Matthew 16
16
Patja takhi ma chu aa
(Mark 8:11–13; Luke 12:54–56)
1Phorisi tang etho Saddusi tang Jesu jamnáng thuta, ning aa piq sha thamaan ma tathin ta. Req ning aa Jesu ma batta, “Shkewa hun nang takat taphu ta takhi ma chamlang patja ching takhi phu.” 2Etharin Jesu aa ning ma batta, “Rangja o rangsal nop aa, nim raaq inn, ‘Rang aqhal, chammatakoi rangkang raa ashang.’ 3Etho rangnap kha o nim raaq inn, ‘Rangchey na, chammatakoi rangkang raa ashang etho amak.’ Nim aa rangkang raa siin eq, rangney chamal angna ta jin raaqtóng eq inn, etha otho nim aa rangham màl chamlang ma jin bat min. 4Thaney nap miqtang sha rapney jashit etho sathuk miqtang! Nim aa patja ching chu inn i? Kap min ang nin! Jonah patja sha shingchak eq nim aa adak patja kap min ang nin.”
Etho Jesu aa ning tha shingchak eq qhing chuwang ta.
Phorisi tang nia Saddusi tang thawung phan
(Mark 8:14–21)
5Ujiphantey tang shitim hangko kang náng ka atho, ning aa banlo lakchakta. 6Jesu aa ning ma batta, “Nim Phorisi tang nia Saddusi tang thawung phan wang rangtun eq tong inn.”
7Ujiphantey tang tha ning jaktung o wanta, “Piq aa irimal batta chammatakoi í aa banlo som mi angti.”
8Jesu aa ning chamta wan atha samta, req piq aa ning ma batta, “Chamma nim jaktung o banlo raaq wan inn? Chamma nim kam sha amaan sa? 9Nim aa thanga tho chamlang ma sam min? Banga banlo som eq hayat banga miqtang ma taphaksat táng shi nim aa tasik min i? Ethi wang nim aa chamtan qhong o tashey tin? 10Etho sannat banlo wang hayat bali miqtang ma taphaksat táng shi nim aa tasik min i? Ethi wang nim aa chamtan khong o tashey tin? 11Nga banlo rangma bat pha mong angta phang ta nim aa sam min i? Phorisi tang etho Saddusi tang thawung phan wang rangtun eq tong inn!”
12Etho ujiphantey tang aa samta, Jesu aa banlo thawung phan tung aa raaq bat moq angta, etharin Phorisi tang nia Saddusi tang tatal wang rangtun eq tong ma batta.
Jesu utang aa ta Peter aa bat aa
(Mark 8:27–30; Luke 9:18–21)
13Caesarea Philippi samhaq rel mung náng Jesu ka atho, piq aa ujiphantey tang ma pitta, “Miqtang aa Miqna Sa ma utang ta bat aa?”
14Ning aa thawel batta, “Chamtey John jung thalamtey wa ta bat aa, adak tang eq Elijah ta bat aa, etho adak tang eq Jeremiah tia adak rangsamal tang wang ashey ta bat aa.”
15Jesu aa ning ma pitta, “Nim aa chamta tathin inn? Nga utang ta nim aa bat inn?”
16Simon Peter aa batta, “Nang raa Khristo, atharang Shkewa Miqwasa.”
17Jesu aa batta, “John sa Simon, nang ma sunmaan chammatakoi iri raaq raa nang ma ashey miq eq takhi moq. Etharin rangmungtan na tongtey Iwa hun nang ma takhi taphu. 18Etho nga nang ma bat phang, nang Peter#16:18 Peter ta “long.” etho iri long kho ro nga i mondoli hun náng, etho walmungtan shey ira jin lìt moq angna. 19Rangmungtan chabi sha nga bajak o kophanáng. Mingkang haq na nang aa chamlang qhak shing u, esha mungtan na tho uqhak eq na! Etho mingkang haq na nang aa chamlang qhang u, esha mungtan na tho taqhang angna.”
20Ethi jio Jesu aa ujiphantey tang ma batta, “Nga raa Khristo tha ta utang ma tho nak bat inn.”
Jesu aa utik raaq bat aa
(Mark 8:31—9:1; Luke 9:22–27)
21Eshi rangham wang sey Jesu aa ujiphantey tang ma phang batta, “Nga Jerusalem náng katching etho eshináng ka eq nga miqlang tang, ajong tingwa tang etho thong tataltey tang ching wang ajong hal tintashit ching kap náng. Ning aa nga tatik eq chak phanáng etho saltom o nga wey jey ang náng.”
22Peter aa Jesu tha ashey ukit náng solkat ta etho kha eq batta, “Teyhungwa, baluk otho ang moq! Irimal bajam o baluk otho ang moq angna.”
23Jesu Peter ching náng ngik eq raaq ta, “Thangwa, i rel wang jol chuwang u, nang aa i lam táng u, chammatakoi iri tinthin raa Shkewa ching kowang ang moq, etharin miq wang thupha.”
24Ethi jio Jesu aa ujiphantey tang ma batta, “Nim ijam o katma nuk inn jo, nim aa nim ni nim sha shingchak eq ching etho nim bólq sha hol eq iji o qhing ching. 25Chammatakoi nim aa nim rollung sha thalun ma tathin inn jo, nim ma nim rollung sha simrum na, etha otho nim aa nim rollung i rangma shingchak inn jo, nim aa esha kap nin. 26Nim aa thaji mingkang sha kap inn jo tho, nim rollung sha simrum ang ajo, nim aa chamlang kap nin? Nim tsija tha chamlang eq thalik nin? 27Chammatakoi, Miqna Sa urangkamwa tang jamoq, uwa phun amun o kaa phana etho piq aa thaji miqtang ma ning jaksom rangma jakthang kona. 28Nga asing batphang, Miqna Sa tha Lungwang ang eq kapha sha khi wey min náng duk, thanga iro lang aa chamtey miqtang sha ti moq angna.”
Tällä hetkellä valittuna:
Matthew 16: Mmmm
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
CC BY-NC-ND 4.0
