San Mateo 3
3
Ra Juan ra si̱kuchi naꞌa
(Mr. 1:1-8; Lc. 3:1-9-15-17; Jn. 1:19-28)
1Saa ku̱u ndi̱yaꞌa kuiya ya xa̱ꞌnu Jesús, ta ndi̱xaa ra Juan, ra síkuchi naꞌa, ndi̱xaa ra nuu íyo iku yuyu ñuu estado Judea, káꞌan ndoso ra tuꞌun Ndioxi. 2Káchi ra saa:
―Ndiko koo ini ndo, ïkan ka ndo ya väꞌa, chi xa ti̱ndaa yati ichí ya kaꞌnda chiñu Ndioxi nuu yo ―káchi ra Juan xiꞌin na.
3Xaꞌa ra Juan kua ta̱a ra ndi̱kaꞌan ndoso tuꞌun yuꞌu Ndioxi, ra Isaías, káchi ra saa:
Nuu íyo iku yuyu kuꞌun ra kaꞌan ndoso ra, kachi ra saa:
“Ná koo tuꞌva ndo ta yachi ka ndasa vií ndo nima ndo, saa chi xa xa̱a mií ra kaꞌnu nuu yo.
Kindaa ndo ya väꞌa sási ndóꞌo̱, ta saa kuchiñu ndo ndikiꞌin ndo ra”, kachi ra koo iku yuyu ikán.
Saa káchi tuꞌun Ndioxi ya ta̱a ra Isaías ra ndi̱kaꞌan ndoso tuꞌun yuꞌu Ndioxi xinaꞌa.
4Ta ndíxi ra Juan toto ndi̱kuaꞌa xiꞌin ixi kiti camello, saa ndíkaa ñii toko ra, ta xi̱taku ra xiꞌin tika ndiama tin ñuñu iku. 5Ta naꞌa na ñuu Jerusalén xiꞌin na inka ñuu, suvi mií estado Judea xiꞌin ndiꞌi na ndóo yati ita Jordán ndi̱xaa na nuu ra Juan ya kúni na kuni soꞌo na tuꞌun káꞌan ndoso ra. 6Saa tá xi̱ni soꞌo na, ta xa̱á na náꞌma na kuachi na nuu ra. Ta síkuchi ra na ikán ini ita Jordán.
7Saa xi̱ni ra Juan kuaꞌan kuaꞌa ni nda naꞌnu nuu na judío, nda fariseo xiꞌin nda saduceo, chi kúni nda kuchi nda. Saa ndi̱kaꞌan ra tuꞌun yóꞌó xiꞌin nda, káchi ra saa:
―¡Ndóꞌo̱ nǎꞌa ku ndo, tá íin seꞌe kiti ko̱ó saa íin ndo! ¿Unku ndi̱kaꞌan xiꞌin ndo kuchi ndo, ta xaꞌa ya íkan ndo saa ta sikaku Ndioxi ndóꞌo̱ nuu ya tixuꞌvi ndo, káꞌán ndo? 8Xiꞌna xíniñuꞌu ndo ndiko koo ini ndo xaꞌa kuachi ndo, ta saa sinaꞌa ndo mií ndo ya ndixa kua ndi̱nama ini ndo xaꞌa ya väꞌa íkan ndo. 9Ta ndïkani ini ndo sikaku Ndioxi ndóꞌo̱ xaꞌa ya kúu ndo seꞌe sikua ra Abraham, káꞌán ndo. Chi mií Ndioxi ta kúu mií ra ichí ndisama ra yu̱ú yóꞌó nduu ya seꞌe sikua ra Abraham. 10Tá íyo iin ra ndáa itun kuiꞌi, itun köo kúun kuiꞌi ndaꞌa, ta kuaꞌan ra xáꞌnda ndiꞌi ra nu xiꞌin yácha, nda tioꞌo nu táva ra kuaꞌan nu xíxi nu. Saa íyo ndóꞌo̱ nuu Ndioxi, xa íyo ndúvi ra ikan ra saa xiꞌin ndiꞌi ndo, tá tu köo ndíko koo ini ndo xaꞌa ya väꞌa íkan ndo. 11Yeꞌe, ta síkuchi i ndóꞌo̱ xiꞌin tikuii, ya sínaꞌa ndo mií ndo nuu naꞌa ya ndi̱nama ndo kuꞌva íyo ndo. Sundi íyo inka ra vaxi sindiꞌi, ta ndee ni ra ikán nuu yeꞌe. Ra ikán ku ra sikuchi ndóꞌo̱ xiꞌin Tachi I̱í Ndioxi xiꞌin ñu̱ꞌu̱ ya xíxi. Xaꞌa ya ndee ni ra ta nda nduxan ra küvi loꞌo kundiso i. 12Ta xa íyo tuꞌva ra kixi ra, tá ná kixi ra, ta ikan ra tá íkan na ndítivi nuni. Chívaꞌa na nuni ini yaka na, ta táan na xeꞌe xíxi ya. Kuꞌva saa íyo nduvi ra ikán, ikan ra xiꞌin naꞌa kuꞌun na koko na nuu xíxi ñu̱ꞌu̱.
Síkuchi ra Juan Jesús
(Mr. 1:9-11; Lc. 3:21-22)
13Saa ke̱e Jesús chí Galilea, ta ndi̱xaa ra nuu íyo ra Juan ita Jordán. Ta ndi̱kaꞌan Jesús xiꞌin ra Juan ya ná sikuchi ñaꞌa ra. 14Ta köo ndi̱xiin ra Juan sikuchi ra Jesús, saa ndi̱kaꞌan ra xiꞌin ra:
―Kúni un sikuchi i yóꞌo̱, ta yóꞌo̱ ka ku un xíniñuꞌu sikuchi yeꞌe, ndikuu ―káchi ra Juan xiꞌin Jesús.
15Saa ndi̱kuiin Jesús, káchi ra saa:
―Käsi un nuu i, vaꞌa ka sikuchi un yeꞌe vitin, saa chi soꞌva xíniñuꞌu yo xaa súvi yo ya xáꞌnda chiñu Ndioxi ―káchi Jesús xiꞌin ra.
Saa ndi̱xinu ini ra Juan si̱kuchi ñaꞌa ra. 16Tá síkuchi ñaꞌa ra, ñaa xa̱á ra kéta ra ini tikuii, saa xi̱ni ra xúna nuu ndivi. Ta ñaa ke̱ta Tachi Ndioxi vaxi ya, tá káa sata, saa káa ri ke̱ta vaxi. 17Saa táku ndi̱kaꞌan Ndioxi nuu ndivi, káchi ra saa:
―Ra yóꞌó ku Seꞌe i, ra kúꞌvi ni ini i xíni i, ta kúsini ni i xiꞌin ra ―káchi Ndioxi xaꞌa Jesús.
Tällä hetkellä valittuna:
San Mateo 3: xta
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Active: ©Wycliffe Bible Translators, Inc. All rights reserved.
