Versets bibliques populaires de Mateo 7

Partager

“S̈mochjotjañe y Bëngbe Bëtsá cmochanjáts̈ataye; s̈mochjánguango y s̈mochanjínÿena; s̈mochjachembo y bës̈ás̈a cmochanjébëtafjo.

Er ndánaca tojtsotjanañá, jóyëngacñana; y nda tojtsenguá cha, jónÿenana; y nda tojtsechembuanábioye jebiatëfjuana.

“Chcasna, nda ats̈e s̈ojoyeuná y chë nts̈amo sëntsichamcá tojtsama, endmëna mo canÿe ts̈abá juabnaye boyabasacá. Chë boyabásana ndëts̈beñe chabe yebna yojajebo.

“Inÿengaftaca s̈mochtsama nts̈amo chë ínÿenga ts̈ëngaftangaftaca chamotsamama s̈mojtsebos̈cá. Chca endmëna nts̈amo Moisesbe leyiñe y chë Bëngbe Bëtsabe juabna oyebuambnayëngbe buatëmbana soyënguiñe endayancá ca” —Jesús tojánayana.

Chë ts̈abe vida binÿnoye jamna base utënts̈á bës̈ás̈ajana endmëna y ndoñe paselo jóyenama benache, y chiñe báseftanga mondbínÿena.

“Chë base utënts̈á bës̈ás̈ajana s̈mochjámashjna. Chë utënts̈á bës̈ás̈ajana y chë paselo jóyenama benache, infiernoye cmochanjuánatse y banga chëjana mondámashjuana.

Y chca, ts̈ëngaftanga, bacna soye amënga, ts̈ëngaftangbe basetémënga ts̈abe soyënga jats̈atayama s̈mojtsamanëse, ¡más ts̈ëngaftangbe Taitá, Bëngbe Bëtsá celoca endmëná, chë tmojtsotjanañënga ts̈abe soyënga echanjáts̈ataye!

“Ndocá ínÿengbiama s̈mattsichamo chë ndoñe ts̈abá tmontsamama. Chca, Bëngbe Bëtsá ndoñe queochátichamo ts̈ëngaftanga ndoñe ts̈abá s̈monjama ca. Chë nts̈amo ts̈ëngaftanga ínÿengbiama s̈mojtsichamcá ts̈abá o ndoñe ts̈abá tmontsamama, cachcá Bëngbe Bëtsá ts̈ëngaftangbiama chë nts̈amo s̈mojamama echántsichamo. Y nts̈amo ínÿengbioye chas̈mojábiama, uabouana o ndoñe jabuache soyënga, cachcá Bëngbe Bëtsá ts̈ëngaftangbioye cmochanjábiama.

Pero nda ats̈be palabra tojouena y nts̈amo sëntsichamcá ndoñe tontsama, endmëna mo canÿe ndëjuabnaye boyabasacá. Chë boyabásana chabe yebna cascajuiñe yojajebo.

“Nderado canÿa chabe bominÿiñe canÿe niñëfja tojtsebomnëse, cha ndoñe ntsobenana chabe cats̈ata jauyanama: ‘Acbe bominÿents̈ana canÿe polvështema jtsebuchjátsëcama s̈molesenciá ca’. Natsana cha bontsemna cachabe bominÿents̈ana chë niñëfja jtsenobuchjátsëcana ts̈abá jinÿama jobenayama, chabe cats̈atbe bominÿents̈a polvështema jtsebuchjátsëcama. Cachcá entsemna acbiama, ¡bacna ents̈á chë nts̈amo ndegombre tcojuabnacá ndinÿinÿnayá!, chë ts̈a bacna soye cojtsama ca acbe cats̈ata tcojauyana ora, cach aca ts̈a bëts bacna soyënga cojtsamama ntjenojuaboycá; y chca, aca jamana canÿe bacna soye. Natsana cmontsemna chë cach aca ndoñe ts̈abe soyënga cojtsamama ngménaca jshatenójuaboyana y chca amana jtsajbanana, y chents̈ana cocayé cochantsobena acbe cats̈ata juajabuáchana nts̈amo ts̈abá yomncá chaotsamama.

“Cuedado s̈mochtsebomna chë Bëngbe Bëtsabe ndoñe ndegombre juabna oyebuambnayëngbiama. Chëngna mo oveshëngcá ts̈ëngaftangbioye mochanjabo, pero ndegombre chënga mondmëna mo ts̈átjaye tjañe ques̈ëngcá. Ts̈ëngaftanga betiyënga jtsabuatmana nts̈amo cada ona tojtseshajcá; cachcá ts̈ëngaftanga chcanga s̈mochantsëbuatma, ndayá chënga mochtsamama. Uchmas̈ëshe betiyents̈ana ndoñe uvas ntjuátabebiana, ni higuëbé cardo betiyents̈ana.

Chca, nÿetsca ts̈abe betiyiñe ts̈abe soye jashájonana; y chë ndoñe ts̈abeshiñna podesca soye.

Canÿe ts̈abe betiyiñe quenátopodena podesca soyënga jashájonana, ni canÿe ndoñe ts̈abe betiyiñe ts̈abe soyënga jashájonana.

Ndaye betiye podesca shajuanëshe jtseshatëts̈ana y iñoye jtsatmets̈ana.