Matiyu 6
6
Yesu kalinŋ wɔ̀ wɔri-i shɔɔrinŋ maka ɲaan ki bi sun
1Yesu tu sɛbɛ : « Dɔnsaŋ, á á yɛri paka tɔ, á fa áwɔ Kirinŋ saa tirimaanna ki ji konaŋ ni ɲaanna bi i kì dɛ! A niŋ ji-i kì, ábɛɛ ra sali kila áwɔ kirinpɔlila Tiŋ ki gbɛ kì. 2A miŋ ji ǹʼtɛ ŋi i shɔɔrinŋ ma gbɛwɔ kiri tɛ, fa niŋ sunjo de mani bataa ru kì. Wulufuulibitɔnŋ kiri mabi kiri i nini i Yawutu kiri wɔ kalinfu kiri ru, niŋ fa kaninwulinŋ kiri fan, nwɔma konaŋ kiri i arì tɔ shɔɔrinŋ bi. Sɛli ki ra, míŋ a ǹʼbi ábɛɛ tɛ, ńʼtu nini arì sali ki kila niŋ i kɔ. 3A miŋ ji shɔɔrinŋ ki ma-a, miŋ panŋ gbɛ ki i finŋ wɔ̀ wɔri-ra, fa ncusun miŋ nɔrinŋ gbɛ ki i niŋ tɔ kì. 4Niŋ ɲaan ki tɛ, nʼwɔ shɔɔrinŋ ki ma du ru, miŋ Tiŋ wɔ̀ i bi radumaan kiri bataa ja-a, niŋ a mɔɔn sali ki wɔri nʼtɛ. »
Kirinŋ nafɛka ɲaan shɔɔrinŋ ki bi ki
(Luki 11.2–4)
5Ntiŋ tu sɛbɛ : « A ábɛɛ ji Kirinŋ nafɛ-a, á fa niŋ ji wulufuulibitɔnŋ ni sali kì. Kí i tu Yawutu kiri wɔ kalinfu ki ru, walima saa kiri tɔnŋ na, kí i Kirinŋ nafɛ-ri, ninki di-i kí tɛ. Kí i ǹʼma-a ninkunŋ, nwɔma konaŋ kiri i arì ja. Sɛli ki ra, míŋ a ǹʼbi ábɛɛ tɛ, ńʼtu kí arì sali ki kila niŋ i kɔ. 6Nka, a miŋ ji-a Kirinŋ nafɛ, de nʼwɔ fu ciiru fudaŋ ki bɛɛ ru, ŋi i ǹʼtɔnŋ ki sɔɔn nʼsun, miŋ Tiŋ Kirinŋ wɔ̀ i mani nadumaan kiri ru, ŋi i niŋ nafɛ. Ninwɔ̀ ɲaniŋ i bi radumaan kiri ra, ninki a miŋ sali.
7A ábɛɛ ji nafɛ ki tan-a, á fa á pwulu-li wulu tenŋ ki sun kaan mwɔɔnna kì. Kirinŋ tɔbali kiri i ǹʼma-a ninkunŋ. Kíbɛɛ cirasun, tu arìbɔɔ wulu ki bi ǹʼmwɔɔnna ki a ji-a ncusun Kirinŋ i arìbɔɔ nafɛ ki pa. 8Á fa ji nini bishi ri kì, sabu ábɛɛ maku i finŋ woo finŋ na, ábɛɛ Tiŋ ki i niŋ bataa tɔ-a, niŋ i faa ábɛɛ ǹʼnafɛ-i sun kì. 9A ábɛɛ ji Kirinŋ nafɛ-a, á ǹʼnafɛ ka ɲaan ka tɛ tu :
‹ Yibɛɛ Tiŋ, ábɛɛ wɔ̀ i kirinpɔli ki ra,
ábɛɛ tɔ wɔlinŋ ki gbɛ konaŋ bataa gbɛ.
10Áwɔ masabi ki na.
Ábɛɛ dintɛ bi ki ma pwɔkulinŋ ki sun,
miŋ tu ŋì i ma-a kirinpɔlila ɲaan wɔ̀ tɛ.
11Á yɔɔ jiŋ nufinŋ ki wɔri yi tɛ.
12Á yɔɔ pɔli kiri tu yi tɛ,
miŋ tu yibɛɛ i yi gbɛ
koŋ pɔlimaan kiri wɔ pɔli kiri tu-a kí tɛ ɲaan wɔ̀ tɛ.
13Á fa ta yibɛɛ wu yi kɔrɔbɔmaŋ nu kì,
nka á yi mwu san shitaanni ki wu.
[Sabu, masabi ki fa sotinbi ki fa gbɛbi ki i ábɔɔ waarinŋ bataa ru. Amiina.] › »
14Yesu tu sɛbɛ : « A ábɛɛ ji konaŋ kiri wɔ pɔli kiri tu-a kí tɛ, ábɛɛ Tiŋ wɔ̀ i kirinpɔli ki ra, niŋ yɛrima ki a ábɔɔ pɔli kiri tu á tɛ. 15Nka, a ábɛɛ ji koŋ pyɛ kiri wɔ pɔli kiri tu-a kí tɛ kì, ábɛɛ Tiŋ ki a ábɔɔ pɔli kiri tu á tɛ sɛbɛ kì. »
Sunŋ deka ɲaan shɔɔrinŋ ki bi ki
16Yesu tu : « A ábɛɛ ji sunŋ na waarinŋ wɔ̀ ru, á fa á ɲaannuŋunu miŋ tu wulufuulibitɔnŋ kiri kì. Nini i arì ɲaannuŋunu-na, nwɔma konaŋ kiri i ǹʼtɔ tu arìbɛɛ sunŋ na. Sɛli ki ra, míŋ a ǹʼbi ábɛɛ tɛ, ńʼtu kí arɔɔ sali ki kila niŋ i kɔ. 17Nka, nwɔ̀ i miŋ, a miŋ ji sunŋ na, nʼɲaannu ki wu, ŋi i ŋuŋ kini jii kɔri nʼsun, 18nwɔma konaŋ kiri fa ǹʼtɔ tu miŋ sunŋ na kì, duu miŋ Tiŋ wɔ̀ i mani nadumaan kiri ru. A niŋ ma, miŋ Tiŋ wɔ̀ ki i bi radumaan kiri ja-a, ninki a miŋ sali. »
Nafulu ramɔnimaŋ sɔbɛ ki bi ki
(Luki 12.33–34)
19Yesu tu sɛbɛ : « Á fa nafulu lakɔli bo á tɛ ka juniɲa ka ru kì. Cininaŋ ni a so de-i ǹʼnu, kpɛlikpɛli i so ǹʼpa-i, kwunŋ ni i so ǹʼbo fu ki tɔnŋ yali-i, kí i ǹʼshi sɛbɛ. 20Nka, á áwɔ nafulu ki rakɔli bo á tɛ Kirinŋ wɔ ki ru. Cininaŋ ni a de ǹʼnu niŋ mani nu kì, kpɛlikpɛli dumiŋ a ǹʼpa kì, kwunŋ ni fani dumiŋ a so ǹʼfu ki tɔnŋ yali-i, kí i finŋ shi nmaŋ kì. 21Sabu, mɔɔn nafulu ki i mani wɔ̀ ru, miŋ ciiru ɲakili ki bataa i niŋ mani ki ru sɛbɛ. »
Firi ki wɔ manisarinŋ ki bi ki
(Luki 11.34–36)
22« Ɲaninaŋ kiri i firi ki wɔ lanpaŋ ki i. Niŋ ɲaan ki tɛ, a miŋ ɲaninaŋ kiri shɔɔrinŋ ni ji-i, miŋ firi ki bataa ra ji manisarinŋ nu. 23Nka a miŋ ɲaninaŋ kiri shɔmaan ji-i kì, miŋ firi ki bataa i ji-a mancinŋ nu. Niŋ ɲaan ki tɛ, finŋ wɔ̀ i miŋ bo-a manisarinŋ ki ru, a niŋ ji mancinŋ i, niŋ mancinŋ ki a gbɛ dɛ! »
Kirinŋ bi ki fa nafulu bi ki
(Luki 16.13)
24Yesu tu sɛbɛ : « Koŋ tɔri tenŋ so-a cinŋ ma-i ŋununtiŋ fuuli tɛ kì, sabu tenŋ ki bi a kwɔ ntiŋ sun, tenŋ ki bi i di ntiŋ tɛ. Walima ntiŋ a a kulu tenŋ tɛ, ntiŋ na a kulu tenŋ tɛ kì. Mìŋ ɲaan tenŋ ki tɛ, ábɛɛ ra so baara ma-i Kirinŋ tɛ, á i ǹʼma jalinŋ ki tɛ mìŋ waaci tenŋ ki ru kì. »
Gbɛ bili bi ki Kirinŋ sun ciirufɔnɔbi kiri waari ki ru
(Luki 12.22–31)
25Yesu tu kí tɛ tu : « Míŋ i ǹʼbi-a ábɛɛ tɛ ńʼtu : ‹ Á fa á gbɛɛratɛɛ áwɔ nufinŋ ki fa á bonsunjuulinŋ kiri kilaka ɲaan bira kì. › Ábɛɛ ǹʼtɔ tu ɲini ki bi ki gbɛ nufinŋ bi wu kì wa? Niŋ fa tu firi ki bi i gbɛ juulinŋ bi wu kì wa? 26Ábɛɛ juunŋ ɲaannaanŋ kiri shɛɛli, yìrì finŋ firi-ra kì, yìrì dumiŋ bilaŋ tɛri-ra kì, yìrì bilaŋ nakɔli bo-a cinŋ nu kì, nka ábɛɛ Tiŋ wɔ̀ i kirinpɔli ki ra, niŋ i yìrì tɔnnafɛ-a! Ábɛɛ pari nini wu pewu pewu kì wa? 27Ábɛɛ ru, nkɛnŋ tenŋ wɔ gbɛɛratɛɛ so-a pyaanŋ bo-i ntiŋ shi ki sun?
28Ábɛɛ á gbɛɛratɛɛ-ra áwɔ bonsunjuulinŋ kiri bira nfɛnŋ na? Ábɛɛ juunŋ ɲiŋ kiri fooka ki shɛɛli, yìrì cinŋ ma-a kì, yìrì dumiŋ juulinŋ bo-a cɛɛli lu kì, 29nka, míŋ a ǹʼbi ábɛɛ tɛ, ńʼtu hali masa Solomani fa awɔ gbɛbi ki bataa, ńʼtu ntiŋ sunyeka ɲaan ki yìrì ru tenŋ wɔ po kì. 30Niŋ ɲiŋ ki wɔ̀ i ja-a jiŋ, siri, tuu i ji-a ǹʼpa, a Kirinŋ ji niŋ sunyeka shɔ-a ka ɲaan ka tɛ, ábɛɛ ǹʼtɔ tu ŋì a ábɛɛ sunye, ŋì i fwuu niŋ sun kì wa? Ábɔɔ bilinabi ki kuru-i dɛ!
31Niŋ ki ra, á fa á gbɛɛratɛɛ, á i ǹʼbi tu ábɛɛ ra nfɛnŋ nu, walima tu ábɛɛ ra nfɛnŋ mwunu, walima tu ábɛɛ ra juulinŋ kila bo á sun dɔɔkunŋ kì. 32Niŋ finŋ kiri bataa ceelimaanna ki i sɔɔmaŋ cin-a Kirinŋ tɔbali kiri ra. Nka ábɛɛ Tiŋ wɔ̀ i kirinpɔli ki ra, niŋ i ǹʼtɔ-a tu yìrì bi ábɛɛ ra. 33Á Kirinŋ wɔ Masabi ki fa ǹʼwɔ telibi ki ceeli sun. A niŋ ma, Kirinŋ a niŋ finŋ kiri bataa bo ǹʼsun ábɛɛ gbɛ.
34Á fa á ciirufɔni siri bira kì. Á siri bi kiri bo siri ra. Jibi bataa fa a ru fɔɔnbi yɛ. Ǹʼbataa wɔ fɔɔnbi i ǹʼnapo-a. »
Tällä hetkellä valittuna:
Matiyu 6: JOB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Wycliffe Bible Translators, Inc.
