ማርቆሳ ምሽራቹዋ 4
4
ዘረ ዘርያዋ ሌምሱዋ
(ማቶሳ 13:1-9፤ ሉቃሳ 8:4-8)
1የሱስ ሽረትካ ጋሊላ አባ ማታን ታማርሱዋ ዶሜዳ፤ ጮራ አሳይ ባረ ምይያን ዩይ አደ ሺቅ ኡትና፥ አባን ደእያ ዎንግርያ ግዶ ገሊደ፥ አን ኡቴድኖ፤ ቃይ ሄ አሳይ ኡባይ አባ ምይያን ደኤ።#ሉቃሳ 5:1-3 2እ ኡንቱንታ ዳሮባ ሌምሱዋን ታማርሲደ፥
3“ስስተ፤ እት ብታኒ ዘረ ዘራናዉ ከሴዳ። 4እ ዘርሽን፥ እት እት ዘረይ ኦግያ ዶናን ዎዳ፤ ሄዋ ካፉ ዪደ ሜዳ። 5እት እት ዘረይ አንጮ ቢታ ቦላ ዎዳ፤ ዳሮ ቢታይ ባይና ድራዉ፥ ሄ ዘረይ ኤለካ ሞኬዳ። 6አዋይ ከሴዳ ዎደ ሹሌዳ፤ አዱሳ ጻጱዋ የድቤና ድራዉ፥ መል አጌዳ። 7እት እት ዘረይ አጉን ግዶን ዎዳ፤ ሄዋን ሞኬዳዋ አጉንይ ድጪደ ጩልና፥ አይፈናን አቴዳ። 8እት እት ዘረይ ቱኤ ቢታን ዘረቲደ ሞኬዳ፤ ድጪደ እቱ ሀታሙዋ፥ እቱ ኡሱፑን ታሙዋ አይፍና፥ እቱ ጼቱዋ አይፌዳ።” 9ቃይካ የሱስ፥ “ስሳናዉ ሀይይ ደእያ ኡራይ ስሶ” ያጌዳ።
የሱስ ሌምሱዋን ኦዴዳ ጋሱዋ
(ማቶሳ 13:10-17፤ ሉቃሳ 8:9-10)
10ታማነ ላኡ የሱሳ ካልያዋንቱነ እ ኦዴዳዋ ስሴዳ ሀራ አሳቱ እ ባረካ ደእሽን አኮ ሺቂደ፥ ሄ ሌምሱዋ ብለ አ ኦቼድኖ። 11-12የሱስ ኡንቱንቶ፥ “ህንተንቶ ጾሳ ካዉተ ጹራ የዉዋ ኤራይ እመቴዳ፤ ሽን ሀራቱ ካዉተፐ ካረና ደእያዋንቱ፥ ጼላ ጼሊደ በኤና ማላ፥ ቃይ ስሳ ስሲድካ አኬከና ማላ፥ ኡንቱንቱ ሽረቲደ ጾሳኮ ስምና፥ እ ኡንቱንቱ ናጋራ አቶ ጌና ማላ፥ ኡንቱንቶ ኡባባይ ሌምሱዋን ኦደቴ” ያጌዳ።#ኢሳ. 6:9-10
ዘርያዋ ሌምሱዋ ብለ
(ማቶሳ 13:18-23፤ ሉቃሳ 8:11-15)
13የሱስ ኡንቱንታ፥ “ሀ ሌምሱዋ ኤርክቴ? ያትና፥ ሌምሱዋ ኡባ ዎት ኤራንቴ? 14ዘርያዌ ጾሳ ቃላ ዘሬ። 15ቃላይ ዘረትያ ኦግያ ዶናን ደእያዋንቱ ሀዋንታ፤ ኡንቱንቱ ቃላ ስስያ ዎደ፥ ሴጻናይ ኤለካ ዪደ፥ ኡንቱንቱ ዎዛናን ዘረቴዳ ቃላ አፍ ድጌዳ። 16ሀዋዳንካ ቃይ አንጮትያ ቢታን ዘረቴዳዋንቱ ሀዋንታ፤ ኡንቱንቱ ቃላ ስሲደ፥ ኤለካ ናሸቻን አኪኖ። 17ኡንቱንቱ ሀእዉ ደኢኖፐ አትን፥ ኡንቱንቶ ምኖ ጻጱ ባዋ፤ ጉየፐ ቃላ ጋሱዋን ዋዪ ዎይ የደርሱ ይያ ዎደ፥ ኡንቱንቱ ኤለካ በት አጊኖ። 18ቃይ አጉን ግዶን ዘረቴዳዋንቱ ሀዋንታ፤ ኡንቱንቱ ቃላ ስስያዋንታ። 19ሽን ሀ ሳኣ ደኦ ህርግያዌ ዱረተ ዶስያዌነ ሀራባ አሞትያዌ ኡንቱንቱ ዎዛናን ገሊደ፥ ቃላ ጩልና አይፈናን አት አጌዳ። 20ሽን ቱኤ ቢታን ዘረቴዳዋንቱ ቃላ ስሲደ አክያዋንታ፤ እቱ ሀታሙዋ፥ እቱ ኡሱፑን ታሙዋ አይፍና፥ እቱ ጼቱዋ አይፌዳ” ያጌዳ።
ጾምፕያ ሌምሱዋ
(ሉቃሳ 8:16-18)
21የሱስ ጉጂደ፥ “ጾምፕያ አሂደ፥ ግላፐ ዎይ አርሳፐ ጋርሳና ዎያ አሳይ ደኢ? ቃሳን ዎኔ? 22አያዉ ጎፐ፥ ቆሴዳባይ ኡባይ ቆንጭያ ከሳናዋ፤ ቃይ ጌማን ዎዳባይ ኡባይ ቤተናን አተና። 23ስሳናዉ ሀይይ ደእያ ኡራይ ደኦፐ ስሶ” ያጌዳ።
24ቃይካ ኡንቱንታ፥ “ህንተንቱ ስስያዋ አኬኪደ ስስተ፤ ጾሳይ ህንተ ማኬዳ ቁንኣን ህንተንቶ ማካናዋ። እ ህንተንቶ ዳርሲደ እማና፤ 25ደእያ ኡራዉ ጉጅ እማና፤ ባይናዋፐ ሀራይ አቶ፥ አዉ ደእያ ሄ ጉቶካ አክ ድጋና” ያጌዳ።
ድጭያ ዘረ ሌምሱዋ
26የሱስ ቃይካ፥ “ጾሳ ካዉተይ ጋደን ካ ዘርያ አሳ ማላ። 27ሄ ብታኒ ቃማ ገምእሼ፤ ጉራ ደንዴ፤ እ ባረ ሁጰዉ ዋንንቶ ኤረናን፥ ሄ ዘረይ ሞኬነ ድጬ። 28ቢታይ ካ ባረካ ሞኬነ አይፌ፤ ኮይሮ ጫርሻይ ጫሬ፤ ጉየፐ አይፋናዉ ኩኩሜ፤ ቃይ ዉርሰን ኩመን አይፍያ አይፌ። 29ሽን ካይ ጋክያ ዎደ፥ ካ ሺሽያ ዎዲ ጋኬዳ ድራዉ፥ ብታኒ ኤለካ ባጫን ጫኩዋ ገል አጌዳ” ያጌዳ።#ኢዩ. 3:13
ሳናፍጭያ ዘረ ሌምሱዋ
(ማቶሳ 13:31-34፤ ሉቃሳ 13:18-19)
30የሱስ፥ “ኑን ጾሳ ካዉተ አያ ማላቴ ጋኔ? ዎይ አያና ሌምሳኔ? 31ጾሳ ካዉተይ ሳናፍጭያ አይፋቶ ማላቴ። ሄ አይፋታ ዘርያ ዎደ፥ ሳኣን ደእያ ም አይፊያ ኡባፐካ ጉጻዉ፤ 32ሄኖ ዘርና ሞካደ ሀራ አታክልትያ ኡባፐ ዳራዉ፤ ዳሮ ዳሻ ዳሻዉ። ካፉ እዝ ቃንካ ኩዋን ጎልያ ኬጻና ዳንዳዬ” ያጌዳ።
33የሱስ ሀዋ ማላ ዳሮ ሌምሱዋን አሳይ ስሳናዉ ዳንዳይያዋ ኬና፥ ባረ ቃላ ኦዴዳ። 34አሳዉ ሌምሱ ባይናን ኦደና፤ ሽን የሱስ ባረና ካልያዋንቱ ጻላላና ደእያ ዎደ፥ ኡንቱንቶ ኡባባ ብሊደ ኦዴ።
የሱስ ቤታ ጮኡ ኦዳ
(ማቶሳ 8:23-27፤ ሉቃሳ 8:22-25)
35ሄ ጋላስ ሳአይ ኦማርስና፥ የሱስ ባረና ካልያዋንታ “አባፐ ሄፍን ፕኖይተ” ያጌዳ። 36አ ካልያዋንቱ አሳ አጊደ፥ የሱስ ካሰ ገል ኡቴዳ ዎንግርያን ገሊደ፥ የሱሳ ባረንቱና አፌድኖ፤ ሀራ ዎንግራቱካ ሄዋን ደኢኖ። 37ዎልቃማ ጎቱ ደንድና፥ ቤታይ ዎንግርያ ሾጭና፥ ሃይ ኩማና ጋካናዉ ዎንግርያ ግዶ ገሌዳ። 38ሄ ዎደ የሱስ ዎንግርያን ጉየ ባጋና ቦርኮ ቦርኮቲደ ገምእሼዳ። የሱሳ ካልያዋንቱ አ ደንደ፥ “ታማርስያዎ፥ ኑን ይያ ዎደ ጮኡ ጋደ ጼላይ?” ያጌድኖ።
39እ ቤጎቲደ ጎቱዋ፥ “ጮኡ ጋ” ጊደ፥ አባካ፥ “ዎፑ ጋ” ጌዳ፤ ጎቱካ ጮኡ ጊና፥ ኡባባይካ ዎፑ ጌዳ። 40የሱስ ባረና ካልያዋንታ “አያዉ ሀዋዳን ያዪቴ? ህንተንቱ ዋን አማንክቴ?” ያጌዳ።
41ኡንቱንቱ ዳሮ ያዪደ ባረንቱ ግዶን፥ “ሀዌ ላ ሀራይ አቶ፥ ጎቱነ አባይ አዛዘትያዌ ኦኔ?” ያጌድኖ።
Tällä hetkellä valittuna:
ማርቆሳ ምሽራቹዋ 4: DFBE
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Word for the World Ethiopia
