Matta 12
12
Ankundi kaa nwiinya Yahudawa ɓa
1A fer siso Yeso yǝ ɓaa ma lau nyaanyo muuma wa, a kaa nwiinya Yahudawa ɓa. Emfǝɗkaa ɓisa ɗoora ǝn si ɓǝn si, pa ɓǝ ntii kau ɗuuti muuma wa, ɓǝ huurtǝ ɓǝ kǝuwǝ. 2Pa ɓaa Farisiyawa ɓa ɓǝ wǝrsǝ maaso wa, ɓaa nkee me, “A sengge! Emfǝɗkaa ɓǝnga ɓǝn tom mbu pamman me kama a tom a kaa nwiinya Yahudawa ra ɓa.”
3Yǝ kak me, “Sǝ pǝta kauwo mbu Dauda yǝ tomsǝ a fer sase ma sik ɓisa ɓǝ kurasǝ ɗoora wa rau? 4Yǝ kana hit Kaa wa, sase ma sik ɓisa ɓǝ kǝu nkaadǝng u ɗekɗek wa, u pamman me ɓǝ kǝu ra wa, ndub kuɓsa nek mbusa sa seɗɗe ɓǝkaa kǝu wa. 5Yaa, sǝ pǝta kauwo a masaka wa me, a kaa nwiinya Yahudawa ɓa, kuɓsa nek mbusa sa ɓǝn kau Masaka kaa nwiinya Yahudawa ɓa a Hit ɓǝɗ Kaa Urshalima wa, pa nding waso ti ɓǝ ɓǝ kaɗ ɓan ma tentenato ɓa rau? 6Nǝn nkeesǝ me, yaa yǝ faɗsǝ Hit ɓǝɗ Kaa Urshalima wa, yaa han ɓa. 7Me kasǝ maa mbu mara ra ǝn sensǝ ɓa, u nkeesǝ me, ‘Niina nǝn taa me ɓeta ɓǝ tom ma nyorataara, pa sem nek mbusa wa ra,’ kama sǝ kankiita yaa yǝsǝ ma senda kwalari ya ra. 8Me Au Ete ya, ǝn sase Ankundi kaa nwiinya Yahudawa ɓa ya.”
9Pa yǝ lee ham sǝsa, yǝ kan a hit kwau Yahudawa ɓoso, 10pa atike kǝnso yǝ ma neme sǝrsǝ. Pa ɓaa Farisiyawa ɓa ɓǝn kǝr ɗǝɗa kǝ ɓaasa ma ra, ɓǝ taa Yeso me, “Pamman a roɓ ete a kaa nwiinya Yahudawa ɓau?”
11Yǝ ɓǝ nkee me, “Me yaake a ɗaaso waaso yǝ ma tǝmnka usu, pa yǝ nwii a npoo a kaa nwiinya Yahudawa ɓa, yǝ ham me yaa hik rau? 12Yaa ete yǝ faɗ tǝmnka mbarta rau! Pa me maaso pamman a tom kwasira a kaa nwiinya Yahudawa ɓa.” 13Pa yǝ nkee eɗ kaya me, “A mal nem nyaange.” Pa yǝ mal nem isi, yǝ roɓɓo, a kang kwakwa nga u fin wa. 14Pa ɓaa Farisiyawa ɓa, ɓǝ fiɗ ntaandi, ɓǝ werkǝ ɗǝɗa ɓǝkaa toɗ Yeso ran.
Hoora Kaa tausǝ ra
15Pa Yeso yǝ maasǝ maaso wa, yǝ lee ham sǝsa. Ɓeta dem ɓaa ɓǝɗǝ, ɗǝm yǝɓǝ roɓ siyamse ɓose nsaad, 16yǝɓǝ wiin ngwee me ɓǝ nkee yaake yǝn yamniu ra. 17Mbusa tom maaso me a kung mbu nkeesǝ ma lau an nawanto Ishaya wa me,
18“U nwa ǝn hoora na u nǝ tausǝ wa,
yaa nǝn yausǝsǝ ya, yaa nǝn hursǝ kuɗa ma sase ya.
Kǝnǝ ti Wis nwaano a ɗuura ira,
ɗǝm kiyǝ kan kiita ɓaa ɓǝn Yahudawa ra ɓa.
19Yǝ tom rǝkata ra, hana yǝ yauli ra,
yaake yǝ kura kwar usu a ntoota ra.
20Kǝɗa ǝn yausǝ nga kiyaa kau ya, sase yaa kau ra,
ɗǝm arkumta ǝn tomsǝ nga kiyaa loo ya, sase yaa loo ra,
ndub me yǝ ti kankiita u ɓongtǝra wa a tomon nhe.
21Ɓaa ɓǝn Yahudawa ra ɓa, ɓǝ kǝ ti senda ɓora a ɗǝnda ira.”
Yeso ma Baˈalzabul
22Pa ɓaa sa wo ma yaake ma siyo nsaamse wa, yǝn ntaara, ɗǝm yǝn kanaa ra, pa Yeso yaa roɓɓo, pa waso yǝn kana, ɗǝm yǝn wǝrǝ. 23Ɓeta nsaad ǝɓǝ tom mbu nhiinyanhiinyato ɓa, ɓǝ nkee me, “Eɗ ɗa, kǝ tom sase Au Dauda yau?”
24Pa ɓaa Farisiyawa ɓa kurasǝ maaso wa, ɓǝ nkee me, “Ma lau Baˈalzabul kuɓ nsaamse wa maɗ, yǝn hiksǝ nsaamse wa.”
25Yeso me yǝ maa senta ɓotan nwa, yǝɓǝ nkee me, “Nsaad kuɓsutu yǝ ɓaasǝ raɓ a ɗuura atekerto wa, kuɓsutu siso kiyǝ tǝblǝ, ɗǝm nsaad uru, hana ɗuur nawa, u ɓaasǝ raɓ a ɗuura atekerto wa, yǝ nǝɗ ɗa. 26Me Shaitan yǝn hik Shaitan, yǝ ɓaa nkweera iran raɓ. Pa kuɓsutu usu kǝ nǝɗ miniu? 27Me ɗǝm nǝn hik nsaamse ma lau Baˈalzabul kuɓ nsaamse wa, yaa em ɓǝsaa ma lau nyamni nwa ɓǝn hiksǝu? Me maaso, ndǝ ɓosa kǝ ɓaa kaɗ ɓan kankiita ɓǝsaa ɓa. 28Pa me nǝn hik nsaamse ma lau Wis Kaa wa, yaa kuɓsutu Kaa wa won a saanin.
29“Hana maaso ɗǝm, yaake sem kǝn kiyaa nkaa yǝ kan a ɗuur eɗ kokrok ya, yǝ haa mbu ɓisa ra, ndub me yǝ kaasǝn nhe, pa yǝ nkaa yǝ kan yǝ haa mbu ɗuur ɓisa.
30“Yaa yǝ sem ke ma niina ra ya, yaa atekerto ma nase, ɗǝm yaa yǝ kwasi nǝ kwauwo ra ya, yǝn yasǝn yasǝ. 31Me maaso, nǝn nkeesǝ, hana nkamǝra tentenato naara, ma mara kwalakwala ɓeta nkeesǝ a ɗuura Kaa ra wa, ɓaa kǝ lee ɓeta a senda, pa nkee mbuka kwalakwala a ɗuura Wis Kaa wa, ɓaa pǝta lee a senda wa ra. 32Hana yamni, yaa yǝ nkeesǝ mara kwalakwala ra a ɗuura Au Ete ya wa, ɓaa kaa lee a senda, pa hana yamni, yaa yǝ nkeesǝ mara kwalakwala ra a ɗuura Wis Kaa wa ra, ɓaa a pǝta lee a senda ra, hana kaare ya, hana kaate ka wo ya.
33“Me ɓota yǝ kwalari, yǝn nsee emba kwalari. Ɗǝm me ɓota yǝ kwalakwala, yǝn nsee emba kwalakwala. Me ɓota ǝn maasǝ ma em ɓisa. 34Saa hurtaa, kǝ tomtomni saa ɓan kwanatiro ɓa kǝsa nkee mbu kwalari ɓau? Me mbu yǝsǝ a kuɗa ɓa ǝn siso ǝn fiɗsǝ a ee nwa. 35Eɗ yǝsǝ kwalari ya, yǝn fiɗ ma mbu kwalari ɓa a kuɗa ira, ɗǝm eɗ kwalakwala ya yǝn fiɗ ma mbu kwalakwala ɓa a kuɗa ira. 36Pa nǝn nkeesǝ, ɓeta ɓǝ kǝ nkee mbu kwaa mbi ɓǝ kansǝ maatamse sal sal ta ɓa, a kaa kankiita ɓa. 37Me ndǝ mara nga kǝ ngaa fiɗaa sin nwa, ɗǝm mara nga kǝ ngǝn nǝng kiita wa.”
Mbu weɗara ɓa a ɗuura Yunana ra
38Pa ɓaata ɓaa Farisiyawa ɓa, ma malǝmaa masaka sa ɓaa nkee me, “Malǝm, tǝn taa me tǝ wǝr mbu nhiinyanhiinya ɓa a ngani, me a weɗa me mbu ngǝn tomsǝ ɓa fiɗ a liura.”
39Yǝɓǝ kak me, “Ɓet kaareyase ɓa, ɓǝ ma kwanatiro, ɗǝm ɓǝ kuraa ee Kaa ra, ɓǝn taa me ɓǝ wǝr mbu nhiinyanhiinya ɓa! Pa ɓaa ɓǝ weɗa mbu nhiinyanhiinya ka ra, ndub u an nawanto Yunana wa. 40Nga Yunana yǝ tomsǝ tǝro taatǝn ma tuka taatǝn a kuɗa wiinee nsenyo ya wa, maaso ɗǝm Au Ete ya, kiya tom tǝro taatǝn ma tuka taatǝn ɗaan a putu wa. 41A kaa kiita ɓa, ɓet Nineba ɓa kǝɓǝ nii ke ma ɓet kaareyase ɓa, ɓǝ weɗa ɓet kaareyase ɓa, me ɓǝ tom keke ra, me ɓosa ɓǝ kon nfaatan a mara Kaa Yunana nkee ɓǝsǝ ran, pa waso yaa yǝ faɗsǝ Yunana ya, yaa ham ɓa. 42Kuɓ toone u put Sheba wa, kiya nii a kaa kiita ɓa ma ɓaa kaareyase ɓa, yǝɓǝ weɗa me ɓǝ tom keke ra, me yǝ fiɗ mǝbmǝb, me wo yǝ kura maawo Sulemanu nwa, pa waso yaa yǝ faɗsǝ Sulemanu ya, yaa ham ɓa.
43“Me wis nsaa nwa yǝ fiɗ a maabiri ete yan, yǝn ko a sanglo han mbraa semra ɓa, yǝn kǝr ham kiyaa nwii ɓa, pa yǝ taa ra. 44Pa yǝkǝ nkee me, ‘Kǝnǝ kang a ɗuur nǝ fiɗsǝ wa.’ Me yǝ kangan, yǝ wǝr ɗuur kawa ete sem ra, kwausǝ ɗekɗek ɗǝm mbusa a han fina. 45Pa yǝ ko yǝ haa ɓaata nsaamse ɓa mbutu u faɗsǝsǝ kwalakwalato ɓa, pa ɓǝ kan ɓǝ kaɗ kǝnso. Pa feɗefeɗe kaɗo eɗ kaya wa, kǝ faɗ u ntiiri wa tǝblǝra. Pa kǝ tom maaso ma ɓet kwalakwala u kaareyase wa.”
Maa Yeso ya ma ɓaata ɓisa
46Pa Yeso yǝsaa kanmǝra ma ɓet kwausǝ dem ɓa wa, maasi ma ɓaata ɓisa ɓǝ nǝɗ ntaandi, ɓǝn yau me ɓǝ kan ma sase. 47Atike yaa nkee me, “Maange ma ɓaata ɓǝnga ɓǝ kǝɗ ntaandi, ɓǝn yau me ɓǝ kan ma ngase.”
48Yaa kak me, “Ndǝ nyamni maane, ɗǝm ndǝ ɓamni ɓaata ɓǝnau?” 49Pa yǝ weɗa neme a emfǝɗkaa ɓisa ni, yǝ nkee me, “U nwa ndǝ ɓosa maane ma ɓaata ɓǝnaa. 50Me nsaad yaa yǝ tomsǝ mbu Paane a liura ya, yǝn yausǝ ɓa, ndǝ sase ate nyaane, ndǝ sase ɓonane, ɗǝm ndǝ sase maane.”
Tällä hetkellä valittuna:
Matta 12: LLA
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©2023 Seed Company in collaboration with Language Developers and Bible Translators Association
