मत्ती 10

बाह्र चेलनको काम

(मर्क. 3:13-19; 6:7-13; 13:9-13; लूक. 6:12-16; 9:1-6; 12:2-9; 21:12-17)

1येशू अपन बाह्र चेलनके बुलाएके बिनके भुतनके निकारन और हर किसिमके रोग और दुर्बलनके अच्छो करन अधिकार दइ।

2बे बाह्र चुनेभए चेलन्को नाउँ जेही हएं, पहिलो पत्रुस कहान बारो सिमोन और बिनको भइया अन्द्रियास, जब्दियाके लौंणा याकूब और बिनको भइया यूहन्ना, 3फिलिप और बारथोलोमाइ, थोमा और कर उठान बारो मत्ती, अल्फयसको लौंणा याकूब और थेदियस, 4सिमोन कनानी और यहूदा इस्करियोत, जौन येशूके पकणबाए दइ रहए।

5येशू जे बाह्र चेलनके अइसो आज्ञा दइके पठाइ, “गैर-यहूदी आदमीनके बीचमे मत् जैयओ, और सामरी सहरमे रहान बारेनके सहरमे मत् घुसियओ। 6पर इस्राएल देशके हरानेभए भेंणाके ठिन जाओ। 7और ‘स्वर्गको राज्य ढिँगै आइगओ हए,’ कहात परचार करओ। 8बिमारीनके अच्छो करओ, मरेभएके जिन्दा करओ, कोढ रोग लागे बारेन्के अच्छे करओ, और भुतनके निकारओ। तुम सेंतएमे पाएहओ, सेंतएमे देओ। 9तुम अपन सँग रुपैयाकी थैली, सोनोचाँदी और तामाके लोहोटा मत् लियओ, 10यात्राके ताहीं झोरा, दुई जोड कुर्ता, जुता, लकणी कुछ मत् लियओ। काहेकी खितहरनके खानु मिलन पणत हए।”

11“जौन सहरमे और गाउँमे तुम घुसैगे, हुवाँ जानोमानो कौन हए, बोके ढुणओ। और हुवाँसे बिदा नाए होन तक हुवएं बैठियओ। 12और घर भितर कुचनसे अग्गु नमस्कार करियओ। 13बो घरमे जानन बुझन बारे हएं तओ, तुमर शान्ति बो घरमे रहबैगो। जौन बो घरमे जानन बुझन बारे नाए हएं, तओ तुमर शान्ति तुमरी सँग घुमके आएजएहए। 14अगर कोइ तुमके स्वागत नाए करीं और तुमर बचन नाए सुनी, तओ बो घरसे निकरत पेती अपन पौलीको धुधर झारदियओ। 15नेहात्तओ, मए तुमसे कहात हओं, न्यायके दिनमे बो नगरको दसासे सदोम और गमोराको नगरको दसा जद्धा सहन सिकन बारो होबैगो, जौन परमेश्वर तुमके देबैगो।”

आन बारो अग्ठो समय

(मर्क. 13:9-13; लूक. 21:12-17)

16“देखओ, मए तुमके गुलहाके बीचमे भेंणा कता पठएहओं, जहेमारे तुम साँप कता चलाँक और कबुतर कता निर्दोष होबओ। 17पर आदमीनसे होसियार हुइयओ, काहेकी बे तुमके अदालतमे सौपदेहएं। और बे यहूदी सभाघरमे तुमके कोर्रा लगए हएं। 18तुम मेरे ताहीं हाकिम और सासकके अग्गु खडा करे जाबैगे, और बिनके ताहीं और जाति-जातिके आदमीके ताहीं साक्षी हुइहओ। 19पर जब बे तुमके पकणाए देहएं, तओ का कहामंगे और का बोलंगो करके चिन्ता मत् करीयओ। काहेकी तुमके का मस्कनके हए, बहे बेरा तुमके बताओ जएहए। 20काहेकी मस्कन बारे तुम अपनए नाए हुइहओ। पर तुमर परमेश्वरको आत्मा तुमसे मस्कैगो।

21भइया अप्नो भइयाके मारनके ताहीं पकणए देहएं, और अइयादौवा लौंणालौंणीयाके, और लौंणालौंणीया अइयादौवाके बिरुद्धमे उठंगे, और बिनके मारन लगए हएं। 22मिर नाउँके कारण तुम सबसे घृणित हुइहओ। पर जो अन्त तक स्थिर रएहए, बोको उद्धार हुइहए। 23जब एक सहरमे परमेश्वरको बचन परचार करत पेती तुम सताए जएहओ, तओ दुस्रे सहरमे भजीयओ, काहेकी नेहात्तओ मए तुमसे कहात हओं, मए, आदमीको लौंणाके आनसे अग्गु तुम इस्राएल देशके सब सहरमे नाए घुम पाबैगे।”

चेला होनके बारेमे

24“चेला अपन गुरुसे और कमैया अपन मालिकसे बडो नाए होत हए। 25चेला अपन गुरु जैसो होन जरुरी हए। और कमैया अपन मालिक जैसो होन जरुरी हए। अगर बे मालिकके सँग खराब ब्यबहार करके ‘शैतानको राजा’ कहात हएं, तओ बे मालिकके कमैयनके सँग फिर खराब ब्यबहार करंगे।”

कौनसे डरानो

(लूक. 12:2-7)

26“जहेमारे बिनसे मत् डराओ। परमेश्वर सब लुको भओ चीजके परगट करैगो। और परमेश्वर लुके भए चीजके जानत हए। 27जो कुछ फिर मए अँध्यारोमे कहात हओं, बहे बातके तुम उजियारेमे नाए डराएके बताए देओ, चुप्पए कोनेसे कही बात घरके छानीसे परचार करओ। 28जौन शरीरके मारडारत हए, पर प्राणके नाए मारपात हए, बिनसे मतडरओ; पर परमेश्वरसे डराबओ, जौन आत्मा और शरीर दोनएके नरकमे नाश करसकत हए। 29का एक पैसामे#10:29 एक पैसामे बो बेला एक दिनकी देहाणी (दिनारको) सोल्हा भागको एक भाग हए। जा बहुत काम दाम हए। दुई गरगओटा नाए बिकेहएं? अगर बे मैसे एक धर्तीमे गिरैगो और मरैगो कहेसे तुमर दौवाके जाके बारेमे पता होबैगो। 30परमेश्वर तुमर जीबनके हर बातको वास्ता करत हए। परमेश्वर जा फिर जानत हए कि तुमर मुणमे कित्नो बार हएं। 31जहेमारे मत् डराबओ, तुम बेढम गरगओटासे बहुत मूल्यवान हओ।”

येशूके स्वीकार

(लूक. 12:8-9; 12:51-53; 14:26-27)

32“देखओ, जौन मोके आदमीनके अग्गु प्रभु करके स्वीकार करैगो, बोके मए, आदमीको लौंणा फिर स्वर्गमे मिर दौवा परमेश्वरके अग्गु मिर चेला हए, करके स्वीकार करंगो। 33पर अगर बे आदमीनके अग्गु मोके नाए चिन्त हएं कहेसे बिनके मए फिर स्वर्गमे होन बारो मिर दौवा परमेश्वरके अग्गु, ‘नाए चिन्त हओं,’ करके कएहओं।”

चेलनके चुकान बारो दाम

34“जा मत् समझओ कि मए पृथ्वीमे आदमीनके बीचमे मेलमिलाप करनके आओ हओं, मए आदमीनके बीचमे मेलमिलाप नाए बल्कि लणाइ करबानके आओ हओं 35काहेकी मए आदमीके बोको दौवाके बिरुद्ध, और लौंणीयाके बोकी अइयाके बिरुद्ध और बहुके बोकी सासुके बिरुद्ध करन आओ हओं।

36आदमीनको दुस्मन बिनके अपने परिवारके आदमी भितरके होमंगे।

37जौन मोसे जद्धा अपन दौवा या अइयाके अपनए कता प्रेम करैगो, बो मिर चेलाको लायक नैयाँ, और जौन मोसे जद्धा अपन लौंणा या लौंणीयाके प्रेम करैगो, बो फिर मिर चेला बननके लायकको नाए हए। 38और जौन मिर अनुसरण नाएकरैगो और मिर ताहीं क्रूस नाए उठाबैगो, और मरनके ताहीं तयार नाए होबैगो; बो मिर चेला बननके ताहीं मिर पिच्छु नाए लगपए हए। 39काहेकी जौन अपन प्राण बचानके इच्छा करत हए, बो येशूके खोबैगो। पर मिर और अच्छो समाचारके ताहीं अपन प्राण गुमान बारो, बो बचाओ जाबैगो।”

प्रतिफल

(मर्क. 9:41)

40“तुमके ग्रहण करन बारो मोके ग्रहण करत हए, और मोके ग्रहण करन बारो मोके पठान बारो परमेश्वरके ग्रहण करत हए। 41अगर तुम एक अगमबक्ताके स्वीकार करैगे जौन परमेश्वरके बचन बोलत हए, तुमके फिर अगम्बक्तए कता इनाम मिलैगो। जौन कोइ धर्मी जनके धर्मी जन मानके ग्रहण करैगो काहेकी बो धर्मी हए, और परमेश्वर धर्मी आदमीके देन बारो जैसो इनाम देबैगो। 42जो कोइ जे छोटे मैसे एकके मिर चेला मानके एक गिलास ठण्डो पानी पिन देहए, नेहात्तओ मए तुमसे कहात हओं, बो अपन इनाम कभी फिर नाए खोबैगो।”

Tällä hetkellä valittuna:

मत्ती 10: THRNT

Korostus

Jaa

Kopioi