If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

यीशु सभास्थल बिच थिये तां तिन्हा ने अमीर मणूआं जो दान-पेटी बिच दान पान्दे दिख्खेया तित्ते इक्क विधवा जनानी आई जे कि गरीब थी, अते तिन्ने दान-पेटी बिच दो दमड़ियाँ पाईयाँ तां यीशु ने बोल्लेया, मैं तुसा कने सच बोल्दा, कि इसेरे दान री कीमत सारेयां रे दान का जादा है। किजोकी सब मणूआं ने अपणी जादा कमाई रा थोड़ा हिस्सा पाया है, पर, इन्ने अपणी घट्ट कमाई बिच का सब किच्‍छ ही पाई दित्ता।

जां किच्‍छ मणू मन्दिर रे बारे बिच गल्लां करेया करदे थिये, कि से किन्ने छैल बट्टेयां ते चढ़ाई री चीजां कने सजाए गे रा है, तां यीशु ने बोल्लेया, इदेया बेल्ला भी आणा जां, ए जे किच्‍छ भी तुसा दिखदे हिन, इसेरा काख नी रैणा, इक्क बट्टा तक नी बचणा, सब किच्‍छ ढेई जाणा अते से मणू यीशु का पूछणा लगे, गुरु जी, ए गल्लां कधाड़ी होणी? अते ए गल्लां जे होणे वालियां हिन, इसजो समजणे तांइ कै निशानी होणी?

यीशु ने बोल्लेया, ध्यान रखो, कुदखी कोई तुसा जो ठग्गी ना लेयो। किजोकी मेरे ना कने बड़े जणेयाँ ने आणा अते तिन्हा बोलणा, कि मैं मसीह यीशु है। अते ए भी बोलणा कि से बेल्ला नेड़े आई गे रा है तां तुसा तिसेरे पीछे मत चली जान्दे। जां तुसा लड़ाई झगड़े कने दंगेया रे बारे सुनणा तां डरी मती जान्दे किजोकी ए सब गल्लां होणा जरुरी हिन, पर दुनिया रा अन्त तिस्सी बेल्ले ही नी होई जाणा। फिरी यीशु ने तिन्हा जो बोल्लेया, जाति-जाति रे लोक्कां ने अते इक्क राज ने दूज्जे रे खिलाफ होई जाणा। अते बड़े-बड़े हिलण आणे अते कई जगाह् अकाल पैणा, अते महामारियां फैलणियां, आसमान बिच डराणे वाली गल्लां होणी अते अनौखी निशानियां दिसणी। पर इन्हा गल्लां रे होणे का पैले मेरे पीछे चलणे वालेयां मणूआं जो पकड़ी लित्तेया जाणा, तुसा पर मुसीबतां पैणी, तुसा जो यरुशलेम रे सभास्थल बिच लेई जाई करी तिन्हा का देई दैणा, अते तुसा जो जेला बिच ढप्पी दैणा, अते तुसा जो राज्जेयां (न्यायधिशाँ) कने राज्पालां का लेई जाणा। पर ए तुसा तांइ मेरी गवाई दैणे रा मौक्का बणी जाणा। इधेरे तांइ अपणे-अपणे मन बिच ठाणी लेयो कि असी पैल्ले का ही जवाब दैणे री फिकर नी करणी। किजोकी मैं तुसा जो इदेइ जुबान ते समझ दैणी कि तुसा रे दुश्मण तुसा री गल्ल नी कटी सकगे ते ना तुसा रा सामणा करी सकगे। पर तुसा रे मां-प्यो, भाई भैण, रिश्तेदारा, दोस्तां ने ही तुसा जो पकड़ाणा अते तुसा रे बिच का किच्‍छ जो मरवाई भी दैणा। मेरे पीच्छे चलणे वालेयां कने सबणी ने दुश्मणी रखणी इधेरे तांइ कि तुसा मेरे चेल्‍ले हिन। पर तुसा रा बाल भी बाँका नी होणा। पर सबर कने तुसा अपणी जिन्दगी बचाए रखणी।

जां तुसा यरुशलेम सहर जो दुश्मणा री फौज कने घिरे रा दिख्खणा तां जाणी लेयो कि तिसेरा तैह्स-नैस होणे रा बेल्ला निड़ी पे रा है। तां जे यहूदियां सहर बिच हुन्गे से पहाड़ा जो नस्सी जायो अते जे यरुशलेम सहर सभास्थल बिच हुन्गे से बाहर निकली आयो अते जे यहूदियां सहर बिच नी हुन्गे से तिस सहर अन्दर मत बड़दे। किजोकी से रोज सजा दैणे रे होणे ताकि जे पवित्रशास्त्र बिच लिखे दा है से पूरा हो। तिन्हा जनानियां तांइ जे दुपराणी होणी या तिन्हा जनानी तांइ जे अपणे बच्चे जो दूद्द पियान्दी हुणी तिन्हा तांइ से रोज बड़े ड्रोणे होणे किजोकी तिन्हा रोज्जे इस दुनिया पर बड़ी मुसीबतां आणी अते यहूदी मणूआं पर परमेश्वर रा प्रकोप हुणा। तिन्हा ने तलवार रे शिकार होई जाणा, ते हर देस रे लोक्कां का गुलाम बणाई करी पूजाए जाणे ते जां तांइ गैर-यहूदी लोक्कां रा बेल्ला पूरा ना होई जाओ, तां तिकर यरुशलेम सहर गैर-यहूदियां रे पैरां हेठ रोदेंया जाणा। सूरज, ते चाँद ते तारेयां बिच अजीब निशानियां दिसणी ते दुनिया रे देस-देस रे लोक्कां पर मुसीबतां आणी अते मणूआं ने समुन्द्रा री उथल-पुथल अते तिसेरी तबाही जो दिख्खी करी घबराई जाणा।

दुनिया बिच आणे वाली मुसीबतां जो दिख्खी करी मणूआं रे मुँह सुकी जाणे अते तिन्हेरी हिम्मत ने भी जवाब देई जाणा किजोकी आसमान अपणी जगाह् का हिल्ली जाणा। तां सब मणूआं ने मणू रे पुत्तर, जे मैं ही है जो अपणी ताकत अते तिन्हेरी जै जै कार हुन्दे बदला बिच का आन्दे दिखणा। जां ए सब गल्लां होणे लग गई तां तुसा खड़े होई करी अपणा सिर उप्परा जो उठाई लेयो किजोकी तुसा रा छुटकारा नेड़े आया करदा हुणा।

फिरी यीशु ने तिन्हा जो इक्क उदारण दित्ता, सबणी बूट्टेयां जो अते अंजीर रे बूट्टे जो दिख्खो। तिन्हा बिच जिय्यां ही पत्तियां निकलणा लगदी तिय्यां ही तुसा जाणी जान्दे कि गर्मी रा मौसम आणे वाला है। तिय्यां ही तुसा इन्हा गल्लां जो हुन्दे दिख्णा तां जाणी लियो कि परमेश्वर तुसा पर राज करणे वाला है। मैं तुसा जो सच बोलदा कि जां तांइ ए सब गल्लां पूरी नी होई जांगियाँ तां तांइ इस पीढ़ी रा अन्त नी होणा। आसमान ते जमीन खत्म होई सकदे पर मेरी गल्लां हमेसा पक्की रैह्णी।

ध्यान रख्खो, ताकि तुसा रे मन डटी करी पीणे अते पियाणे तांइ अते इस दुनिया री चिन्ता जो लेई करी बेफिक्करे नी होई जाए कुदखी इय्यां ना हो कि जे तुसा सोच्चे दा भी नी हो से तुसा कन्ने होई जाओ। किजोकी से रोज दुनिया रे हर इक्क मणू पर जरुर आई पैणा। हर बेल्ले तैयार रेयो, अते प्रार्थना करदे रेयो कि तुसा जो इन्हा सब गल्लां का, जे होणे वाली हिन, तिन्हा का बचणे री ताकत मिली सकें अते भरोसे कने मणू रे पुत्तर, जे मैं ही है रे अग्गे खड़ी सकण। यीशु हर रोज मन्दिर बिच उपदेस दिन्दे थिये, पर से रात बताणे तांइ जैतून ना री पहाड़ी जो चली जान्दे थिये। सब मणू भ्यागा तड़के उठ्ठी करी मन्दिर जो जान्दे थिये ताकि से यीशु री गल्लां सुणी सकण।

Écouter लूका 21