Matta 2
2
Tooma ɓan maa mbuka a ɗuura seklǝmeta wa
1Ndiira ɓaa haasǝ Yeso Baitalami a put Yahudiya wa, fer kuɓu Hiridus yǝsaa kuɓsutu wa, pa ɓan maa mbuka a ɗuura seklǝmeta ɓa, ɓǝ fiɗ ma lau ɓoti ra wa ɓǝ wo Urshalima, 2ɓǝn nkee me, “Yaa ɓaa haasǝsǝ meen kuɓ ɓaa Yahudawa ɓa wa ya, yǝ nau? Tǝ wǝr seklǝmera ira ma ɓoti ra, tǝ wo me taa nyoo.”
3Pa kuɓu Hiridus yǝ kurasǝ mbusa maaso wa, senta ita a nii ma ɓaa Urshalima nsaad. 4Pa yǝ kwau kuɓsa nek mbusa sa ma malǝmaa Masaka Musa sa, yǝ ɓǝ taa ham ɓaa ka haa Almaseho ɓa. 5Ɓaa nkee me, “A ur Baitalami a Yahudiya wa, me an nawanto kaya yǝ nyor maaso me,
6“ ‘Pa ngase Baitalami, a put Yahuda wa wa,
ngǝ sem ngekelek ɗaan a kuɓsa Yahuda sa ra.
Me ɗaan a ngani an kuɓsutu ya kiyaa fiɗi,
yaa kiya war wanda ɓet ɓǝna Isra'ila ɓa.’ ”
7Pa Hiridus yǝ yar ɓan maa mbuka a seklǝmeta ɓa a nhuukǝra me yǝ maa a ɓoni fer ɓǝ wǝrsǝ seklǝmera kara wa. 8Pa yǝ ɓǝ tung Baitalami yǝ nkee me, “Soo kosǝ kǝr ɓong ham au kaya yǝsǝ ɓa, me sǝ wǝrsǝn wosǝ nǝ nkee, me niina kǝn konaa nyoo.”
9Pa ɓǝ kurasǝ mara kuɓu yǝ nkeesǝ ra, ɓǝ faɗ ɓobɓǝsa, pa seklǝmera ɓǝ wǝrsǝ ma ɓoti ra ɓa yǝ toma siko a wii ɓoso, ko yǝ nǝɗ a ham auwe yǝsǝ ɓa. 10Pa ɓǝ wǝrsǝ seklǝmera kara wa, ɓǝ kung ma kuɗa pengpeng ra. 11Ɓǝ kansǝ a hit kawa wa, pa ɓǝ wǝr au kaya ma maasi Maryamu, pa ɓǝ kwirsǝ a wii usu ɓaa nyoo. Pa ɓǝ haa mbu ɓǝ wosǝ ɓa zinariya ma lubban ma mur ɓaa sa too. 12Pa ɓaa win ɓǝsǝ ngwee a rotǝma me ɓǝ kong kang ma lau Hiridus wa ra, pa ɓǝ kang a put ɓoso ma ɗǝɗa kǝra ɓol.
Moon ko Masar wa
13Pa ndiira ɓǝ faɗsǝ wa, Ankundi ndǝ antimira ya yǝ weɗa ee usu Yusufu a rotǝma yǝ nkee me, “A nii a too auwe ma maasi sǝ mon sǝ ko Masar. Sǝ kaɗ kǝnso ndub me nǝ nkee ngǝn mee sǝ wo, me Hiridus yǝn kǝr au kaya me yaa toɗɗo.” 14Pa yǝ nii yǝ too auwe ma maasi a pǝrtǝra ɓǝ faɗ Masar, 15yǝ kaɗ kǝnso, Hiridus yǝ woɗ nhe. Mbusa tom Maaso me a kung mbu Ankundi nkeesǝ ma lau an nawanto ya me, “Ɗaan a put Masar wa, nǝ yarsǝ auwane wa.”
16Pa Hiridus maasǝ me ɓan maa seklǝmeta ka ɓa ɓǝ nlaasǝn wa, pa yǝ nfii dem, yǝ nkee me ɓaa tod em parata ɓǝsǝ Baitalami ma kalta nsaad, niinyo meta raɓ a kang ma ndiira, me a pam keke ma fer ɓan maa seklǝmeta ka ɓa nkeesǝsǝ wa. 17Pa mee a kung mbu ɓaa nkeesǝ ma lau an nawanto Irmiya ɓa me,
18“Ɓaa kura kwaro a Rama,
oro ma kuɗa teb ra dem,
Rahila yǝn tee sase me emɓisa
ɗǝm yǝ yau me yǝ sing ra,
me emɓisa woɗon.”
Kango Nazarat wa
19Pa ndiira Hiridus yǝ wodsǝ wa, antimira Ankundi ya, yǝ weɗa ee usu Yusufu a rotǝma Masar 20yǝ nkee me, “A nii, a too auwe ma maasi ngǝ ko a put Isra'ila wa me ɓaa ɓǝn taasǝ me ɓǝ toɗ au kaya ɓa ɓǝ woɗɗon.”
21Pa yǝ nii yǝ too auwe ma maasi ɓǝ faɗ a put Isra'ila wa. 22Pa yǝ kurasǝ me Arkilayus yǝn tom kuɓsutu Yahudiya wa me yǝ kang papsi Hiridus wa, yǝ kura kokto ko kǝnso wa. Pa ɓaa win sǝsǝ ngwee a rotǝma wa, yǝ far a put Galili wa. 23Pa ko yǝ kaɗ a urko ǝn yarme Nazarat, me a kung mbu ɓan nawanto ɓa nkeesǝ wa me, “Ɓaa ka yarme eɗ Nazarat ya.”
Tällä hetkellä valittuna:
Matta 2: LLA
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©2023 Seed Company in collaboration with Language Developers and Bible Translators Association
