Mʉkpanganɨa 31
31
Yakɔɓɔ ɔtɔwɔ anɔ Kanana
1Yakɔɓɔ ɔ꞉ka ga ɓana ɓɔ Labanɨ, ɓakɔsugo ɓɔ: «Yakɔɓɔ a꞉tʉpa ikesi ngɨyɛ aba ngɨyeso iɓomu. Nɔ, ɛ꞉nɨanɨa nɔ lɨkyɛmʉ ta akʉʉ ɔ ikesi ngɨyɛnɛnɨ.» 2Ndʉ Yakɔɓɔ a꞉kanganakɨa Labanɨ, ɛ꞉na ɓɔ mangɛ angɔmʉ ɓata nayɔ, nɔ ɓʉkʉnda ndʉ aka ɓa꞉kyaka-ɔɔ pɛɨ. 3Kʉdɔ, MAKWƆƁƗƗ a꞉sigio Yakɔɓɔ ɓɔ: «Tɔwa gɔ tii aɨkʉmbʉ ngɨyɔ ɓatʉngwanʉ, anambamba ɔ ɨfananja ngɨyɛsɔɔ, nɔ, na꞊ɓio ta ɨhɔ nɔwɛ.»
4Yakɔɓɔ ɔ꞉ɓʉtʉmɨa atɨ Lakeli nɔ Lɛa ɓɔ ɓɛ꞉ka-sɨ, inani a꞉ɓio-ɛɛ akɔdyakakiso ɓanama. 5Ga ɨyɔ naɓɔ ɓɔ: «Nanɨna ndʉ atɔ eno angɔmʉ ɓata nɛmɨ nɔ ɓʉkʉnda, ndʉ aka ta꞉ɓio-ɔɔ nayɔ pɛɨ. Ɨnadɔ, Asɔɓɨɨ ngɨyɔ aba, a꞉ɓio ta ɨhɔ nɛmɨ. 6Inu, nanɨmbɨa iɗo ɓɔ ɨmɨ, na꞉kyananakɨa atɔ eno, nɔ angu ngɨasɛmɨ ta muɓomu. 7Gʉtʉ ndʉ, atɔ eno a꞉ɓio nɛmɨ apɛtanaka ta pɛtanaka, nɔ, ɔ꞉ɓio anachoko mʉkaya ngʉwɔsɛmɨ gagaa gagaa. Iɗo dɔ, Asɔɓɨɨ a꞉mʉsɨamʉ pɛpɛ ɓɔ ɨnakɨa ɓʉɓɨɓɨ. 8Atɔ eno ɔ꞉sugeni jɛnɛ ɓɔ: ‹Ɓana ɓɔ ɓanama ngʉɓɔ lɨɗa ɓɔ kpɛɛ kpɛɛ, ɓa꞊ɓio mʉkaya ngʉwɔsɔɔ›, ngbinga ngɨananɨ, linye lɔngɔ liɓomu, lɔ꞉pʉnga anɔta ɓana tɨta ɓɔ kpɛɛ kpɛɛ. Ɔ꞉nataniseni jɛnɛ tɨa ɓɔ: ‹Ɓana ɓɔ ɓanama ɓaɓomu ngʉɓɔ mudii ɓɔ gɨnɨgɨnɨ, ɓa꞊ɓio mʉkaya ngʉwɔsɔɔ›, linye lɔ ɓanama liɓomu, lɔ꞉pʉnga anɔta ɓana tɨa kʉ ɓɔ gɨnɨgɨnɨ. 9Yaɓanɨ, Asɔɓɨɨ akɛ, ɔ꞉sɨka ɓanama ngʉɓa atɔ eno, nɔ, ɔ꞉nenjo ɨɓɔ tɨa ɨmɨ.
10Akɔ angbinga ngɨa ɓanama ɓakyɔnapʉana-ɔɔ, nɔ꞉tɛna ɓisi mʉnga, amati ɔ lɨwɔtɔ, ɓɔ ɓague ɓɔngɔ ngʉɓa ɓa꞉ɓio akɔɗetio linye lɔ ɓakɔndɔlɔ, nɔ ɓamɛmɛ, ɓa꞉ɓio nɔ mudii, nɔ lɨɗa, nɔ mabii. 11Amati ɔ lɨwɔtɔ ngɨlɛnɛnɨ, Malaika wɔ Asɔɓɨɨ, wa꞉tɔnɛsoko ɓɔ: ‹Yakɔɓɔ!› Ga ɨmɨ aka ɓɔ: ‹Hei, sugo pɨ nanʉka.› 12Ɔ꞉nasigio ɓɔ: ‹Ɨna ɓague ɓɔ ɓanama ngʉɓa ɓakɔɗetio ɓoi ɓɔngɔ-a, ɓaɓomu ɓa ta nɔ mudii, nɔ lɨɗa, kʉ nɔ mabii. Yaka ngɨyɛnɛnɨ, ya꞊kyananakɨa-sɨ tɨta ɓanɨ, dɔ, yaka ngɨyɛ Labanɨ akyɔnakɨa suo, ɨmɨ, nɛ꞉na pɔngɔ ɨnanɨ. 13Ɨmɨ, na Asɔɓɨɨ ngɨa a꞉nachwɛanɨa jɛnɛ anɔ Bɛtɛlɛ, aki wa꞉chumo-ɛɛ ikopi, nɔ, wɔ꞉to mʉtʉ wɔngɔ nɔ umbundo, nɔ, wɔ꞉kio silika. Ʉngwa-sɨ aɨkʉmbʉ ngɨyɛ tɨa ʉngwanɨ, nɔ, wɔtɔwa tɨa kʉ andɛnɔ.›»
14Kʉdɔ, atɨ Lakeli nɔ Lɛa ɓa꞉tosio Yakɔɓɔ ɓɔ: «Ɨkyɛmʉ nga yeno dɔ tɨa tanɨ, ɨyɛ isu ingainga ta ɓata nayɔ amati ɔ mʉgyɛndɔ wɔ maɓɨɨ ngʉwa atɨ aba aka? 15Ɨyɔ, a꞉tɨkyananaka ndʉ ɓɛɛka, ɔ꞉sɨka ɔ꞉tɨgaba, nɔ, ɔ꞉dya lɨkyɛmʉ ngɨlɛ ta꞉lɨkwa. 16Akɔ ingono, tasugo ɓɔ lɨkyɛmʉ liɓomu, ngɨlɛ Asɔɓɨɨ a꞉sɨka anɨngwa atɨ aba ngɨyeso, ya lɨkyɛmʉ leso, nɔ ɓana ɓeso. Kʉɓanɨ, iɓomu ngɨyɛ Asɔɓɨɨ a꞉nasigio pɛ, ʉwɛ kɨa ta kɨanɨ.»
17Yakɔɓɔ ɔ꞉pʉnga tambanakɨa kyɛnda, nɔ, ɔ꞉ɗetekiso ɓana, nɔ ɓoi ɓangɔ akʉʉ ɔ ɓangamɨa. 18Ɔ꞉tʉpa mitunduga yɔ ɓanama, nɔ ikesi ngɨangɔ ta iɓomu ɨyɛ, ɛ꞉nɨanɨa nayɔ inani anɔ Padanɨ-Alanɨ. Kʉdɔ, ɔ꞉tɔwa atɨ ɨsɛ Isaka, anɔ Kanana. 19Ngbinga ngɨa Labanɨ, ɨsɛ ɔ Lakeli a꞉sa-ɔɔ akɔkio ɓakɔndɔlɔ mata, iyani ambise angɔ, Lakeli e꞉ɓo ɓamʉngʉ ɓɔ majɛjɛ#31:19 ɓamʉngʉ ɓɔ majɛjɛ: pɔ ɓɔ ɓa꞉ɓʉchɛka akɔ mɨkakaʉ ngʉɓangɔ. 20Yakɔɓɔ a꞉pɛta ɓata ɨyɔ, Labanɨ, Mʉalamɨa kʉ pɛtanɨ, dɔ, a꞉ngwɨa kyɛnda sɔkɔmʉ ɨmʉɓɨa. 21Yakɔɓɔ a꞉hɛyaka nɔ lɨkyɛmʉ ngɨlangɔ, ta liɓomu. Ndʉ a꞉tapʉa lisini ɔngɔ, Ɛfʉlatɨ, ɛ꞉sɨnganaka anɨsa tɨa nɔ ʉbɔbɔ ngʉwɔ ihoi yɔ lɨkpangba, anɔ Gɨlɨadɨ.
Labanɨ ɔsɔ akpata Yakɔɓɔ
22Ambise ɔ makwaa kaatʉ, ɓɔ꞉tɛka tɨa aɓɨa Labanɨ ɓɔ, Yakɔɓɔ a꞉hɛyaka pɛ hɛyakanɨ. 23Labanɨ ɔ꞉sɨka ɓafandɔngɔ, nɔ, ɔ꞉ngwɨa kyɛnda nayɔ akpata, amati ɔ makwaa mɛɗɨanɛka. Ɔ꞉tɔmufeyeko tɨa akɔ lɨkpangba anɔ Gɨlɨadɨ. 24Asɔɓɨɨ ɔ꞉tɔmʉyakɨa Labanɨ, Mʉalamɨa, naɓutu akɔ lɨwɔtɔ, ga ɨyɔ nayɔ ɓɔ: «Kanganɨa iɗo, akʉʉ ɔ yaka ngɨyɛ wanɨsa anʉngɨa Yakɔɓɔ.»
25Yakɔɓɔ a꞉ɓio ɓɔ ɛmaiseni ɨhɛma, anɔ Gɨlɨadɨ ngbinga ngɨa Labanɨ, a꞉tɔmufeyoko-ɔɔ. Ɨyɔ Labanɨ, nɔ ɓafandɔngɔ ɓɔ꞉tɛmaiso ɨhɛma nga yeɓo, tɨa kʉ ananɨ.
26Kʉdɔ, Labanɨ a꞉ɓokuo Yakɔɓɔ ɓɔ: «Ha gue, wa꞉kɨa pɛ-sɨ ɓanɨ dɔtanɨ? Wa꞉napɛtanaka pɛ, nɔ, wɔ꞉tʉgbʉa pɛ nɔ ɓana ngʉɓɔsɛmɨ ɓeɓoi ndʉ ɓabaya ɓɔ ɗite! 27Wa꞉hɛyaka pɛ-sɨ ɓanɨ, dɔtanɨ? Ya꞉kwa pɛ-sɨ tanɨ ʉwɛ, nɛmɨ akɔpɛtanaka ɓanɨ? Wakumo pɛ-sɨ ɨmanɨ nɛmɨ aɓɨa? Ambɔ ɨmɨ, na꞉nasɨa pɛ akɔnɨsa ta amati ɔ magyagya. Nɔ, ambɔ na꞉nadyisio pɛ kʉ nɔ ʉmbɔ, nɔ, ɓɔ꞉naɓɛndɨa ɓabiba ɨhɔ nɔ ʉdɔmʉ. 28Ɨna-sɨ, wɔ꞉kɔnasɨɔmʉ pɛngɛ anɨka anɨmwaka ɓanɔnɔ ɓɔsɛmɨ lɨngʉngʉ, ɨhɔ nɔ ɓana ngʉɓɔsɛmɨ ɓeɓoi, pɔ naɓɔ aninjo kyɛnda. Wɔ꞉kɨɔ pɛngɛ yaka mɛngana yɔ ɓujangijangi. 29Ha gue, ambɔ nɔnakɨa ɓʉɓɨɓɨ kɨanɨ! Yakamɛngana, Asɔɓɨɨ ngɨyɔ ɓatɔ, ɔ꞉nasigio pɛngɛ naɓutu ɓɔ: ‹Kanganɨa iɗo akʉʉ ɔ yaka ngɨyɛ wanɨsa anʉngɨa Yakɔɓɔ.› 30Nanɨmbɨa iɗo ɓɔ ʉwɛ, wahʉya tɨta kyɛnda, dɔ, wakʉnda atɔwa atɨ atɔ. Ya꞉kwa pɛ dɔ tɨa tanɨ, ʉwɛ, nɛmɨ aniɓio tɨa kʉ nɔ ɓamʉngʉ ngaɓɔsɛmɨ?»
31Yakɔɓɔ ɔ꞉mutosio Labanɨ ɓɔ: «Ʉɓá, wa꞉nakɨa pɔngɔ, dɔ, na꞉ɓio ayongo ɓɔ wanahɨnɨa ɓana ɓɔsɔɔ ngʉɓa ɓeɓoi, nɔ ɓʉkaɓʉkaɨ hɨnɨanɨ. 32Mombi ngɨa wa꞊mʉgbʉka nɔ ɓamʉngʉ ngʉɓɔsɔɔ, ati ɔ ɓandamɨ aka, yɛtɔ ɓɔ ɓɨmʉwa ta nɨwa. Ʉwɛ, kangaka pɨ, ati eso aka, pɔ ɓɔ weneni ɨkyɛmʉ yɛsɔɔ mɛngana, wɔɨsɨka kʉ sɨka.» Ɨnadɔ, Yakɔɓɔ ɛ꞉mbɨɔmʉ ɓɔ Lakeli akɛ, e꞉ɓo ɓamʉngʉ ngʉɓɔnanɨ ɓɔ ɓangɛ.
33Kʉdɔ, Labanɨ ɔ꞉kumonokio amati ɔ lɨhɛma ngɨlɔ atɨ Yakɔɓɔ, nɔ atɨ Lɛa, nɔ atɨ ɓoi ɓɔ tɛa ɓapɨnɨ ngʉɓɔmɔ. Yakamɛngana, sɔkɔmʉ ɨ꞉na ɨkyɛmʉ pɔ mɛngana. Ndʉ a꞉chwɛa amati ɔ ɨhɛma ngɨyɔ Lɛa, ɔ꞉tɔkumonio tɨa atɨ Lakeli. 34Ambɛnigo ɓɔ pe, Lakeli akɛ a꞉sɨka ɓamʉngʉ, nɔ, ɔ꞉ɓʉnaya amati ɔ itoi yɔ ngamɨa, nɔ, ɔ꞉wolo akʉʉ ɔngɔ, ga jikomu. Labanɨ ɔ꞉hatanaka inani amati ɔ ɨhɛma, sɔkɔmʉ ɛ꞉na ɨkyɛmʉ.
35Ga Lakeli nɔ ɨsɛ ɓɔ: «Makwasɛmɨ, watɨkwamʉ mʉtɨma wɔ ʉnganga, ɓɔ dɔ nɔngwɔmʉ ɨkʉʉ apɛɨ asɔɔ. Nɛ꞉nakɨa pɛ uyi ngʉweso wɔ ɓoi.» Kʉdɔ, Labanɨ ɔ꞉ɗʉɨa ʉmʉa ɓɔ fu fu fu, sɔkɔmʉ ɨ꞉na ɨkyɛmʉ.
36Yaka ngɨyɛnɛnɨ, yɔ꞉mʉjʉka Yakɔɓɔ, nɔ, ɔ꞉mʉnyakɨa Labanɨ asugo ɓɔ: «Ɓʉɓɨɓɨ ngʉɓɔsɛmɨ ɓa ɨmanɨ? Yaka yɛta ɓɨɓɨ nga yeno tanɨ nɔ꞉kɨɔ, ɨyɛ, wa-ɔɔ nɛmɨ akpata tɨa ɓʉmʉ ɓɔ? 37Ɨtakɨtakɨ ngɨyɛ, dɔ, wɔ꞉kpɔwɔ lɨkyɛmʉ ngɨleso, tɨa kʉ liɓomu, ɨkyɛmʉ yɛsɔɔ nga yeno tanɨ, ɨyɛ, wɔ꞉ɨnɔ inani amati? Ɨnapɨa tɨa apɛɨ ɔ ɓombi ngʉɓɔsɔɔ, ɨhɔ nɔ ʉɓɔsɛmɨ, iɗo ambɔ, tɨa ɨɓɔ, ɓitikio mʉkɔmbʉ ngʉweso nɔwɛ. 38Akɔɓɔya ɨtakɨtakɨ ngɨyɛ, ta꞉kɨa pɔngɔ nɔwɛ mago ɓatɛkɛɓɛ ɓapɨnɨ. Nɛ꞉namʉ gʉtʉ pɔ ɓʉa ɓɔta bʉchʉchwakɛ akɔ ɓakɔndɔlɔ, ga pɔ ɓamɛmɛ ngʉɓɔsɔɔ, nɔ, na꞉dyamʉ ɓague ɓɔ ɓakɔndɔlɔ, ati ɔ mutunduga wɔ ɓanama ngʉɓɔsɔɔ, pɔ ɓisi pɔ mʉnga. 39Nɔ꞉nɛkɨɔmʉ nɔ mʉnda wɔ mɛmɛ, ɓɔ dɔ ɓanama ɓɔ iju ɓɔmʉwɔ. Ɨkyɛmʉ yɔ꞉yanakini jɛnɛ, ta ɨmɨ akɛ, nɔ꞉tʉmba ɓuɓuto ɓɔngɔ. Ɓɛɓeni jɛnɛ nama nɔ musoti ga pɔ naɓutu, wɔnɛta ta busiko ɓɔngɔ. 40Ɨpá ya꞉ɓinadya nɔ musoti, nɔ sɛsʉ yɔ꞉najio naɓutu, sɔkɔmʉ pɔ adaa ngɨa na꞉kwa-ɔɔ tɔɔ. 41Na꞉ɓio ɨmɨ, ta ɓanɨ amati ɔ mago ɓatɛkɛɓɛ ɓapɨnɨ, ngʉka na꞉kɨa andɔɔ. Na꞉nakyananakɨa mago tɛkɛɓɛ nɔ ɓɔgɨna, akʉʉ sɨka ɓana ngʉɓɔsɔɔ ɓeɓoi ɓapɨnɨ, nɔ mago mɛɗɨa akɔɓeyoko ɓanama ngʉɓɔsɔɔ. Yakamɛngana, wa꞉ɓɨo anagombonokio mʉkaya ngʉwɔsɛmɨ machaa nɔ machaa. 42Asɔɓɨɨ ngɨyɔ ɓaba, Abalaama, nɔ Asɔɓɨɨ ngɨa ɔ Isaka, a꞉tɨmukumo, ɔ꞉naɓeyokenimʉ jɛnɛ, ambɔ wa꞉natoiso pɛ ta lɨkɔndɔ ɓʉtʉʉ. Asɔɓɨɨ ɛ꞉na ikoko ngɨyɛsɛmɨ, akʉʉ ɔ tɛa yɛta ɓʉmʉ ngɨyɛ na꞉nakɨa, kʉdɔ, a꞉nagɔga pɛ ʉwɛ naɓutu.» 43Labanɨ ɔ꞉mutosio Yakɔɓɔ ɓɔ: «Ɓoi ngʉɓaɓɛ, ɓa ɓana ɓɔsɛmɨ, nɔ ɓana ngʉɓaɓɛ, ɓa kʉ ɓana ɓɔsɛmɨ, nɔ mutunduga wɔ ɓanama ngʉɓa, ɓa ɓanama ɓɔsɛmɨ. Ɨkyɛmʉ iɓomu ngɨyɛ wanɨna aka, yeso nɔ ɓana ɓeɓoi ngʉɓɔsɛmɨ. Ɛɛ, tɨa ɨmanɨ dɔ, ɨyɛ ɨmɨ, na꞊kɨa ɓʉɓʉnʉ nɔ ɓana ngʉɓɔsɛmɨ ɓeɓoi, pɔ ɓana ngʉɓeɓo, ɓa꞉ɓʉnɔta aɓɛ? 44Ha gue, ika tɨkɨa gɔ tɨa agɔmɛ, ɨya a꞊ɓio ndʉ dɛmʉ ati eso nɔwɛ.»
Atɨ Labanɨ ɓɔkɨɔ agɔmɛ nɔ Yakɔɓɔ
45Kʉdɔ, Yakɔɓɔ ɔ꞉sɨka ikopi, nɔ, ɔ꞉ɨchumo ga chu, ndʉ mʉbɨnga. 46Ga Yakɔɓɔ nɔ ɓafandɔngɔ ɓɔ: «Inu ɓague, mɔmakeni makopi.» Kʉdɔ, ɓɔ꞉mɔmaka ibimba yɔ makopi, nɔ, ɓɔ꞉dyakaka ananɨ anambamba ɔngɔ. 47Labanɨ ɔ꞉sʉa ibimba yɔ makopi ngɨyɛnɛnɨ, ino ɓɔ Yegali-sahaduta#31:47 Yegali-sahaduta: pɔ ɓɔ ɨsɨ yɔ manɔ ngʉka nɔ Ɨalamɛa ya ɓɔ «ibimba yɔ makopi yɔ ɓʉdɛmʉ», nɔ Yakɔɓɔ ɔ꞉ɨsʉa ino ɓɔ Galɛdɨ. 48Ga Labanɨ ɓɔ: «Ibimba yɔ makopi ngɨyɛ, ya dɛmʉ ati eso nɔwɛ.» Yaka ngɨyɛ ɓa꞉ɨsʉa-ɔɔ ino ɓɔ Galɛdɨ#31:48 Galɛdɨ: pɔ ɓɔ ibimba yɔ ɓʉdɛmʉ ya꞉kwa ɓanɨ. 49Ɓa꞉ɨsʉa ino ngayɛmɔ ɓɔ Mɨsɨpa#31:49 Mɨsɨpa: pɔ ɓɔ mukangi dɔ, ɨyɔ Labanɨ, a꞉ɓio ɔsugeni ɓɔ: «MAKWƆƁƗƗ ɨtɨkanganakɨa, isu, kanganakɨanɨ, ngbinga ngɨa ta꞉ɓio-ɔɔ ɗu ɗu ɗu, sɔkɔmʉ anɨnana mesu akɔ mesu. 50Wɔseni akɔkyananaka ɓana ngʉɓɔsɛmɨ ɓeɓoi, pɔ ɓɔ wɔsɨka ɓoi ngaɓɔmɔ ambise eɓo, gʉtʉ ndʉ mombi mʉngana, angɔmʉ ɨhɔ nesu aka, ɨmbɨa ta ɓɔ Asɔɓɨɨ a dɛmʉ ngɨyeso nɔwɛ.» 51Ga Labanɨ ɓata nɔ Yakɔɓɔ ɓɔ: «Ɨna ibimba yɔ makopi, nɔ, mʉbɨnga ngʉwa nɛ꞉maiso ati eso nɔwɛ. 52Ibimba yɔ makopi, nɔ mʉbɨnga ngʉwa, ya ndʉ dɛmʉ, ati eso nɔwɛ. Yasugo ɓɔ ɨmɨ, na꞊ngɔchanamʉ ibimba yɔ makopi ngɨyɛ, anɨsa nɔ ʉgbaa ngʉwɔsɔɔ, nɔwɛ akɔkɨa ɓʉɓɨɓɨ. Kʉndʉ ʉwɛ, wa꞊ngɔchanamʉ ibimba yɔ makopi, nɔ mʉbɨnga ngʉwa, anɨsa nɛmɨ akɔkɨa ɓʉɓɨɓɨ. 53Asɔɓɨɨ ngɨyɔ ɓakuku, atɨ Abalaama, nɔ Naholi iɓio ndʉ juji ati eso nɔwɛ.»
Kʉdɔ, Yakɔɓɔ ɔ꞉kio silika, akɔ ino yɔ Asɔɓɨɨ ngɨa ɨsɛ Isaka, a꞉tɨmʉkumo. 54Yakɔɓɔ e꞉njo mutebii akɔ Asɔɓɨɨ, ananɨ akʉʉ ɔ ɨkpangba, ɛ꞉sɨa ɓafandɔngɔ idyo, nɔ, ɓɔdyakaka, nɔ, ɓɔ꞉kwaa tɨa kʉ inani akʉʉ ɔ ɨkpangba.
Tällä hetkellä valittuna:
Mʉkpanganɨa 31: buuN
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2021, Wycliffe Bible Translators, Inc.