LUG 23
23
Á wo de Yeso pel Pilade
(Mat 27.1-2,11-14; Mark 15.1-5; Jaŋ 18.28-38)
1Ngaɓan raw wo hoo ge ciŋ ɓuy, raw wo raw ge de Yeso pel Pilade. 2Wo ni mokay á raw wo tĩĩ wer car wããre ne hẽn se ga : Wùr daʼ bloo sen mo deŋ hãy nen jar wur wo go ga : á mo hã wo targe ne Sesar wa, wãɗ ti see ɓe ga se diŋ je maga Baa maŋ se go, se diŋ Waŋ lay.
3Pilad raw wii jag ɓe ga : Ndo mbo diŋ Waŋ jar Jwifn wo?
Yeso raw fer wããre ne hẽn ga : á doo ga ndo wãã mbo nono.
4Blam sen Pilad raw riŋ waŋre ma siɗ jag wo de ngaɓan ga : Ndi bay de daʼ re po ma baw bloo sen mo deŋ wa.
5Ama á raw wo dog wããren de egre pa ga : á de ɓoɗ wǔy ti holaŋ jar de siɗgi wããre ɓe no. Á tĩĩ wer ɓe le Galile hãã á go de ɓe Jude ɓuy, patala á a go de ɓe la pa.
Á raw de Yeso pel Herod
6Pilad wo laa wããre sen mokay, raw wiigi ga : Day bloo sen la diŋ je Galile so? 7Pilad wo laa ge ga Yeso a le diŋ ɓi sir maga Herod de wãã re ɓe mokay, á raw laa jar wo de ɓe ne Herod, Herod hay go de a ge wur sen Jerusalem ni lay. 8Herod raw fug ɓil go debaŋ ti maga á wo ko Yeso mono. Werga á hay laa re ɓe, day á seɓaa kiɗ gi ga se mo yiŋ de ɓe, á hay gor ge ɓe ga se mo kon joŋ fen mbuɗgi lay. 9Herod raw wiɗ jag Yeso ti wããre debaŋ, ama Yeso laa fer wããre ne hẽn ni ga hase. 10Waŋre ma siɗ jag wo de jar ma ndar wer wããre Baa hay yaŋ wo ni, raw wo hoo ge ciŋ de waŋ car wããre ne Yeso se. 11Herod wo de soode ɓen raw wo feg ge ti Yeso, mbuɗ wo foo ɓe lay, á raw wo laa õõbe ma de woore ne hẽn ti, raw wo ferge ɓe wo ne Pilade. 12Herod raw wo joŋ barge de Pilad wur sen tuu, á hay wo ɓaa hee de kããra.
Á baw wo Yeso de wããre ga ʼwarn go
(Mat 27.15-26; Mark 15.6-15; Jaŋ 18.39—19.16)
13Pilad raw tay waŋre ma siɗ jag wo le de jar koɗ sen wo, de wer jar wo, 14raw riŋ rage ga : Nday á de bloo sen mokay me ga á de hãy nen jar ɓay wo go. De ele. Ndi wiɗ jag ɓe we pel ɓay la ɓuy lay, ndi daʼ ɓlagge ɓe ti fẽẽre maga nday car ne hẽn se mo deŋ boŋ gà. 15Herod daʼ ɓlagge ɓe ga lay, á raw ferge ɓe le ne wùr mo deŋ no. Wersen bloo sen bay de joŋ mopo ma de ɓlagge maga á ʼwar ti re ɓe wa hase. 16Wersen ndi jwag ne de kleg jwag jwag, ni ndi ɓoʼ ne. [17Ti few Pag tum Pilad ɓoɗ je daŋgay maga ngaɓan wii wo doo ɓe ga ɓoʼ sen go ne saara.] 18Á raw wo ngar jag ɓuy ga : ii bloo sen go, ɓoʼ le go ne wùr diŋ Barabas. 19(À hay ɓoʼ Barabas ti daŋgay diŋ ti re wũy maga hay urn ciŋ ɓi leegen wo de re iigi húulí maga á hay id ne mo lay.) 20Pilad hay da ga se ɓoʼ Yeso go, á raw wii ngaɓan wo tigriŋ pa. 21Ama á raw wo riŋ gi ɓe de ngar jag ga : Ɓaln go ti koo, ɓaln go ti koo.
22Pilad raw dog riŋ rage ma de swaʼ ga : á joŋ diŋ ɓlagge may no maʼ la? Ndi daʼ fen maga á joŋ de ɓlagge nen ɓi maga á ʼwar ti re ɓe boŋ ga has mo la. Wersen ndi jwagn, jwag jwag, ni ndi ɓoʼ ne. 23Á raw wo yaʼ wer ngar jag debaŋ ga á mo ɓaln go ti koo. Garge jag ɓaaran raw baw Pilad mbe so. 24Pilad raw mbe cag wããre ɓe go doo maga á da wo no so no. 25Á raw ɓoʼ bloo maga á hay wii wo ne, je maga á ɓoʼn ti daŋgay ti wããre wǔy maga hay urn ciŋ, wo de ii gi húulí maga á hay id ne, mbe go ne hara so. Á raw men Yeso ne hara maga á mo joŋn wo mbaara de fen maga ɓil ɓaara dan mo so.
Á ɓal Yeso go ti koo ma ɓal jarn so
(Mat 27.32-44; Mark 15.21-32; Jaŋ 19.17-27)
26Á baa wo Yeso le go mokay, á raw wo yiŋgi de je Siren, à ɗen ga Simoŋ, á hay hay le ɓi pay. Á raw wo bagge ɓe, maŋ wo koo ma ɓal jarn ne hẽn ti maga á mo see le de ɓe wer Yeso.
27Jar raw wo maŋ blam Yeso ngaɓa debaŋ, de naare maga hay wo rag ge law Yeso mono. 28Yeso raw mbuɗ nen ɓe wo ti ɓaara, raw riŋ rage ga : Nday naare Jerusalem mono, rag we ti re ɓi wa. Rag we diŋ ti see ɓay de weere ɓay wo. 29Werga wurpo a ge yaŋ le, nday wãã ge yaŋ ga : Naare maga bay wo daɗ weere wa, de maga biŋ wo go ti boŋ ga has has wo, de maga mbarga hee jag jag-wããre ɓaara ti boŋ gan wo de daʼ see ɓaara ane. 30Jar wiɗ gi wo húulìn wo yaŋ ga : Leɗ we le ne wur ti, ne wùr ti, wiɗ wo húulì ma lurbub lurbub wo yaŋ ga : Yoŋ wùr go ɗa la, go ɗa la. 31Á joŋ wo ndi, ndi je ma doo koo ma depãy de ɓlagge debaŋ mo deŋ yaw no, á joŋ ge wo nday, nday jar ma doo koo ma de hegn wo de ɓlagge daŋge so.
32Á raw age de jar joŋ ɓlagge wo ɓog id gi go ɓiŋ Yeso ni lay. 33Á wo wo day ge ti ngel maga à ɗen ga Hm Ti mokay, á raw wo ɓal Yeso go ti koo ma ɓal jarn ti ngel sen ni, raw wo ɓal jar ma joŋ ɓlaggen wo ɓiŋ ɓe ni ɓog lay, boŋ ti ɓaŋ war ɓe, lan ti ɓaŋ gùr ɓe lay. 34Yeso raw wãã ge ga : Baba, jar maga joŋ wo ndi de ɓlaggen mo deŋ men ɗig re ɓlagge ɓaaran go ne hara ti, werga á bay wo de ko re maga á joŋ wo mo deŋ wa. Sooden raw wo ɓes õõbe ɓen go ti yoo kããra de naa ge wãywáale. 35Jar po raw wo lagge ko nen ni lagge, waŋre jar Jwifn raw wo feg ge ti Yeso kal wo ga : Ndo yãɗ jar lan wo go jag bon lay, yãã see ɓo go lay so, hayga ndo yaŋ diŋ Mesi, je maga Baa maŋ go mono. 36Sooden feg wo ti ɓe doo sen no lay, raw wo yaʼge see ɓe, raw wo hã feneger ne hẽne, 37raw wo wãã ge ga : Hayga ndo yaŋ diŋ waŋ jar Jwif wo no, yãã see ɓo go de see ɓo sog la. 38Á raw wo yer wããre ti ɓe ni taʼ ga : Bloo sen la diŋ Waŋ jar Jwif wo.
39Boŋ yoo jar ma joŋ ɓlagge ma de ɓalge ti jeŋ ɓe ni raw ɗar ge ɓe lay ga : Ndo bay diŋ Mesi wa pa ge? Yãã see ɓo go, ni ndo yãã wùr go lay sog ne? 40Ama je lan raw ruu gi ɓe, raw riŋgi ɓe ga : Ndo bay joŋ hẽẽne doo Baa wa ge. Ndo ti bon doo se no lay no. 41Ama bon ma naa daʼ naa ti ngel ɓe, werga naa daʼ bon ma naa diŋ wer re maga naa joŋ ra, ama ma ɓen á bay de joŋ mopo ma de ɓlagge wa hase. 42Blam sen á raw riŋ Yeso ga : Ɗig ɓo ti ti ɓi, ti wur maga ndo wo ge le ferge doo Waŋ no mono. 43Yeso raw riŋgi ɓe ga : Kidolgi ndi riŋ mo wara ga, ndo wo yaŋ hayge see ɓi ti Paradis.
Húulì Yeso
(Mat 27.45-56; Mark 15.33-41; Jaŋ 19.28-30)
44-45Wur hay go de kos ɗeger mbaŋ, wur raw men sag ge go, suŋgu raw ɓoʼ ge go ti sir krub ɓuy, hãã wo go de wur maga fǐiri ma de law wo go de kos a ge liŋ. Õõbe ma de caa nen tiŋ Baa raw ngar ge go gesiɗgi degaʼa. 46Yeso raw ngar jag de gẽẽge kloŋ ga : Baba, ndi de ferge hã nenterse ɓi wo mo doo tigriŋ. Blam maga á wãã doo sen no wãã, egre ɓe raw hoo ge go. 47Je kluu soode po wo ko re maga joŋ mokay, á raw togoɗ Baa, raw wãã ge ga : Bloo sen bay de joŋ fen ma de ɓlagge wa cwãy. 48Ngaɓa jar maga hay á wo ni mo ɓuy de maga hay wo de lagge ko nen ni mo ɓuy, ko wo fen maga joŋ mono. Blam sen á raw wo ferge wo go mbar jiili ɓaara tiʼ i. 49Bar Yeson wo ɓuy de naare maga hay wo de maŋ blam ɓe le Galile hãã, raw wo lagge le go hãã ɗawa ko fen maga de joŋge mono.
Á ɓoʼ Yeso ɓi tuu húulí
(Mat 27.57-61; Mark 15.42-47; Jaŋ 19.38-42)
50Jobo hay we, à ɗen ga Josefe. Á hay diŋ je ma yoo jar ɓoɗ faare wããre ma yoo jar Jwif wo. 51Á hay ɓi leege Arimate, ɓi leege mani jar Jwif wo no. Je sen diŋ je ma de ɗaw wããre Baa de deele lay, de gor twaywaŋ mani Baan lay. Ama á hay bay de da re maga jar ɓoɗ faare wããre lan dan wo, day joŋ wo mo wa. 52Á raw woge se Pilad wii húulí Yeso. 53Blam sen á raw naa húulí Yeso le go gesiŋ jag koo ma ɓal jar no, raw kuugi ɓe de õõbe ma depuy, raw ɓoʼ ge ɓe ɓi tuu húulí maga á hay cloʼ ne, diŋ tuu húulí maga á bay de ɓoʼ jobo ni ti boŋ wa ɗa. 54Á joŋ joŋre sen mo caw wur maga jar ʼwũy wo see ɓaara go, taŋgu maga wur Saban de tĩĩ wer mono.
55Naare maga hay maŋ wo blam Yeso le hãã Galile raw wo age wer Josef ko nen ɓi tuun lay, ko wo ɓoʼ ge Yeso maga á ɓoʼ no kay lay. 56Blam sen á raw wo raw ge liŋ kneʼ wo noo le, raw wo tay nen ɓe de trusa ma woge kag ge ɓe ne húulí Yeso ti.
Wo day ge wur Saban naaren raw wo ig gi doo ga wããre bag ge keɗeg keɗeg wãã nono.
Tällä hetkellä valittuna:
LUG 23: TUP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tupuri Bible © Bible Society of Cameroon, 2016. All rights reserved.
