मत्‍ती 1

ईसू मसीह की बंसावली

(लूका 3:23–38)

1ईसू मसीह अब्राहम कौ बन्सज और दाऊद कौ बन्सज है। ईसू मसीह के बाप दादान के नाम जा तरैह ते हैं। 2अब्राहम कौ बेटा इसहाक, इसहाक कौ बेटा याकूब और याकूब कौ बेटा यहूदा और वाके भईया हते। 3यहूदा और वाकी पत्नी तामार के बेटा फिरिस और जोरह हते। फिरिस कौ बेटा हिस्रोन हतो। हिस्रोन कौ बेटा एराम हतो। 4एराम कौ बेटा अम्मीनादाब हतो। अम्मीनादाब कौ बेटा नहसोन और नहसोन कौ बेटा सलमोन हतो। 5सलमोन और वाकी पत्नी राहब कौ बेटा बोअज हतो। बोअज और वाकी पत्नी रूत कौ बेटा ओबेद हतो। ओबेद कौ बेटा यिसै हतो। 6यिसै कौ बेटा दाऊद राजा हतो। दाऊद कौ बेटा सुलेमान हतो, बू बा औरत ते पैदा भयौ, जो पहलें उरिय्याह की पत्नी हती। 7सुलेमान कौ बेटा रहबाम हतो। रहबाम कौ बेटा अबिय्याह हतो। अबिय्याह कौ बेटा आसाफ हतो। 8आसाफ कौ बेटा यहोसाफात हतो। यहोसाफात कौ बेटा योराम हतो। योराम कौ बेटा उज्जियाह हतो। #1:8 कछू यूनानी हस्त लेखन में लिखौ भयौ है कै योराम उजियाह के दादा कौ दादा हतो। 9उज्जियाह कौ बेटा योताम हतो। योताम कौ बेटा आहाज हतो। आहाज कौ बेटा हिजिकिय्याह हतो। 10हिजिकिय्याह कौ बेटा मनश्शे हतो। मनश्शे कौ बेटा आमोन हतो। आमोन कौ बेटा योसिय्याह हतो। 11इसरायल ते बन्दी बनाकै बेबीलोन जाबे के समै में योसिय्याह के बेटा यकुन्याह और वाके भईया पैदा भए। #1:11 इब्रानी हस्त लेखन में लिखौ भयौ है कै योसिय्याह यकुन्याह और वाके भईयन कौ दादा हतो। मत्‍ती पीढ़ी की बात करतुए जा बजैह ते ऐसौ लिखौ गयौऐ।

12बन्दी हैके बेबीलोन में पौहचायबे के बाद यकुन्याह कौ बेटा सालतिएल पैदा भयौ। और सालतिएल कौ बेटा जरुब्बाबिल हतो। 13जरुब्बाबिल कौ बेटा अबीहूद हतो। अबीहूद कौ बेटा इल्‍याकीम हतो। इल्‍याकीम कौ बेटा अजोर हतो। 14अजोर कौ बेटा सदोक हतो। सदोक कौ बेटा अखीम हतो। अखीम कौ बेटा इलीहूद हतो। 15इलीहूद कौ बेटा इलियाजर हतो। इलियाजर कौ बेटा मत्‍तान हतो। मत्‍तान कौ बेटा याकूब हतो। 16याकूब कौ बेटा यूसुफ हतो। जो मरियम कौ पती हतो। मरियम ते ईसू पैदा भयौ जाकूं लोग मसीह कैहतैं।

17जा तरैह ते अब्राहम ते लैके दाऊद तक सब चौदह पीढ़ी भईं। और दाऊद ते लैके बेबीलोन में बन्दी बनाकै पौंहचाए जाबे तक चौदह पीढ़ी भईं। बेबीलोन में पौहचबे के बाद ते लैके मसीह तक चौदह पीढ़ी भईं।

ईसू मसीह कौ जनम

(लूका 2:1–7)

18 # लूका 1:27 ईसू मसीह कौ जनम जा तरीका ते भयौ, जब वाकी मा मरियम की सगाई यूसुफ नाम के आदमी के संग भई हती बिनकी सादी हैबै ते पैहले बू पबित्र आतमा की सक्‍ती ते गर्भवती भई हती। 19जब यूसुफ कूं जि मालूम परी, तौ बानें मरियम ते चुपचाप सगाई तोड़बे की सोची। चौंकि यूसुफ एक धरमी और भलौ आदमी हतो और बू अपनी हैबे बारी पत्नी कूं बदनाम करबौ नांय चाहतो।

20 यूसुफ इन बातन के बारे में सोचई रयो, तबई पिरभू के सुरग दूत ने बाते सपने में कही, “कै दाऊद के बन्सज यूसुफ तू मरियम कूं सादी करकें अपने घर लायबे ते मत डरपै। चौंकि जो वाके पेट में है, बू पबित्र आतमा की सक्‍ती ते है। 21#लूका 1:31बू बेटा जनैगी, तू वाकौ नाम ईसू रखियो। चौंकि बू अपने लोगन कौ बिनके पापन ते उद्धार करैगौ।” 22जि सबरी बात जा बजैह ते हैरइऐं कै, पिरभू के बे वचन जो परमेस्‍वर की ओर ते बात बतायबे बारेन के द्वारा कहे गये हते, बे पूरे होंय। 23“एक क्वारी गर्भवती होगी, और बू एक बेटाए जनैगी और वाकौ नाम इम्मानुएल रखौ जाबैगौ” जाकौ मतलब है “परमेस्‍वर हमारे संग है।”

24इतनी सुनकें यूसुफ नींद ते जग गयौ और पिरभू के सुरग दूत की आग्‍या मानकै मरियम कूं अपने घर ब्याह करकें लै आयौ। 25#लूका 2:21और जब तक वाके बेटा पैदा नांय भयौ, तब तक बू मरियम के संग नांय सोयौ। और बानें वाकौ नाम ईसू रखौ।

Tällä hetkellä valittuna:

मत्‍ती 1: BRAJ

Korostus

Jaa

Kopioi