Mateghusi 6
6
Oku muna kughamwena hahepwe
1“Mwa neghedha yitenda yenu yoyinongo kughutho wawanu eshi ha yi mone, ngo mbadi sho mu wane yiruwera kwaWihenu ghomudiwiru.
2“Ninge eshi ku ghuna kughamwena hahepwe, wa shigha mumapori. Eyi ne hana kuyitenda hakadifurumeko mumasinagoge nomumikara eshi ha wa kughe hanu. Shemwa na kumutongwera: Awo ne kare ha yongaritha ghushwi wawo. 3Hewa kadi kemo, ngeshi ku ghuna haka kutapa thinu kwawahepwe, rumoho roye mbadi rwa kona kudimuka eyi runa kutenda rudyo. 4Kemo sho yi kare yitenda yoye yoyihunga mughudhindo. Wiho ghokumona yokunda, mbo ghana kuruwera.
Ngeshi ku muna kurapera
(Luk 11:2–4)
5“Karo shime, ngeshi ku muna kurapera, mwa kara yira hakadifurumeko. Awo ha haka thikuma mumasinagoge nomumashonga ghomikara kuraperera eshi ha kone kuwamona hanu. Shemwa na kumutongwera: Ndjambi dhawo ne kare dha yongara. 6Kadi kemo, ngeshi ku ghuna kurapera, yende kungonda dhoye no rapere kwaWiho yu ghuna kudhira kumona. Wiho ghokumona yokunda, ghana kukuruwera.
7“No ku muna kurapera, mwengipitha man̂ando yira hahayidena. Awo ne kughayara eshi Nyambi wawo ghana kuwayuva yoyi hana kuvuritha man̂ando. 8Mwa tenda thika wo, yoyishi Wihenu gha dimuka eyi muna nyanda, kughutho ghokiyimukumbera.
9“Mu rapere ngeno:
‘Wihetu ghomudiwiru,
di fumane Dina dyoye;
10ghufumu ghoye wiye;
mahimeno ghoye ha gha tende yira mudiwiru
kemo nopamuve.
11Yidya yetu yokehe diyuwa ghu tu peko dyarero;
12ghu tu thigherere mirandu dhetu
kenge di tuna kuthigherera hakamirandu dhetu,
13wa twingeneka mumayedhekerero,
ne ghu tu komonone kughumango.’
14“Yoyishi ngeshi ha mu thigherera hamweya mirandu dhawo, naye Wihenu ghomudiwiru mbo ghana mu thigherera. 15Ene ngeshi ha mu dhiri kuthigherera wa ha tenda ghuyi kukwenu, naye Wihenu mbadi gha kona kumuthigherera.
Oku muna kudhirerekedha
16“Ngeshi ku muna kudhirera, mwa butathana marupara ghenu yira hakadifurumeko. Awo hana kukuthitaghura marupara ghawo eshi, ha wa dimuke hanu eshi kudhirera hana kudhirera. Na kumutongwera ghushemwa eshi yiruwera yawo ne kare ya pita. 17Kadi kemo, ngeshi ku ghuna kudhirera, roghithe huki dhoye no yoghe rupara roye. 18Eshi gha dhire kukudimuka ghumweya kuyidhirera yoye. Shimengwa Wiho yu wa dhira kukona kumona. Wiho ghokumona yokunda yo gha kona kukuruwera.
Ghushwi ghomudiwiru
(Luk 12:33–34)
19“Mwa ku kongwedhera ghushwi ghopamuve, apa wa vundera kuyumbanyungu nokuthitembwe, no ku ha tjoroveranga hedhi hedhe. 20Mu kukongwedhere ghushwi ghomudiwiru. Omu wa dhira kuvundera kuyumbanyungu nokuthitembwe, nawedhi temba mbadi ha kona kutjoverekedha eshi hedhe. 21Yoyishi kughushwi ghoye, ko kumutjima ghoye.
Munyenge ghoyirama
(Luk 11:34–36)
22“Munyenge ghoyirama ne diho. Ngeshi diho dyoye diyumiyumi, yirama yoye yoyiheya yina kuwana thishe. 23Ene ngeshi ha dipa diho dyoye, yirama yoye yoyiheya yina kukara makokore. Ngeshi ha ghu dhimana munyenge mumoye, ngepi keho ghukuru ghodikokore!
Nyambi noyiyedhaghura
(Luk 16:13)
24“Mbadiko yu gha kona kurughanena hafumu hawadi. Aye ghana kudhimba ghumweya pamweya, no kufumaneka ghumweya. Ngambi ghana kutawa kwaghumweya no kunyatha ghumweya.
Yikudhekera yomoyo
(Luk 12:22–34)
25“Yodigho na kumutongwera me: Mwa kudhekera yomoyo wenu, eyi sho mu dye ngambi yi sho mu nwe, ngambi yoyirama yenu eyi sho mu shupate. Moyo ne mbadi wa piterera yidya nane! Endi yirama ne mbadi ya piterera yivata? 26Mu mone kuyinyunyi: Ayo mbadi ya kuna no mbadi ya pokora no mbadi ya ghungura. Wihenu ghomudiwiru yo gha yi kunga. Amwe ne mbadi mwa yi piterera ndi? 27Endi po mu di mukatji kenu, yidye ne ghokukona kuwedherera moyo wendi kamanana pamurandu ghoyikudhekera yendi.
28“No nye muna kukudhekera kuyivata? Mu koneke eshi ngepi di dhina kumena mitemo dhomumuthitu: Mbadi dhina kutwama no mbadi dhina kuruka yivata. 29Ne na kumutongwera eshi: Ene ngambi kenge gha tungire Salomoni, mbadi gha kuyengire thika mutemo ghofotji. 30Ngeshi ha yengi Nyambi kemo muhonyi ghomumuthitu, oghu ghuna kukara po dyarero dyokupeghunda ne hana kughutumekera. Ngepi keho di sho gha mu vateke ne mwe, amwe mwakamatawero ghomanbiru?
31“Yodigho mwa kudhekera no kuninga eshi: Nye sho tu dye endi nye sho tu nwe ngambi nye sho tu vate. 32Yinu yoyiheya yi ne ya kushana hakakupira matawero. Wihenu ghomudiwiru, gha dimuka eshi mwa nyanda yoyiheya yi. 33Yodigho mwandenge, mu shane tango pakutanga ghufumu waNyambi noghuhunga wendi, ndani po mbo gha mu pa yoyiheya yino.
34“Mwa kudhekera yopandere, yoyishi dyopeghundha nadyo no yadyo. Kehe diyuwa dya kara nomaghukukutu ghadyo.
Tällä hetkellä valittuna:
Mateghusi 6: MHW1986
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Mbunga dhoBayibili dhaNamibia (Bible Society of Namibia) 1986
