ማቶሳ ምሽራቹዋ 20
20
ዎይንያ ቱራ ግዶን ኦያ ኦሳንቻቱዋ ሌምሱዋ
1“ሳሉዋ ካዉተይ ዎይንያ ጌተትያ ቱራ ግዱዋ ኦያዋንታ ኡንያ ኦስሳናዉ፥ ዎንታ ጉራን ከሴዳ ዎይንያ ቱራ ጎዳ በሴ። 2እ ሄ ኦሳንቻቶ ሀቼ ሀቼ ኦዳዋ ዎልቃ ጋትያ ጭጋናዉ ኡንቱንቱና ጊጊደ፥ ባረ ዎይንያ ቱራ ግዱዋ ኦስሳናዉ ኡንቱንታ የዴዳ።
3“ቃይ ሄዙ ሳትያ ግዶደ ከሲደ፥ ኦሱ ባይናን ቆጫን ኤቄዳ ሀራ አሳቱዋ በኢደ፥ 4ኡንቱንታ፥ ‘ህንተንቱካ ቃይ ታ ዎይንያ ቱራ ግዱዋ ኦናዉ ቢተ፤ ታን ህንተንቶ በስያ ጋትያ ጭጋና’ ያጌዳ፤ ሄዋፐ ጉይያን ኡንቱንቱ ቤድኖ። 5ላኤንዋካ ኡሱፑን ሳትያንነ ኡዱፑ ሳትያን ከሲደ፥ ሄዋዳን ኦዳ። 6ታማነ እት ሳትያ ሄራን እ ከስያ ዎደ፥ ሀራንቱ ሄዋን ኤቄዳዋንታ ደሚደ፥ ‘ኦሱዋ ኦናን ኩመን ጋላሳ ሀዋን አያዉ ኤቂ ፔሼድቴ?’ ያጌዳ።
7“ኡንቱንቱ፥ ‘ኑና ኦስስያ አሳይ ዬዳ ድራዉ ኤቂ ፔሼዶ’ ያጌድኖ።
“እ፥ ‘ኡንቱንታካ ቃይ ታ ዎይንያ ቱራ ግዱዋ ኦናዉ ቢተ’ ያጌዳ።
8“ሳአይ ኦማርስያ ዎደ፥ ዎይንያ ቱራ ጎዳይ ኦያዋንቱ ካፑዋ፥ ‘ኦሳንቻቱዋ ጼሳደ፥ ዉርሰን ኦሱዋን ገሌዳዋንቱፐ ዶማደ ኮይሮ ገሌዳዋንታ ጋካናዉ፥ ኡንቱንቱ ኦሱዋ ድርጉዋ ጭጋ’ ያጌዳ።#ዎጋ 19:13፤ ዛረ. 24:15
9“ታማነ እት ሳትያ ሄራን ኦሱዋ ዶሜዳዋንቱ ዪደ፥ ሁጲያን ሁጲያን ኦደ ፔሼዳ ዎልቃ ጋትያ አኬድኖ። 10ኮይሮ ኦሱዋ ዶሜዳ አሳይ ዬዳ ዎደ፥ ዳሩዋ አካናዉ ቆፔድኖ፤ ሽን ኡንቱንቱካ ሁጲያን ሁጲያን ባረንቱ ኦሱዋ ዎልቃ ጋትያ አኬድኖ። 11-12ሄዋፐ ጉይያን፥ ‘ሀ ጉየፐ ዬዳዋንቱ እት ሳትያ ጻላላ ኦድኖ፤ ኩመን ጋላሳ ዳቡሪደ ጫዎቴዳ ኑዋና ኡንቱንቱ ኦሱዋ ድርጉዋ ቃራ ኦዳ’ ያጊደ ባረንታ ኦሱዋን ገልሴዳዋ ቦላ ዙዙሜድኖ።
13“ሽን እ ኡንቱንቱፐ እቱዋ ሀዋዳን ያጌዳ፤ ‘ታ ላገዉ፥ ታን ኔና ናቃበይከ፤ ኦደ ፔሼዳ ዎልቃ ጋትያ ታናና ጊጋበይክዬ? 14ነዋ አካደ ባ፤ ታን ሀእ ዉርሰን ኦሱዋን ገሌዳዎካ ነዋ ኬና እማናዉ ኮያይ። 15ታን ታ ሚሻን ታ ኮዬዳዋዳን ኦናዉ ታዉ ማታይ ባዌ? ዎይ ታን ሎአ ግዴዳ ድራዉ፥ ኔን ቃናታይ?’ ያጌዳ።
16“ሄዋዳንካ፥ ቃይ ጉየቴዳዋንቱ ስንታናዋንታ፤ ስንቴዳዋንቱ ቃይ ጉየታናዋንታ፤ አያዉ ጎፐ፥ ጼሰቴዳዋንቱ ጮራ፤ ሽን ዶረቴዳዋንቱ ጉ” ያጌዳ።
የሱስ ባረ ሀይቁዋባ ሄዘንዋ ኦዴዳ
(ማር. 10:32-34፤ ሉቃሳ 18:31-34)
17የሱስ የሩሳላመ ቢደ፥ ኦግያን ባረናና ብያ ታማነ ላኡ ባረና ካልያዋንታ ጋጻ ከሲደ፥ ዱማ ኡንቱንቶ ያጌዳ። 18“በእተ፥ ኑን የሩሳላመ ሀእ ከሴቶ። ያን ታና፥ አሳ ናኣ ቄሳቱዋ ካፓቶነ ህግያ ታማርስያዋንቶ አደ እማናዋንታ፤ ኡንቱንቱ ታ ቦላ ሀይቁዋ ፕርዳ ፕርዳናዋንታ። 19ቃይ አይሁዳ ግደና አሳዉካ ታና አደ እማናዋንታ፤ ሄ አይሁዳ ግደና አሳይ ታ ቦላ ቅሊጫናዋንታነ ታና ልሱዋን ሾጫናዋንታ፤ ያቲደ ማስቃልያ ቦላ ምስማርያን ሺደ፥ ታና ካቃናዋንታ፤ ታን ሄዘንያ ጋላስ ሀይቁዋፐ ደንዳና” ያጌዳ።
ዛብድዮሳ ናና ዳይ ዎሳ
(ማር. 10:35-45)
20ሄ ዎደ ዛብድዮሳ ናና ዳያ ባረ ናናና የሱሳኮ ያዱ፤ አ ስንን ጉልባታደ እትባ አ ዎሳዱ።
21የሱስ እዞ፥ “አያ ኮያይ?” ያጊደ ኦቼዳ።
እዛ ዛራደ፥ “ሀ ታ ላኡ ናናይ ነ ካዉተን እቱ ኔፐ ኡሸቻ ባጋና፥ ቃይ እቱ ኔፐ ሀድርሳ ባጋና ኡትኖ ያጋርኪ” ያጋደ ዎሳዱ።
22ሽን የሱስ ዛሪደ ናና፥ “ህንተንቱ አያ ዎሳናዉ በስንቶ ኤርክታ። ታና ጋክያ ዎልቃማ መቱዋ መቶታንቴ? ታን ጻማቀታና ጽንቃታ ጻማቀታናዉ ዳንዳዪቴ?” ያጌዳ።
ኡንቱንቱ፥ “ኤ ዳንዳያና” ያጌድኖ።
23የሱስ፥ “ታና ጋክያ ዎልቃማ መቱዋ ቱማካ ህንተንቱ መቶታንታ፤ ሽን ታፐ ኡሸቻ ባጋናነ ሀድርሳ ባጋና ኡታናዋንታ ዶራናዉ ታዉ ማታይ ባዋ፤ ሽን ሄ ሳአይ ታ አቡ እማናዉ ጊግስ ዎዳዋንቱሳ” ያጌዳ።
24የኮ ታሙ የሱሳ ካልያዋንቱ ሄዋ ስሴዳ ዎደ፥ ሄ ላኡ እሻቶ ሀንቀቴድኖ። 25ሽን የሱስ ኡንቱንቱ ኡባቱዋካ ባረኮ ጼሲደ፥ ሀዋዳን ያጌዳ፤ “አህዛበ አሳቱዋ ካፓቱነ ሀዋንታ ካለያ አሳቱ ባረንቱ አሳ አይስያዋ ኤሪታ። 26ህንተንቱ ግዱዋን ሄዋ ማላ ግደና፤ ሽን ህንተንቱ ግዱዋን ቃተ ኮይያ ኦንነ ህንተንቶ ቆማ ግዳናዉ በሴ። 27ቃይ ህንተንቱ ግዱዋን ኡባፐ ቦላ ግዳናዉ ኮይያዌ ኦንነ ህንተንቶ አይለ ግዳናዉ በሴ። 28ሄዋዳን ታን፥ አሳ ናአይ፥ አሳዉ ኦናዉነ ዳሮ አሳ ዎዛናዉ ታ ሸምፑዋ እማናዉ ዬዳዋፐ አትን፥ አሳይ ታዉ ኦና ማላ ያበይከ” ያጌዳ።
የሱስ ላኡ ቆቃቱዋ ፓዳ
(ማር. 10:46-52፤ ሉቃሳ 18:35-43)
29የሱስነ አ ካልያዋንቱ እያርኮፐ ከስሽን፥ ዳሮ አሳይ ኡንቱንታ ካሌዳ። 30ላኡ ቆቃ አሳቱ ኦግያ ዶናን ኡቴዳዋንቱ የሱስ ሄዋና አያዋ ስሲደ፥ ባረንቱ ኮሻ ቁ ኦደ፥ “ጎዳዉ፥ ዳዊታ ናአዉ፥ ኑዉ ቃረታርኪ” ያጌድኖ።
31ዳሮ አሳይ ኡንቱንታ፥ “ሀይዝተ” ጊደ ሀንቀቴዳ፤ ሽን ኡንቱንቱ ባረንቱ ኮሻ ዳሪ ቁ ኦደ፥ “ጎዳዉ፥ ዳዊታ ናአዉ፥ ኑና ማራርኪ!” ያጌድኖ።
32የሱስ ኦግያን ኤቂደ፥ ኡንቱንታ ጼሲደ፥ “ታን ህንተንቶ አያ ኦና ማላ ኮዪቴ?” ያጌዳ።
33ቆቃቱ፥ “ጎዳዉ፥ ኑ አይፍያ ፓርኪ” ያጌድኖ።
34የሱስ ኡንቱንቶ ቃረቲደ፥ ኡንቱንቱ አይፍያ ቦቼዳ፤ ኤለካ ኡንቱንቱ አይፊ ጼል አግና፥ አ ካል አጌድኖ።
Tällä hetkellä valittuna:
ማቶሳ ምሽራቹዋ 20: DFBE
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Word for the World Ethiopia
