Mattayo 15
15
1Bahalapala waFarisayo na wakulembela kuhumila Yerusalem wanchilila Yesu, 2kujowa, Ndawa kiki wanafunsi wako wapatuka pa mawungu ga wakulu‐wakulu? pakuya wakusa lepa mawoko gawe pala walya nkate. 3Leka pakahigiti akawajowili wombe, Ndawa kiki mwenga namu mupatuka pa luwimbi lwa Mulungu ndawa ya liwungu linu? 4Pakuya Mulungu akatawili, Ginikaye dadiyo nu nyoko: na, Wakunjowela dadi mundu pangi nyina fiwifu, afwe kifwilile. 5Leka mwenga mujowa, Ayi yoha uyu yatawile kwa dadi mundu pangi nyina, Kila ngamwipatili pa nenga kiyii njetulo kwa Mulungu; 6asinginika dadi mundu. Mwalikiti lya waka lilowe lya Mulungu ndawa ya liwungu linu. 7Mwenga wakwikangalakisa, chakaka Isaya akalwetiti ya mwenga, kujowa,
8Nsafi uwu waniginika ni milomo yawe;
Koma mwoyo wawe upatukana nu nenga.
9Leka pa waka wanigwilakimbo,
Kuwula mawulo mimbi sya wandu.
10Na akalikemalili kwake lipuga, kuwajowela, Muyufwanaye ni kuwalalila: 11Si kila kiyingila mu ndomo kinkitisa mundu wa waka; koma kila kipita mu ndomo, iki kinkitisa mundu wa waka. 12Bahalapala wanafunsi wakamhichili, kunjowela, Umanya ati kukita waFarisayo, pa wakayufwini lilowe ili, wakakuwasiki? 13Koma yombe pakahigiti akajowiti, Mhofu uyi woha wula ukalemiti kuupanda Dadi wangu wa kunani yautupulike. 14Muwaleke wombe: wayii wakulongolela wa wakukoyoka miho. Na wona wakukoyoka miho walongosa wakukoyoka miho, woha wawili yawagwe mu liwumba. 15Leka Petro pakahigiti akanjowili yombe, Utikokosele ngongo iyi. 16Nayombe akajowiti, Haka mwenga kawili mukona nukuwalalila lepa? 17Muwona lepa wila kukita kiyi kyoha kyakuyingila mu ndomo kibita ku lileme, ni kitagika ku mayendo? 18Koma fila fipita pa ndomo fipita pa mwoyo; na fifi fikitisa mundu wa waka. 19Pakuya pa mwoyo fipita maholo mawifu, kukoma, kukema, fiyaka, kuyiwa, fya mageya, blasfemia: 20fifi ifi finkitisa mundu wa waka: leka kulya na mawoko gangakusa kunkitisa lepa mundu wa waka.
21Na Yesu akapititi kukulakula, na akawukiti kuyingila pa malundu ga Turo ni Sidon. 22Na lola, ndala mKanaan akapititi pa mipaka yila, nakakuwiti kujowa, Unipwelekele lipyana, wenga Bambo, mwana wa Daudi; mwanangu ndala ahumbusika nyahope ni daimon. 23Leka akamhigiti lepa kindu. Na wanafunsi wake wakachiti kumpembesa kujowa, Umpele mwanja; ndawa akuwa panyuma pa tenga. 24Nayombe akahigiti kujowa, Nu kutumika lepa nenga lema kwa mambelele gakutagika ga nyumba ya Israel. 25Leka yombe pakachiti akangwilikimbo kujowa, Bambo, unitangatile. 26Leka yombe pakahigiti akajowiti, Nukuya kinofu kutola nkate wa wana na kutagila kwa tumabwa. 27Leka yombe akajowiti, Ena, Bambo; pakuya haka tumabwa tulya fimenyumenyu fifigwa pa mesa ya bambo wawe. 28Bahalapala Yesu akahigiti kunjowela, Ndala, kiyitakiso kyako kikulungu: kikitike kwako umu ulondela. Na mwana mundu ndala akalwasiki kitumbulile saa yiyilayila.
29Nu Yesu akawukiti kukulakula, nakachiti papipi nyanja ya Galilaya; na akakweliti ku kidunda, nakatemi pasi kukulakula. 30Na wakamhichili mapuga makulungu, na wakayili nawo wakuchipila, wakukoyoka miho, wa mbuwuta, wa kilema, na wangi wingi, na wakawatagiti pa magulu gake; na akawalwasiti: 31mpaka lipuga likakangichi, pakulola wangajowa wayii mu kulongela, wakilema wayii mu kusangaluka, wakuchipila wayii mu kugendagenda, na wakukoyoka miho wayii mu kulola kawili: na wakankwisiti Mulungu wa Israel.
32Leka Yesu apa akikemalili wanafunsi wake, akajowiti, Niwona lipyana pa lipuga ili, ndawa hino magono gadatu wahweliti nu nenga na wayilepe ni kindu kyakulya: na nigana lepa kuwapela mwanja ni njala yawe, pembee yawasinduke pa ndila. 33Na wanafunsi wake wanjowela, Kuhumila kuliku umu mu mapululu kwa tenga mikate ya kufuluka, mpaka kuwatupalisa lipuga ngati ili? 34Nu Yesu awajowela, Mikate ilinga muyii nayo? Wajowiti, Mhano ni yiwili, pamonga na tusomba tukuwalangika. 35Na akataukili lipuga litame pasi; 36na akatoliti mikate mhano ni yiwili na somba sila; na akasengwisi na akametwili, na akawapili wanafunsi, na wanafunsi akawapili wa mapuga. 37Leka wakalili woha, na wakatupili: na wakatondwili fya kusigala fya fimenyumenyu, fipalo mhano ni fiwili fya kumema. 38Leka wala wakalili wayili wagosi maelfu ncheche, ndemuko wadala na wana. 39Na akawapili mapuga mwanja, akayingili mu liboti, nakachiti ku mipaka ya Magadan.
Tällä hetkellä valittuna:
Mattayo 15: MGS1937
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
First published by the British and Foreign Bible Society in 1937.
