Meta - 2013 CABTAL (NT) Non Drama

Meta - 2013 CABTAL (NT) Drama

À nyaʼa əni ze nɨ nyaʼə nàʼ əmbɨ əni Əchwɨ̂ ə Che-ɨgun, Yeso nyaʼa kyerɨ ni nyùmə̀ nyaʼa fə kùʼ ɨ bɔ nɨ saŋ ɨsɨg wɔ̂ wò əsɨ i Mbǎʼ. Ɨchî nɨ wɨ̀ nyaʼa ghaʼ bə̂d mbe rɨŋga ɨsɨg wɔ̂ nɨ nyaʼa mbi, wɨ̀ nyaʼa ghaʼ əne wò pè ənɨ ɨnwǐ.
Ənɨ Yeso mbɨ mbi mə̀mə̀ə̀nɨ̀-ɨnû nyaʼə jɨgə tɨjɨg rɨ ɨkwirɨ, Debɨ̀rə̀ nyaʼa fə zɨ̀ ɨkɔndɨ ɨŋga fîŋ Judàs Iskàriɔ̀t, nɨ yeʼ wan Saimòn, ni wɨ̀ fen ə Yeso. Yeso nyaʼa kyerɨ ni i Mbǎʼ nyaʼa fə zɨ̀ ɨnû jìm ɨŋga ti rɨkyerɨ-ɨbɔ. Wɨ̀ nyaʼa bə̀ kyerɨ ni à yɨə Ŋwìə̀ nyaʼa tom əwi fɔrɨ ni tə wɨə wɨrɨə wò əsɨ ə Ŋwiə̀. Əne wɨ̀ nyaʼa nɔ̀ʼ rɨ ənɨ wɨ̀ nyaʼə jɨgə, chɨ i ngywɨ̌ maʼi nùŋ, əne nɨŋ ə tawòrə̀ kod ənɨ i ɨkyerɨ. Wɨ̀ nyaʼa ghɨ̀ əne, zɨ̀ mɨnib ɨŋga əkaŋ ə kyeŋ kɔ so ɨwu mə̀mə̀ə̀nɨ̀-ɨnû mbe bə̀ fu ənɨ ə tawòrə̀ we nɨ wɨ̀ nyaʼa kod ənɨ i ɨkyerɨ. Wɨ̀ nyaʼa sò əne wò pè ənɨ Saimon Pità, àyɨə Pità nyaʼa biirɨ ɨ bɔ ni, “Ə̀nùŋɨ̀sɨg, à kɨə kàŋ kəb so mbɨ ɨwu ə?”
Yeso nyaʼa wììrɨ̀ ɨ bɔ ni, “Chəi e ətu ə kɨrɨ zeŋ ɨmbə̀ʼ ənû zɔ̂ nɨ mɨə ghɨ̀ rɨ̀nîn, àyɨə ənɨ əgha ə bɨrɨ nɨ sààrɨ̀, zɨə kɨ zeŋ.”
Pità nyaʼa ghà ɨ bɔ ni, “Chəi à bɨrɨ nɔ so mbɨ ɨwu!”
Yeso nyaʼa wììrɨ̀ ɨ bɔ ni, “À mɨ yeʼ nɨ chəi mə̀ so mbe ɨwu, njɨ kyerɨ ni chəi à berɨ ənû ə mɔʼɔ nɨ ghɨ mbɨ num.”
Saimon Pità nyaʼa ghà ɨ bɔ ni, “Ə̀nùŋɨ̀sɨg, tɨrə̀ so e àmei mbɨ ɨwu, bə̀ sò fɔrɨ mbɨ ɨbɔ mbɨ mɨ ətu!”
Yeso nyaʼa wììrɨ̀ ɨ bɔ ni, “Chəi wə̀d we nɨ fə so i ɨnyod jìm berɨ wɨrɨ so ɨnyod kɨrɨ ənɨ wɨ̀ sɨ so àmei mbi ɨwu, ɨmbə̀ʼ ɨghəm nɨ ɨnyod məd jìm fə zeŋ i. Mbə zeŋ, àyɨə kaʼi mbə̀n mɨjìm zeŋɨ.” Wɨ̀ nyaʼa ghà əne ɨmbə̀ʼ ɨghəm nɨ wɨ̀ nyaʼa kyerɨ wə̀d we nɨ nyaʼa bɨrɨ fen əməd. À yɨ əton nɨ wɨ̀ nyaʼa gha ni, “Chəi mbə̀n mɨjìm zeŋɨ.”
Ənɨ wɨ̀ nyaʼa fə so ɨwu mɨ̀mə̌d, wɨ̀ nyaʼa wɨrɨ nɨŋ i ngywɨ̌ maʼi zɨ̀, wɨrɨ wò chub ənɨ əzi rɨmbin. Wɨ̀ nyaʼa chub əne biirɨ əmbɨ mɨ̀mə̌d ni, “Mbə ɨtu ə zeŋ ɨmbə̀ʼ ənû zɔ̂ nɨ mə ghɨ ənɨ nən ə? Mbə mbɨə tɔŋ əmɨ ni 'Əchwiə̀-ɨnû' bə̀ tɔŋə ni 'Ə̀nùŋɨ̀sɨg.' Ənû nɨ mbə̀ gha ə kùʼ, ɨmbə̀ʼ ɨghəm nɨ à yɨə kaŋə wə̀d we nɨ mə yeʼ wɨwən. Tɨ̀nîn nɨ mɔ̌, nɨ yeʼ wən Ə̀nùŋɨ̀sɨg bə̀ fɔrɨ wən Əchwiə̀-ɨnû fə so mbə ɨwu, mbə̀ bə sò ɨwu mbə bɔŋgɔb. Mə fə chwi ənweenɨ ɨ nən ɨmbə̀ʼ mbə̀ sɨə ghɨ̀ àmei ɨchî nɨ mə fə ghɨ ənɨ ə nən. Mə ghà rəsìʼ ɨ nən ni chəi wə̀d ə̀fàʼì mɔʼɔ nɨ dabə chè i mbǎʼ ə̀fàʼì, kɨ̀ wə̀d tom nɨ dabə chè wə̀d we nɨ tom əməd. Tɨ̀nîn nɨ mbə̀ fə kyerɨ ɨnû mbɔ̂, Ŋwìə̀ zɨ əbɔrəbɔd ɨgwɨ nən ənɨ mbə̀ ghɨ mbɨwən!
“Chəi mɨə ghà ɨnû mbɔ̂ ɨmbə̀ʼ mbə̀n mɨjìm. Mə kyerɨ bə̂d mbe nɨ mə̀ fə chɔʼɔ. Àyɨə ənû ze nɨ yeʼ ɨŋga Ə̀ŋwàʼnɨ̀ ə Ŋwiə̀ ə berɨ jwɨ ənɨ rəsìʼ ni, 'Wə̀d we nɨ nyaʼa jɨgɨ mbɨ num fə bèŋ ənɨ mɨ wə̀d pə̀n'. Mə wɨə ghà ənû zɔ̂ ɨ nən rɨ̀nîn bɔŋ zɨə sɨə ghɨ̀ə̀, ɨmbə̀ʼ ənɨ zɨə ghɨ, mbə bɨrɨ ben ni mɔ̌ yɨə wə̀d we nɨ mə̀ yeʼ wɨwən. Mə ghà rəsìʼ ɨ nən ni wə̀d mɔʼɔ we nɨ nɨŋ wə̀d we nɨ mə̀ tomɨ fə bə̀ nɨŋ əmɨ. We nɨ nɨŋ əmɨ, fə bə nɨŋ wə̀d we nɨ nyaʼa tom əmɨ.”


Ənɨ Yeso nyaʼa fə gha ɨnû mbɔ̂, fîŋ məd nyaʼa kɔ tɔb əməd əne wɨ̀ nyaʼa gha əsaŋ əsaŋ ni, “Mə ghà rəsìʼ ɨ nən ni wə̀d mɔʼɔ rəbɔʼ nən bɨrɨ fen əmɨ.”
Mə̀mə̀ə̀nɨ̀-ɨnû mbe nyaʼa neŋnɨ ɨnyod, sɨə bìd ə wə̀d we nɨ wɨ̀ gha ənû zɔ̂ ɨmbə̀ʼ əməd. Ə̀mə̀ə̀nɨ̀-ɨnû Yeso mɔʼɔ, nɨ yeʼ we nɨ wɨ̀ nyaʼa ghaʼi, nyaʼa chub ɨban məd. Əne Saimon Pità nyaʼa mə̀ ɨ bɔ ənɨ ɨbɔ ni wɨ̀ biirɨ əmbɨ Yeso ni, “Wə̀d we nɨ àwɔ̀ ə ghà ɨmbə̀ʼ əməd kɨə we ə, gha ɨ na.”
Əne ə̀mə̀ə̀nɨ̀-ɨnû we nɨ nyaʼa tindɨ ɨban ə Yeso nyaʼa biirɨ ɨ bɔ ni, “Ə̀nùŋɨ̀sɨg, à kɨə we ə?”
Yeso nyaʼa wììrɨ̀ ni, “À yɨə wə̀d we nɨ mə bɨrɨ chub ŋgə̀ŋ ɨŋga ɨme nàʼ ɨ bɔ.” Ənɨ wɨ̀ nyaʼa chub ŋgə̀ŋ ze ɨŋga ɨme, wɨ̀ nyaʼa nàʼ əmbɨ Judàs we nɨ nyaʼə wan Saimon Iskàriɔ̀t. Ənɨ Judàs nyaʼa nɨŋ ŋgə̀ŋ ze, Satàn nyaʼa bèŋ fîŋ məd. Əne Yeso nyaʼa ghà ɨ bɔ ni, “Zambɨ ghɨ̀ ənû ze nɨ à kəbɨ ghɨ̀.” Chəi wə̀d mɔʼɔ rəbɔʼ bə̂d mbe nɨ nyaʼə jɨgə mbɨ Yeso nyaʼa kyerɨ əton nɨ Yeso nyaʼa gha ɨ bɔ əne. Mbɨ mɔʼɔ nyaʼa kɔndɨ ni ɨchî nɨ à yɨə Judàs nyaʼə yim ə̀bàm ɨkab, Yeso wɨə nyaʼə ghà ɨ bɔ yeʼ ni wɨ̀ zon ɨghɨ mbe nɨ mbɨ bɨrɨ jɨg əchwɨ̂ ze əŋgu, kɨ ni wɨ̀ naʼ əghɨ ə mɔʼɔ əmbɨ ə bə̂d ɨkwaŋ. Ənɨ Judàs nyaʼa fə nɨŋ ŋgə̀ŋ ze, wɨ̀ nyaʼa jwɨ̀ wò ɨsɨg əwu əwən. Ɨsɨ nyaʼa fə fin i.

Ənɨ Judàs nyaʼa fə jwɨ i, Yeso nyaʼa ghà ni, “Nyùmə̀ fə kùʼi nɨ mbɨ bɨrɨ wumnɨ Wan Wə̀d, bə̀ wumnɨ ə Ŋwiə̀ ənjìm məd. Mbɨ mɨ fə wumnɨ ə Ŋwiə̀ ənjìm məd, əne yɨ ni Ŋwìə̀ bɨrɨ bɨ wumnɨ əməd ənjìm ɨnû mbe nɨ wɨə ghɨ̀ə̀. Wɨ̀ bɨrɨ ghɨ əne kwàʼ àmei rɨ̀nîn. Mbɨ bɔn, mə bɨrɨ kɨrɨ chubɨ mbɨ nən ənɨ ɨkə nyùmə̀. Ɨ nɔʼ rɨ əwɔ, mbə bɨrɨ kəb əmɨ rəkan. Ənû ze nɨ mə̀ nyaʼa gha əmbɨ ə bə̂d mbe nɨə tekɨ ɨnû ɨŋga əbeŋ mɨ̀Jû, mə yɨ əni ghà ɨ nən ni, 'Chəi ənɨ tɨ̀ mbə yeʼe əsɨ ze nɨ mɨə wò əŋgu.' Mə yɨ əni nàʼ ɨkə fi ɨ nən ni: mbə̀ ghaʼ mbə bɔŋgɔb. Ɨchî nɨ mə̀ nyaʼa ghaʼ əwən, əne mbə̀ berɨ bɨ ghaʼ mbə bɔŋgɔb. Mbə mɨ ghaʼ mbə bɔŋgɔb, njɨ bə̂d mɨjìm bɨrɨ kyerɨ ni mbə̀ yɨ mbɨ mə̀mə̀ə̀nɨ̀-ɨnû.”


Saimon Pità nyaʼa biirɨ əmbɨ Yeso ni, “Ə̀nùŋɨ̀sɨg, à kɨə wò ə yi ə?”
Yeso nyaʼa wììrɨ̀ ɨ bɔ ni, “Mə wɨə wò əsɨ nɨ chəi ənɨ tɨ à beenɨ əbɔʼ num tɨ̀nîn. Àyɨə à bɨrɨ beenɨ ənɨ əgha ə tɔ sààrɨ̀.”
Pità nyaʼa biirɨ ɨ bɔ ni, “Ə̀nùŋɨ̀sɨg, əton nɨ chəi ənɨ tɨ mə beenɨ əbɔʼ ne tɨ̀nîn kɨ ni ye ə? Mə fə tekɨ mɨ ɨnyod nɨ kwɨ ɨmbə̀ʼ əwe!”
Yeso nyaʼa wììrɨ̀ ni, “À bɨrɨ kaŋ kwɨ ɨmbə̀ʼ əmɨ ə? Mə ghà rəsìʼ ɨ ne ni bɔŋ ɨnoŋgub sɨə tɔŋə, à bɨrɨ fə ton əmɨ ɨghəm tad.”

Écouter Jn 13