Mayanzame 20
20
Paul amakea môtôô na gô Macédoine na gô Grèce
1Vamagôga môsosoe agô Ephèse, Paul amakôkanganéda ane ameetsa Jésus mitémamie gôéongô ahngô ndongi. Amaagana n’ahngô mbe: Nanôdeekeda na gô mogo maNzambé. Vane Paul amakea môtôô na gô Macédoine. 2Amaseta tsenge nene nyetso na amakasôgéda mitéma miane ameetsa Jésus miangô, gô meekédu medi kuka yetso. Vane amoota na gô Grèce. 3Amamana gône ngonde ditatô. Amabaka mbe apeka gô mbôngône gôékea na gô Syrie ivô amookô mbe: Ajuif gô Syrie agôvangéa gépangô. Te gamanikangô na gô Macédoine. 4Ane amakea n’edi te adua. Sopater muana aPyrrhus môsi Bérée, na asi Thessalonique abaé te Aristarque na Secundus. Na Gaïus môsi Derbe na dôta asi tsenge éAsie te Timothée na Tychique na Trophime. 5Amôgôôe ane amoobégéa gôéenéa we gô môsenge aTroas. 6Na we tômapeka gô mbôngône gô Philippes vamoota sueti éaakô môpemba ôsiaahndéni. Môtôôe agô mbôngône ômabaka pitsi ditayi, vane tômadenga akasô gô Troas. Gône tômamana tsono épo.
Môtôôe amôyusumédu ômakea Paul na gô Troas
7Samedi na dikoo tômabaka muetso kôkangana vavo gôéaa tabudé éaKumu Jésus. Paul amabaka gôéongô we tômeetsa Jésus mitémamie ndongi. Gômabakangô na môtôôe n’ongôngôe, ameekéda ngu na va gatse apitsi. 8Gô tsongo émawanya we gô môgényé agô ngongo eba, gômabaka pingô yadambi. 9Mônzambu môvo, inedi Eutyche, amabaka digaa v’opôdéké ebee. Gômatongo meekédume maPaul, mônzambu ône amatimba na vio na ameeboga. Gômatsoo angô viovie amaaga môsingi gô môgényé amôtatô na gô tsina va gésa samôkii. Oma amamôdingôa gô mbadi amamana éwa. 10Paul amasutuméa gô pandimô na gô tsina. Amagudama na gôndé nzumbine. Amamôvatangana na amavovo n’oma mbe: Nômbiaba na mikebanganô. Adôngi. 11Paul amoomba ébata na gô tsongone éagô ngongo. Amabukua mipemba gôéaa n’akedi. Vane amoomba éékéda mabégô mayekani ngu na vamaagiia nyee. Amakea. 12Mônzambue ômakundugani ône, amanika n’akedi na gô ebedi. Oma muetso ameena ti gényônga gévôni.
Môtôô ômakea Paul na gô Milet
13We avo tômoobégéa gôépeka gô mbôngône gôébuéa gô Assos, mbôkane éngapeka Paul. Amuene amavanga nane, gôébégô amanyôngéô ékea na gô Assos gô tsina. 14Amaviga na amadenga we gô Assos. Vane amapeka n’asô gôékea na gô Mitylène. 15Tômatenôa mbôngône gô Assos na ôvo enyaa ône tômatsega gô Chio. N’ongôngôe tômabuéa gô Samos. Ovo enyaa ône tômatsega gô Milet. 16Paul amabaka n’etasa gôéôta Ephèse te ootaga, gésikamé. Asibé na ndéô gôédinga gô tsenge éAsie. Amabénga ébuéa na gô Jérusalem gô ndéô éaPentecôte.
Paul amavovo na peeye yambumu éaNzambé gô Ephèse
17Vamabaka Paul gô Milet amakudéga ôgi na gôndé peeye yambumu éaNzambé gô Ephèse mbe: Vigani na gô Milet. 18Vamabuéa peeye na gôndé Paul amanigôa ahngô mbe: Anye nôsabômu môdigédie wami ômabaka me n’anye, bandôa gô nyee ômatsiga me gô tsenge éanyô éAsie. 19Me namayanzéa Kumu Jésus gébé na nyemo. Namayanza te na keba. Namayanza gô tsina apanda dimatubédu me n’Ajuif gô épangôe émavangéahngô me. 20Gô meekédume, tsinôsuéga ta n’ebégô évo éndé na tsoongo gôndé anye gô nzéa éaNzambé. Namanôékéda mabégô metso v’ekanga na gô yeba yanyô. 21Namabambéa Ajuif na ane asaba Ajuif na mbeene éaNzambé mbe: Koani mitéma mianyô gôéba na wene mônongo. Géngôgani na gôndé Kumu Nzambé. Istani mitéma mianyô na gôndé Kumu Jésus-Christ gémôtsumé paga. 22N’atsatsee me nakea na gô Jérusalem gatômu me na Gédidi SaNzambé mbe: Kea. Me tsamenya éne engadenga me gône. 23Ene ésabômu me te éne émabeendu me na Gédidi SaNzambé gô mbôkaye yetso mbe: Eba atsôgôô na maguga mavôni mandé gôéenéa éwe gôkéwe. 24Ivô tsabono monyoe wami mbe te sôma sami satsoongo. Ene ébuta me gô monyo ôdôô te mbe nabuéa v’ekôdéô na gényônga ga môma akea tsaé. Na mbe namangôa éyanzee émeetsô me na Kumu Jésus. Eyanzee, te gôétsua na gôénigôa Tsangô Eamôsôba éangeba dimatôenanô na Nzambé.
25Me namoota va gatse anyô gôéékéda mabégô mokumu aNzambé. Menyani mbe nôsangadôomba éena ôsôe wami éva. 26T’ebandô nabeenda anye deo noo mbe ôkô va gatse anyô môvo akea gôébungana, tsangatsundédu gôndé angô. 27Bangôani mbe me namanônigôa matasa na ndongi yaNzambé yetso génôsuégé ta n’ebégô évo. 28Bakani misiki gôéwema mitéma mianyô. Gandé môkeneyi akenea ôbuee wedi, mônongovo anye keneani asi mbumu éaNzambé. Gôébégô Gédidi SaNzambé géétsa anye ényanga éamôkeneyi. Bôngôani mbumu éaNzambé. Te éne émavana Jésus na nzina yedi. 29Me tsabômu éne éngabuéa gô ngimami. Gôngaviga avo amôgôô agono na émbungu étsongono va gatse amandombo. Na éangô éseena mandombo ngeba. 30Buéyé na va gatse anyô gôngatimôa avo gôépatéa Mane Mamavovo Nzambé. N’avo ane ameetsa Jésus mitémamie angookô diboe yaô mbe mabégô mapie, na angakea go nzéane amabégôme mane. 31Bakani n’ekena. Menyani mbe me gô mipuma mitatô na pitsi n’omanda me tsidunda énôévéda môma na môma. Nameevéda na namadéa na keba te gôndé anye.
32N’atsatsee me nanôdeekeda na gô mogo maNzambé gôésumbédu n’edi na gôékeneo n’edi gô mabégô medi metondo. Amuene andé na ngudi gôéoodeda anye. Vane anganôétsa éne ékôkégangô ga mikuanya gôndé omedi. 33Me tsinyima gôndé môma ôkiti, vo dodo vo maduani. 34Nôsabômu gamayanza me na mogo mami gôédiia éne ébutu gôékenea ôtô. Emabaka nane te gôndé me na ane amakea mitôô n’ami. 35Gô mabégô metso me namani énôtubéda gayanza môma na mogo medi. Buéyé na gôéwedéa misuga nameenda te nane. Veenda wa n’anyô nane, tôbangôa éne émavovo Kumu Jésus mbe: Na gôéétsô, na gôéétsa, éne éôtéa na gényônga te gôéétsa.
36Vamamana Paul évovo nane, Paul n’ahngô muetso ahmasiba mabongo maô na amavovo na Nzambé. 37Muetso amadéa na gégeba. Amasambanéa n’edi gôéaagana n’edi n’enyônganéô évôni. 38Gégeba saô gévôni te gômavovo Paul mbe: Wa n’anyô tôsangadôenana. Na ahmakea gôémôveegeda na gô mbôngône.
Tällä hetkellä valittuna:
Mayanzame 20: TSV
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Alliance Biblique du Gabon (Bible Society in Gabon) 1983
