Nugunu - 2017 CABTAL (NT) Non-Drama

Nugunu - 2017 CABTAL (NT) Drama

Naá buisí moánɛ bɔ́ɔbɔ, Yésusu go húme naá nnyaŋá, go ɛ́da lukumene naá cɔ́lɔ ya máŋɛ́ go go húunenye. Gɔ́ɔ bitúu bitúu bá batɔ bɛ́ bábándamɔ́ mekúígíi nɛhɛ́, bó báá ŋaáa goŋaá a bólɛga naá gilué, a lukumene kɔ́ɔ. Bitúu bá batɔ go síene naá cɔ́lɔ.

Gɛ́hɛ́ go ɛ́da go bó oyanɛna gɛca gá moóma go ncaba, a amɔ́ gáábɔ́ a amɔ́: «Gɔ́ɔ mɔtɔ ummue a hémemú go go kasana masámá. A lɛ́ naá go kasana nɔ́ɔnɔ, masámá móncodío go oba go pɛ́ gimbúlúu; munoní mó búú úlé, mó báá nyáá púmú. Masámá móncoó má bóó obá naá hoóma há adánɛ́, anáa cí ɛ mbaá lɛ ɛ dɛ íŋénénée. Camɔ́ sɛ́ báá basá gɛcamɛna kanɛ go dómba, goakɛ́ cí ɛ dɛ mbáa lɛ yɛ íŋenene. Aŋa gɛonyá gɛ́ mbɛɛ́ ɛ́dá go noma, gɛ́ báá lókónónyóo baaná bá magónɛ́dá bɔ́ɔbɔ, bá báá kótáa go kanɛ ɛŋaŋá. Masámá móncoó má bóó obá naá musíníni, musíníni mɔ́ɔmɔ mó búú úbígéné, mó báá mɔ́mɛ́nɔ́ɔ magónɛ́dá. Gɔ́ɔ masámá móncodío mó obanamɔ́ naá gɛnɔ́gɔ́ gá cí, má báá ágánáa bɛondá: gɛondá gímmue na camɔ́ ntɛdɛ, gɛ́ɛgɛ na camɔ́ otíno ádadɔ́, gɛ́ɛgɛ gɔnɔ́ na camɔ́ nitíno na sɛ́ɔ́dɔ́.» Yésusu go gídene a amɔ́: «Mɔ́ɔnyɔ a lɔ́mɔ́ na edúu ɔ ɔ́bɔ!»


Gɔ́ɔ behúúní bá Yésusu bá mo báyɛkɛnamɔ́, bá amɔ́ gɛ́hɛ́ bá amɔ́: «Go busío báakɛ́ o bó gálagalamɔ́ na ncaba o?» Yésusu go bó gundie a amɔ́: «Bɛɛnyɔ́ɔ no lɛ́ bɛáalú goíyime gá nnindíi sá Bufuŋe bá mmoɛná, kanɛ́ bɔ́ɔ bá lɛ́ kanɛ go bɛa. Mammana, mɔtɔ mɔ́ɔnyɔ a bɛananamɔ́, bá ŋga gɔnɔ́ mo gídene, a bɛ́ɛmba naá fundufundu. Kanɛ́ mɔ́ɔnyɔ a lɔ́mɔ́ a dɛ bɛanánáa, bá ŋgu úlíe akɛ́ sɔŋɛ yɛ́ɛyɛ a bɛananamɔ́. Go busío bá ndiemi gɔ́ɔ mbó gálagalamɔ́ go ncaba go goŋaá bá núune kanɛ go ɛ́na, bá gɔnɔ bódólonyo kanɛ go ɔ́bɔ aŋa bó lɔ́mɔ́ naá cí. Gáábɔ́ gɔ́ɔ mbúsí ya Asaŋa Iseyíi, ɛ mbaá lɛ ɛ gálagala yɛ amɔ́:
“Akɛ́ no bódólonyo nɛɛ́nɛ, no do ná bóso go ɔ́bɔ.
Akɛ́ no núune nɛɛ́nɛ, no do ná bóso go ɛ́na.
Mammana odɛ́má yá boɛ́nɔ bɔ́ɔbɔ yó lala,
bá á bácóá edúu,
bá báá buyíményée oŋgíso go goŋaá bá dɛ ɛ́ná boóma na oŋgíso yábɔ́,
bá dɛ ɔ́bɔ́ boóma na edúu yábɔ́,
odɛ́má yábɔ́ yó do dígímídé
náana goŋaá bá dɛ núgíe gɛɔyɔ gábɔ́. Yɔmɔ́ɔ kanɛ́ mbó éŋugie.”
«Kanɛ́ go busío bɛ́nyɔ́, no lɛ́ besé makɔ́nɔ́ go goŋaá oŋgíso yɛ́nyɔ́ yá ɛ́nana, edúu yɛ́nyɔ́ yɔ́ ɔ́bɔnɔ! Mammana, ŋgaá nyó oyáná daŋɛ́daŋɛ caá: gɛcɛcá gá mbúsí sá Asaŋa na bɛtɛ́nɛ́ɛ bá batɔ gɛca bá mba lɛ́gálɛ́gáa go ɛ́na bɔ́ɔbɔ no ɛ́nanamɔ́, kanɛ́ bá lɛ́ kanɛ go bó ɛ́na. Bɔ́ ɔ́bɔnɔ bɔ́ɔbɔ no ɔ́bɔnɔmɔ́, kanɛ́ bá lɛ́ kanɛ go ɔ́bɔ.


«Kanɛ́ bódólónyóomú nɔnɔ naá cí gofalona gá ncaba ya uyogóní ba go kasana masámá. Batɔ báaba bá bódólonyomú nogálɔ nɔ́ɔnɔ nó oyamɔ́ Bufuŋe bá dɛ nó ɔ́bɔ́, bá lɛ́ caŋa táŋɛ́ mmue aŋa masámá máama mó obamɔ́ go pɛ́ gimbúlúu; Ohándá u úle a báá bolá, a bála bɔ́ɔbɔ bó lɔ́mɔ́ gónáalú naá odɛ́má yábɔ́. Bóntió bá lɛ́ caŋa táŋɛ́ mmue aŋa cí ya adánɛ́ anáa masámá mó obamɔ́; bá bódólonyo nogálɔ bá gunde bá nó gɛ́ndɛgɛna hɔ́ɔ na hɔ́ɔ na bɛyaŋa. Kanɛ́ bá dɛ nó dɛ́ɛ́ná, nó sume ɛŋaŋá naá bɔ́ɔ. Bá lɛ́ batɔ bá moɔnɔ́ ba gɛcamɛna. Aŋa gɔ́ɔgɔ gɛdɔmbɔ na noséésényée mó bó bolɛnamɔ́ go busío bá nogálɔ, bá dómba go umbe gioliminyo. Batɔ bóntió gɔnɔ́ bá bɛanana masámá naá musíníni; bá mba bódólónyóo nogálɔ, kanɛ́ mecíkílí má gɛɔyɔ gá cí yɛ́ɛyɛ na golɛ́galɛga gá bonɔ́mɛ bá mbele mó lɛ go mɔ́mɛnɔ nogálɔ, nó lɔbɛnɔ kanɛ go ága gɛsamɔ́. Batɔ bóncodío naá mesúgudinye bá bɛanana masámá naá gɛnɔ́gɔ́ gá cí; bá bódólonyo nogálɔ bá gɔnɔ nó ɔ́bɔnɔ naá cí. Bɔ́ɔ bá áganamɔ́ bɛondá: gímmue camɔ́ ntɛdɛ, gɛ́ɛgɛ camɔ́ otíno ádadɔ́, gíntió camɔ́ nitíno na sɛ́ɔ́dɔ́.»

Yésusu go gɔnɔ bó ágɛna ncaba intió a amɔ́: «Náana gɔ́ɔ Bufuŋe bá mmoɛná bó lɔ́mɔ́: Mɔtɔ ummue a mba góná camɔ́ naá mɔ́ ntɛ́mɛ́. Na budúgú, mɔtɔ uŋkimée a ná lɛ́ go dɔnɔ́ɔ, obɛlɔ́bɛlɔ bɛhɛ́ go úle a báá bolá, gɛ́hɛ́ go góna gɛbɛ́ gá mbínyí naá kadɛ́gadɛ́ɛ ya belée, a báa lɛ gó biene pɛ́. Aŋa gɔ́ɔgɔ magónɛ́dá má mbaá basá, má báá ágánáa bɛondá, gɛbɛ́ gá mbínyí go basa tɔ́nɔ.» Gɔ́ɔ boyogóní bá mɔtɔ ba ntɛ́mɛ́ bá ncomɔ́ mo oyana bá amɔ́: «Ogɔ́nɔ́ɔ, o mba gónáa gɛnɔ́gɔ́ gá camɔ́ naá mamɔ́ ntɛ́mɛ́: gɛbɛ́ gá mbínyí gíiní gɛ́ ɛ́damɔ́ go úle áhanɛ́ɛ o?» A báa lɛ gó bó gundie a amɔ́: «A lɔ́mɔ́ obɛlɔ́bɛlɔ mɔ́ɔ a á ná ŋaáa boóma bɔ́ɔbɔ.» Boyogóní go mo úhune kanɛ́ bá amɔ́: «O lɛ́galɛga goŋaá dɛ ɛ́da bála gɛbɛ́ gá mbínyí moánɛ lí?» Gɛ́hɛ́ go bó gundie a amɔ́: «Akɛ́ɛ, goakɛ́ naá gobála gɛbɛ́ gá mbínyí, no lɛ́ ba go bála tɔ́nɔ belée. Dɛ́ɛ́na nɔnɔ mó goma oŋɛndɔ yúmmue bó ɛ́da héme naá masáŋa. Gɔ́ɔ naá gɛcamɛna moánɛ, ka ŋgo oyáná boyogóní bá masáŋa caá: Manɛ́ no bála gɛbɛ́ gá mbínyí, no gɛ́ góda go páŋá go go dɔ́yɛgɔ. Naá nnyimé, no lɔ go sáŋa belée, no ágana naá gɛɔ́lɔ gámɛ.»


Yésusu go bó ágɛna ncaba intió a amɔ́: «Bufuŋe bá mmoɛná bó lɔ́mɔ́ caŋa táŋɛ́ mmue aŋa camɔ́ ya motáladɛ yɛ́ɛyɛ mɔtɔ a mbaá góná naá mɔ́ ntɛ́mɛ́. Bó lɛ́ ɛcaácamɔ́ naá camɔ́ iŋkimée. Kanɛ́ aŋa ɛ gomamɔ́, ɛ lɛ go ɛ́ya gɛantá gá boɛ́tɛ naá mogónagónáa muimée: ɛ bɛ́ɛmba boɛ́tɛ bɔ́ɔbɔ munoní mó ncomɔ́ fóaga aŋaanɔ yá mɔ́ naá ɛtáfɛ yabɔ́.»


Yésusu go gɔnɔ bó ágɛna ncaba intió a amɔ́: «Bufuŋe bá mmoɛná bó lɛ́ caŋa táŋɛ́ mmue aŋa ondɔ yá go fudugenye uguŋe, yɔ́ɔyɔ okɔ́dɔ a gɔ́lɔnɔmɔ́ a dɔ́bɔnɔ naá uguŋe kílo nitíno na ɛtáanɔ gó ɛ́da go éme aŋa gikébé gɛ́ gaá ná fudúgée.»


Yésusu a mba lɛ́ o oyanɛna bitúu bitúu bá batɔ moóma go ncaba. A dɛ mbáa lɛ a bó gálagala kanɛ go ága ncaba. A mbaá lɛ a ŋanana nɔ́ɔnɔ goŋaá nogálɔ ná mbúsí ya Asaŋa nɔ́ɔnɔ nó ɛ́nanɛna, nogálɔ moánɛ nó lɔ́mɔ́ nó amɔ́: «Ka ŋga bó gálágáláa go ncaba, ka ŋga bó dúmbénínyée moóma má nnindíi gó bayɛga aŋa cí ɛ mbaá básaŋá.»

Gɔ́ɔ a síemú a báá dɛ́ɛ́ná bitúu bá batɔ, a bɛ́ɛ́ ɛ́dá naá nnyaŋá. Behúúní bɛ́hɛ́ go mo báyɛkɛna bá amɔ́ gɛ́hɛ́ aá: «Có falónɛ́náamɔ́ ncaba ya gɛbɛ́ gá mbínyí naá ntɛ́mɛ́.» Yésusu go bó gundie a amɔ́: «Mɔ́ɔnyɔ a kasanamɔ́ gɛnɔ́gɔ́ gá masámá a lɔ́mɔ́ Moɔnɔ́ ba mɔtɔ. Ntɛ́mɛ́ ɛ lɔ́mɔ́ batɔ bá cí; gɛnɔ́gɔ́ gá masámá gɛ́ lɔ́mɔ́ batɔ báaba bɔ́ ɔ́bɛnɔnɔmɔ́ na Bufuŋe bá mmoɛná; gɛbɛ́ gá mbínyí gɛ́ lɔ́mɔ́ batɔ báaba bɔ́ ɔ́bɔnɛnɔmɔ́ na Ohándá. Obɛlɔ́bɛlɔ mɔ́ɔnyɔ a kasanamɔ́ gɛbɛ́ gá mbínyí a lɔ́mɔ́ Ohándá; masáŋa má má lɔ́mɔ́ mamáná má cí; beséŋí bá lɔ́mɔ́ bɛɛ́ŋgɛlɛsɛ. Gɔgɔ́ aŋa bá bálamɔ́ gɛbɛ́ gá mbínyí go go nɔɔ naá íyuke, nɔ́ɔ gɔ́ɔ bó ŋgaá bɛ́ɛ́mbá caŋa mmue naá mamáná má cí. Moɔnɔ́ ba mɔtɔ a ŋga dómá bɛɛ́ŋgɛlɛsɛ bɛ́hɛ́, bú úlie naá Bugúmigumi bá mmoɛná, biimée báaba bá ŋananamɔ́ goŋaá batɔ bó obana naá gɛlɔgɔ, na báaba bá ŋananamɔ́ gɛbɛ́. Bá ŋga bó nɔɔnɔ́nɔ́ɔ naá gɛbɔlɔ́gɔdɔ gá íyuke, anáa mbií na gobanda gá bigélédé mó lɔ́mɔ́. Kanɛ́ besi bá batɔ bá ŋga sánáa aŋa buisí naá Bufuŋe bá Isée babɔ́. Mɔ́ɔnyɔ a lɔ́mɔ́ na edúu ɔ ɔ́bɔ!»

«Bufuŋe bá mmoɛná bó lɛ́ aŋa bonɔ́mɛ bɔ́ɔbɔ bó lɔ́mɔ́ ɔsɛ́gɔ́ɔlú naá ntɛ́mɛ́; aŋa mɔtɔ a bó dambonamɔ́, a gɔnɔ bó ɔsɛgɔ. Na bɛyaŋa dácɛ, ɛ ɛ́da dúe buimée bɔ́ɔbɔ a bɛananamɔ́ go go nco go ɔ́ndɔ ntɛ́mɛ́ yɛ́ɛyɔ.
«Bufuŋe bá mmoɛná bó lɛ́ aŋa udúí moóma mɔ́ɔnyɔ a fúmbemú bɛnɔ́gɔ́ bá ndɛŋɔ. Aŋa a dambonamɔ́ ndɛŋɔ ya go oŋona muinyí gɛca, ɛ ɛ́da dúe buimée bɔ́ɔbɔ a bɛananamɔ́ go go nco yɛ ɔ́ndɔ.»

«Bufuŋe bá mmoɛná bó lɛ́ aŋa mafɔ́ɔ́dɔ́ɔ máama bonóbí bá nɔɔnɔnɔmɔ́ naá máŋɛ́ go go gumbenene mbɔ́dɔ mbɔ́dɔ sá moɔbɔ́ iŋkimée. Aŋa mafɔ́ɔ́dɔ́ɔ má hóogomú na moɔbɔ́, bá lɛ go má gɔ́gɔ naá kɔndɔ. Bá lukumene, bí íye; bá ágana naá ncada moɔbɔ́ má bese; bú umbenene má kanɛ ndénégé. Bó ŋga bɛ́ɛ́mbá nɔ́ɔnɔ naá mamáná má cí; bɛɛ́ŋgɛlɛsɛ bá ŋgu úlé, bá dádona besi na mbɛ́ sá batɔ, bá nɔɔnɔnɔ mbɛ́ sá batɔ naá gɛbɔlɔ́gɔdɔ gá íyuke; hɔ́ɔ gɔ́ɔ bá ná baŋamɔ́ bá gunde bá banda bigélédé.»
Yésusu go bó úhune a amɔ́: «No ɔ́ ɔ́bɔ́ buimée bɔ́ɔbɔ o?» Behúúní go mo gundie bá amɔ́: «Ɛɛ́ɛŋ!» Gɛ́hɛ́ kanɛ́ go yibe a amɔ́: «Kɔ́ɔ bó lɔ́mɔ́, iloodio há bicele hiimée hɛ́ɛhɛ hɛ́ bɛamɔ́ nciŋí ya masɛnɛ má Bufuŋe bá mmoɛná, hɛ́ lɛ́ aŋa mɔtɔ ba nnyaŋá mɔ́ɔnyɔ a bódamɔ́ bonɔ́mɛ bɛ́hɛ́ naá moóma má mofáa na naá má cóá.»


Aŋa Yésusu a mbaá dɔmbɔ́ go bó áganɛna ncaba sɛ́ɛsɔ, gɛ́hɛ́ go úlukie hɔ́ɔlɔ́. A á gundé naá gɛdɔŋɔ gɛ́hɛ́ gá mbíényée, go ɛ́da go húunenye boɛhɛ́ naá nnyaŋá sábɔ́ sá mbósógólí. Boɛhɛ́ go ɛ́da go békúke gohúunenye gɛ́hɛ́, bá gálagala bá amɔ́: «Nciŋí na bogaaga bá go ŋanana bɛsɛɔ bɛ́ɛbɛ mó ɛ́damɔ́ mo úlenine áhanɛ́ɛ o? Ábɔ caá mɔ́ɔ a lɔ́mɔ́ moɔnɔ́ ba ufúégí nnyaŋá o? Malɛ́a a dɛ báá nnyeedíi dɔ́gɔ́? Ábɔ caá bolimóní bá banɔ́mɔtɔ́ bábáa bá lɔ́mɔ́ Sáakɛ, Yósɛbɛ, Símono na Yúude o? Bá bakɔ́dɔ, caá bɔ́ɔ bábáa bɔ́ ɔyɔmɔ́ nɛcɔ́ o? Kanɛ́ buimée bɔ́ɔbɔ bó ɛ́damɔ́ mo úlenine áhanɛ́ɛ o?» Moóma mɔ́ɔmɔ mó mbaá lɔmɔ́ mó bó legene go ága odɛ́má yábɔ́ naá mɔ́ɔ mɔ́mɔ́ɔ. Gɔ́ɔ Yésusu a bó oyanamɔ́ a amɔ́: «Goana mbúsí ya Asaŋa ɛ lɔ́mɔ́ ɛ dɛ báá na ufíno naá boɛhɛ́, akɛ́ naá ncíbo yɛhɛ́ ya batɔ.» Gɛlalaga gábɔ́ gá odɛ́má gɛ́ lɛ́ mo legéelú goŋaá a ŋa bɛsɛɔ makɔ́nɔ́ hɔ́ɔ.

Écouter Motíosi 13