Lukë 14

Nyɔɔlɔ 'jajraa' ‑fʋflʋlɩ ɔ Jesu 'pʋɔa'

1‑Srɩlɩ bäa' ‑fʋflʋpasrɩ nɩ, Jesu nya mi Farisinyɔɔa 'cifi 'dooa nyuku ‑wälɩ dɛɛjrörö. ‑Bɛ nyüü prɛrɛ 'ɔɔn 'nyü dɛrɩ. 2Nyɔɔ 'doo nya 'nyüglö 'ɔɔn 'klɩ, 'ɔ 'jajra ‑fʋflʋlɩ. 3Jesu nya dɔrɔ wii 'wʋ, 'ɔnya ‑gbala ‑dɔkpɩanyüü nyra Farisinyüü ‑maa: «‑Asɩ ‑dɔ ‑gba le? ‑Dɔ 'nyie nyɔɔ 'mä nyɔɔ 'pʋɔ ‑fʋflʋpasrɩ 'lɩ?» 4'Ünyɩ mɛ ‑a cɛ. 'Ɔnya dɔrɔ nyɔɔlɔ 'wʋ, 'ɔnya 'pʋɔ 'ɔɔn, 'ɔnya ‑gbala 'ɔɔn ɔ mi. 5'Ɔnya ‑gbala 'üün: «Nyɔɔ 'plɛɛ bä 'ana ‑tɔrʋpɩɔ ɔ ‑nëmä 'ɔa 'jʋ#14.5 'ɔa 'jʋ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «'ɔa ‑sʋbre». 'aiɛ 'ɔa breelɛ blöa' 'bütügba 'lɩ 'bakalɩ mi ‑fʋflʋpasrɩ 'lɩ le?» 6'Ünyɩ 'ɔɔn ‑gälɩ ‑a 'sa.

'Wʋcieciekʋa 'kpɩkpɩakʋ

7Jesu 'jäa' 'sɩrɩ nyüülü 'ü tupoa' dɛɛjijikʋa ‑gʋ 'sosoa' 'wʋ nyüü kpaküa 'töwlö ‑gälɩa tarakʋa ‑gʋ nɩ, 'ɔnya 'pala 'üün tapönänälä kʋa' ‑pɩ 'klɩ: 8«Nyɔɔ ma tuplo ‑mɩ 'titiöa ‑glɩsɩglɩsɩ 'lɩ nɩ, ‑nyɩ kʋ kpaküa nüa 'töwlö ‑gba. ‑Beere dɛɛ 'ɔ tupo nyɔɔ ‑moloo 'ɔ 'bʋa 'ɔnya ‑si ‑mɩ 'wʋ. 9‑Ama nʋ 'saa nyɔɔlɔ tupoa' 'ana 'sɔɔ nya jia 'kä 'ɔnya 'daa: ‹Sɔwʋ nyɔɔlɔ kʋa' ‑pɩ 'mä ‑wälɩkʋ!› 'Inya ‑mɩ 'nyüsü 'wʋ käa ‑mä dɛrɩ kʋkalɩ mi. 10‑Maa nyɔɔ ma tupo ‑mɩ dɛɛjijikʋa ‑gʋ nɩ, 'prɛrɛ dɛrɩ ‑a kʋwälɩ. 'Ia 'taɩn 'lɩ nɩ, nyɔɔlɔ tupoa' ‑mɩ nya jia 'kä 'ɔnya 'daa: ‹'Na ‑bei, ji ‑tɛ 'mʋfa ‑pɩɔ ‑mä ‑wälɩkʋ.› 'Ia 'taɩn 'lɩ nɩ, 'i 'bʋala ‑mɩ 'töwlö ‑gälɩa nyüüa 'fɩɔa 'klʋɩ. 11'A 'ia ‑gʋ nyɔɔ o nyɔɔ 'jraraa' 'ɔa nyufa nɩ, 'ɔnya 'wʋcierea; ‑bɛ nyɔɔ o nyɔɔ 'ciea' 'ɔa nyufa 'wʋ nɩ, 'ɔnya 'jraraa.»

12Jesu nya ‑gbala nyɔɔlɔ tupoa' 'ɔɔn dɛɛji ‑gʋ: «‑Ama pi nyüüa jijri ‑sopuwlaa, 'aiɛ ‑gbiajrʋ 'lɩ nɩ, ‑nyɩ we ‑na ‑gbötü, ‑na ‑wlajü, ‑na 'wʋwʋnyüü. ‑Nyɩ we diikänyüü. 'Ü ‑pɩ bɩa ‑mɩ we 'üa nia 'taɩn 'lɩ. ‑Ama nʋ 'saa nɩ, 'ünya ‑mɩ wea 'abɩa ‑na 'kpa 'ü 'saa. 13‑Maa ‑ama pi ‑glɩsɩglɩsɩa jijri nɩ, tupo nyüülü 'nyɩa' dɛɛ kä, nyüülü 'nyɩ 'nyɛa', ü kpaa', nyra 'nɔnɔnyüü. 14‑Ama nʋ 'saa, abɩa dɔrʋ 'blaa ‑mɩ, 'be 'ünyɩ dɛɛ ‑a kä 'ümä ‑na 'kpa 'sa. Nyɔsʋa nya ‑mɩ 'iin 'pɛɛa 'taɩn 'lɩ 'klɩgänyüüa 'fɩɔ 'mäa' 'kuaabre sɔ.»

‑Glɩsɩglɩsɩ kpakia tapönänä

Matiö 22.1-10

15Nyüülü nyra Jesu tara ɩa' 'wʋ 'nua' 'iin 'wli nɩ, 'üa ‑tɔrʋpɩɔa 'doo nya ‑gbala Jesu: «Dɔrʋ 'blaa ‑mɩ ‑mɔ nyɔɔlɔ nëmäa' Nyɔsʋaa 'kamaplä 'lɩ tara!» 16Jesu nya ‑gbala 'ɔɔn: «Nyɔɔ 'doo pi kä jijri 'kɔkɔmlɛ, 'ɔnya we nyüü 'kɔkɔmlɛ. 17Dɛɛjitaɩn jräa' 'wli nɩ, 'ɔnya blɔ 'ɔa 'jrʋpafɛnyɔɔ nyüülü 'ɔ tupo ɩa' dɛrɩ, ɔ ‑gbala 'üün: ‹'Ba ji! 'Ia 'fɩɔ 'a 'wlara.› 18‑Maa 'üa 'fɩɔ nɩnɩa 'ü ‑jɛmɩ 'ü ‑nëmä ji ‑a ji. ‑Kätɩa nɔlɔ ‑gbala 'jrʋpafɛnyɔɔlɔ ‑maa: ‹'N ‑su putu; 'uu 'n mö 'jäkalɩ. 'N bibie ‑mɩ, cɛrɛ 'mɩ 'iin.› 19‑Moloo ‑nëma: ‹'N ‑su bruu ‑pʋ 'umä 'na putu 'lɩgoglo; 'uu 'n mö 'jä uma 'mrɛɛ. 'N bibie 'ɔɔn, cɛrɛ 'mɩ 'iin.› 20‑Moloo ‑nëmä: ‹'Abɩa 'mɔɔ ‑ka 'ti ɩa', 'ii känyrɩ 'nyɩ 'mrɛɛ ‑a 'mrɛɛ 'mä ji.› 21'Jrʋpafɛnyɔɔlɔ nya 'blöö 'ɔnya 'sa 'ɔa 'kamanyɔɔ ‑gogo. 'Kamanyɔɔlɔ nya ‑tʋ 'crɛ 'ɔnya ‑gbala 'ɔa 'jrʋpafɛnyɔɔ: ‹Mi bätëa 'nyifikpakü mlɩ nyra bätëa 'nyifijie mlɩ; ‑gbala 'pʋablanyüü, 'tokonyüü, 'nɔnɔnyüü nyra kpakpanyüü ü ji.› 22'Jrʋpafɛnyɔɔlɔ nya ‑gbala 'sɔɔwʋ 'ɔa 'kamanyɔɔ 'ɔ ‑nëma: ‹'Kamanyɔɔ, wiili 'daaa' 'i 'a nrörö, ‑maa kʋfa ‑ka bälɩ.› 23'Kamanyɔɔlɔ nya ‑gbala 'ɔɔn: ‹Mi 'klʋɛɛa 'nyifia mlɩ nyra 'pütia 'mäklɩa 'mʋgbɛ, kʋ nyüü 'klɩ 'ümä ji 'na nyuku 'mä 'si. 24'Amɔ 'n ‑gbala: Nyüülü 'n tupo ɩa' ‑bɛ ünyɩa' ji nɩ, 'üa nyɔɔ 'doo ‑nëmä ‑srɩɩ 'na jijrɛ ‑a ji!› »

'Sɩrɩ nyɔɔ bäa' Jesua 'wʋnyɛrɛnyɔɔ

Matiö 10.37-38

25Jesu mö ɩ ‑bɛ nyüü 'kɔkɔmlɛ fala 'ɔɔn. 'Ɔnya ‑sie 'üa 'pɛlɩ kälɩ 'ɔnya ‑gbala 'üün: 26«Nyɔɔ ma 'daa nyra 'ɔɔn 'mä 'nyɛ, ‑bɛ ɔma 'nyɩ 'mɩ ‑a ‑wa ɔma 'nyɩ 'ɔa tʋ nyra 'ɔa 'yio 'wʋ ‑a ‑si, ɔma 'nyɩ 'ɔa 'ŋlʋʋ nyra 'ɔa 'jü 'wʋ ‑a ‑si, ɔma 'nyɩ 'ɔa ‑wlajü nyra 'ɔa ‑wlayörü 'wʋ ‑a ‑si, ‑bɛ ɔma 'nyɩ 'mɩ ‑a ‑wa, ɔma 'nyɩ 'ɔa 'mʋgbɛa 'klä 'wʋ ‑a ‑si nɩ, 'ɔnyɩ 'lɩ ‑a bɩa 'ɔmä 'na 'wʋnyɛrɛnyɔɔ bä. 27Nyɔɔlɔ 'nyɩ ‑gbötöa' 'ɔa krʋa#14.27 Krʋaa ‑gbötökʋa ‑gbaa bä: nyɔɔlɔ 'nyierea' ‑sʋɩ 'klɩ Jesua ‑gʋ, ɔ 'nyierea' jäjäkʋ 'klɩ Jesua ‑gʋ. 'ɔmä 'mɩ dɛrɩprɛ nɩ, 'ɔnyɩ 'lɩ ‑a bɩa ɔ bä 'na 'wʋnyɛrɛnyɔɔ. 28Nyɔɔ 'plɛɛ bä ‑pɩ 'ana ‑tɔrʋpɩɔ, ɔma nëmä nyuku kpaku 'pa, ɔnyɩ kʋwälɩ ɔnyɩ blɛ 'uun 'ɔmä 'iin 'jä ɔma 'mrɛɛ 'ɔmä 'uun 'wlara le? 29Ɔma 'nyɩ 'saa ‑a nʋ, ‑bɛ ɔma 'sri 'ua ‑toko 'kä, ‑bɛ ɔma ‑kanyɩ 'lɩ ‑a bɩa 'ɔmä 'uun 'wlara nɩ, nyüülü kä 'fɩɔ nëmäa' 'ɔɔn 'jä nɩ, srörö 'ü nëmä 'ɔɔn srörö. 30'Ünya 'daa: ‹Nyuku nyɔɔlɔ kʋa' ‑pɩ 'paa ɩ, ‑maa 'ɔ ‑kanyɩ 'ua 'wlarakʋ mlɩ ‑a bɩa!› 31'Aiɛ, 'kɩɩ 'plɛɛ nyra 'kɩɩ ‑moloo ma nëmä tou ‑fu, ɔnyɩ kʋwälɩ ɔnyɩ bobo ‑kätɩ; nyüüa ‑diiglʋ ‑diigböö (10 000) ma 'mrɛɛ ü du ‑mɔlɔ nyra nyüüa ‑diia ‑glʋɩsɔɔ ‑diipʋ (20 000) 'sɔɔ jöa' le? 32'Ɔma jresaa 'ɔnyɩ 'lɩ ‑a bɩa nɩ, 'ɔnya 'diprö blɔa' 'ɔɔ ‑bɛ 'kɩɩ ‑mɔlɔ 'mä 'wli 'nönrö, ‑bɛ 'wlinönrökʋ 'mä 'üa ‑tɔrʋpɩɔ bä. 33'Asɩ nyɔɔ o nyɔɔ bäa' 'ana ‑tɔrʋpɩɔ ma 'nyɩ diili kä 'fɩɔ 'ɔ 'klaaa' dɛrɩ ‑a sɔ nɩ, 'ɔnyɩ 'lɩ ‑a bɩa ɔ bä 'na 'wʋnyɛrɛnyɔɔ.»

Matiö 5.13; Marëkë 9.50

34«Taŋlʋ bä 'mʋfadɛɛ; ‑maa taŋlʋ ma ‑kanyɩ 'ua mɛ ‑a kä, dɛplɛɛ a ‑ka 'mrɛɛ amä ‑plɩɩ nʋ ‑bɛ 'umä 'mɛnɛ le? 35'Unyɩ 'na ‑a 'na ‑tʋtʋa ‑gʋ, 'u ‑nëmä 'nɩmɩ angrɛɛ ‑a bä; ‑fälɩ 'ü be 'uun. Nyɔɔlɔ käa' 'nununyakli ɔ 'nu.»

Tällä hetkellä valittuna:

Lukë 14: Bakwé

Korostus

Jaa

Kopioi