Komo: Ɔngana á Kɛ̌kɛ (New Testament+)

Ɔngana á Kɛ̌kɛ

Yéso atóki ye wa, áoga ka phaeka ntanga-nji nɛngbo á Yudɛ́a kubi á Yɔɔdáni. Kó, usɛsɛ á ɓakpa ɓâ goto odondana bíbí akɛ, áokpanga goto goisaga ɓíndɔ ɗáɛmbani ně. Wa, ka Ɓaphaisáyɔ ɓáombîmisia ka tombaga akɛ. Ɓɔ, ɓáomúsia ɓe: «Ɛɔphi nɛsu asosi gea mǒko án'yɛ nkakɛ?» Yéso áǒsikisia: «Ɛɔphi ndea Mósa anososi ɓo?» Ɓáogea: «Mósa ɗásosi ɗundua á ɓaoɓa á keyé, mpɔ mǒko áon'yá nkakɛ.»
Yéso â gǎkɛ ǒngoɗea te: «Mósa ɗánóɗundui ɛɔphi ndɔ ka nyɔngɔ á mɔ̌ anu akpɛ. Ka nkpangeɔ á conjá á mokonda, Mokonga ɗánconji mǒko na nke. Ka nyɔngɔ índɔ unge, mǒko antoande abakɛ n'amakɛ, ɓáojúkana na nkakɛ. Ɓɔbu ɓaɓɛ ɓâ ye tɔ ko ɓá nyama moci, ka ubisa gea te, ɓáná ye ɓakpa ɓaɓɛ, a ye gǎkɛ nkpa moci. Cɔ, nnde Mokonga ajúkanisi, ɓakpa ɓákakatanisɛmbɛ.»
Mbenɔ nde ɗáɓátú ye k'éndu, ɓagoigi ɓâ goto omúsia Yéso ka nyɔngɔ ndɔɔ. Mpɔ, áǒsikisia: «Aoɓá nkpa n'an'yé nkakɛ, áomuka ɓaangbo, agi ndiu iɛɓɛ ka phɔa á nke ímbɔ á mosá. A gǎkɛ oɓá nke n'atóki k'éyamani, áoga ɔɔmana, ámbé agi iɛɓɛ.»


Mbusa á wa, ɓáombikia Yéso na ɓaniki ɓábɔbɔa ka gea, yɛ áebisiɛ njaga. Ɓagoigi ɓâ gǎkɛ ǒphekeaga ɓakpa ndɔɔ. Yéso aɔni ye ɓó áɔɓɛa, áǒngoɗea te: «Óɗeketani ɓaniki ɓábɔbɔa ɓábikɛ mɔtɛ-amɔ. Ɓókǒimisiɛmbɛ nga, koɓoamɛ ndea Mokonga a ndiu á ɓakpa ɓunde ɓá ɓea ɓaniki. Nenóngoɗi ɗoni gea, nkpa nde káɓeeki nyɔngɔ á koɓoamɛ ndea Mokonga ɓea miki, kángiɛku tanda kó.» Mpɔ, Yéso áǒkotoa ɓaniki ndɔ, áobisa njaga akɛ gǔ aɓɔ.


Mbenɔ nde Yéso ɗámɛi tamba nɛkɛ, nkpa moci áombikia mbangɔ, áongbukia muanku, áomúsia: «Ngoisigi anjánjá, négeɛ ɓo, néɓɛ na enda á mɛyɔ?» Yéso áonsikisia ɓe: «Ɔmɔɔphani Nto á anjánjá ka ɓo? Mokonga sasakɛ tɔndɔ aámbé aánjánja. Cɔ, oúba ɛɔphi ndee:
Kómmowɛmbɛ nkpa,
kótunganɛmbɛ,
kóúɓɛmbɛ,
kón'yɔngɛɛ mɔnɔ nkpa mbɛa,
kóndemɛgɛmbɛ nkpa,
nɗokomisa abakɔ n'amakɔ.»
Áonsikisia Yéso te: «Ngoisigi, ɗékpangi amba ɛɔphi ndɔ bui ka koniki ani.» Yéso áonenga, áonkonda phɛɛ. Áongoɗea: «Oúki tɔ kema moci: Gǎ, ósombisɛ kema bui nde oně, ɔ́bɛɗɛ imɔna í, óɓophɛ ɓato á ɓuyɛnɛ, mbusa í, oɓande n'ɛtɔi na koba. Mpɔ bika, ómoɓeɛ.» Nkpa ndɔ aɔ́ki ye nyɔngɔ ndɔ, áophinda kiki, áoga n'aɓɛí nga, ɗátú n'ɛtɔi ásii phɛɛ.
Mpɔ Yéso áǒenga ɓagoigi nɛkɛ nde ɗáɓántimbi, áǒngoɗea te: «Haa! Aákpɛ ka ɓatɔi ngia aɓɔ ka koɓoamɛ ndea Mokonga.» Ka nyɔngɔ á ɓoabi ndɔ, ɓagoigi ɓáoyayama. Yéso â goto ǒngoɗea te: «Eya, ɓaniki amɔ ngia ka koɓoamɛ ndea Mokonga aákpɛ! Cɔ, nna akpɛ ka ngamia ngia akɛ k'aphɛ á mǔphe, ɓíndɔ aákpɛ ka ntɔi ngia akɛ ka koɓoamɛ ndea Mokonga.» Ɓagoigi ɓâ goto oyayama phɛɛ, ɓáoúsianaga: «Ani mmbé aɔtɔka n'aami ka měma?» Yéso áǒenga jaa! Áǒgea: «Kema bui nde nkpa nna ɔtɔtɔkisa, Mokonga aámbé aɔtɔtɔkisa.»
Mpɔ, Pɛ́tɛɛ áongea: «Cɔ, ɓesu ɓeɗeketi kema bui ka nyɔngɔ á ɓeá akɔ.» Yéso áonsikisia te: «Eya! Nenóngoɗi ɗoni gea, nkpa nde aɗeketi endu nɛkɛ, ɓana-amakɛ, ɓáwákɛ, amakɛ, abakɛ, ɓ'anakɛ na ciko nɛkɛ, ka nyɔngɔ ani na ka phɔa á Mbino-Ánjá, Mokonga amophande goto kema ndɔ bui mɔngɔ mia moci (100) ka matú nde ɓe phɔ́tɔ oenda, kaɓɛ endu, ɓana-amakɛ, ɓáwákɛ, ɓamakɛ, ɓ'anakɛ na ciko, aɓande phɔtɔ na tambaga. Mpɔ, ka matú nde abikaeka, aɓande na enda á mɛyɔ. Ɓakpa ɓásii ɓunde ɓa kesande ɓato á k'ama mosá-mosá ɓáɓande ɓato á mbusa, na ɓato á mbusa, ɓáɓande ɓato á k'ama mosá-mosá.»


Yéso na ɓagoigi nɛkɛ ɓátóki ye wa, ɓáotáia na Yɛusalɛ́ma. Yéso áɔ̌mɛɛa mosá. Ɓagoigi nɛkɛ ɓáoɓá na kɔɓɔɓɔkɔ. Ɓakpa nde ɗáɓátú ǒɓea, ɓáoɓánga phɛɛ. Yéso â goto ɔ̌bɛɗa ɓagoigi nɛkɛ nkama na ɓaɓɛ (12), áokpanga tɔ̌mia aɓɔ nyɔngɔ nde atɔtɔkɛanande ka phɔakɛ. Aǒgea: «Cɔ, ɓetái na Yɛusalɛ́ma. Kó, eme Muna-Nkpa ɓámobisande ka njaga á ɓagbɛga á ɓatoɓeigi-phɛ́a na ɓaɗundu-ɛɔphi. Ɓátenande nyɔngɔ á kukuwa ani, ɓáomobisa ka njaga á ɓakpa nde ɓáná Ɓayúda. Ɓɔ, ɓámotondeande, ɓáomosúia soki, ɓáomoɓinda na gbutu, ɓáomomowa. K'ésa á ko isaɔ mbusa í, néojujuka ka kukuwa.»


Mbusa, Yakɔ́ɓɔ na Yoáni ɓana Jɛbɛdáyɔ, ɓáobika bíbí á Yéso ɓáongea: «Ngoisigi, ɓekondi ɔ́tɔtɔkisɛ kasu ɛmɛmi nde ɓɛkɔmɛmande.» Yéso áǒgea: «Kema sina nde ɓokondi nɛ́tɔtɔkisɛ ka phɔanu?» Ɓáonsikisia: «Mbenɔ nde oɓande ka koɓoamɛ nɛkɔ á ɓoombia, ɓeekea gea, ka ɓesu moci áikɛ ka njaga akɔ á mǔku na ɓaangbo ka njaga akɔ á nkei.» Yéso áǒngoɗea: «Ɓókóoúba kema nde ɓɔmɛmi. Cɔ, ɓɔtɔkande noa ka kiɓe nde nenoande na ɓophiphiande ɓánoɓatisɛ k'óɓatisɔ nde ɓámoɓatisande?» Ɓáonsikisia te: «Ɓɛtɔkande.» Mpɔ, Yéso â gǎkɛ ǒgea: «Ande ɗoni! Ɓonoande ka kiɓe ndɔ nenoande na phiphia óɓatisɔ nde ɓámoɓatisande. Cɔ, ikisa á ɓakpa ka njaga ani á mǔku na nnde á nkei, nna gǎkɛ nyɔngɔ nɛmɔ. Ɔma ndɔ a tɔ ka ɓunde ɓáɛɓɔngisíí.»
Mbenɔ nde ɓagoigi ɓunɛngbo nkama (10) ɓáɔ́ki ɓó, ɓáɔ̌ɓɛɛa Yakɔ́ɓɔ na Yoáni. Mpɔ, Yéso áɔ̌ɓɔphana ɓɔbu áǒgea te: «Ɓooúba ɓî ɓaamɛ á ka mokonda nde, ɓáɔbɛɗaneaga kɔkɔta nɛɓɔ akpɛ gǔ á ɓakpa nde ɓá kusi aɓɔ na ɓî ɓamamei-nji ɓáǒtambisaga ɓakpa na kɔkɔta nɛɓɔ. Cɔ, sɔsɔɓɛ anu, káɓɛku ɓó. Aoɓá ka ɓenu moci n'akondi ɓá á mɔkɔta, akeni gǎkɛ áɓɛ mbɛɗanigi nɛnu. Aoɓá ka ɓenu moci n'akondi ɓá nto á k'ama mosá-mosá, akeni áɓɛ mbɛɗanigi á ɓɔbu. Nga, eme Muna-Nkpa, kébiki ka gea ɓakpa ɓámɔbɛɗaneɛgɛ. Nebiki ndiu ka bɛɗaneaga aɓɔ na bisa á enda ani k'óphendɔ ka amisa á ɓakpa ɓásii.»


Mbusa á wa, ɓáokiɗia ka Yɛíkɔ. Yéso na ɓagoigi nɛkɛ, kimoci na usɛsɛ á ɓakpa ɗáɓáotaɓanga ntanga-nji ndɔɔ. Ka juana aɓɔ, keíme-íme moci ina akɛ Baatimáyɔ, muna Timáyɔ ɗáiki ka mpɛphɛ á aphe n'aɔmɛmaga. Ɓî aɔ́ki ye gea, Yéso nto á ka Najalɛ́ti aámbé aɔnyɛ́nya, áokpanga yɔnga n'ɛsɔ akpɛ: «Yéso mosuko á Daúdi hoo! Ómokuia ngomi ee!» Ɓakpa ɓásii ɓáomphekeaga gea te áphɔngɛ. Yɛ, â gǎkɛ otetemisa yɔnga akpɛ phɛɛ: «Mosuko á Daúdi hoo! Ómokuia ngomi ee!» Yéso áomama, áogea: «Mɔphanani.» Ɓáɔmɔphana keíme-íme, ɓáongea: «Cɔ, bisa měma akɔ, ómesia, aɔkɔɔphana!» Keíme-íme áophúia bɔngɔ nɛkɛ á gǔ, áǒjukumisa, áoga kuɓî Yéso aɔ. Mpɔ, Yéso áomúsia te: «Cɔ, okondi negeɛ ka phɔakɔ ɓo?» Keíme-íme áonsikisia te: «Ngoisigi, nekondi nɛ́ɔnaphɛ goto.» Yéso áongoɗea: «Gǎ, ɓeekea nɛkɔ akoamisi.» Kɛ̌kɛndɔ, â goto ɔɔnapha, áomɓea Yéso k'aphe.

Écouter Málikɔ 10