Medheteththa Maxaafa 7
7
1Hessafe guye GODAY Nohe, «Neni hayssa ha wode yeletaa giddon xillo gididayssa ta be7ida gishshas neni neso asaa ubbaara markabeza giddo gela. 2-3Neni geesh gidida mehenne do7a ubbaafe iza qommofe qommofe addenne macca laappun laappun, geesh gidontta mehenne do7a ubbaafe iza qommofe qommofe issi addenne issi macca qasse kafotappe iza qommofe qommofe addenne macca laappun laappun, biitta ubbaa bollan dumma dumma zereththay paxa daana mala nenara ekka gela. 4Ays giikko laappun gallassafe guye tani oyddu tammu gallassinne oyddu tammu qamma biitta bollan ira bukisana; histtada tani medhdhida medheta ubbaa biitta bollafe dhayssana» gides.
5Nohey GODAY iza azazidayssa ubbaa ooththides.
6Dhaysa haaththi biitta bolla yiza wode Nohes layththay usuppun xeeta. 7Nohe, iza attuma nayti, iza machcheyanne iza nayta machcheti dhayssa haaththaafe attanaas markabeza giddo gelida.#Mato 24:38-39; Luqa 17:27 8Geeshsha meheppenne do7appe, geesh gidontta meheppenne do7appe, kafoppenne biittara gooshettiza ubbaafe, 9Xoossi Nohe azazida malakka addenne macca nam7u nam7u gididi Nohekko markabeza giddo geliin, 10laappun gallassafe guye dhayssa haaththi biitta bolla yides.
11Nohes usuppun xeetu layth gidishin nam7anththo aginan tammanne laappunththa gallassan he gallassankka biitta giddon diza gita ciimma pulttoy wuri dhuuqqides; salon diza haaththa maskootetikka doyetti wodhdhida.#2Phex 3:6 12Iray biitta bollan oyddu tammu gallassinne oyddu tammu omars bukkides. 13He gallassan Noheynne iza attuma nayti, Seemey, Kaameynne Yaafeetey, Nohe machcheyanne iza nayta heedzdzata machcheti issife markabeza giddo gelida. 14Isttanne do7a ubbaafe ba qommon qommon, mehe ubbaafekka ba qommon qommon, biittara gooshettizayata ubbaafe ba qommon qommon, kafo ubbaafe ba qommon qommon isttara issife gelida. 15Shemppora paxa dizayti wuri nam7u nam7u gididi Nohekko markabezan gelida; 16Xoossay Nohe azazida mala medheta ubbaafe addenne macca gididi markabeza giddo geliin Nohey giddon dishin GODAY markabeza penge gordides.
17Dhayssa haaththi oyddu tammu gallas biitta bolla bukkishe gam7ides; haaththi daridi, markabeza biittafe pude denththides. 18Haaththay biitta bollan keehi dariin markabezi haaththaa bollan tookettides. 19Saloppe garsara diza dhoqqa zumati wuri mitettana gakkanaas haaththay biitta bollan keehi wolqqafe darides. 20Haaththay zumata xeerappe aadhdhidi 15 wadha gakkanaas dhoqqu gides. 21Histtiin biitta bollan shemppora paxa qaaxxiza medheteththati wuri, kafoy, mehey, do7ay, biitta bollan woxxi qaxxizaynne asi wuri hayqqides. 22Biitta bollan diza siidhera shempizay wurikka hayqqides. 23Ha biittan paxa dizay wuri asi, meheynne do7ay, biittara gooshettiza medheteththinne salo kafoti wurikka biittafe pitetti dhayiin Noheynne izara markabe giddon dizayti xalla attida. 24Haaththayka 150 gallas gakkanaas biitta bollan gam7ides.
Tällä hetkellä valittuna:
Medheteththa Maxaafa 7: GM
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Word for the World International