʋ 'ye, ʋ 'mʋ 'aan 'Baɩ Nyɩsʋa ‑nɩ 'lɩ yakɔ 'kwli 'nyrɛ lɛ pʋ.»

'A mʋ ‑mɔ 'klɔ ‑bʋ, 'a ‑nyrɛ. 'Dɩɔ ‑mʋ', ‑ɛ nɩ 'lɩ dʋgba 'lu, ɛ 'yɩ ‑huhlidɩɔ 'pa‑.

Nyibli ‑mʋ', ‑ʋ kɔ ꞊wlɩ ꞊sii 'ʋ yɩ, bʋ kɔ plɔ a bleelɛ, ‑ɛ nu꞊o, ʋ di Nyɩsʋa 'nɩ 'ye.

Nyibli ‑mʋ', ‑ʋ ꞊mʋɛ꞊ɛ lɛ dɩakɩ, 'kɩ 'lɩ 'waa ꞊wlɩ a pɛpɛ kɩ, 'kɩ 'waa nɩnabʋɩ bʋ 'sii 'ʋ yɩ, 'kɩ 'ʋ Nyɩsʋa ye', nyibli a 'mʋ, bʋ kɔ plɔ a bleelɛ, ‑ɛ nu꞊o, dɛ ‑mʋ', ʋ ꞊mʋɛ lɛ, Nyɩsʋa di ꞊nʋ 'nɩ ‑nyi.

Kɛɛ, 'mɔ ‑bɩ, kɛ‑ 'n pɩ: Ba nʋɛ nɛ 'aan yraanyibli, kɔ, ba da Nyɩsʋa, 'kɩ 'ʋ nyibli ‑mʋ', ‑ʋ ꞊tui 'a mʋ ꞊hɩʋɛn a ‑ta'

Ɛ wɛn: «Nyibli ‑mʋ', ‑ʋ yi꞊e, ‑ɛ mɔ, 'kɩ 'lɩ 'waa ꞊wlɩ kɩ, ꞊haandɛ 'yɩ 'lɩ ‑nɩ, 'bʋ mɔ, Nyɩsʋa a ‑Hihiu* 'bʋ 'yɩ 'ʋ ꞊nʋ ke' ‑nɩ, nyibli a 'mʋ, bʋ kɔ plɔ a bleelɛ, ‑ɛ nu꞊o, ʋ nʋ‑ di 'lɩ Nyɩsʋa a 'klɔ yrayrʋ 'kwli pa.

Nyibli ‑mʋ', ‑ʋ ꞊mʋɛ꞊ɛ lɛ, 'kɩ nyibli bʋ wʋnwɛɛn kɩ bʋ, bʋ kɔ plɔ a bleelɛ, ‑ɛ nu꞊o, Nyɩsʋa di daa ꞊nʋ 'a 'yonʋ.

Nyibli ‑mʋ', ‑ʋ kɔ ꞊wlɩ bi ꞊hlɔn, bʋ kɔ plɔ a bleelɛ, ‑ɛ nu꞊o, Nyɩsʋa a ꞊gbɛtʋ, ɛ nɔ‑ di 'lɩ ꞊nʋ ꞊wlʋ 'kwli bʋ ꞊tu.

Nyibli ‑mʋ', dɛ Nyɩsʋa ‑hʋɛ, ‑ʋ ni꞊e, 'a ‑tɩ 'bʋ yɩ ꞊nʋ ꞊hɩʋɛn nɩ ꞊tui, nyibli a 'mʋ, bʋ kɔ plɔ a bleelɛ, ‑ɛ nu꞊o, ʋ nʋ‑ di 'lɩ Nyɩsʋa a 'klɔ yrayrʋ 'kwli pa.

Nyibli ‑mʋ', ‑ʋ kɔ 'waa 'bio ‑tonyibli a nyaɩ, bʋ kɔ plɔ a bleelɛ, ‑ɛ nu꞊o, 'waa 'mumu, Nyɩsʋa di yru 'waa nyaɩ.

'A mʋ ‑mʋ', 'bʋ yɩ 'a mʋ 'yri nɩ ‑hɛ, 'bʋ yɩ 'a mʋ ꞊hɩʋɛn nɩ ꞊tui, 'bʋ yɩ 'a mʋ ‑tɩ nɩ ‑yɛɛ ‑nɩ, 'bʋ yɩ 'a mʋ hɩ klɛ nɩ pɩ, ‑tɛ a mɔ 'na ‑nagbopʋ* a ‑tɩ, ba kɔ plɔ a bleelɛ. Ba nu dɔdʋ, ‑kɔtɩ ‑nyrɔwɔ, a di Nyɩsʋa yɩ mu, Nyɩsʋa di ‑nyi 'a mʋ 'wio gbagbʋ. Nyɩsʋa a winwlɔn‑hanyʋ* ‑mʋ', ‑ʋ nɩ la 'klɔ, ti ‑hi la a ti 'yri, kɛ‑ nyibli ni la, 'ʋ ꞊tui la ꞊nʋ ꞊hɩʋɛn.»

Nyibli ‑mʋ', ‑ʋ kɔ ꞊wlɩ ꞊yɔpɔ ‑nɩ, bʋ kɔ plɔ a bleelɛ, ‑ɛ nu꞊o, ʋ nʋ‑ Nyɩsʋa di 'blʋgba ‑mʋ' ‑nyi, ɛ pʋ lɛ, ɛ di 'a nyibli ‑nyi.

Kɛ‑ ‑Yusu pɩ 'a ‑nagbopʋ* yɩ de: «‑Tɛ 'ta nɩ 'mʋ, 'kɩ 'ʋ dididɛ ‑mɔ, kɛ‑ a nɩ 'mʋ, 'kɩ 'ʋ ‑tʋtʋ kɩ a nyibli ‑mɔ ‑wɛ. Kɛɛ, 'ta a 'mʋ, bʋ 'waan nɛ 'a wlɔnnɩnɔ, ʋ 'yɩ 'lɩ꞊ɩ 'lɩ ‑wɛ, bʋ ‑nyi꞊e 'a wlɔnnɩnɔ a 'mʋ de. Ɛ 'yɩ 'kɩ ‑kʋan ꞊dʋ ‑kɔ de, 'bʋ 'yɩ bʋ pɩɩ 'wan, nyibli bʋ na꞊a klɛ.

Ba 'sii 'ʋ yɩ, ꞊wɩ yɩ ‑tɛ 'aan 'Baɩ Nyɩsʋa ‑nɩ 'lɩ yakɔ 'kwli, ɛ ‑nu, 'ɛ 'sii 'ʋ yɩ.»

Kɛ‑ ba pʋ: Iin 'bʋ mɔ iin, ɛ kɔ, ba pʋ: 'Ʋʋn‑, 'bʋ mɔ 'ʋʋn‑. ꞊Nɩ ‑maa 'ʋ꞊ʋ 'sʋʋlɛ 'lu, ɛ mɔ yɩnyredɛ ꞊nɩɔ. 'Kɩ ɛ ‑hʋɛn 'lɩ 'kuo ‑hʋɩn* a nyiblo gbagbʋ ‑mɔ.»

«A yi꞊e nɩ, ‑ɛ mɔ, tete ‑bɩ, Nyɩsʋa ‑nyi la ‑aan 'baɩnʋ, ɛ nɔ‑ mɔ: Nyiblo 'bʋ wa 'a 'bɩ a 'yie, ʋ kɔ bʋ wa a 'yie ‑wɛ. Nyiblo 'bʋ ‑yraa nɛ 'a 'bɩ 'nyɛ wlɔn, ʋ kɔ bʋ ‑yraa ꞊nɛ 'nyɛ wlɔn ‑wɛ. Kɛɛ, 'mɔ ‑bɩ, kɛ‑ 'n pɩ: Nyiblo 'bʋ nu 'a mʋ yɩnyredɛ ‑mɔ, a 'nɩ 'wɩɩ 'lɩ 'aan dɩɔnʋ klɛ. Nyiblo 'bʋ pʋ 'lɩ 'ŋma ‑na diidɛnʋa 'kwli, ‑ha꞊a mɛ lɛ, bʋ pʋ 'lɩ 'a dɛ ‑bɩ kamlanʋa 'kwli.

'Bʋ mɔ, ‑na 'yii 'bʋ yɩ꞊ɩ nɩ ni, ꞊nɩ yɩ dɛ 'kuku nɩ ni, ‑ɛ ‑bɩ ‑ha 'lɩ ꞊nʋ lɛ, ꞊mʋ ꞊nʋ 'wan pʋ. ‑Bʋ ‑ha 'ʋ ‑dɩɔnʋ a 'hʋɩ a 'kɩbɩa, ‑bʋ pʋ꞊ʋ 'wan, ɛ nɔɔ 'ʋ lɛ, 'ɛ ‑hi 'ʋ bʋ pʋ 'lɩ ‑na pɛpɛ na ‑mʋ', ‑ɛ 'yɛ nɩ jre yruyru 'nyɩ. 'Bʋ mɔ, ‑na diidɛdabʋ 'bʋ yɩ꞊ɩ nɩ ni, ꞊nɩ yɩ dɛ 'kuku nɩ ni, 'bɛ 'ʋ꞊ʋ 'ʋ, ꞊mʋ꞊ʋ 'wan pʋ. Ɛ nu ‑tɛɛ, 'kɩ ‑bʋ pʋ ‑na 'hʋɩ a 'kɩbɩa ‑bɩ 'wan, 'ɛ ‑hi 'ʋ ‑na pɛpɛ ‑bʋ mu 'lɩ na ‑mʋ', ‑ɛ 'yɛ nɩ jre yruyru 'nyɩ.»