Matthew 10
10
Asi ani apostle tang
(Mark 3:13–19; Luke 6:12–16)
1Jesu aa asi ani ujiphantey tang tha kashey o halta etho ning ma anaan tsija tang phan rangma etho phanrip tak asa taqhal rangma authority kota. 2Asi ani Apostle#10:2 Takat miqtang ma Apostle ta raaq aa tang miing ira: jakho Simon (Peter ta tho thamiing angta) nia uno Andrew; Zebedee sa wani James nia uno John; 3Philip etho Bartholomew; Thomas etho phunta qheytey Matthew, Alphaeus sa James etho Thaddaeus; 4Simon patriot#10:4 Patriot ta mung rangma thamol tey. etho Jesu thalottey wa Judas Iscariot.
Asi ani ujiphantey tang jaksom
(Mark 6:7–13; Luke 9:1–6)
5Jesu aa asi ani ujiphantey tangma iri raaq tang raa bat eq jaksom náng takat ta, “Gentile mung náng nak ka inn etho Samaria miqtang samhaq ashey náng tho nak ka inn. 6Etharin Israel wang matwang ang aa kelwut tang relnáng ka inn. 7Ka eq, ning ma phanchan inn, ‘Rangmungtan tha arel hal na sey.’ 8Atakasa miqtang taqhal inn, utik miqtang shi wey thajey inn, angam tak miqtang shi tasang inn etho miqtang wang thangwa tang shi phanchak inn. Nim aa thanghung wang kap tin, nim atho thanghung wang ko inn. 9Nim jamoq cha, hun aa cha etho nginsa nak hol inn. 10Khak nak hol inn, etho adak samqhong ni jaaqhong tho nak hol inn, etho qhingthil nak hol inn. Chammatakoi jaksomtey tang eq phaksat kap eq ching.
11 “Nim qhim tia samhaq náng nop inn jo, utang miq eq tin sungrang eq hal phin jo, nim uhim náng ka inn etho ethi haq wang thalat wey min nángduk eshi him sho hun tong inn. 12Nim ashey himnáng nop inn jo, sunmaan raaq bat inn. 13Eshi himtey tang eq nim jaqhal eq rimrang phin jo, nim sunmaan sha ning jamna angna; etho eshi himtey tang aa nim jaqhal eq rimrang pha min ang ajo, nim sunmaan sha nim jamnáng wey welna. 14Etho ashey him tia samhaq shey nim jaqhal eq rimrang pha min ang ajo etho nim raaq tat moq ang ajo, eshi haq sha shingchak rangham tho nim jaa wang botkhi shi thalnak inn.#10:14 Shkewa ning sha shingchak ta ta takhi rangma 15Nga nim ma khakla bat phang, Khaphung Saal o Sodom ni Gomorrah samhaq miqtang ma iri samhaq miqtang phey náng eq Shkewa manchan ahan takhina.”
Tahikham aa
(Mark 13:9–13; Luke 21:12–17)
16 “Inkaku tang jaktung na kelwut tang mal nga nim takat phang. Ethi rangma nim pu tang mal asoalat ang ching etho wotopin tang mal anin ang ching. 17Miqtang wang nim ni nim shi rangtun eq tong inn. Ning aa nim raa khak eq qhim rongnáng sol kat phanin etho Synagogue na wat phanin. 18I tungkang o, governor tang etho lungwang tang eq nim raa hum eq sol kat pha nin; irimal ang jo ning nia Gentile tang ma tungtang aqhal jin bat eq nin. 19Ning aa nim lo phin jo, chamta bat náng tia chamal eq bat náng ta nak tathin inn. Nim aa chamta bat ching sha nim ma ukot eq pha nin. 20Chammatakoi, uraaq tey nim ang min, etharin nim Wa Asang Tsija nim nung o raaq kana.
21 “Upho tang eq uno tang ma etho uwa tang eq usa tang ma tatik ma thalona. Usa tang eq unu ni uwa tang sha miiksuk eq ning tha tatik ma thalona. 22I tungkang o, thaji miq eq nim raa chikrik pha nin. Etharin uthun nang thula kam shingchak moqtey tang sha ulun angna. 23Ning aa nim ma ashey samhaq na thahikham phin jo, nim adak samhaq náng jol chuwang inn. Nga nim ma asing batphang, Miqna Sa thuwey pha moq jakho, Israel mung thaji samhaq náng nim ka min ang nin.
24 “Likphattey sha tataltey phey náng eq ajong ang moq. Qha sha tangteywa phey náng eq ajong ang moq. 25Likphattey sha tataltey mal ang ajo lali, etho qha sha tangteywa mal ang ajo lali. Him tangtey sha Beelzebul #10:25 Greek raaq na Beelzebul sha anaan tsija tang lungwang miing. ta hal ajo, him adak miq tangma ahan jashit miing o halna!”
Utang ma tho nak cho inn
(Luke 12:2–7)
26 “Ethi rangma miqtang ma nak cho inn. Tasak ang sha thaji thalat na etho tapu ang aa sha thaji eq sam na. 27Nga nim ma anak o batphang shi, nim aa alit o ka eq bat inn. Nga nim ma naq o batphang shi, nim aa himkho náng lang wang eq ring eq bat inn. 28Nim hanphung sha tathom eq chak ajo tho nim tsija sha jin tathom moq tey tangma nim nak cho inn; etharin Shkewa ma cho inn. Piq aa nim hanphung nia tsija thani sha wal mungtan o jin tathom eq na. 29Ani wosak thang sha rapney akum, etha otho, nim Wa sam moq ang eq, eshiwang ashey tho anim náng qhat moq. 30Etho nim thaji khorun sha wetchol sey. 31Rey nim nak cho inn, ahan wosak thang wang nim thang ahan.”
Khristo o hantey etho hanmoq tey
(Luke 12:8,9)
32 “Thaji miqtang jakho o nim i jiphantey ta raaq ajo, nga tho mungtan na tongtey i Wa jakho na nga irimal hun raaq náng. 33Etharin thaji miqtang jakho o nga sampha mong ta raaq ajo, mungtan na tongtey i Wa jakho na nga irimal hun raaq náng.”
Nungmay ang moq, etharin jantong
(Luke 12:51–53; 14:26,27)
34 “Nga iri mingkang náng nungmay hol kat taphang ta nak tinthin inn; nga nungmay hol kat pha mong ang taphang, etharin jantong hol eq ka taphang. 35Miqwasa tang sha ning wa tang jamoq thamiiksuk rangma etho miqnu sa tang sha ning nu tang jamoq thamiiksuk rangma etho namnu tang sha ning nicha tang jamoq thamiiksuk rangma nga ka taphang. 36Ashey miq rangma uhimtey tang hun ralwa tang angna.
37 “Iphey náng eq, uwa tia unu ma tinmat tey sha i jiphantey jin ang moq. Iphey náng eq, usa miqwasa tia miqnu sa ma tinmat tey, i jiphantey jin ang moq. 38Nim aa nim ni nim bólq hol eq iji phamin ang inn jo, i jiphantey jin ang min ang nin. 39Nim aa nim ni nim rollung sha táng shing inn jo, esha ushing eq chak náng thuna; etharin i tungkang o, nim aa nim ni nim rollung sha shing chak inn jo, esha kapna.”
Jaksom thang
(Mark 9:41)
40 “Utang eq nim jaqhal eq thawan phin jo, ning aa nga sha jaqhal eq thawan na. Etho utang eq nga jaqhal eq thawan ajo, ning aa nga takat teywa sha jaqhal eq thawan na. 41Utang eq rangsamal ang tungkang o, chamtey sha jaqhal eq thawan ajo, ning aa rangsamal jaksom thang kapna. Etho utang eq asing miq ang tungkang o, chamtey sha aqhal eq thawan ajo, ning aa asing miq jaksom thang kapna. 42Nga asing bat phang, i jiphantey tang wang thaji phey náng eq aming sha i jiphantey ta sam eq, jungki thaling ajo ning aa jaksom thang kapna.”
Tällä hetkellä valittuna:
Matthew 10: Mmmm
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
CC BY-NC-ND 4.0
