1आदरणीय थियुफिलुस ज़ो घटना आसा बीच़ै घटी तिन्हरै बारै न बोहू सारै लोकै लिखणै री कोशिश केरी। 2ज़ैण्ढा कि ते पैहलै न इन्हां सारी गैला रै गुआह ती होर बादा न ते तेई वचना रै गुआह बैणै, होर तिन्हैं आसा तैंईंयैं ऐ गैला पजेरी। 3तिन्हां गैलै री मैं शुरू न लेइया बड़ै ध्याना सैंघै जाँच केरी सा होर तिन्हां गैला बै तेरी तैंईंयैं बौढ़ै लिखणा मुँभै शोभला भी लागा, 4ताकि तू ज़ाणला कि ज़ो शिक्षा तौभै धिनी सा सौहै सच़ सा।

यूहन्ना बपतिस्मा देणु आल़ै रै पैदा होंणै री भविष्यवाणी

5ज़ैबै हेरोदेस यहूदिया ज़िलै रा राज़ा ती तैबै अबिय्याह रै दला न जकर्याह नाँ रा एक यहूदी पुजारी ती, तेइरी लाड़ी बी हारून पुरोहिता रै खानदाना री ती होर तेसरा नाँ एलीशिबा ती। 6ते दुयै परमेश्वरा सामनै धर्मी ती, होर प्रभु री सारै हुक्म ता बिधि पैंधै च़ला ती। 7तिन्हरै कोई भी औलाद नी ती ऑथि, किबैकि एलीशिबा बांढी ती होर ते दुयै बूढ़ै ती।

8जकर्याह आपणै दलै री तरफा न परमेश्वरा सामनै पुरोहित रा कोम केरा ती। 9पुरोहित रीति रै मुताबक जकर्याह रै नाँ री चिट्ठी निकती#1:9 चिट्ठी निकती रीति रै मुताबक पुरोहित चिट्ठी पा ती कि मन्दिरा न कुण कोम केरला। , कि सौ प्रभु रै मन्दिरा न जाईया धूप पकाला।#निर्ग. 30:7. 10ज़ैबै जकर्याह धूप पकांदा लागादा ती ता लोकै री सारी मण्डली मन्दिरा रै ब्राम्दै न प्रार्थना केरदी लागीदी ती, 11तैबै प्रभु रा एक स्वर्गदूत जकर्याह न धूप पकेणै री वेदी रै दैहिणी धिरै खड़ा हेरूआ। 12जकर्याह तेई स्वर्गदूत हेरिया बोहू डौरू होर कोमदा लागा। 13पर स्वर्गदूतै जकर्याह बै बोलू, “हे जकर्याह, डौरदा मत किबैकि तेरी प्रार्थना परमेश्वरै शुणी दी सा, होर तेरी लाड़ी एलीशिबा सैंघै तेरै एक बेटा पैदा होंणा तू तेइरा नाँ यूहन्ना रैखेई। 14तेइरी बजहा न तौभै बोहू खुशी होंणी होर बोहू सारै लोका बी तेई रै पैदा होंणै सैंघै खुश होंणा। 15तेई प्रभु सामनै महान होंणा, तेई अँगूरा रा रस होर शराब कैधी बी नी पीणी होर तेई आपणी आमै रै पेटा न पवित्र आत्मै रै वशा न होंणा। 16तेई बोहू सारै इस्राएली लोका तिन्हरै प्रभु परमेश्वरा धिराबै फेरनै। 17होर तेई एलिय्याह सांही आत्मा न बड़ै शक्तिशाली होंणा होर तेई प्रभु रै आगै ज़ाइआ, बापू बै तिन्हरै बच्च़ै सैंघै मिलाणै, होर परमेश्वरै री गैला नी मनणु आऐ बै ऐण्ढी गैला दसला; कि ते धर्मी सांही विचार रखलै, होर परमेश्वरा बै मनला। ऐण्ढै तैरहै तेई प्रभु री तैंईंयैं काबिल लोका त्यार केरनै।” #मला. 4:5-6. 18जकर्याहै स्वर्गदूता न पुछ़ू, “हांऊँ कैण्ढै ज़ाणी सका सा कि तेई ऐण्ढा होंणा? किबैकि हांऊँ ता खापरा सा; मेरी लाड़ी बी खापरी हुई सा” 19स्वर्गदूतै जकर्याह बै बोलू, “मेरा नाँ गब्रिएल सा, होर हांऊँ परमेश्वरा सामनै खड़ा रौहा सा। हांऊँ तौभै इन्हां खुशी रै समादा बै दसणै री तैंईंयैं भेज़ू सा। 20शुण, ज़ाँ ढौई ऐ गैला पूरी नी होली, तौ ऐण्ढै रौहणा, होर तेरै गैला नी केरिनी, किबैकि तैं मेरी गैला रा बशाह नी केरू ज़ो ठीक बौगता न पूरी होंणी।” 21ऐथा मौंझ़ै मन्दिरा रै ब्राम्दै न लोका जकर्याह बै निहाल्दै लागै ती, होर ते ऐसा गैला न हैरान ती कि जकर्याह बै मन्दिरा न ऐतरी देरी किबै होंदै लागी सा। 22पर ज़ैबै जकर्याह बाहरै आऊ ता तेइरै तिन्हां सैंघै गैला निस्सी केरूई होर सौ हौथै लाईया इशारा केरा ती तैबै तिन्हैं लोकै ज़ाणू कि जकर्याह बै मन्दिरा न ज़रूर कोई दर्शन मिलू। 23ज़ैबै जकर्याह रा मन्दिरा न पुरोहिता रै रूपा न कोम खत्म हुआ ता सौ यरुश्लेम छ़ौड़िआ आपणै घौरा बै नौठा। 24किछ़ रोज़ा बाद जकर्याह री लाड़ी एलीशिबा सुज़दी रौही होर पौंज़ म्हीनै तैंईंयैं आपु बै गजिहाँदी रौही, 25होर बोल्दी लागी, “प्रभुऐ मेरी तैंईंयैं ऐ केतरा शोभला कोम केरू सा। ऐई बौगतै तेइयै मूँ पैंधै केतरी दया केरी सा मेरै कोई औलाद नी ती ऑथि, ऐसा बेइज़ती न प्रभुऐ हांऊँ बच़ाई।”

यीशु रै पैदा होंणै री भविष्यवाणी

26ज़ैबै एलीशिबा बै छ़ौऊआ म्हीना लागा ती तैबै परमेश्वरै गब्रिएल स्वर्गदूत गलीलै रै नासरत शैहरा बै एक कुँआरी हागै भेज़ू। 27तेसरी बौरनी यूसुफ नाँ रै मांहणु सैंघै हुई ती ज़ो दाऊद राज़ै रै खानदाना रा ती। तेसा कुँआरी रा नाँ मरियम ती। 28स्वर्गदूतै मरियमा हागै भीतरै एज़िया बोलू, “आनन्द होर जय तेरी हो, तौ पैंधै प्रभु रा अनुग्रह हुआ सा!” 29पर ऐसा गैला बै शुणिया मरियम घबराई होर सोच़दी लागी कि स्वर्गदूतै री गैला रा कि मतलब होई सका सा। 30स्वर्गदूतै मरियमा बै बोलू, “हे मरियम; डौरदी मत, किबैकि तौ पैंधै परमेश्वरा रा अनुग्रह हुआ सा। 31शुण, तौ सुज़दी रौहणा, तेरै एक शोहरू होंणा होर तू तेइरा नाँ यीशु रखेई। 32तेई महान होंणा, होर लोका तेइबै परमप्रधान रै बेटै बोलणा। प्रभु परमेश्वरा तेइबै तेइरै पूर्वज़ राज़ा दाऊदा सांही राज़ा बनाणा।#भज. 132:11; यशा. 9:6-7. 33याकूबा इस्राएली लोका पैंधै सदा राज़ केरना, होर तेइरा राज्य कैधी खत्म नी होंणा।” 34मरियमै स्वर्गदूता न पूछू, “ऐ कैण्ढै होई सका सा? हांऊँ ता हाज़ी कुँआरी सा।” 35स्वर्गदूतै बोलू, “पवित्र आत्मा तौ पैंधै ऐणा होर परमप्रधानै री शक्ति तौ पैंधै ऐणी, तैबै सौ ज़ो पैदा होणू आल़ा सा सौ पवित्र होंणा होर लोका तेइबै परमेश्वरै रै बेटै बोलणा। 36शुणा, तेरी रिश्तैदार एलीशिबै भी बुढ़ापै न बेटा सुज़दी सा, लोका तेसा बै बांढी बोला ती, पर ऐ तेसरा सुज़णै रा छ़ौऊआ म्हीना लागा सा। 37परमेश्वर सैभ किछ़ केरी सका सा।”#1:37 मती 19:26, यिर्म. 32:27 38मरियमै बोलू, “शुण, हांऊँ ता प्रभु री दासी सा, ज़ैण्ढा तुसै बोलू तैण्ढा मूँ सैंघै हुआ लोड़ी।” तेथा न बाद स्वर्गदूत मरियमा हागै न नौठा।

39किछ़ रोज़ा बाद मरियम यहूदिया ज़िलै रै एकी पहाड़ी देश यहूदा रै एक नगरा बै एलीशिबैथा सैंघै मिलदी नौठी ज़ौखै जकर्याह रौहा ती। 40होर तौखै ज़ाइआ मरियमै जकर्याह रै घौरा न तेइरी लाड़ी एलीशिबा बै नमस्कार केरी। 41ज़ैबै एलीशिबै मरियमै री नमस्कार शुणी ता बच्च़ा तेसरै पेटा न पटीकू होर सौ पवित्र आत्मा न भौरूई। 42होर इलिशिबै ज़ोरा सैंघै बोलू, “तू सैभी बेटड़ी मौंझ़ै धन्य सा, होर तेरै पेटा रा शोहरू भी धन्य सा! 43मेरी तैंईंयैं ऐ केतरी इज्ज़ती री गैल सा कि मेरै प्रभु री आमा मुँभै मिलदी मूँ हागै आई सा। 44हेर, ज़ाँ मैं तेरी नमस्कार शुणी ता शोहरू मेरै पेटा न खुशी सैंघै पटीकू। 45तू धन्य सा, किबैकि तैं बशाह केरू कि परमेश्वरा ऐ गैला पूरी केरनी।”

मरियम परमेश्वरै री जय-जयकार केरा सा

46तैबै मरियमै बोलू,

“हांऊँ परमेश्वरै री प्रशंसा केरा सा।

47हांऊँ उद्धार केरनु आल़ै

परमेश्वरा न खुश हुई,

48किबैकि तेइयै आपणी

दीन-हीन दासी पैंधै कृपा-दृष्टि केरी।

ऐबै न लेइया ज़ुगा-ज़ुगा ढौई लोका मुँभै धन्य बोलणा,

49किबैकि सर्वशक्तिमान परमेश्वरै मेरी तैंईंयैं बड़ै-बड़ै कोम केरै सी,

तेइरा नाँ पवित्र सा।

50ज़ुणा परमेश्वरा न डौरा सी,

तिन्हरी पीढ़ी-पीढ़ी ढौई परमेश्वरै री दया बणी रौहणी।

51हेरा, तेइयै आपणी ताकत रिहाई, ज़ुणा आपणै आपु बै बड़ा

होर ताकतवर बुझ़ा ती,

प्रभुऐ ते तितर-बितर केरै।

52परमेश्वरै राज़ै राज़गद्दी न हटायै,

होर दीन मांहणु रा आदर केरु।

53परमेश्वरै भूखै म्हणू शोभली चीज़ा सैंघै तृप्त केरै,

होर सेठ मांहणु खाली हौथ वापस भेज़ै।

54परमेश्वरै आपणै सेवक इस्राएलै री मज़त केरी,

कि सौ आपणी तेसा दया बै याद केरला,

55ज़ो अब्राहम होर तेइरै खानदाना पैंधै सदा रौहणी,

ज़ैण्ढा कि प्रभुऐ आसरै बुज़ुर्गा बै बोलू सा।”

56मरियम लगभग त्रा म्हीनै ढौई इलिशिबा सैंघै रौही होर तेथा न बाद आपणै घौरा बै वापस नौठी।

यूहन्ना बपतिस्मा देणु आल़ै रा जन्म

57तैबै एलीशिबै रै सुज़णै रै ध्याड़ै पूरै हुऐ, होर तेसै एकी बेटै बै जन्म धिना। 58ज़ैबै तेसरै पड़ोसियै होर रिश्तैदारै शुणू कि प्रभुऐ तेसा पैंधै केतरी दया केरी सा तैबै तिन्हैं तेसा सैंघै खुशी मनाई। 59ज़ैबै शोहरू औठ रोज़ा रा हुआ, तैबै ते तेइरा खतना केरदै आऐ होर तेइरा नाँ तेइरै बापू रै नाँ पैंधै जकर्याह रखणा च़ाहा ती। 60परन्तु तेइरी आमा इलिशिबै बोलू, “नैंई ऐईरा नाँ यूहन्ना रखणा।” 61तिन्हैं लोकै इलिशिबा बै बोलू, “तेरै रिश्तैदारा मौंझ़ै कौसी रा ऐण्ढा नाँ नी ऑथि।” 62तैबै तिन्हैं शोहरू रै बापू न इशारै सैंघै पुछ़ू, “कि तू ऐई शोहरू रा कि नाँ रखणा च़ाहा सा?” 63तेइयै लिखणै री पौटी मँगाई होर तेथा पैंधै लिखू, “ऐईरा नाँ यूहन्ना सा,” तैबै सैभी बै बोहू हैरानी हुई। 64तैबै एकदम जकर्याह गैला केरदा लागा होर परमेश्वरा रा धन्यवाद केरदा लागा। 65तेई रै औरै-पौरै रौहणु आल़ै लोका डौरै होर ऐसा गैलै री खबर यहूदिया रै सारै पहाड़ी देशा न फैली। 66सब शुणनु आल़ै आपणै-आपणै मना न बिच़ार केरदै लागै, कि “ऐई शोहरू कैण्ढै होंणा होला।” किबैकि प्रभु रा अनुग्रह ऐई पैंधै सा।

जकर्याह प्रभु री स्तुति केरा सा

67तेई शोहरू रा बापू जकर्याह पवित्र आत्मा न भौरूआ होर, भविष्यवाणी केरदा लागा;

68“इस्राएला रा प्रभु परमेश्वर धन्य सा,

किबैकि तेइयै आपणै लोका पैंधै कृपा

दृष्टि केरी

होर तिन्हरा छुटकारा केरू सा।

69होर आपणै सेवक दाऊदै रै खानदाना न,

आसरी तैंईंयैं एक महान मुक्ति देणु आल़ा भेज़ू सा,

70ज़ैण्ढा कि परमेश्वरै आपणै पराणै बौगतै रै पवित्र, भविष्यवाणी केरनु आल़ै रै द्वारा बोलू ती।

71परमेश्वरै आसरै सैभ दुश्मन होर,

बैरी रै हौथा न आसरा उद्धार केरू सा।

72परमेश्वरै आपणै वायदै बै ज़ो आसरै बुज़ुर्गा सैंघै केरी ती,

तेसा याद केरिया आपणै लोका पैंधै दया केरी।

73सौहै वायदा परमेश्वरै आसरै बापू

अब्राहमा सैंघै केरू ती।

74“परमेश्वरा आसै दुश्मना रै हौथा न छ़ुड़ाणै ताकि,

आसै नडौरै होईया परमेश्वरै री सेवा केरी सकलै।

75ताकि आसै पवित्रता होर धार्मिकता

सैंघै, ज़िंदगी भर परमेश्वरै री सेवा केरलै।

76ओ शोहरुआ तौ परमप्रधाना री

भविष्यवाणी केरनु आल़ा कहलाइणा,

किबैकि तौ प्रभु रै ऐणै री तैंईंयैं

लोका त्यार केरनै, #मला. 3:1; यशा. 40:3.

77तौ परमेश्वरा रै लोका बै ऐ दैसणा कि,

तेई तिन्हां बै कैण्ढै माफ़ केरना;

होर तिन्हां बै पापा री माफी री तैंईंयैं

सज़ा न कैण्ढै बच़ाई सका सी।

78परमेश्वरै री बड़ी दया सैंघै,

स्वर्गा न आसा पैंधै ज्योति च़मकणी।

79ताकि ऐ ज्योति निहारै होर मौऊती रै डौरा न बेठैंदै लोका री तैंईंयैं पुजली होर,

आसाबै शान्ति री बौतै औंढणै न बौत रिहाऐ केरली।” #यशा. 58:8; यशा. 60:1; यशा. 9:2.

80शोहरू यूहन्ना बड़ा होंदा रौहू होर आत्मिक शक्ति न बढ़दा रौहू। बड़ै होंणै न बाद ज़ाँ तैंईंयैं तेइयै इस्राएली लोका मौंझ़ै आपणी सेवा शुरू नी केरी ताँ तैंईंयैं सौ सुनसान ज़ैगा न रौहू।

Écouter लूका 1