℗ Audio 2018 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

蛇係主上帝所創造个動物當中最搞怪个。蛇對該女人講：「上帝敢有影講過你等一定做毋得食園中所有樹頂个果子？」
該女人應講：「園中樹頂个果子𠊎等全部做得食； 只有園中央該頭樹頂个果子，上帝識講：『你等做毋得食，也毋好摸，若毋聽從，你等就會死。』」
蛇對女人講：「你等無一定會死， 因為上帝知你等拿來食，目珠就會變金，你等會像上帝恁樣曉得分別善惡。」
該女人看到該頭樹仔个果子好食、好看、又會給人得到智慧，姖就將果子摘下來食，也拿給厥老公，厥老公也食。 佢兩儕个目珠就金起來，正知自家係赤身露體，就編無花果樹个葉仔來遮身體。
該日臨暗仔，該人㧯厥𡜵娘聽到主上帝在園肚行个聲音，就囥在園肚个樹林中，毋敢見主上帝个面。 主上帝喊該人，對佢講：「你在㖠？」
佢講：「𠊎在園中聽到你个聲，因為𠊎赤身露體，驚到囥起來。」
主上帝講：「麼人㧯你講你赤身露體呢？你敢有食𠊎吩咐你做毋得食該頭樹頂个果子？」
該人講：「你賜給𠊎做伴个女人，姖將該樹頂个果子給𠊎，𠊎就食。」
主上帝問該女人講：「你到底做麼介事呢？」女人講：「蛇引誘𠊎，𠊎就食。」

主上帝對蛇講：
「你既然做這事，就一定受責罰，
會比一切牲畜㧯野獸較衰過。
你愛用肚笥趖，
終身食泥。
𠊎愛使你㧯女人結冤仇；
你个後代㧯女人个後代彼此怨恨。
佢愛打你个頭；
你愛咬佢个腳㬹。」
主上帝又對該女人講：
「𠊎愛大大增加你懷孕个痛苦；
你愛在痛苦中𫱔子女。
你會愛慕若老公；
若老公會管你。」
主上帝又對 亞當 講：
「你既然聽若𡜵娘个話，
食𠊎吩咐你做毋得食該頭樹頂个果子，
土地愛因為你來受咒詛；
你愛一生人勞碌，
正能對土地得到食物。
土地為到你會生竻仔㧯雜草，
你也愛食野生个菜。
你愛汗流脈落正有好食，
直到你歸土，
因為你係對泥出來个。
你本來係泥，
到尾愛歸土。」
亞當 㧯厥𡜵娘安到 夏娃 ，因為姖係人類个阿姆。 主上帝用獸皮做衫褲俾 亞當 㧯厥𡜵娘著。

主上帝講：「看啊！該人已經㧯𠊎等相像，會分別善惡；驚怕佢這下又伸手摘生命樹个果子食，就永遠毋會死。」 所以主上帝將佢逐出 伊甸 園，俾佢去耕種 — 佢本來係對土地出來个。 主上帝逐走該人，又在 伊甸 園東片安設基路伯 㧯四面轉動發火个劍，來掌生命樹个路。

Écouter 創世記 3