If you would like a copy of this version please contact info@davaraudiobibles.org

Dogri Bible, CC-BY-SA-4.0, Beyond Translation. (Text)
Dogri Audio Bible, CC-BY-SA-4.0, Davar Partners International, Beyond Translation, 2026. (Audio)

Dogri Bible

This work is licensed under Creative Commons Attribution-ShareAlike 4.0 License.

यीशु ते ओदे चेलें यरीहो बिचें ओईयै शैर गी जा दे हे। उत्थें जक्कई नां दा एक मानु हा, जेड़ा चुंगी लेने आलें दा प्रधान ते तनी हा। ओ यीशु गी दिखना चांदा हा के ओ केडा ऐ। लेकन पीड दी बजा कन्ने ओ नेई दिखी सकया, किके ओ नाटा हा। ते उसी दिखन लेई ओ अगें दौडीयै एक गुलर दे बूट्टे उपर चढ़ी गीया, किके यीशु उसै रस्ते जाने आला हा। जेलै यीशु ओस जगह पूजया, ते उपर नजर मारीयै उसी आखया, ए जक्कई, चट उतरी आ; किके अज्ज मिगी तेरे कर च रौना जरुरी ऐ। ओ फोरन उतरीयै खुशी कन्ने उसी अपने कर लेई गीया।
ए दिखियै सारे लोक कुड्कुडाईयै आखन लगे, “ए तां एक पापी मानु दे कर प्रोना बनियै गीया ऐ।”
जक्कई ने खड़े ओईयै प्रभु गी आखया, “ए प्रभु, देख्ख, आऊँ अपनी अध्दी दौलत गरीबें गी देई दिना, ते जेकर मैं कुसे दा केछ बेन्यायी करियै लेत्ता ऐ तां उसी चारगुना पी देई ओड़ना। ओस बेलै यीशु ने उसी आखया,” अज्ज एस कर च उद्धार आया ऐ, एसकरी के एबी अब्राहम दा एक पुत्तर ऐ। किके मनुक्ख दा पुत्तर गुआचें दें गी तुपन ते उनेंगी बचाने लेई आया ऐ।

जेलै ओ ए गल्लां सुना दे हे, ते ओनें एक मसाल बेच आखया, एसकरी के ओ यरूशलेम दे कोल हा, ते ओ समझदे हे के परमेसर दा राज ऊन परकट रूप च औने आला ऐ। खीरी च ओनें आखया, “एक तनी मानु दूर देश च गीया के अपने लेई राज पद्द पाईयै बापस औग। ओनें अपने दासें बिचा दस गी बलाईयै उनेंगी दस मोरां दितीयां ते उनेंगी आखया, मेरे बापस औने तकर लैंन-देन करयो।” लेकन ओसदे शैर दे रौने आले ओदे कन्ने बैर रखदे हे, ते ओदे पिछें दूतें कन्ने आखी पेजया, “के अस नेई चांदे के ए साड़े उपर राज करै।”
“जेलै ओ राज पद्द पाईयै बापस आया, तां ऐसा ओया के ओनें अपने दासें जिन्नें गी ओनें तन दिता हा बुलाया, तां के पता करै के उनै किन्ना-किन्ना तन कमाया।” ओस बेलै पैले ने आईयै आखया, “ए मालक, तेरी मोरें कन्ने दस मोरां ओर कमाई न।” ओनें उसी आखया, तन्न, ए अच्छे दास, तू मते गै थूड़ें च मानदार निकलया ऊन दस शैरें उपर अख्त्यार रख। दुए ने आईयै आखया, ए मालक, तेरी मोरें कन्ने पंज ओर मोरां कमाईयां। ओनें उसी आखया, तू बी पंजें शैर उपर अख्त्यार रख। त्रिऐ ने आईयै आखया, “ए मालक, देख्ख तेरी मोर ए ऐ, जिसी मैं कपड़े च बन्नीयै रखे दा हा। किके आऊँ तेरे कोलां डरदा हा, एसकरी के तू कठोर मानु ऐं; जेड़ा तू नेई रखदा उसी चुकी लेना ऐं, ते जेड़ा तू नेई रांदा, उसी बढना ऐ।” ओनें उसी आखया, “ए दुष्ट दास, आऊँ तेरे गै मुंह थमां तुगी कसुरबार आखना ऐं। तू मिगी जानदा हा किके आऊँ कठोर मनुक्ख ऐं, जेड़ा आऊँ नेई रखदा उसी चुकी लेना ऐं, ते जेड़ा आऊँ नेई रांना उसी बड्डना ऐं; ते तो मेरे रूपये बेंक दे बेच कि नेई रखी दिते के आऊँ आईयै ब्याज समेत लेई लैंदा हा। ते जेड़े लोक कोल खडोते दे हे, ओनें उनेंगी आखया, ओ मोरां ओसदे कोलां लेई लियो, ते जेसदे कोल दस न उसी देई ओड़ो।” उनै उसी आखया, “ए मालक, ओसदे कोल दस मोरां ते ऐ न।” आऊँ तुसेंगी आखना ऐं के, “जिन्दे कोल ऐ, उसी ओर दिता जाग; ते जिसदे कोल नेई ऐ, ओसदे कोल ओ बी जेड़ा ओसदे कोल ऐ लेई लेता जाग। लेकन मेरे ओनें बैरीयें गी जेड़े नेई चांदे हे के आऊँ उन्दे उपर राज करां, उनेंगी इत्त्थैं लयाईयै मेरे अगें मारी ओड़ो।”

ए गल्लां बोलियै ओ यरूशलेम गी अपने चेलें दे अगें-अगें गीया।
ते जेलै ओ जैतून नां दे पाड़ उपर बैतफगे ते बैतनिय्याह दे कोल पूजया, ते ओनें अपने चेलां बिचा दों गी ए बोलियै पेजया, “सामने आले घरां च जाओ; ते उत्थें पूजदे गै एक गदही दा बच्चा जेसदे उपर कदें बी कोई सवार नेई ओया, बनें दा तुसेंगी मिलग, उसी खोलियै लेई आओ। जेकर कोई तुसेंगी पूछै के कि खोलदे ओ, तां ए बोली ओड़या के प्रभु गी एस दी जरुरत ऐ।”
जेड़े पेजे गै हे, उनै जाईयै जियां ओनें उनेंगी गलाया दा हा, उयांगै ओ गदही दा बच्चा लबा। जेलै ओ गदही दे बच्चे दी खोलां दे हे, तां ओदे मालकें पूछया, “एस बच्चे गी कि खोलदे ओ?” उनै आखया, “प्रभु गी एस दी लोड ऐ।” ओ उसी यीशु दे कोल लेई आए, ते अपने कपड़े ओस गदही दे बच्चे उपर पाईयै यीशु गी ओसदे उपर बैठाई दिता। जेलै यीशु जा दा हा, तां लोक अपने कपड़े रस्ते च बछांनदे जनदे हे।
ते कोल औंदे ओई जेलै ओ जैतून पाड दी टलांन उपर पूजया, ते चेलें दी सारा जथा उनै सारे चमत्कार दे कम्में दे कारन जेड़े उनै दिखे दे हे, खोश ओईयै उच्ची बाज कन्ने परमेसर दी स्तुति करन लगे,
“धन्न ऐ ओ राजा, जेड़ा प्रभु दे नां बेच ओंदा ऐ! सोर्ग च शान्ति ते अम्बर बेच ओदी मैमा उवै!”
पी लोकें बिचा केछ फरीसी उसी बोलन लगे, “ए गुरु, अपने चेलें गी चोप्प करा।” ओनें जबाब दिता, “आऊँ तुसेंगी आखना ऐं, जेकर ए चोप्प रे तां पत्थर करलाई उठगन।”

जेलै यरूशलेम दे कोल आया तां शैर गी दिखियै ओस उपर रोया। ते आखया, “किन्ना गै पला ओंदा हा के तू, आं, तू गै, इसै धयाडै शान्ति दियां गल्लां जानदा, लेकन ऊन तेरी अखीयाँ कोलां ए गल्लां छपी गईयां न। किके ओ देन तेरे उपर औने के तेरे बैरी मोर्चा बनियै तुगी केरी लैगन, ते चौनी पासें दा तुगी दबागन; ते तुगी ते तेरे कन्ने तेरे जागतें गी, मिट्टी च मिलागन, ते तेरे च पत्थर उपर पत्थर बी नेई छुड़गन, किके तू ओस मौके गी जेलै तेरे उपर रैम दी नजर दिती गेई ही नेई पछांनया।”

ओस बेलै ओ यरूशलेम दे मंदर च जाईयै वपार करने आलें गी बार कढन लगया, ते उनेंगी आखया, “लिखे दा ऐ, मेरा कर प्रार्थना दा कर ओग, लेकन तुसें उसी डाकुऐं दी खो बनाई दिता ऐ।”
ते ओ हर देन मंदर च प्रचार करदा हा; ते प्रधान याजकें ते शास्त्री लोकें दे प्रधान उसी मरने दा मौका तुपदे हे। लेकन कोई तरीका नेई कढी सके के ए केस तरीके करचै, किके सारे लोक बड़ी चा कन्ने ओसदी सुन्दे हे।

Écouter लूका 19