ማርቆሳ ምሽራቹዋ 6
6
የሱሳ ናዝሬተን አከናን እጼድኖ
(ማቶሳ 13:53-58፤ ሉቃሳ 4:16-30)
1የሱስ ሄዋፐ ከሲደ፥ ባረ ጋድያ ናዝሬተ ካታማ ቤዳ፤ አ ካልያዋንቱካ አ ካሊደ ቤድኖ። 2ሳምባታ ጋላስ አይሁዳ ዎሳ ጎልያን ታማርሱዋ ዶሜዳ፤ እ ታማርስያዋ ስሴዳ ጮራ አሳይ ማላለቲደ፥ “ሀዌ ሀ ኡባባ ሀቃፐ ደሜዴ? ሀ አዉ እመቴዳ አ ኤራተይ አዬ? ጾሳይ ኦያ ማላታ እ ዎት ኦ? 3ሀዌ አናጽያ#6:3 አናጽያ፦ ግሪከ ብለን ሹቻ ዎይ ኡርቃ መልሲደ መያ አሳ ጊደ ጎኤቴ። ግደኔ? ማይራም ናኣ፥ ያቆባ እሻ፥ ዮሳ እሻ፥ ይሁዳ እሻ፥ ስሞና እሻ ግደኔ? አ ምቻቱ ኑናና ሀዋን ደእያዋንታ ግድክኖ?” ያጊደ፥ እ ግያዋ አከናን እጼድኖ።
4የሱስ ሄ አሳዉ፥ “ናቢ ባረ ጋድያን፥ ባረ ዳባቱዋንነ ባረንቱ ሶይ አሳን ቦንቼተናዋፐ አትን፥ ኡባ ሳን ቦንቼቴ” ያጌዳ። 5እ ሄዋን ባረ ኩሽያ አማሬዳ አሳቱዋ ቦላ ዎደ፥ ኡንቱንታ ፓዳዋፐ አትን፥ ጮራ ማላታ ኦናዉ አይነ ዳንዳይቤና። 6አሳይ አማንቤና ድራዉ ማላለቴዳ።
የሱስ ታማነ ላኡ ባረና ካልያዋንቱ ታማርሳናዳን ኪቴዳ
(ማቶሳ 10:5-15፤ ሉቃሳ 9:1-6)
ሄዋፐ ጉይያን፥ የሱስ ሄዋ ሄራን ደእያ ቄር ካታማቱዋን ዩይ ዩዪደ፥ አሳ ታማርሴዳ። 7የሱስ ታማነ ላኡ ባረና ካልያዋንታ ባረኮ ጼሲደ፥ ላኡዋ ላኡዋ ኪቴዳ፤ ቃይ ኡንቱንቶ ኢታ አያናቱዋ ከስያ ማታ እሜዳ። 8ኡንቱንታ፥ “ኦግያ ጻምኣፐ አትን፥ ቁማ፥ ቃርጪትያ፥ ህንተዉ ሚሻ አያኔካ ኦይቆፕተ። 9ህንተንቱ ገድያን ጫማካ ዎተ፤ ሽን ላኡ ማዩዋ ማዮፕተ” ያጌዳ። 10ቃይካ ኡንቱንታ፥ “ህንተንታ አሳይ ሀቃን ሞኮፐነ፥ ሄዋፐ ከሳና ጋካናዉ፥ ሄ ጎልያን ኡት አግተ። 11ህንተንታ አሳይ ሞከናሳ ዎይ ህንተ ኦድያባ ስሰናሳ ሀቃ ግዶፐካ፥ ሄ ጋድያን ደእያ አሳዉ ሄዌ ማርካ ግዳና ማላ፥ ሄዋፐ ከሲደ፥ ህንተ ገድያፐ ባና ሾጭተ”#6:11 ህንተ ገድያፐ ባና ሾጭተ፦ ሀዌ አሳይ እጼዳዋ በስያዋ። ያጌዳ።
12ታማነ ላኡ አ ካልያዋንቱ ቢደ፥ አሳይ ባረንቱ ናጋራፐ ስማናዳን፥ ቃላ ኦዴድኖ። 13ኡንቱንቱ አሳፐ ዳሮ ኢታ አያናቱዋ ከሲደ፥ ሀርግያ አሳ ጮራ ዛይትያ ኦኪደ ፓድኖ።#ያቆባ 5:14
ጻማቅያ ዮሃንሳ ሀይቁዋ
(ማቶሳ 14:1-12፤ ሉቃሳ 9:7-9)
14አሳይ የሱሳ ሱን ደንያ ድራዉ፥ ካትያ ሄሮድሰ ሄዋ ኡባ ስሴዳ፤ እት እት አሳይ፥ “ጻማቅያ ዮሃንስ ሀይቁዋፐ ደንዴዳ፤ ሄዎ አዉ ዎልቃማ ማላታ ኦያ ዎልቃይ ደኤ” ያጌዳ።
15ሽን ሀራንቱ አ፥ “ሀዌ ኤላሳ” ያጌድኖ።
ሀራንቱ ቃይ፥ “ሀዌ በን ዎደ ናባቱዋ ማላትያ ናብያ” ያጌድኖ።
16ሽን ሄሮድሰ ሄዋ ስሴዳ ዎደ፥ “ሄዌ ታን ቆያ ሙጭሴዳ ጻማቅያ ዮሃንሳ። እ ሀይቁዋፐ ፓጼዳ” ያጌዳ።
17አያዉ ጎፐ፥ ሄሮድሰ ባረ እሻ ፕልጶሳ ማቻቶ ሄሮድያዶ አክ ዎዳ፤ ሄሮድሰ እዝ ድራዉ፥ ባረ ሁጰዉ አሳ ኪቲደ፥ ዮሃንሳ ኦይደ፥ ቃሽስ ዎዳ። 18አያዉ ጎፐ፥ ዮሃንስ ሄሮድሳ፥ “ኔን ነ እሻ ማቻቶ አካናዉ በሰና” ያግ ዎዳ።
19ሄሮድያዳ ዮሃንሳዉ ኡሉዋን ሞርክያ ኦይቃደ አ ዎሳናዉ ኮያዱ፤ ሽን ዳንዳያበይኩ። 20ዮሃንስ ጽሎ አሳነ ጌሻ አሳ ግዴዳዋ ሄሮድሰ ኤሬዳ ድራዉ፥ አዉ ያዪደ፥ ሎይ ናግ ዎዳ፤ ዮሃንስ ግያዋ ስሲደ፥ ባረ ዎዛናን ዳርስ መቶቲደካ አባ ናሸቻን ስሴዳ።
21ሄሮድሰ ባረ የለቴዳ ጋላስ፥ ጋድያ አይስያዋንቶ፥ ሻላቃቶነ ጋሊላን ደእያ ዎልቃማ አሳዉ ሾብያ ጊግሴዳ ዎደ፥ ዉርሰን ሄሮድያዳ እንጀ ጋላሳ ደማዱ። 22ሄሮድያድ ናታ እማ ሞክያሳ ገላ ዱራደ፥ ሄሮድሳነ አ እማቱዋ ናሸቻዱ፤ ሄዋፐ ጉየ ካቲ ናትዉ፥ “ኔና ሎኤዳዋ አያ ግዶፐነ ታና ኦቻ፤ ታን ነዉ እማና” ያጌዳ። 23ቃይ እዝዉ ዳሪ ጫቂደ፥ “ኔን ኦቼዳዋ አያ ግዶፐካ፥ ታን ነዉ እማና፤ ሀራይ አቶ፥ ታ ካዉተፐ ባጋ ግዶፐካ፥ ታን ነዉ እማና” ያጌዳ።
24ናታ ካረ ከሳደ ባረ ዳዮ፥ “አያ እማ ጎ?” ያጋደ ኦቻዱ።
እ ዳያ፥ “ጻማቅያ ዮሃንሳ ሁጲያ እማ ጋ” ያጋዱ።
25ናታ ኤለካ ካትያኮ ባደ አ፥ “ጻማቅያ ዮሃንሳ ሁጲያ ዎጪትያን ዎደ፥ ኔን ሀእ ታዉ እማናዳን ኮያይ” ያጋዱ።
26ሄዋፐ ጉየ ካቲ ዳሪ ቃረቴዳ፤ ሽን ባረ ጫቁዋ ድራዉነ ባረ እማቱዋ ድራዉ እዝዉ ጫቄዳ ጫቁዋ ኮላናዉ ኮይቤና። 27ሄዋ ድራዉ፥ ኤለካ ናግያዋ ኪቲደ፥ ዮሃንሳ ሁጲያ አሀና ማላ አዛዜዳ፤ ናግያዌ ቃሾ ጎለ ቢደ፥ ዮሃንሳ ቆያ ሙጬዳ። 28ሄ ሙጬዳዋ ዎጪትያን ዎ አሂደ፥ ናትዉ እሜዳ፤ ናታ ቃይ ባረ አትዉ እማዱ። 29ዮሃንሳ ካልያዋንቱ ሄዋ ስሴዳ ዎደ ዪደ፥ አ አሃ አፊደ ሞጌድኖ።
የሱስ እቼሹ ሻአ አሳ ምዚደ ካልሴዳ ታርክያ
(ማቶሳ 14:13-21፤ ሉቃሳ 9:10-17፤ ዮሃ. 6:1-14)
30የሱስ ኪቴዳዋንቱ ስሚደ፥ የሱሳና ጋከቲደ፥ ባረንቱ ኦዳባነ ባረንቱ ታማርሴዳባ ኡባ የሱሳዉ ኦዴድኖ። 31ብያ አሳይነ ይያ አሳይ ዳርና፥ ሀራይ አቶ ቁማ ማናዉካ ኡንቱንታ ጋናን እጼዳ ድራዉ፥ የሱስ ኡንቱንታ፥ “ኑረካ ጉ ሸምፕ አካናዉ አሳይ ባይናሳ ቦይተ”#6:31 አሳይ ባይናሳ፦ ሀዌ ጋሊላ ጌተትያ ዎምባፐ ፑደሃ ዶላ ባጋና ደኤ። 6:45 ጼልተ። ያጌዳ። 32የሱስነ ኡንቱንቱ ባረንቱ ጻላላ ዎንግርያን ኡቲደ፥ አሳይ ባይናሳ ቤድኖ።
33ኡንቱንቱ ቢሽን፥ ጮራ አሳይ ኡንቱንታ በኢደ ኤሬዳ፤ ካታማ ኡባፐ ገድያን ዎጺደ፥ ኡንቱንቱ ብያሳ ኡንቱንቱፐ ካሰቲደ ጋኬድኖ። 34የሱስ ዎንግርያፐ ከሲደ፥ ጮራ አሳ በኤዳ፤ አሳይ ሄምያ አሳይ ባይና ዶርሳ ማላ ግዴዳ ድራዉ፥ ቃረቲደ አሳ ዳሮባ ታማርሱዋ ዶሜዳ።#ፓይ. 27:17፤ 1 ካታ. 22:17፤ 2 ኦዱዋ 18:16፤ ህዝ. 34:5፤ ማቶሳ 9:36
35ሳአይ ኦማርስያ ዎደ፥ የሱሳ ካልያዋንቱ አኮ ዪደ፥ “ሀዌ ሳአይ አሳይ ባይና ሳኣ፤ ሀእ ሳአይካ ቃም ድጌዳ፤ 36አሳይ ሄራነ ቄር ካታማቱዋ ግዶ ቢደ፥ ባረንቶ ምያባ ሻማና ማላ፥ አሳ ሞይዛ” ያጌድኖ።
37ሽን የሱስ ዛሪደ ኡንቱንታ፥ “አሳዉ ምያባ ህንተ እምተ” ያጌዳ።
ሄዋፐ ጉየ ኡንቱንቱ፥ “ኑን ቢደ፥ ላኡ ጼቱ ብራ ሳንትምያ#6:37 ብራ ሳንትምያ፦ በን ዎድያን አሳ ጋድያን እት ጋላሳ ኡንያ ኦ ፔሼዳ አሳዉ እት ብራ ሳንትሚ እመቴ። ማት። 20:2 ጼልተ። ቁማ ሻሚደ፥ አሳይ ማናዉ እማኔ?” ያጊደ አ ኦቼድኖ።
38የሱስ ኡንቱንታ፥ “ህንተንቶ አፑን ዳቡ ደኢ? ቢደ በእተ” ያጌዳ።
ኡንቱንቱ በኢደ፥ “እቼሹ ዳቡዋነ ላኡ ሞልያ” ያጌድኖ።
39የሱስ ባረና ካልያዋንታ አሳ ኡባ ጭታን ጭታን ሻክ ሻኪደ፥ ማታን ኡትሳና ማላ አዛዜዳ። 40አሳይ ጼቱ ጼቱነ እሻታሙ እሻታሙ ጭታን ጭታን ኡቴድኖ። 41የሱስ እቼሹ ዳቡዋነ ላኡ ሞልያ ኦይቂደ፥ ፑደ ሳሉዋ ጼሊደ፥ ጾሳ ጋላቴዳ፤ ዳቦቱዋ መንደ አሳዉ ግሻና ማላ፥ ባረና ካልያዋንቶ እሜዳ፤ ቃይ ላኡ ሞልያካ ኡንቱንቱ ኡባዉ ሻኬዳ። 42አሳይ ኡባይ ሚደ ካሌድኖ። 43ሄዋፐ ጉየ አቴዳ ዳቦቱዋ ዶካይነ ሞልያ ዶካይ ታማነ ላኡ ዛምቤልያ ኩሜዳዋ የሱሳ ካልያዋንቱ ደንድኖ። 44ዳቡዋ ሜዳ አቱማ አሳይ እቼሹ ሻአ።
የሱስ አባ ቦላን ሀመቲደ ቤዳ
(ማቶሳ 14:22-33፤ ዮሃ. 6:15-21)
45ኤለካ የሱስ ሄ ጮራ አሳ ሞይዚደ፥ ባረና ካልያዋንቱ ዎንግርያን ገሊደ፥ አባፐ ሄፍንን ደእያ ቤተሳይዳ ግያ ካታማ ባረፐ ስንቲደ ባናዳን አዛዜዳ። 46ኡንቱንታ ሞይዜዳዋፐ ጉይያን፥ ጾሳ ዎሳናዉ ዞዝያ ከሴዳ።
47ሳአይ ቃምያ ዎደ ዎንግሪ ዎምባ ግዱዋን ደእሽን፥ የሱስ ዎምባፐ ጋጻን ባረካ ደኤ። 48ጫርኩ አ ካልያዋንቱኮ ጫርክያ ድራዉ፥ ባረና ካልያዋንታ ዎምባ ቤታይ መቶያዋ የሱስ በኢደ፥ ኩቱ ዋሳና ሀንያ ዎደ ዎምባ ቦላን ሀመቲደ፥ ኡንቱንቱኮ ዬዳ፤ ኡንቱንታ የግ አናዉ ኮዬዳ። 49ሽን ዎምባ ቦላን እ ሀመትሽን፥ ኡንቱንቱ አ በኢደ፥ ባረንቶ ሞይትልያ ማላትና ዋሴድኖ። 50አያዉ ጎፐ፥ ኡንቱንቱ ኡባይ አ በኢደ፥ ያሻ ኮኮሬድኖ፤ ሽን ኤለካ የሱስ ኡንቱንታ፥ “አይነ ባዋ፤ ታናተኔ ያዮፕተ” ያጌዳ። 51የሱስ ኡንቱንቱና እትፐ ዎንግርያን ገልና፥ ጫርኩ ዎፑ ጌዳ፤ ኡንቱንቱ ዳሮ ማላለቴድኖ። 52አያዉ ጎፐ፥ ኡንቱንቱ ዎዛናይ ጆሌዳ ድራዉ፥ ኡንቱንቱ ኡክባ አኬክበይክኖ።
የሱስ ገንሳሬጸን ሀርጋንቻቱዋ ፓዳ
(ማቶሳ 14:34-36)
53ኡንቱንቱ አባ ፕኒደ፥ ገንሳሬጻ ግያ ቢታ ጋኬድኖ፤ ያን ዎንግርያ ጋጻ ሺሽ ቃቼድኖ። 54ኡንቱንቱ ዎንግርያፐ ዎያዋን፥ አሳይ ኤለካ የሱሳ ኤርነ 55ሄዋ ሄራን ደእያ ጋድያ ኡባን ዎጸረቲደ፥ ሀርጋንቻቱዋ ሻንቻማን ቶኪደ፥ “የሱስ ደኤ” ጊና ስሴዳሳ አሁዋ ዶሜዳ። 56የሱስ ቤዳ ሳ ኡባን ቄር ካታማን ግድና፥ ዎልቃማ ካታማን ግድና፥ ሄራ ግዶን ግድናካ፥ ገያ ደንባን አሳይ ሀርጋንቻቱዋ አኮ አፌ። የሱስ ባረ ማዩዋ ማጫራ ግዶፐነ ሀርጋንቻቱዋ ቦሽሳና ማላ፥ አሳይ አ ዎሴዳ፤ ቦቼዳ ኡባይ ፓጼዳ።
Tällä hetkellä valittuna:
ማርቆሳ ምሽራቹዋ 6: DFBE
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Word for the World Ethiopia
