Mattayo 13
13
1Na ligono lililalila Yesu akapititi mu nyumba, nakatemi pasi mu makigi mwa nyanja. 2Na wakawunganiki kwake mapuga mingi, mpaka akayingili pa liboti, nakatemi pasi; ni lipuga lyoha likayimi pa masekwa. 3Leka akalongili nawo fingi pa ngongo, kujowa, Lola, akapititi wakumicha mbeyu; 4na pakumicha, yingi yikagwili mu makigi mwa ndila, na gakachiti madege na gakayilili: 5leka yingi yikagwili pa lutala, pala pakayili lepa lidupi lingi: na hino apa yikameliti, ndawa pakayili lepa lidupi lyakubita pasi: leka pala likakweliti lijuwa, yikawawuliki; 6na ndawa yikayili lepa ni milela, yikayunditi. 7Leka yingi yikagwili pa mifwa; na yikakuliti mifwa ni yikayiniengiti: 8leka yingi yikagwili pa lidupi linofu, ni yikapambiki fipambiko, yingi mamia, yingi makumi mhano ni limonga, na yingi makumi gadatu. 9Yuyu ayii na makutu, ayufwanaye.
10Na wanafunsi wakachiti, na wakajowiti kwa yombe, Ndawa kiki ulongela nawo pa ngongo? 11Na akahigiti kuwajowela, Kwinu kupeliwi kumanya fya kuhyetu fya utwa wa kunani, koma kwa wala nakupelewa lepa. 12Ndawa kwa uyu nayombe ayii nakyo yakipelewe, na yayolokeke: leka uyu nayombe ayii nakyo lepa, haka kila ayii nakyo yakinyakike kwake. 13Kwa ndawa iyi nilongela nawo pa ngongo; ndawa pakulola miho walola lepa, na pakuyufwana wayufwana lepa, haka wawalalila lepa. 14Na kwa wombe kimalasiki kila akalwetiti Isaya, kujowa,
Pa kuyufwana yamuyufwane, na yamuwalalile lepa napachokope;
Na pakulola miho yamulole miho, na yamuwone lepa napachokope:
15Ndawa mwoyo wa nsafi uwu utopaliki,
Na wayufwanaga kitopalile na makutu gawe,
Na wasisili miho gawe;
Pangi kwali wawone na miho gawe,
Ni kuyufwanila na makutu gawe,
Ni kuwalalila ni mioyo yawe,
Ni kung’anamuka kawili,
Ni yaniwalwase wombe.
16Koma gakusengwa miho ginu, ndawa galola; na makutu ginu, ndawa gayufwana. 17Pakuya chakaka niwajowela mwenga, Wingi wakulweta na wagolofu wakanyonyili kulola ifi mufiwona, na wakafiweni lepa; na kuyufwana ifi muyufwana, na wakayufwini lepa. 18Mumu muyufwanile ngongo ya wakumicha mbeyu. 19Pa kuyufwana mundu ayi yoha lilowe lya utwa, pangali kuwalalila, ahicha mbifu yula, na anyaka kila kimichiki pa mwoyo wake. Uyu yuyu amichiki mu makigi mwa ndila. 20Leka yula amichiki pa lutala, uyu yuyu ayufwanila lilowe, na hino apa aliyupa ni kiheko; 21leka ayilepe ni nkiga mugati mwake, koma ayii wa lukumbi; leka wona kufika kuhumbusika pangi kuhyunga ndawa ya lilowe, hino apa akuwasika. 22Leka wakumichika pa mifwa, uyu yuyu ayufwanila lilowe; na fyakuholengana fya miaka iyi, ni kukongeka kwa kyuma, kinienga lilowe, na apata kuya wangapambika. 23Leka wakumichika pa lidupi linofu, uyu yuyu wakuyufwanila lilowe, na aliwalalila; yula chakaka apambika fipambiko, ni kufikita, yungi fya mamia, yungi fya makumi mhano ni limonga, na yungi makumi gadatu.
24Ngongo yingi akawalekalili, kujowa, Utwa wa kunani uhwanangana nu mundu uyu akamichiti mbeyu yinofu pa ngunda wake: 25leka pakugona wandu, wa mitumba wake akachiti na akamichiti kawili fimbwau pagati pa trigo, na akawukiti. 26Leka pala mhofu ukameliti, na ukapambiki fipambiko, bahalapala fimbwau fikawoniki kawili. 27Na wawanda wa mwene nyumba pakamhichili wakajowiti kwa yombe, Bambo, si mbeyu sinofu ukamichiti pa ngunda wako? mumu kuhumila kuliku fimbwau? 28Leka yombe akajowiti kwa wombe, Wa mitumba akakiti iki. Leka wawanda wanjowela yombe, Wila ulonda tibite kufiwunganisa ifi? 29Koma ajowa, Lepa; pembee isiya pa kuwunganisa fimbwau, yamutupule ngano pamonga nafyo. 30Mufileke fyoha fiwili kukula pamonga mpaka pa kubena; ni pa lukumbi lwa kubena yaniwajowele wa kubena, Muwunganise huti fimbwau, na mufikunge fikamato‐fikamato kufikunga mwoto: leka ngano muyiwunganise pa kikokoli kyangu.
31Ngongo yingi akawalekalili, kujowa, Utwa wa kunani uhwanangana nu lungele lwa karadali, lula akatoliti mundu, na akamichiti mu ngunda wake: 32lula luyii luchoko kulutila mbeyu syoha; leka apa lukakuliti, luyii ngulungu kulutila makolo, nu lupata kuya nkongo, mpaka madege ga nyingalila gayicha ni kujenga masakasa mu ndafi syake.
33Ngongo yingi akalongili nawo; Utwa wa kunani uhwanangana ni kimela, kila akakitoliti ndala, nakafihiti pa milingilo yidatu ya usembe, mpaka apa wa mfilimila ukakweliti.
34Aga goha akalongili Yesu pa ngongo kwa mapuga; na pangali ngongo akalongili nawo lepa kindu: 35nausi limemasike lila likajowiki na wakulweta, kujowa,
Yanidindule ndomo wangu pa ngongo;
Yaniwandise findu fifihaliki kitumbulile kuupanga ndima.
36Bahalapala pakalekiti mapuga, akayingili mu nyumba: na wakanchilili wanafunsi wake, kujowa, Utikokosele ngongo ya fimbwau pa ngunda. 37Leka akahigiti, kujowa, Wakumicha mbeyu yinofu yula ayii Mwana wa adam; 38na ngunda uyii ndima; ni mbeyu sinofu, awa wawa wana wa utwa; 39ni fimbwau fiyii wana wa mbifu; na wa mitumba wakumicha ifi ayii diabolo: leka mabeno gayii kumalakisa kwa miaka iyi; ni wakubena wayii wamalaika. 40Mumu ngati umu fimbwau fiwunganasika ni kukungika nu mwoto; mumu yakuye pa kumalakisa kwa miaka iyi. 41Mwana wa adam yatume wamalaika wake, na yawawunganise kuhumila pa utwa wake fya kukuwasa fyoha, na wakukita fya usokosi, na yawawatage mu litende lya mwoto: 42bahalapala yakuye malilo ni kugogodola mino. 43Bahalapala wagolofu yawawale ngati lijuwa pa utwa wa Dadi wawe. Yuyu ayii na makutu, ayufwanaye.
44Utwa wa kunani uhwanangana ni kyuma kyakufihika mu ngunda; kila mundu akakikolili, ni akakifihiti; ni pa kiheko kyake abita na atasa fyoha ayii nafyo, na ahemela ngunda wula.
45Kawili, utwa wa kunani uhwanangana nu mundu wa makau uyu akalonditi lulu yinofu: 46leka pakayiweni lulu yimonga ya uhemesi ukulungu, akabiti, akatasiti fyoha akayili nafyo, na akayihemili.
47Kawili, utwa wa kunani uhwanangana ni kilepa, kila kilekeliki pa nyanja, ni kikawunganisi somba sya ntundu uyi woha: 48kila, pala kimemiti, wakakiyonjili pa lilowoko; na wakatemi pasi, wakasihagwili sinofu pa ndundu, leka siwifu wakasitagiti kunja. 49Wiwi yakuye pa kumalakisa kwa miaka iyi: wakamalaika yawapite, na yawapatule wawifu pagati pa wagolofu, 50na yawawatage pa litende lya mwoto: kukulakula yakuye malilo ni kugogodola mino.
51Wila muwalalili aga goha? Wanjowela yombe, Ena. 52Leka akajowiti kwa wombe, Mumu wakulembela ayi yoha uyu akitiki mwanafunsi wa utwa wa kunani ahwanangana nu mundu mwene nyumba, uyu nayombe apisa kunja pa kikokoli kyake findu fya hino ni fya mwandi.
53Ni ikayili kukita pala akamaliti Yesu ngongo isi, akawukiti kukulakula. 54Ni pakachiti ku ndima wake mwene, akawayigalisi mu sunagoge yawe, mpaka wakakangichi nyahope, kujowa, Kuhumila kuliku uyu ayii ni luhala ulu, ni fya makakala ifi? 55Uyu si mwana wa yula wakukayula mabihi? nyongolo si akemeleka Mariamu? na walongo mundu Yakobo, nu Yosefu, nu Simon, nu Yuda? 56Na walumbu mundu, si woha wayii kwitu? Mumu kuhumila kuliku ayii nafyo fyoha ifi uyu? 57Na wakakuwasiki pa yombe. Koma Yesu akajowiti kwa wombe, Wakulweta nukuya wangali liginiko, lema pa ndima wake mwene, na pa nyumba yake mwene. 58Na akakiti lepa kula fya makakala fingi ndawa ya kulema kukela kwawe.
Tällä hetkellä valittuna:
Mattayo 13: MGS1937
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
First published by the British and Foreign Bible Society in 1937.
