Muuduko 3
3
A'mwo kwolabolo teyaul Gooti toolluro yogalo tovi kisuvolo solo tovinokwono
1 #
Ado. 12:9, 20:2 To'no'gwowi su toro toga Gooti Yawelluro yiuwi'nokai ibesa'aiyo sokwollosoka tooravuro pwol youkuu'najo'mo kuudo tov yiuwi'nokai pworai kuuwoleyajukekono. Toro kuuwoleyajuko tool gabakuto tookono. Toro te gabakuto su tool abolo tovi kuudoganokaikono. “Gooti tool nebal'no aro aikudokaldukono. Kevu yiuwi'nokai iko womdo akavida'ai adakwopo tooravuro ikulsulo ton mamuudanbullunono. Aikudokaldukono?” 2Gabakuto tool toro kuudoganoka tovi abolo tov kuudokakwono. “Awiyo, toro manakudokaikono. Aro anakudokaikono. “Womdo akavida'ai yiuwi'nokai iko tooravuro ikulsulo ton nokwo muudanbullunokwono. 3Toro kuvi kuruv iko womnakuuto tomuu aulodapsuko toolluro ikulsulo tono'gwowi mamuudanbullunokwono. Aki ato to'no kuubogai'nubullu kuruv nobolbullunovakikono.” Gooti tool toro anakudokaikono.” Abolo tov gabakuto toollu toro kuudokakwono. 4Abolo tov toro wuujuno sumaiyokwe gabakuto tool kuunano aro soukuu'nuudokaikono. “Awiyo, kuvimaiyo. Mabolbullunovakikono. 5Kevu ikulsulo su toolluda'ai amanbullu tov kuudo go'no go'nodo tonyu kuu'maiyo toru'no baiki'mowonovakikono. Kuudo sugudo togai'aro kuudo ma'no ma'nodo togai'aro tonyuno youromaro'bullu Gooti toolbusuko imo'nubullunovakikono. Toro te Gooti tool gavubusuko nyumo'nubullokweyo'mo aro aikudokaikono. “Ikulsulo toollu mamanbullonono.” Aikudokaikono.” Gabakuto tool abolo tovi toro soukuu'nuudokaikono.
6Toro wuujuno sumaiyokwe abolo tov ikulsulo tovi wonoma'no sumaiyokwe toga kuudo saurokakwono. Oo iko akal sugumalukekono. Aki toro toolluro ikulsulo ton ilaiyo nokwo nonyo'mogano. Toro tovi nuu amanmi tov pi'mwo kuudo tov nokwo youroma'mo'mideyo. Kuudo saurokakwono. Toro kuudo yau'no sumaiyokwe toga ikulsulo tov muudanyuno sumaiyokwe pun gami kwolo tool gavuge mwaloduke toollu wiyo'no amanokaikono. 7Toro teyaul nyuno sumaleyokwe kuudo tov kuu'maiyo toru'no abwi'movokavakono. Toro teyaul, “Oo muukanyulmaiyo teyonauldeyo” juno sumaleyokwe toga iko fik toolluro kuuwopto togai kanyulo to'busuko amuloumdukuulluro'nolovakono.
8Toruda'ai Gooti Yawel sula'iminyo toga womdo tovi biyomolloduke toolluro suulbibi tovi a'mwo kwolabolo teyaul wuu'nolno iko toorai akuuto tomuu yiulo apuu'naroleyaukono. 9Toro kupuu'na'dole toga Gooti Yawel a'mwo toollu deko aro abuudokaikono. “Gadomuu dukomwakuno?” 10Toro abuudoka toga a'mwo tool aro kuudokaikono. “Guvu womdo akavi biyomollodore tookuji guu'nodum muukanyulmaiyo toonyu nobanuwono'jokwe luko yodum yiulo apuu'nakono.” Kuudokaikono. 11Toro kuudoka tovi Gooti tool samuugojokaikono. “Muukanyulmaiyekugono tov ala'mwol agudumokaikudeyo? Moro iko, kumakekono, agudo toolluda'ai ikulsulo tov amanmodekudukono?” Samuugojokaikono. 12Toro samuugojoka tovi a'mwo tool aro kuudokaikono. “Abolo nuuge yogaimo'nyo'mo anyabodo akav iko su toolluda'ai ikulsulo pullugwo amuudonyamoka tov amanmonyugono.” Kuudokaikono. 13#2Krn. 11:3; 1Tm. 2:14A'mwo tool toro kuudoka tovi Gooti Yawel abolo tovi samuugojokaikono. “Guu burowo'nyo sumodo'guudeyo?” Toro samuugojoka tovi abolo tov kuudokakwono. “Gabakuto tool soukuu'nanyudumoka tovida'ai amuudanme'gono.” Kuudokakwono.
Gooti tool a'mwo kwolabolo teyauke'aro gabakuto tooke'aro tonyu tabunyuwuulo adubweyoka tovinokwono
14Toro te Gooti Yawel gabakuto toollu kuudokaikono. “Guu toro soukuu'nuudumodo tovino tov tabunyu nogubwemekugono. Tabunyuwuulo su tov noonyumwonyu ibesa'aiyo pworai muubwemokwono. Yiuno guu judo tookujuno gubwemokwono. Toro tooku yiuwi'nokai aiyo kuuno amjomwekovla'bi iruko tobuullu sumwolkado to'no plavo'bi sullukwako tov nugovla'mwalbinekugono. 15#Ado. 12:17Aki toro tooku abolo tovi ikomago wimo'numwalbinekugono. Aki abolo tov gumi ikomago gujumo'numwalonokwono. Aki gumida'ai sumo'nugelabupi kworo kuruv abolo tovuro kwolaiyo toorai ikomago wimo'nupinorogano. Toro yopi puga abolo tovuro kwikweyago kwolaiyo pwol imo'nonekono. Toro toolluro suvlo wuuduwago tovi tuko dowa'do'bure kwekuji kuruv kwolaiyo su tool gumoro mido tovi gurojagubweyonekugono. Su toro tabunyuwuulo tov agubwemono.” Gooti Yawel gabakuto toollu toro kuudokaikono.
16Toro wuujuno sumaiyokwe aki abolo tovi aro kuudokaikono. “Guu gabakuto toollu kaduko kwimado tovino tov tabunyuwuulo akav gubwemo'guugono. Kwolaiyo yomallo'mo tobuuku tuko bwotonyo ibwosunmwalbinobuukugano. Toro ibwosuno'bi kuu'guu kuruv gumi kwolo toolluno ilaiyo kuuno gujunumwalono'guugono. Toro tool gumi mollogumwalowo'ji guu kwollu dolago tomuu mwalmwalbinobuukugano. Toro tov gubwemonyugono.” Gooti Yawel abolo tovi toro kuudokaikono.
17 #
Hib. 6:8
Toro wuujuno sumaiyokwe aki Adamollu aro kuudokaikono. “Guu abolo tovi kaduko wiyodum moro ikulsulo, kumakokwono, agudo toolluda'ai amanmodo tovino tov tabunyuwuulo akav gubwemekugono. Toro amanmado tovi nuvu aro gubwemekugono. Aga kwako sugudo tovi kaiyako igolosumonyugono. Toro te wosamujuko ton yasuwa'no mabilapinogano. Toro te guu wosamujuko ton mallo'mo tekwogu yiuwi'nokai toga womdo bwotonyo yo'bi yonugovla'mwalbinekugono. 18Toro te aga kwako su to kuvi wosamujuko yoburoudanyo'mo yodo'bure tekwoguji noonyumwonyu lodokweyodeyo suguratodeyo ton kugai'aro biloworomwekuupinogano. 19Toro te guu womdo tov dukwogulo imo'naro'bi nyomjonomwekovla'mwalbinekugono. Toro tekwogu nuvu kwako tovida'ai saguukwollo tooku kwako tovi aki aiko te pla'binekwogugano. Tabunyuwuulo akav toro agubwemono.” Gooti Yawel a'mwo toollu toro kuudokaikono.
20A'mwo su toolluno yovo tov Adamolekono. Aki Adamol gami abolo tovino yovo tov Iviyovo sowarokaikono. Abolo su tov yiuwi'nokai a'mwo abolo tonollu nelluneyago muudu'no kuunodo tovino tov toro sowarokakwono. 21To'no'gwowi Gooti Yawel Adameke teyaullu youro kanyulo puruval sokwolluwiropiyokaikono. Youro kanyulo su toval allu kuulolo tooravuro kulako tovida'ai dovelowiyoma'no sumaiyokwe sokwolluwiropiyokavakono.
Gooti tool Adameke Iviyokwe teyaullu womdo Idenda'ai abilomovomjopiyoka tovinokwono
22 #
Ado. 22:14
Toruda'ai Gooti Yawel aro sajunokaikono. “Aga'no'gwowi a'mwo tool nevubusuko sumo'numokaikono. Toro tool kuudo sugudo togai'aro kuudo ma'no ma'nodo togai'aro tonyuno me'no souroma'mokaikono. Toro tovino tov a'mwo su tool aiyo yiunokuudo nomjomwekovlawo'jokwe tov iko aiyo yiunokuudo mujomwekovlaiyo'moneyokwe toolluro ikulsulo tov nomuudano'jo.” Sajunokaikono. 23Toro juno sumaiyokwe Gooti Yawel Adamollu kuudokaikono. “Guu womdo Idenda'ai bolokwo'bi kwako puvino dovlavono. Kwako su tov gumi saguukwollo tovi julloburoudanogawono.” Gooti Yawel Adamollu toro abilomodovomjopiyokaikono. 24Toro modovomjapino sumaiyokwe toga a'mwo tool iko aiyo yiunokuudo mujomwekovlaiyo'moneyokwe toolluro ikulsulo tov noulomuudano'jokwe puuto tovi duuwato'mo tov seruubim ensel pworai kuudapiyokaikono. Toro toorai womdo Iden toru kuujo tool sulopiyamoka tomgu wuudapiyo'no aki puuto tovi uullukullo'mo kwallu'mopto puruv kwosokaikono. Kwallu'mopto su tov du'wiyo to'no nodowo gunyumwo gunyumwoga yodowodo tov kwosokaikono. Toro kwosoka su ton a'mwo pwol iko aiyo yiunokuudo mujomwekovlaiyo'moneyokwe toollu wobo toru nuuwipiyokweyo'mo kwosokagano.
Tällä hetkellä valittuna:
Muuduko 3: SMB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2022: Ethnos360 Sanford, Florida