LUG 24

Yeso fer le go bir gi

(Mat 28.1-10; Mark 16.1-8; Jaŋ 20.1-10)

1De jag toŋ crum wur dimasi, naare raw wo raw ge ti tipaale Yeso, hoo wo noo maga á hay kneʼ wo de tay nen de trusa doo ɓaara. 2Á wo wo daʼ húulìn go de lagad ge jag tuun hãã. 3Naaren raw wo laage ɓi tuu no, ama á daʼ wo húulí Yeso Waŋkluu ni gà. 4Ɗiggi raw yeɗ nen ɓaara go, jar po wo ɓog õõbe ɓaaran sag debaŋ, raw wo naa nen see ɓaara ne hara. 5Hẽẽne raw caa rage, á raw wo lagge de jel ti gesiŋ, jar se ɓog raw wo riŋ rage ga : Nday kiɗ je ma tenen yoo jar ma de húulí wo le ɓa? 6Á bay la wa, á fer we go bir gi. Ɗig we ti wããre maga á hay wãã we de maga á hay le see ɓay Galile ɗa mono, 7ga : Nen da ga á mo hã wel je táabay go ne jar ma de ɓlaggen wo doo, á mo ɓaln wo go ti koo ma ɓal jar, day wur síilí ma de swaʼ á fer ge le go bir gi mono.

8Wersen á raw wo ɗig ti wããre Yeso so. 9Á raw wo men tipaalen le go, raw wo raw ge sii wããre sen ne jar ma wer ɓe ma hwal ti boŋ wo, sii ne te lan wo ɓuy lay. 10Jar a ge de wããre sen wo diŋ Mari ma Magdala, Jan wo de Mari man Jag. Naare maga á hay wo le de kããra ɓuy sii wo wããre sen ne jar peele wo doo sen no lay. 11Ama jar maga Yeso hoo ra go ma siɗ wããre Baa go ne jar raw wo ɗig ɓaaran ga á wãɗ wo diŋ jag loɗge, laa wo yãã wããre ɓaaran gà. 12De sen ni, Piyer raw urgi ciŋ, raw ur ɗee wo ti tipaale no, raw jel nen ɓe wo ɓi tuu no, kal ko ge diŋ õõbe maga á hay kuun de ɓe lag tawa. Blam sen á raw ferge liŋ, go de ngel ge doo re maga joŋ mokay no.

Jar po wo ɓog de wo ge Emawus

(Mark 16.12-13)

13De wur sen ni tuu, jar po wo yoo ɓaara ɓog raw wo raw ge ɓi leege maga à ɗen ga Emawus, wo go se Jerusalem nen klewmeder hwal ti boŋ. 14Re maga joŋ mo deŋ Jerusalem saara de bag blam re sen wo ti yoo ɓaara sugi. 15Á wo de bag blam wããre sen faa kããra mo sug no, Yeso de see ɓe raw daʼ rage, raw tayge wer ɓaara lay. 16Á kon wo mbaara caw, ama mopo raw dig rage go maga á mo kon wo go pah wa. 17Yeso raw wii rage ga : Nday faɗ kããra ti may ti faage mo sug ɓa? Á raw wo lagge go de hrag se lagge. 18Jobo yoo jar ma ɓog wo no, à ɗen ga Klewpas raw riŋgi ɓe ga : Ndo bay de ko re maga joŋ wara mo deŋ wa, ndo diŋ waare ɓi leege Jerusalem la? 19Á raw wii rage ga : Diŋ re may wo ne? Á raw wo fer wããre ne hẽn ga : Re maga joŋ Yeso ma Nasared, bloo maga diŋ je ndar nen wããre Baa go, de egre ti joŋre wo de wããre pel Baa, pel jar téebeere wo ɓuy lay mono. 20Waŋre wùr ma siɗ jag wo de jar koɗ wùr raw wo hãge ɓe go ga bawn de wããre, ni ʼwar go, á raw wo ɓal ge ɓe go ti koo ma ɓal jar. 21Wùr hay de ɗig gi ga á diŋ je maga yãã ge jar Israyel wo go mo so no, ama re ma de daŋ sen ɓuy yaŋ pa so, síilí maga á joŋ wo re sen go wara swaʼa yaw. 22Day naare wùr po raw wo ngel wur de wããre pa so, day se cwãy lay, werga á raw wo raw ge de jag toŋ crum ti tipaale no, 23ama á daʼ wo húulí ɓen ni gà. Á raw wo ferge le riŋ wùr ga jar peele Baa raw wo naa nen see ɓaara ne saara lagge, raw wo riŋ saara ga á yaŋ tenene. 24Jar po raw wo raw ge yoo wùr ti tipaale lay, wo wo daʼ re sen doo ga naaren wãã won nono, ama á de see ɓe á kon wo ga tawa.

25Blam wããre sen Yeso raw wãã ge ga : Oo, nday jar se maga ti ɓay bay wa no, nday kal de depãy debaŋ, wããre maga jar siɗ wããre ma jag Baa siɗ ra wo go mo ɓuy, nday bay yãã rage ga á cwãy wa le la? 26Mesi bay le go de ngaɓ ge ɓaa ga se mo joŋ bon doo sen no joŋ, blam sen Baa mo woon ge kway wa yawla? 27Blam wããre sen á raw ɓoɗ wer wããre maga á hay yer ra go ti ɓe mo ɓuy ne hara, tĩĩ wer de maga Moyis yer ra mono, hãã go de maga jar ndar nen wããre Baa go yer ra wo mo ɓuy.

28Á wo wo kos ɓi leege maga saara de wo ge ni mokay, Yeso raw joŋge doo ga se daŋ ra pel nono. 29Á raw wo teb ge ɓe ga : Hay ɓiŋ wùri, wur go de coŋ ge, suŋgu go de joŋge lay. Á raw kalge hay ge ɓiŋ ɓaara. 30Á wo wo lag ge rege mokay, á raw maŋ hoole doo ɓe, raw joŋ suseʼ ne Baa, blam sen á raw car nen hoolen go, raw hãge ɓe ne hara. 31Wersen nen ɓaara raw caa ge go, á raw wo ko ge ɓe go pah so, ama á raw yee nen go pel ɓaara ni yeʼ tuu. 32Á raw wo riŋ kããra ga : De maga á hay wãã re le ne naa ti faage, ɓoɗ wer wããre Baa go ne naa mokay, jiili naa hay haɓ naa doo ga wùu de haɓ naa ni nono?

33Á raw wo hoo ge ciŋ deparday, raw wo ferge daʼ jar ma wer ɓe ma hwal ti boŋ wo de tayge de kããre ɓaaran wo 34wãã ge lay ga : Yeso Waŋkluu kal mbe we go ciŋ cwãy. Simoŋ kon we. 35Á wo de see ɓaara raw wo sii wããre maga joŋ saara le ti faage Emawus mo lay, ga saara ko Yeso we de maga á car nen hoolen go ne saara mono.

Yeso naa nen see ɓe ne jar ma wer ɓen wo

(Mat 28.16-20; Mark 16.14-18; Jaŋ 20.19-23; Joŋ 1.6-8)

36Á wo de wãã ge doo sen no mokay, Yeso de see ɓe raw naa nen yoo ɓaara deŋ tuu, raw riŋ rage ga : Daga Baa mo lag we jam. 37Nenterse ɓaara raw daŋ rage go doo hẽẽne debaŋ werga á hay ɗig wo ɓaaran ga saara ko diŋ manmbuyuuri. 38Ama Yeso raw riŋ rage ga : Nday caa jiili ma ɓay go wer may ɓa? Nday de faare sen jiili ɓay le la? 39Ko we doo ɓi wo de ɓaale ɓi mokay no, á diŋ ndi mbi. Duɗ we doo me se, ko we ɗa, manmbuyuuri bay de hõõgese wo de hm doo ga ndi de hõõgese no deŋ wa. 40Yeso wãã wããre ne hara doo sen no, á raw kaŋ nen ɓaara ti doo ɓe wo de ɓaale ɓe. 41Ɓil ɓaara raw fug gi go debaŋ debaŋ, de sen ɓuy á laa mbaara yãã re sen wo go pah ga ɗa pa, doo ga re sen ngel ra, Yeso raw wii rage ga : Nday yaŋ de fen rege doo? 42Á raw wo hã ɓaare cẽẽ ma de cog ge ne hẽn boŋ. 43Á raw maŋ ge ɓe raw rege ɓe pel ɓaara ni deŋ. 44Blam sen á raw riŋ rage ga : Mokay diŋ re maga ndi hay riŋ we de ɓe de maga ndi hay hay see ɓay ɗa, ga re maga Moyis hay yer ra go ti ɓi, jar ndar nen wããre Baa go yer ra wo go ti ɓi, de maga á yer ra go ti ɓi ɓil Siŋ wo ɓuy mo bag wo jag go mo so no.

45Blam sen á raw bul ti ɓaara go maga á mo laɗ wo wer wããre maga á hay yer ra go mono. 46Á raw riŋ rage ga : Coʼ we sug wããre maga á hay go de yerge ga : Mesi mo joŋ bone, blam sen mo fer le go bir gi wur síilí ma de swaʼa, 47day nen da ga á mo sii wããre ɓe ma de cõõren go de ɗúu ɓe pel wer jar wo ɓuy, ga á mo coo wo ɗiggi ɓaara ma de ɓlaggen de deele tigriŋ, Baa mo men ɗig re ɓlagge ɓaaran wo go ne hara ti, ama tĩĩ wer ɓe le Jerusalem. 48Wersen nday diŋ jar siɗ wããre ɓi go ne jare. 49Ndi de see ɓi, ndi ɓoʼ ge fen maga Pan ɓi hay wãã ga se hãn ne nday yaŋ le we. Ama lag we ɓi leege Jerusalem ni hãã wur maga egre ma ciŋ mo a ti ɓay ɗa.

Baa maŋ Yeso wo go ciŋ

(Mark 16.19-20; Joŋ 1.9-11)

50Blam sen Yeso kal rawge wo go de ɓaara faale ɓi leegen hãã nen Betani, raw hoo doo ɓe ciŋ raw kaŋ bosaʼ ne hara ti. 51Á wo kaŋ bosaʼ go ne hara ti kaŋ, á raw blaw ge go de ɓaara, Baa raw maŋ ge ɓe wo go ciŋ. 52Blam sen á raw wo leɗ monɗra ne hẽne, kal wo ferge le Jerusalem go de fug ɓil feh debaŋ, 53lag wo ɓi tiŋ Baa tum tum togoɗ Baa.

Tällä hetkellä valittuna:

LUG 24: TUP

Korostus

Jaa

Kopioi