Mʉkpanganɨa 34
34
Ɓamanye ɓɔ Dina ɓɔtosio ikosi
1Ɓisi mʉngana, Dina, gwa ata moi ngɨa Lɛa a꞉nɔtɨa Yakɔɓɔ, a꞉chwɛa anɨsa anɨnana nɔ ɓiga ɓeɓoi ngaɓɔmɔ, ananɨ amati ɔ ɨkʉmbʉ. 2Kʉdɔ Sɛkɛmʉ, mwana ɔ Hamoli, ngama ɔ ɨkʉmbʉ ngɨyɛnɛnɨ, yɔ Ɓahɨvɨ, ɔ꞉tɔmɨna. Ndʉ aka ɓɔ ɔmʉfa, ɔ꞉kwaa nayɔ, nɔ, ɔ꞉mʉyapakiso. 3Sɛkɛmʉ ɔ꞉napɨana mʉtɨma akʉʉ ɔ Dina, gwa ata moi ngɨa ɔ Yakɔɓɔ. Nɔ kʉdɔ, a꞉mʉkʉnda mwana ata moi, nɔ, ɔ꞉pʉnga nayɔ akʉnganakɨa. 4Ga Sɛkɛmʉ nɔ ɨsɛ Hamoli ɓɔ: «Aba, anasɨkɨa mʉsamʉkyɛ ngʉa, a꞊ɓio moi asɛmɨ.» 5Kʉdɔ, Yakɔɓɔ ɔ꞉ka, ɓɔ gwa ata gue ngɨananɨ, a꞉yangiso pɛ gwa ata moi ngɨangɔ. Yakamɛngana, a꞉kɔsugomʉ yaka, dɔ ɓana ɓegue ngʉɓangɔ ɓa꞉ɓio nɔ ɓanama ngʉɓangɔ aneju. Nɔ, Yakɔɓɔ ɔ꞉gbaa ta ɓɔ woo, akɔɓɔya ta aka ɓana ɓangɔ ɓa꞉tɔwa-ɔɔ.
6Hamoli, ɨsɛ ɔ Sɛkɛmʉ, ɔ꞉ngwɨa kyɛnda anɨsa atɨ Yakɔɓɔ dɔ ɓɨyakananaka nayɔ. 7Ɨyɛ ndʉ, ɓana ɓɔ Yakɔɓɔ ɓa꞉tɔwa aneju, ɓɔ꞉tɔka tɨa yaka ngɨyɛnɛnɨ, yɔ꞉ɓujo ɓɔ kpe, nɔ yɔ꞉ɓʉjʉka nɔgbɛ. Dɔ, Sɛkɛmʉ a꞉kɨa yaka yɔ soni amati ɔ Ɨsalaɛlɛ, akɔkwaa nɔ mwana ɔ Yakɔɓɔ. Ɨyɛnɛnɨ, ya yaka ngɨyɛ yɔsisekiomʉ kyananakɨa pɔ bele. 8Ga Hamoli naɓɔ aka ɓɔ: «Mwana ngɨasɛmɨ Sɛkɛmʉ, a꞉kʉnda pɛ gwa ata moi ngɨakeno. Kʉɓanɨ, nɔnɨtɔ ɓɔ minjeni ɓaka ɨyɔ, ɨmʉsɨka. 9Tinjoneni masɔnɔ ati ɔ eso. Ná꞊ɓio nesu aninjo ɓiga ɓeɓoi ngʉɓeno, isu tɔninjo ʉɓeso. 10Inu, na꞊wolo ɨkʉmbʉ tɨta ɨhɔ nɔ isu aka, nɔ, ɨkʉmbʉ yɔ꞊ɓio ɓwau akɔ inu. Ɓieni agabanaka aka, nɔ, nɛnɨanɨa nɔ lɨkyɛmʉ.»
11Sɛkɛmʉ ɔ꞉sigio ɨsɛ ɔ Dina, ɨhɔ nɔ ɓamanye ɓɔ: «Nɨnɨanɨa ɓaka nɔ ɨjɨɔ akɔ mesu keno, nɛmɨ, na꞊ninjo ɨkyɛmʉ ngɨyɛ ná꞊nɛta. 12Ɨteni-sɨ lɨkyɛmʉ lɔ mʉsikana lɨja, nɔ ɓapɛpɛ kʉ ɓaja. Nɛmɨ, na꞊ninjo ta ndʉ aka ná꞊nɛta-ɔɔ. Yakamɛngana, nɔ́꞊nenjo ɨmɨ, ta gwa ata moi ngɨyeno ata mwana, aɓio moi asɛmɨ.» 13Ɓana ɓɔ Yakɔɓɔ ɓɔ꞉tosio atɨ Sɛkɛmʉ, nɔ ɨsɛ Hamoli yaka ngɨyɛnɛnɨ, nɔ mʉjɛɛ, dɔ, a꞉ɓio ɓɔ ɔ꞉yanakiseni manye eɓo, ngɨa ata moi yanakisoni. 14Ɓɔ꞉mʉngɨa ɓɔ: «Ya yaka ngɨyɛ isu ta꞊ngɔkɨa sina, akɔninjo gwa ata moi eso, atɨ gue ngɨa angɔkiisomʉ ɨgʉnɨ. Dɔ ɨyɛnɛnɨ, ya soni akɔ gbali ngɨyeso. 15Isu tɔ꞊kana nenu, ta ambɔ ɓague ɓaɓomu inani andɛnɔ, ɓɔkiiso ɨgʉnɨ kʉndʉ isu. 16Kʉɓanɨ, isu nenu tɛ꞊njono masɔnɔ. Tɔ꞊wolo nenu tɨta ʉmʉa mʉngana, nɔ, tɔ꞊ɓio nenu, tɨta ɨfananja mɛngana. 17Yakamɛngana, nɔkɔbayenimʉ inu, akɔkiiso ɨgʉnɨ ta ndʉ aka isu tɔ꞉sugo-ɔɔ, isu ta꞊nɨhɨnɨa gwa ata moi ngɨyeso, nɔ tɔ꞊sa nayɔ ta nɨsa.» 18Yaka ngɨyɛnɛnɨ ɓa꞉sugo, yɛ꞉kataa atɨ Hamoli, nɔ mwana angɔ Sɛkɛmʉ. 19Sɔkɔmʉ mwana ɔ ɓandambʉ ngɨananɨ, ɨgbalakiso akɔkyananakɨa yaka ngɨyɛ, ɓa꞉ɓio ɓɔ ɓɔɓusigieni, dɔ, mwana ɔ Yakɔɓɔ ngɨa ata moi, a꞉mɨkataa ɨkatanɨ. Ɨyɔ mʉndambʉ ngʉwɔnanɨ, a꞉ɓio kʉ ɨnga atɨ ɨsɛ.
20Atɨ Hamoli, nɔ mwana angɔ Sɛkɛmʉ, ɓɔ꞉sa aumongu wɔ gʉlʉ ngɨyeɓo, nɔ, ɓɔ꞉sigio ɓandaɓʉ ɓɔ: 21«Ɓombi ngʉɓa ɓa ta ɓawai ɓeso. Ɓiwolo pɨ ɨkʉmbʉ, nɔ gabanaka ta ɨhɔ nesu aka. Ɨkʉmbʉ ngɨyɛ ya ta ɨja, akɔ isu naɓɔ kʉtaa. Takwanana ninjono tɨa masɔnɔ isu naɓo. 22Yakamɛngana, ɨɓɔ ɓa꞊baya suo awolo ɨkʉmbʉ ɨhɔ nesu aka, nɔ isu akɔɓio tɨta ɨfananja mɛngana naɓɔ, ta ambɔ ɓague ɓaɓomu andɛsɔ aka, ɓɔbayɔ akiiso ɨgʉnɨ kʉndʉ ɨɓɔ. 23Tɔbayeni ɓɔ ɓɨka awolo ɨkʉmbʉ ɨhɔ nesu aka, mitunduga yɔ ɓanama ngʉɓeɓo, nɔ ikesi ngɨyeɓo kʉ iɓomu, ya꞊ɓio tɨta yeso. Kʉɓanɨ, tɨbayeni gɔ yaka ngɨyɛ ɓɔ꞉sugo, iɗo ambɔ ɓɨka awolo ɨhɔ nesu aka.» 24Kʉdɔ, ɓombi ɓaɓomu, ngʉɓa ɓa꞉ɓio ɓɔmomanieni akɔ umongu wɔ gʉlʉ, ɓɔ꞉baya yaka ngɨa atɨ Hamoli, nɔ mwana angɔ Sɛkɛmʉ, ɓa꞉ɓio ɓɔsugeni. Kʉɓanɨ, ɓague ɓaɓomu ɓɔ꞉kiiso ɨgʉnɨ.
25Ta ambise ɔ makwaa kaatʉ, ɓamoya-sɨ ta amati nʉkana, ɓana ɓapɨnɨ ngʉɓɔ Yakɔɓɔ, atɨ Simoni nɔ Lawi, ɓamanye ɓɔ Dina, ɓɔ꞉sɨka mapi yɔ ɗite ngɨyeɓo, nɔ, ɓɔ꞉chwɛanɨa amati ɔ gʉlʉ ga mbʉlɛɛ, nɔ, ɓɔ꞉dʉka ɓague ta ɓaɓomu, ɓɔ sɛ. 26Ɓɔ꞉wa kʉ nɔ Hamoli, nɔ mwana angɔ Sɛkɛmʉ. Tɨa aki atɨ Sɛkɛmʉ ambɛnɨ, ɓɔ꞉fa Dina, nɔ ɓɔ꞉sa nayɔ. 27Ɓana ɓɔ Yakɔɓɔ, ɓɛ꞉ka ahinyoo mɨnda lɨkyɛmʉ liɓomu, nɔ, ɓɔ꞉tɔpa ɨlɛ la꞉ɓio inani akɔ gʉlʉ, akɔtosio ikosi ngɨyɛ ɓa꞉yapakiso-ɔɔ, mʉsaɨ weɓo. 28Kʉdɔ, ɓa꞉tɔpa ɓakɔndɔlɔ, nɔ ɓamɛmɛ, nɔ ɓangɔmbɛ, nɔ ɓapunda ngʉɓeɓo, kʉ nɔ lɨkyɛmʉ liɓomu, ngɨlɛ la꞉ɓio andei, nɔ ɨlɛ la꞉ɓio aɓakʉbaa. 29Ɓɔ꞉sa nɔ lɨkyɛmʉ ta liɓomu, anɨngwa ta akɔ ɓana, nɔ ɓoi ɓaɓomu, nɔ lɨkyɛmʉ liɓomu ngɨlɛ la꞉ɓio amati ɔ lɨkáá ngɨleɓo.
30Ambise ɔngɔ, ga Yakɔɓɔ nɔ atɨ Simoni, nɔ Lawi aka ɓɔ: «Inu ɓiga, nɔ́꞉naɗaiso ɨmɨ tɨa mʉngɨmbɔ, nɔ, nɔ́꞉neniso ɓɨɓɨ apɛɨ ɔ ɓombi ɓɔ ɨkʉmbʉ ngɨyɛ ɓangɛ, yɔ Ɓakanana, nɔ Ɓapɛlɛsɨ-ɛ. Ɨnadɔ, ta isu ta mikpekpe ndʉ aka. Ɨyɛ tɨa ɓabinamɔmanakɨa-ɔɔ ɨmɨ, nɔ, ɓɔ꞊nagoiso nɔ ɗite, ambɔ ingwo ngayɛsɛmɨ ɨhɔ nɔ ɨfananja ngɨyɛsɛmɨ, tɨa ɨyɛnɛnɨ ɓanɨ.» 31Kʉdɔ, ɨɓɔ ɓapɨnɨ ɓɔ꞉mutosio ɓɔ: «Ya꞉sisekio ndɨ pɛ kyananaka mʉsaɨ weso tɨta ndɨ ɨjangwɛ ɓanɨ?»
Tällä hetkellä valittuna:
Mʉkpanganɨa 34: buuN
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2021, Wycliffe Bible Translators, Inc.