Matthew 17
17
Jesu hanphung kaley aa
(Mark 9:2–13; Luke 9:28–36)
1Saal tharok jio, Jesu aa Peter etho James nia upho John ujamoq sol eq aluk haqkan náng qhangta. 2Ning aa Jesu tha siing siin chey ta tho, Jesu tha kaley ta! Piq sham tha rangsal mal phángta, etho piq khat tha apung hal angta. 3Etho ethi atom ujiphantey tang eq Moses nia Elijah Jesu jamoq wan aa tha khita. 4Req Peter aa Jesu ma batta, “Teyhungwa, í iro tong raa aqhal! Nang unuk ang ujo, nga atom bulang taap him hun phang, ashey raa nangma, ashey raa Moses ma etho ashey raa Elijah ma.”
5Piq irimal raaq chey atho ashey alip phun ka eq ning tha homta etho ethi phun thiwang ashey raaq batta, “Ira i Miqwasa, bara nga tinma ang etho nga piq ma rapney sungrang ang! Piq raaq tat inn.”
6Ujiphantey tang they iri raaq raa tat atho, ning rapney cho eq ning sham tha hoplo eq ngakta. 7Jesu ning jamnáng ka eq ning tha thaklo eq batta, “Shat inn, nim nak cho inn.” 8Ning aa siin atho Jesu tha chen khita, adak utang tho khimoq angta.
9Ning tha aluk kanwang anim náng ka atho Jesu aa ning ma batta, “Miqna Sa ti eq wey jey moq nángduk, nim aa khi tin thi utang ma tho nak bat ka inn.”
10Etho ujiphantey tang aa Jesu ma pitta, “Elijah sha jakho thuk ching angna ta thong tataltey tang aa chamma bat aa?”
11Jesu aa thawel batta, “Elijah sha asing jakho kaphana etho piq aa thaji sha kacha na. 12Etharin nga batphang, Elijah uthok sey angta pha etho miqtang eq jin sing moq angta, etharin ning aa chamal tathin ta ethi mal hun piq jamoq somlo ta. Irimal hun Miqna Sa sha tho miqtang aa tatsamna.”
13Etho Jesu aa John jung thalamtey wa tung aa raaq batta ta ujiphantey tang they usam sey ta.
Thangwa eq lota ashey jaro Jesu aa taqhal aa
(Mark 9:14–29; Luke 9:37–43a)
14Ning miqtang relnáng wey wel ta tho, ashey miq Jesu jamnáng ka eq, ujaa thong o shong tong eq batta. 15“Teyhungwa, i miqwasa ma manchan phu, piq raa wakngak taksa etho piq rapney tsamnang aa. Piq wal náng ngak aa etha ang moq o jung náng ngak aa. 16Nga ba jiphantey tang jamnáng piq tha thok sol táng, etharin ning aa jin taqhal moq angta.”
17Jesu aa batta, “Iri miqtang raa rapney kam moq tang etho rapney jashit tang! Nga nim jamoq chamtan luk náng thok tong phanáng? Chamtan nángduk nga nim thanaan phang náng? Miqwasa ri irel náng sol kat phu.” 18Jesu aa thangwa ma kha eq batta, etho thangwa they ethi miqwasa tha shing chak eq chuwang ta, etho ethi rangham wang miqwasa tha qhalta.
19Ethi jio ujiphantey tang they Jesu jamnáng shu shu ka eq pitta, “Í aa anaan tsija tha chamal ley jin phan miq ang ti?”
20Jesu aa batta, “Chammatakoi nim kam rapney aney! Nga nim ma asing batphang, nim kam jungqhang li mal ang ajo, nim aa iri aluk kan rima jin bat eq nin, ‘Iri wang eshináng ka u’ etho eshimal hun kana. Nim aa thaji jin som eq nin. 21Iri phan raa romtam chuk etho wokcham wang hun thalat aa. Iri phan raa romtam chuk etho wokcham wang hun thalat aa.”#17:21 Chamtey Greek likdap tang na verse 21 ahung.
Jesu aa utik raaq wey bat aa
(Mark 9:30–32; Luke 9:43b–45)
22Jesu nia ujiphantey tang Galilee o tachong atho, Jesu aa ning ma batta, “Miqna Sa sha miqtang jakna thalona. 23Etho ning aa piq sha tatik na etha o tho saltom o piq sha wey jey na.”
Ujiphantey tang tha tintashit angta.
Rangnuk him phunta
24Jesu nia ujiphantey tang Capernaum náng thuta tho, Rangnuk him phunta qheytey tang aa Peter ma pitta, “Nim tataltey wa aa Rangnuk him phunta ko moq i?”
25Peter aa batta, “Ukot eq aa.”
Piq himnáng thu atho, Peter aa pit wey moq jakho, Jesu aa pitta, “Simon, nang aa chamta tathin u, iri mingkang lungwang tang aa utang jakwang phunta chu aa? Ning mung wang ti adak mung wang thu pha tang jak wang?”
26Peter aa batta, “Adak mung wang thupha tang ching wang.”
Jesu aa thawel batta, “Irimal ang ajo, mung miqtang eq phunta kot ching ang moq. 27Etharin ning tin na jashit ang moq rangma, nang aa shitim náng ngaqthan ka u. Jakho kapthan u eshi ngaqsa shi lo u. Unung sha kak ujo, nang aa ashey nginsa kap nu. Eshi som eq hiqtang rangma phunta ko u.”
Tällä hetkellä valittuna:
Matthew 17: Mmmm
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
CC BY-NC-ND 4.0
