Matthew 5
5
Jesu haqkan o tatal aa
1Jesu aa miqtang tha khi eq, haqkan thináng ka eq tong ta. Ujiphantey tang piq relnáng thu eq tong ta. 2Etho Jesu aa ning thima phang tatal kota.
Asing sunmaan
(Luke 6:20–23)
3 “Utin na tharangka moq tey tang ma sunmaan,
chammatakoi Rangmungtan sha ning ma angna!
4 Uqhap tey tang ma sunmaan,
chammatakoi ning aa nungmay kapna!
5 Tinmang tey tang ma sunmaan,
chammatakoi thaji mingkang sha ning ma angna!
6 Asing rangma junglal chamlal tey tang ma sunmaan,
chammatakoi ning shima tashey kona!
7 Manchan kottey tang ma sunmaan,
chammatakoi ning aa manchan kapna!
8 Tin asang tey tang ma sunmaan,
chammatakoi ning aa Shkewa sha ukhi eq na!
9 Karok karatey tang ma sunmaan,
chammatakoi ning tha Shkewa sa tang ta halna!
10 Asing o qhing rangma tahikham kaptey tang ma sunmaan,
chammatakoi Rangmungtan sha ning ma angna!
11 “I tungkang o, miqtang aa nim sha junnam phin jo etho tahikham phin jo etho thaji jashit hutdip kup eq bat ajo, nim ma sunmaan. 12Nim sungrang ang inn, chammatakoi nim rangma ajong khongpha mungtan na shing aa. Chammatakoi jakho tok wang rangsamal tang ma tho ning aa irimal hun tahikham ta.”
Simm ni wallit
(Mark 9:50; Luke 14:34,35)
13 “Nim raa iri mingkang haq simm mal, etharin simm siim raa bangti ajo, chamal eq wey jin tasiim nin? Esha chamtho jin som mi ang nin, eshirangma bichak eq nin etho ja eq dapnak nin.
14 “Nim iri mingkang wallit mal. Kang na samhaq ajong sha jin thathuk moq. 15Miq aa nalpang sha thajung eq khowan eq hop shing moq. Etharin taap o shing aa. Irimal ang ajo himtey thaji eq wallit kapna. 16Khakla irimal hun, nim wallit thaji miq tangma takhi ma kot inn, etho ning aa nim jaqhal jaksom lot tang sha siin eq nim rangmungtan Wa sha tasapsey na.”
Thong
17 “Nga Moses thong etho rangsamal tang tatal sha lat chak ma thuta phang ta nak tathin inn. Nga iri thong tang raa tathun eq chak ma ang moq, thaji sha asing angma thuta phang. 18Nga khakla hun bat phang, mungtan nia mingkang haq uthun angna, etha thaji thun wey moq jakho, Shkewa thong wang aming raaq tho matwang moq angna. 19Ethi rangma utang aa amaan sa thong sha som hung aa, miq dak ma iri thong raa som ma tatal ajo, piq Rangmungtan na thaji phey wang aming angna. Etharin, utang aa thong sha som eq miq dak ma iri thong raa somlot ma tatal aa, piq Rangmungtan na thaji phey wang eq ajong angna. 20Ethi rangma, nga nim ma bat phang, nim asing sha Phorisi miqtang ni thong tataltey tang asing wang ahan ang ching. Ethimal ang min ang inn jo, nim Rangmungtan náng nop min ang nin.”
Tinqhat
21 “Jakho wang miqtang aa irimal batta ta nim aa tat tin, ‘Miq shi nak tatik inn, utang eq irimal somlo ajo khaphung kapna’ 22Etharin nga nim ma bat phang, utang eq tho upho ni no ma kha ajo, piq aa khaphung kapna. Utang eq tho upho ni no ma ‘miqthom’ ta raaq ajo, rong miq jakho náng sol katna. Utang eq upho ni no ma manthun raaq ko ajo, piq sha wal mungtan náng thum chak na. 23Ethi rangma, Shkewa jakho o rongthung náng tangwang kot kat ma kat tok o, nim pho ni no ma nim jamoq chamli jashit raaq tang atha ta nim aa tasik inn jo, 24nim tangwang sha rongthung na shingchak eq, jol eq ka inn etho nim pho ni no jamoq kara inn; ethi jio ka eq, nim tangwang shi kot chak inn.
25 “Chamtey tey nim ma tinkhat eq phungwa rel náng sol kat phu jo, kalo piq jamoq tung aa raaq shi kara inn. Etha ang moq ang ajo, piq aa nim sha phungwa ma kochak pha nin etho phungwa nim sha ralkoltey jamnáng takat pha nin etho ralkoltey aa nim sha chuk náng sakpha nin. 26Nga nim ma bat phang, chamtan namtu sha dok ko wey moq náng duk, nim chuk o hun tong nin.”
Sathuk tinthin
27 “Iri thong raa nim aa tat tin, ‘Sathuk nak som ka inn.’ 28Etharin nga nim ma batphang, utang miq adak miqnu siin eq piq sha kap ma nuk ang ta tathin ajo, piq aa tinmong wang sathuk somta. 29Nim aqhako miik eq ngarey tasom phin jo, iri miik ri lat eq bichak inn. Nim thaji hanphung ang eq walmungtan náng kat phey náng eq nim hanphung wang ashey shit aa sha aqhal. 30Nim jakqha shey ngarey tasom phin jo, eshi jak shi thaduk eq bichak inn. Nim thaji hanphung ang eq walmungtan kat phey náng eq nim hanphung ashey shit aa sha aqhal.”
Miqnu miqwa waqpaak kho
(Matthew 19:9; Mark 10:11,12; Luke 16:18)
31 “Irimal tho bat eq ta, ‘Utang miqwa miqnu waqpaak khochak ma nuk aa, piq aa lik wit eq jin kot eq aa.’ 32Thanga nga nim ma batphang, bari miqwa eq uhimteynu sathuk jaksom ahung na wapak kho ajo, piq aa eshi miqnu ma sathuk tasom aa; etho adak chamtey tey miqwa eshi miqnu sha wey kap ajo, eshi miqwa shey sathuk jaksom somlo aa.”
Rangtum ching tung aa raaq
33 “Jakho wang miqtang aa irimal batta ta nim aa tat inn, ‘Nim aa Teyhungwa relna chamlang rangtum tin eshi thaji shi som inn, eshi som hung aa nak tong inn.’ 34Etharin thanga nga nim ma batphang, nim aa chamlang ta tho ráng nak tum inn; mungtan miing o ráng nak tum inn, chammatakoi esha Shkewa tongching; 35Mingkang haq miing o ráng nak tum inn, chammatakoi esha Shkewa jaa shingching. Jerusalem miing otho ráng nak tum inn, chammatakoi esha rapney ajong Lungwang samhaq. 36Nim kho o lo eq ráng nak tum inn, chammatakoi nim kho shiwang ashey tho nim aa apung ni amak ta jin kaley min. 37Etharin nim raaq sha ‘ang’ tia ‘ang moq’ ang ching, chammatakoi eshi pheynáng eq ahan ang ajo, esha Thangwa chingko wang.”
Tsamnáng kot ajo tsamnang nak thawel inn
(Luke 6:29,30)
38 “Jakho wang miqtang aa irimal batta ta nim aa tat inn, ‘Utang eq ba miik tashit chak ajo, piq miik shi tho tashit u. Etho utang eq ba pa sha lok chak ajo, piq pa shi tho lok cha u.’ 39Etharin nga nim ma bat phang, nim jamoq tashit tey shima nak wey tashit inn. Chamtey tey nim aqhako sham phang o wat phin jo, piq ma hangko shi tho wey nol kot inn. 40Chamtey tey miq eq nim samqhong sha som chuwan ajo, piq ma nim khat sam shi tho ko chak inn. 41Chamtey tey ralkoltey miq eq kachang chang aa phalong shey náng hol ko phin ta bat ajo, phalong ni náng hol ko inn. 42Chamtey tey miq eq nim ching wang chamli tangwang chu phin jo, ukot eq chak inn; baluk o miq eq nim ching wang nam phin jo, eshima nam kot eq inn.”
Ralwa ma tinmat inn
(Luke 6:27,28,32–36)
43 “Miqtang aa irimal batta ta nim aa tat inn, ‘Nokwa ma tinmat inn, ralwa ma muksuk inn.’ 44Etha nga bat phang, nim ralwa ma tinmat inn etho nim tahikham tey tang rangma romtam chu inn. 45Eshimal som inn jo, nim sha mungtan Wa sa ang nin. Piq aa aqhal ni jashit miqtang ma rangsal taphang aa etho miq shi miq qhal tang ma ráng tachey kot aa. 46Nim ma tinmat tey ma chen tinmat inn jo, nim aa chamlang kongpha kap nin i? Phunta qheytey tang atho eshimal hun somlo aa. 47Etho nim nokwa tang jamoq chen nim wan inn jo, nim miq adak wang chamal eq mama ang nin? Thongking tey tang eq tho eshimal hun somlo aa. 48Ethi rangma, mungtan na tongtey nim Wa thimal, nim tho khakla asing ang ching!”
Tällä hetkellä valittuna:
Matthew 5: Mmmm
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
CC BY-NC-ND 4.0
