Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወበውእቱ መዋዕል መጽአ ዮሐንስ መጥምቅ እንዘ ይሰብክ በገዳመ ይሁዳ ዘዮርዳኖስ። እንዘ ይብል ነስሑ እስመ ቀርበት መንግሥተ ሰማያት። እስመ ዝንቱ ውእቱ ዘተብህለ በኢሳይያስ ነቢይ እንዘ ይብል «ቃለ ዐዋዲ ዘይሰብክ በገዳም ወይብል ጺሑአ ፍኖቶ ለእግዚአብሔር ወዐርዩ መጽያሕቶ።» ወልብሱ ለዮሐንስ እምፀጕረ ገመል ወቅናቱ ዘአዲም ውስተ ሐቌሁ ወሲሳዩ አንበጣ ወመዓረ ገዳም። ወይመጽኡ ኀቤሁ ኵሎሙ ሰብአ ኢየሩሳሌም ወኵሎሙ ሰብአ ይሁዳ ወኵሉ አድያሚሃ ለዮርዳኖስ። ወያጠምቆሙ በፈለገ ዮርዳኖስ እንዘ ይትአመኑ ኀጣውኢሆሙ። ወሶበ ርእየ ብዙኃነ እምፈሪሳውያን ወሰዱቃውያን እንዘ ይመጽኡ ውስተ ጥምቀቱ ጽሚተ ይቤሎሙ ኦ ትውልደ አራዊተ ምድር መኑ አመረክሙ ከመ ታምሥጡ እመቅሠፍት ወእመንሱት ወእመዐት ዘይመጽእ። ግበሩኬ እንከ ፍሬ ሠናየ ዘይደልወክሙ ለንስሓ። ወኢይምሰልክሙ ዘታመሥጡ በብሂለ አብ ብነ አብርሃም እብለክሙ ከመ ይክል እግዚአብሔር እምእላንቱ አእባን አንሥኦ ውሉድ ለአብርሃም። እስመ ናሁ ወድአ ማሕፄ ተሠይመ ውስተ ጕንደ ዕፀው ይንበር ኵሉኬ ዕፅ ዘኢይፈሪ ፍሬ ሠናየ ይትገዘም ወውስተ እሳት ይትወደይ። አንሰኬ አጠምቀክሙ በማይ ለንስሓ ወዘእምድኅሬየሰ ይመጽእ ውእቱ ይጸንዕ እምኔየ ዘኢይደልወኒ እጹር አሣእኖ ወውእቱ ያጠምቀክሙ በመንፈስ ቅዱስ ወበእሳት። ዘመሥኤ ውስተ እዴሁ ዘቦቱ ያነጽሕ ዐውደ እክሉ ወያስተጋብእ ሥርናዮ ውስተ መዛግብቲሁ ወሐሠሮሰ ያውዒ በእሳት ዘኢይጠፍእ።

አሜሃ መጽአ እግዚእ ኢየሱስ እምገሊላ ውስተ ዮርዳኖስ ከመ ይጠመቅ እም ዮሐንስ በፈለገ ዮርዳኖስ። ወዮሐንስሰ አበዮ እንዘ ይብል አነ እፈቅድ እምኀቤከ እጠመቅ ወአንተኑ ትመጽእ ኀቤየ። ወአውሥአ እግዚእ ኢየሱስ ወይቤሎ ኅድግ ምዕረሰ እስመ ከመዝ ተድላ ለነ ወይደልወነ ከመ ንፈጽም ኵሎ ጽድቀ ወእምዝ ኀደጎ። ወተጠሚቆ እግዚእ ኢየሱስ ሶቤሃ ወፅአ እማይ ወናሁ ተርኅወ ሎቱ ሰማይ ወርእየ መንፈሰ እግዚአብሔር እንዘ ይወርድ በአምሳለ ርግብ ወነበረ ዲቤሁ። ወናሁ መጽአ ቃል እምሰማይ ዘይብል ዝንቱ ውእቱ ወልድየ ዘአፈቅር ዘቦቱ ሠመርኩ።

Écouter ወንጌል ዘማቴዎስ 3