Mattayo 10
10
1Na akakemili kwake wanafunsi wake kumi na wawili, nakawapili chengo panani pa roho sya wafu, kusitaga kunja, ni kulwasa utamu uyi woha nu ulegelefu uyi woha.
2Leka mahina ga ma‐apostolo kumi na wawili gaga aga: Wakutumbula, Simon, wakukemeleka Petro, nu Andrea nung’una mundu; Yakobo wa Zebedayo, nu Yohana nung’una mundu; 3Filipo, na Bartolomayo; Tomaso, nu Mattayo wakuyupa nsongo; Yakobo wa Alfayo, nu Thaddayo; 4Simon mKanani, nu Yuda Iskariota, yula kawili akamfumbwili. 5Awa kumi na wawili Yesu akawatumiti, nakawataukili, kujowa,
Musibita pa ndila ya Mihuku, na pa makaya ga waSamaria musiyingila: 6leka mbanga mubite mwanja kwa mambelele gakutagika ga nyumba ya Israel. 7Leka pa kubita mwanja muwandisaye, kujowa, Utwa wa kunani uwandamila. 8Muwalwase wakulwala, musyusyaye wakufwa, muwaguyulaye wa matana, mutagaye kunja madaimon: mukayupiti waka, mupelekaye waka. 9Musiyipatila zahabu, haka ndalama, haka nkuwa pa ngoto sinu; 10haka lihaku lya mpako pa mwanja, haka mingila yiwili, haka sapato, haka nkongojo: ndawa wakuhenga lihengo alinganila kwa fyakulya fyake. 11Leka likaya liyi lyoha pangi mhali uwu yamuyingile mumu, mukotaye nani ayii mumu wakulinganila; na bahalapala muhwelaye mpaka pa kupita. 12Leka pakuyingila mu nyumba muyilamusaye. 13Ni wona nyumba yilinganili, kindamba kinu kihiche panani pake: leka wona yilemiti kulinganila, kindamba kinu kiwakilawukile. 14Na ayi yoha uyu alema kuwakemelekesa, pangi alema kuyufwana malowe ginu, pakupita pa nyumba yila, pangi likaya lila, mukung’unde lufumbi lwa pa njayo sinu. 15Chakaka niwajowela, Mhalo wa ndima wa Sodom nu Gomora, pa ligono lya kupawula, yaupindike kulutila mhalo wa likaya lila.
16Lola, niwatuma mwenga ngati mambelele pagati pa mabwa ga ku dasi: mumu muye wa luhala ngati mayoka, na wololo ngati njiwa. 17Leka mwigohaye wicho kwa wandu: pakuya yawawafumbule pa chengo, na pa masunagoge gawe yawawatowe; 18ena, na pa manduna na pa watwa yamutoleke ndawa ya nenga, kwa ulungamakiso kwa wombe na kwa Mihuku. 19Koma pala wawafumbula, musihola ngani kukita yamulongele wuli pangi kiki: pakuya yamupelewe saa yiyilayila iki yamulongele. 20Pakuya nukuya mwenga mulongela, koma Roho wa Dadi winu wakulongela mugati mwinu. 21Leka mamaye yamfumbule nung’una mundu kwa kifwa, nu dadi mwana mundu: na wana yawayime kupindika wakuwahogola wawe, ni kuwafwisa. 22Na yamuye wakuwipilika na woha ndawa ya lihina lyangu: leka uyu yayumalakile mpaka pa kumalakisa, yuyu yayokoleke. 23Leka pala wawahyunga mwenga pa likaya ili, mukimbililaye pa lingi: pakuya chakaka niwajowela, Yamumalakise lepa makaya ga Israel, mpaka yahiche Mwana wa adam.
24Mwanafunsi nukuya nkulungu kulutila mwalimu wake, haka mbanda kulutila bambo mundu. 25Kulinganila kwa mwanafunsi kupata kuya ngati mwalimu wake, nu mbanda ngati bambo mundu. Ngati wankemili mwene nyumba Beelzebub, wuli wala wa pa nyumba yake! 26Mumu musiwayogopa wala: pakuya payilepe kandu kakufunakalika, kala yakaleme kufunukulika; na kakufihika, kala yakaleme kumanyika. 27Kila niwajowela pa lwisi, mulongelaye pa lulanga: na kila mukiyufwana pa makutu, muwandise pa misagasa. 28Ni musiyogopa wala wakukoma mbili, leka wumi wahotola lepa kukoma; koma mbanga munjogope yula ahotola kuyananga wumi nu mbili kawili pa gehena. 29Si njegeya siwili sihemeleka kwa senti siwili? leka haka kimonga kya ifi yakigwe pasi lepa pangali Dadi winu: 30koma haka mayunju goha ga pa mutu winu gawalangiki. 31Mumu mukotoke kuyogopa; mwenga mulutila njegeya nyingi pa uhemesi. 32Mumu ayi yoha uyu yaniyitakile palongolo pa wandu, nenga nani yaninjitakile palongolo pa Dadi wangu uyu ayii kunani. 33Leka nayombe yanikane nenga palongolo pa wandu, nenga nani yaninkane palongolo pa Dadi wangu uyu ayii kunani.
34Musihola kukita nichiti kulekela kindamba pa ndima: nichiti lepa kulekela kindamba, koma upanga. 35Pakuya nichiti kupatula mundu nu dadi mundu, mwana ndala nu nyina, ndala nkamwana nu nyihyala mundu: 36nu wa mitumba wa mundu wawa wa pa nyumba yake. 37Wakungana dadi mundu pangi nyina kulutila nenga ayii wangali kunilinganila; nu wakungana mwana mundu ngosi pangi ndala kulutila nenga ayii wangali kunilinganila. 38Na uyu ayupa lepa msalaba wake ni kukisa panyuma pa nenga, ayii wangali kunilinganila. 39Yula yaukolele wumi wake yautage; nu yula yautage wumi wake ndawa ya nenga yaukolele.
40Yula awakemelesa mwenga anikemelesa nenga, na yula wakunikemelesa nenga ankemelesa yula akanitumiti nenga. 41Yula ankemelesa wakulweta pa lihina lya wakulweta yayupe njombe ya wakulweta; na yula ankemelesa ngolofu pa lihina lya ngolofu yayupe njombe ya ngolofu. 42Na ayi yoha uyu yanywese yumonga wa wachoko awa ntimbo wa machi masisimu pa lihina lya mwanafunsi, chakaka niwajowela, yayintagike lepa njombe yake.
Tällä hetkellä valittuna:
Mattayo 10: MGS1937
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
First published by the British and Foreign Bible Society in 1937.
