JAŊ 1
1
Wããre car nen jar go ko re, kol jar tenene
1Le taŋgu ti tĩĩgi wer hay diŋ wããre no, day wããren hay wo de Baa, day wããren hay diŋ Baa. 2Wããren hay le ti tĩĩgi wer tuu diŋ se Baa. 3Baa joŋ fẽẽren wo mo deŋ ɓuy diŋ de ɓe, mopo maga de joŋge ga bay diŋ de ɓe wa, sen baywa. 4Wããren diŋ kããge fẽẽre ma tenen wo krub ɓuy, á raw ler ngel wo go ne jar téebeere wo ti. 5Suŋgun de ɓoʼ ge mo tiʼ, Je ler ngel raw ler ngel wo nen ɓe, egre suŋgun laa kãã ge ma yãã ngeln gà so.
6Baa raw ɓoʼ je soole ɓe le, ɗúu je sen ga Jaŋ. 7Je soolen a ma wãã ge go ti je ler ngel no, á a maga jar ɓuy mo yãã wo wããre je ler ngel no. 8Á de see ɓe, á bay diŋ je ler ngeln wa, á a ɓen wãã ge go ti je ler ngel no. 9Je se maga á a wãã ge ti ɓe diŋ je ler ngeln go cwãy, á a ti tamsir la, á raw ler ngel go ne jar ti ɓuy.
10Wããren hay hay ti tamsir la, Baa joŋ fẽẽre ma ti tamsir wo la ɓuy diŋ de ɓe, de sen ɓuy, jar ma ti tamsir laa wo ko ge ɓe mbe gà pa. 11Wããren raw age diŋ ɓi sir ɓe no, jar ɓen laa wo yãã ge ɓe gà. 12Mbe de sen ɓuy, jar po wo yoo ɓaara raw wo yãã ge ɓe, raw wo hã ɓil ɓaara ne hẽne, á raw hã egre ne hara, maga á mo kol wo go weere Baa. 13Á bay wo de kol ge weere Baa de faage maga jar téebeere biŋ wo weere de ɓe gesiŋ lam wa, ama Baa kol ra weere ɓe.
14Wããren raw kolge go je tabay, raw hayge yoo jar téebeere wo, joŋ jar de el debaŋ, à ko cwãy ɓuy diŋ see ɓe lay. Wùr raw koge ɓe, á de woore, doo Wel ma boŋ maga Pan ɓe gragn go nono. 15Jaŋ raw riŋ jar ti ɓe raw ngar jag so ga : Mo caw diŋ je maga ndi hay wãã ti ɓe ga á le de age blam ɓi, ama á de daŋ mege kluu, werga á hay go taŋgu ɓi ɓaa mo so no.
16Naa raw daʼ nen mo ma naa ɓuy diŋ wer ɓe, á raw mbe woo naa creɓ creɓ so. 17Baa hã wããre ɓen le ne jar diŋ ne Moyis doo, ama ma joŋ ge jar de el wo de ko ge cwãy ɓuy nduu wo le diŋ jag Yeso Kris lay. 18Jobo bay de ko Baa ga á diŋ wo la wa hase, say de ko ge ɓe diŋ Wel ɓe ma boŋ ga diŋ Baa, de tayge de Baa Pan ɓe mono, kaŋ nen jar ti ɓe diŋ se.
Wããre maga Jaŋ ma joŋ batem jar siin go mono
(Mat 3.1-12; Mark 1.1-8; Lug 3.1-18)
19Jar Jwif ma Jerusalem laa wo waŋre ma siɗ jag ne Baa wo de Lefid wo le wii Jaŋ ga : Ɓa ndo diŋ wo ɓa? 20Jaŋ raw fer wããre ne hara, á yõõ ti gà hase, ama á kal wãã ge go pel ɓaara poɗag ɓuy deŋ ga : Ndi bay diŋ Mesi wa.
21Á raw wo wii gi ɓe ga : Day ndo diŋ wo yaw ne? Ndo diŋ Eli? Jaŋ raw fer wããre ga : Bay wa, ndi bay diŋ Eli wa. Á raw wo wii gi ɓe pa ga : Ndo diŋ Je ndar nen wããre Baa go? Á raw riŋ rage ga : Bay wa. 22Blam sen á raw wo riŋ gi ɓe ga : Day ndo diŋ wose yaw ne? Wùr fer de wããre sen ne jar maga laa wo wùr le mo so lay no, ndo de see ɓo ndo wãã gahãyne?
23Jaŋ raw fer wããre ga :
Ndi diŋ bloo maga Baa wãã ti ɓe, day Esay je siɗ wããre ma jag ɓen go raw sii gi ɓe go ga :
Je tabay yaŋ le ʼwaa ɓay ti puuli ga :
Kneʼ we blam faage go ne Waŋkluu de el de deele ɗegere mono.
24Jar maga á hay laa ra le se Jaŋ, Farisiyẽẽ hay yaŋ wo ni lay. 25Á raw wo wii Jaŋ ga : Hayga ndo bay diŋ Mesin wa, bay diŋ Eli wa, bay Je ndar nen wããre Baa go po wa lay, ndo joŋ batem jar le? 26Jaŋ raw fer wããre ne hara ga : Ma ɓi, ndi de joŋ batem ɓay diŋ de bii, ama jobo yaŋ yoo ɓay la, je sen nday bay de ko ge ɓe wa. 27Á a ɓen le blam ɓi, ama ndi bay de kããge maga ndi naa way taarag ɓen go draʼ wa.
28Re sen joŋ wo mo deŋ ɓuy Betani, wo go faale pyew Jurdẽẽ ti ngel maga Jaŋ hay joŋ batem jar ni mono.
Jaŋ ga Yeso diŋ we sam Baa
29Toŋ ɓe, Jaŋ raw ko Yeso le a ge see ɓe caw, Jaŋ raw riŋ rage so ga : Ko we wesam mani Baa ma taw ɓlagge jar ma ti tamsirn wo go mo caw so no. 30Á diŋ je maga ndi hay wãã ti ɓe ga : Jobo yaŋ le a ge blam ɓi, ama á de daŋ mege egre mo so no, werga á hay le go taŋgu ɓi ɓaa. 31Ndi hay bay de koge ga á joŋ ge diŋ mo bag la wa, ama ndi a ɓin joŋ batem jar de bii, maga ndi mo kaŋ nen jar Israyel wo ti ɓe.
32Jaŋ raw wãã ge pa ga : Ndi ko Nenterse le sir gi le ciŋ doo kurgudun no, raw hayge ne hẽn ti. 33Mbe de sen ɓuy, ndi bay mbi de koge ga á diŋ wosela wa ɗa pa, ama Baa maga ɓoʼ me le joŋ batem jar de bii, raw riŋ mege ga : Ndo ko Nenterse we le sir gi, day raw hayge we ne jobo ti no, ni á diŋ je maga joŋ ge batem jar diŋ de Nenterse ma bay ɗag mono. 34Jaŋ raw wãã ge ga : Ndi ko ne, ndi raw wãã ge ga á diŋ Wel Baa.
Jar maga Yeso daʼ ra wer ɓe taŋgu mono
35Toŋ ɓe, Jaŋ fer hay ge go ni tigriŋ pa de jar ma wer ɓe po wo ɓoge. 36Á wo ko Yeso le seege mokay, á raw wãã ge ga : Ko we wesam mani Baan mo caw so no. 37Jar ma wer Jaŋ ma ɓogn raw wo laa wããre maga á wãã ne mono, raw wo maŋ blam Yeso. 38Yeso raw mbuɗ nen le blam ɓe, raw ko rage le seege wer ɓe, Yeso raw riŋ rage ga : Nday kiɗ diŋ may ɓa? Á raw wo ɗe ge ɓe ga : Waŋ ma had jar, ndo de hayle la gen ne? 39Á raw riŋ rage ga : See we le ko ge ɓe lam. Á raw wo age, raw wo ko ngel maga Yeso hay de hay le ni mo so no. Á raw mbaara lagge leʼ wur gesiŋ ɓiŋ ɓe ni so. (Wur hay go de ngar maga fǐiri ma de law wo de a ge liŋ lay.)
40Jobo yaŋ yoo jar ma ɓog maga hay wo laa wããre maga Jaŋ wãã ne ni boŋ, raw maŋ blam Yeso lay, je sen diŋ Aŋdre wegeman Simoŋ Piyere. 41Aŋdre raw sii wããre sen taŋgu ne hẽn ɓe Simoŋ, raw riŋgi ɓe ga : Wùr daʼ Mesi we le la. (Mesi wer ɓe ga Krisi.) 42Aŋdre kal rawge de Simoŋ see Yeso. Yeso raw koge ɓe mokay, raw riŋgi ɓe ga : Ndo diŋ Simoŋ wel mani Jaŋ no, a ɗe mo ge yaŋ ga Sefas. (Sefas wer ɓe ga wel húulì.)
Yeso ɗe Filip wo de Nataniyel wer ɓe
43Toŋ ɓe, ɓil Yeso raw da ge ga se wo go ɓi sir Galile, á raw yiŋgi de Filip, kal riŋ gi ɓe ga : See le wer ɓi. 44(Tiŋ Filip Betsayda, ɓi leege maga Aŋdre wo de Piyer wo ni mono.)
45Blam sen Filip raw yiŋgi de Nataniyel lay, kal riŋ gi ɓe ga : Je maga Moyis yer go ti ɓe yoo wããre Baa mono, jar ndar nen wããre Baa go yern wo go lay, wùr daʼn we le. Diŋ Yeso je ni Josef ma ɓi leege Nasared no. 46Nataniyel raw riŋgi ɓe ga : mopo ma de el kãã ma a ge mbe yaŋ le Nasared lay? Filip kal riŋ gi ɓe ga : A mbo le ko ge ɓe ɗa.
47Yeso wo ko Nataniyel le seege mo caw, á raw wãã ge ti ɓe ga : Ko je Israyel ma cwãyn mo caw so no, bag ge bii jar bay ɓil ɓe meʼ wa hase. 48Nataniyel kal wii gi ɓe ga : Ndo ko me ko ge ɓa? Yeso raw riŋgi ɓe ga : Ndi ko mo de maga ndo hay hay le wer gum, taŋgu maga Filip hay bay ɗe mo ge ɗa mono. 49Nataniyel raw ɗe ge ɓe ga : Waŋ ndo diŋ Wel Baa, ndo diŋ Waŋ jar Israyel wo lay. 50Yeso raw fer wããre ne hẽn ga : Ndo yãã wããre ɓin diŋ wer maga ndi riŋ mo ga ndi ko mo le de maga ndo hay hay le wer gum mo so gà yawla? Ndo ko ge re ma de el debaŋ daŋ ma kay la wo yaŋ pa. 51Á raw wãã ge pa ga : Kidolgi ndi riŋ nday, nday ko ge ngel ma ciŋ yaŋ go de bul gi, jar peele Baa joŋ wo yaŋ wo ɗii gi ciŋ, ma la wo le de ɗii gi gesiŋ ti ɓi Wel je táabay no.
Tällä hetkellä valittuna:
JAŊ 1: TUP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tupuri Bible © Bible Society of Cameroon, 2016. All rights reserved.
