Basketo - 2014 BSE (NT) Drama

Basketo - 2014 BSE (NT) Non Drama

ጾ̈ሲ̇ ዪንታ̇ ጋልዳ ፊርዳካ̇ዮ̈ዲፌ̈ን ዪንቲ̇ ኣሳ ጋልዳ ፊርዳፒ̇ቴ። ኣባ ጌይን ዪንቲ̇ ኣሳ ጋልዳ ፊርዲኖን ኢዝፌኒ ጾ̈ሲ̇ ዪንታ̇ ጋልዳ ፊርዲ̈ሬ፤ ማ ዪንቲ̇ ማኪ̇ኖ ኢቂ̇ን ኢዝባር ዪንታ̇ብ ማኪ̇̈ሬ። “ኔ ኣ̈ፊ̈ን ጋርታ̇ ዎን ቱ̈ሲ̇ን ቤቃካይዶራ ኔ ኢሻ ኣ̈ፊን ጋርታ̇ ዎ ሱ̈ሊ̇ን ኣባብ ቤቃ̈ራ? ኔ ኣ̈ፊ̈ን ጋርታ̇ ዎ ቱ̈ሲ̇ን ኬሳ̇ካይዶራ ኔ ኢሻ ኣ̈ፊን ጋርታ̇ ዎ ቡ̈ሪን ‘ቴ ኔ̈ብ ኬሶ̇’ ጋ̈ንዳ̇ብ ዎዛርታ̇ር ዳንዳኣ̈ራ? ኔ ኣሳ ቲ̈ን ኮሽ ማይጻር ቤንታንዳብ ኮዪዛ̈ዶ፥ ኔ ቲ̈ኒታራ ኔ ኣ̈ፊ̈ን ጋርቶ̇ ቱ̈ሲ̇ን ኬ̈ሳ̇ቤ፥ ኢናፖ̇ ዓኒ ኔ ኢሻ ኣ̈ፊ̈ን ጋርቶ̇ን ሱ̈ሊ̇ን ኬሳ̇ንዳ̇ቦ ኔ ኣ̈ፊ̈ን ኮሺንቻ̇ ቤቃ̇̈ሬ።
ጌ̈ሽ ማ̈ቂ̇ኖ ባዝ ካናብ ኢማ̇ፒቴ ኢንቲ̇ ጋስ ማ̈ቃ̇ሪ ዪንታ̇ ቂ̈ሬ። ማ ኢንቁ ጋዚን ዎይሊን ኣልኣ ማ̈ቂ̇ኖ ሹ̈ቺን ጉዲን ቲ̈ን ሚሻፒ̇ቴ፥ ኣባጌዪን ኢንቲ̇ ፌ ቶ̈ሃባር ሜላ̇ ዬ ኢሲ̇̈ሬ።


“ጾ̈ሳ̇̇ ጌሺብቴ̇ ዪንታ̇ብ ኢሚ̇̈ሬ፥ ኮዪብቴ̇ ኢ ዪንታ̇ብ ቤይሲ̈ሬ ካሪን ቆንኪ̇ብቴ̇ ኢ ዪንታ̇ብ ፊርቂ̇̈ሬ። ጌሺዝ ኣሲ ዎይ ኤኪ̇̈ሬ ኮዪዝ ኣሲ ዲጚ̈ሬ ካሪን ቆንኪዛ̈ቦ ፊሪቂ̇ንታ̈ሬ። ዪንታ̇ ጋርታ̇ ኢ ናኣ ኢያ ቂጻ̇ ጌሺን ሹች ኢሚ̇ዝ ኣሲ ዎ? ዎይ ‘ሞላ ታ̈ብ ኢሚ̇ሼ’ ጌዪ ጌሺን ሾ̈ሽ ኢሚ̇̈ራ? ዪዚ ዪንቲ̇ ኢ̈ታ ኣስዶሪ ዪንታ̇ ናኣንቦ ኮሽ ባዝ ኢሚ̇̈ርዶን፥ ዪንታ̇ ባ̈ባ̈ ኣፋ ዎ̈ዲ ኢያ ጌሺዛንቦ ዎዛርፌ̈ን ኮሽ ባዝ ሺሻር ኢሚ̇ባሳ? ዪዚ ኣሲ ዪንታ̇ብ ኦምፔን ዪንቲ̇ ኮዪዝ ባዛን ዪንታ̇ር ዪና̇ ኢዝፌ̈ን ኣሳንቦ ኦ̈ብቴ። ሙ̈ሳ ሂጋ̇ ማጻ̈ፋ ጋልዳ̇ሬ ማ ናባን ማጻ̈ፋ ጋልዳ̇ሬ ታማ̈ርሳዝ ሂጊ̇ን ዓና̇ ኢዞ” ጌይዴ።


“ይሳ̇ንዳብ ኤ̈ጛዝ ጎይንዳ ሻኬ̇፤ ጌላዝ ካሪንዳ̇ሬ ሻኬ̇፥ ዎይሊን ኣሲ ኢዝባር ጌሊ̈ሬ። ሼምፓ ጎይ ኤ̈ጛዝ ጎይሚንዳ ኩንኤ፤ ጌላዝ ካሪንዳ̇ር ኩንኤ፥ ኢዝባር ጌሊዝ ኣሳንር ጊላ̇” ጌይዴ።


ዪንቲ̇ ማቃ ናባን ጋልዳፖ ዪንታ̇ ና̈ጊብቴ̇። ኢንቲ̇ ፌ ጋልዳ ዶሪ ሻ̈ቻ ማኣሪ ዶሪ ማይጺ̈ርዶሪ ጋርታ ቡሪዝ ዬ̈ያ። ዪንቲ̇ ኢንታ̇ ኤራዚንዳ ኢንታ̇ ኦ̈ሲ̇ምባ̇ራ። ጉርጪንቻ̇ ጋልዳፖ̇ ዎይና ኣ̈ፊ፤ ጫጭ ጋልዳፖ̇ ኦች ኣ̈ፍ ሱባ̈ሴ። ዪና̇ ኢዝፌ̈ኒ ኮሽ ሚ ዎይ ኮሽ ኣ̈ፍ ካ̈ጺ̈ሬ፤ ኢ̈ት ሚ ኢ̈ት ኣ̈ፍ ካጺ̇̈ሬ። ኮሽ ሚ ኢ̈ት፥ ኣ̈ፍ ኢ̈ት ሚ ኮሽ ኣ̈ፍ ካጻ̇ንዳብ ዳንዳኢባ̈ሴ። ኮሽ ኣ̈ፍ ካጺባ̈ሶ ሚ ዎይ ቃጺንቲ̇̈ሬ፥ ታማ ጋርታ̇ ቶጚንቲ̈ሬ። ዪ̈ኮታ̇ ዪንቲ̇ ኢንቲ̇ ካጻ̇ዝ ኣ̈ፊምባ̇ር ኢንታ̇ ኤሪ̈ሬ።
“ኣፋ ዎ ቴ ባ̈ባ̈ ጋዝ ባዚን ኦ̈ዝ ኣሳንዶኬ ሜላ̇ ታ̈ና ጎዳ̈ዶ! ጎዳ̈ዶ! ጌይዝ ኣሲ ዎይ ጾ̈ሳ̇̇ ካ̈ቲቲ ጋርታ̇ ጌሊባ̈ሴ። ዪና̇ ኢዝ ቃሚ̇ን ዎይሊንን ‘ጎዳ̈ዶ! ጎዳ̈ዶ! ኑ ኔ ሱምባር ካ̈ያ ካ̈ያካ̇ያ? ኔ ሱምባር ኢ̈ታ ኣያ̇ና ኬሳ̇ካ̇ያ? ኔ ሱምባር ዎይሊን ዎልቃ̈ማ ባዝ ኦ̈ካያ?’ ጌይሬ። ዪና̇ ኢዝባራ ቴ ዪንታ̇ ዉርሳ ኤራካ̇ዬ፤ ዪንቲ̇ ኢ̈ት ኦ̈ዛን ታ̈ፖ̇ ጌዳ ጎቲ̇ብቴ̇ ጋ̈ራ ፋል ሶ̈ላ̈ሬ።


ዪዚ ቴ ቃ̈ሊን ዓኖ̇ ሲስካ̇ሪ ኦ̈ሳ ጋልዳ ፌ̈ሺ̇ዝ ኣሲ ዎይ ፌ ኬ̈ን ሹች ጋልዳ ኬ̈ጺ̇ኖ ኤጫ ኣስ ማይጺ̈ሬ። ኢሪ ኬዲ̇ዴ፤ ዲኣር ዬ̈ዪዴ፤ ዡባ̇ር ባቃ̇ሪ ኬ̈ን ኢዞ ሱጊዴ፤ ኬ̈ንዳ ሹች ጋልዳ ኬ̈ጺንቲ̇ኖኮታ̇ቦ ዪርዳካይ ኣታ̇ዴ። ቴ ቃ̈ሊን ዓኖ̇ ሲስካ̇ሪ ኦ̈ሳ̇ ጋልዳ ፌ̈ሺ̇ባ̈ሶ ኣሲ ፌ ኬ̈ን ሻ̈ማ ጋልዳ ኬ̈ጺ̇ኖ ዳሻ ኣስ ማይጺ̇̈ሬ። ኢሪ ኬዲ̇ዴ፤ ዲኣር ኢዝ ጋልዳ ዬይዴ፤ ዡባ̇ር ኢዞ ባቂ̇ዴ፤ ኬ̈ን ኢዞ ሱጊዴ ኢዛር ዪርዳ̇ዴ ኢዝ ዪርዲ̇ንዳሬ ዎይሊን ኢ̈ት ማ̈ቃ̇ዴ” ጌይዴ። ዬሱ̈ሲ ዪኖ̇ ታማ̈ርሲ̇ ዉርሲ̇ኖፖ̇ ዓኒ ዎርዣ ኢ ቲሚርታ̇ባር ጋራ̇ሚንቲ̇ዴ። ኣባ ጌይን ኢ ታማ̈ርሲ̈ርዶሪ ኣይሁዳን ሂጋ̇ ታማ̈ርሲዝ ኣሳንፌ̈ን ጊዳካ̇ይዶ̈ን ሲልጣ̈ና ዎ ኣስፌ̈ን ታማ̈ርሲኖንኮታ̇ቦ።

Écouter ማ̈ቶ̈ሳ 7