Mateus 5
5
Ti preeticht uf em përich
1Wii Yeesus tas kroose folek kesiin hot, is eyer en përich ruf kang un hot sich kesetst. Sayn tisiple sin tichter pay em khom 2un eyer hot aan kefang tëne untericht se kewe.
Ti echt kliklichkheet
Lukas 6.20-23
Yeesus saat:
3— Kliklich sin ti layt woo wise tas se kaystlich aarem sin,
wayl tëne is te Himels Raych.
4— Kliklich sin ti layt woo prile,
wayl Hërkot tuut se konsoleere.
5— Kliklich sin ti layt woo sich keweenlich mache,
wayl tii kriin was Hërkot ferxproch hat.
6— Kliklich sin ti layt woo hunger un torxt hon fer em Hërkot sayne wile tuun,
wayl Kot lost se kans tsufriite.
7— Kliklich ti layt woo paarmhërtsich sin mit te anere,
wayl Hërkot wil paarmhërtsich sin mit tëne.
8— Kliklich sin ti layt woo en sauwer hërts hon,
wayl tii wëre Hërkot siin.
9— Kliklich sin ti layt woo xafe fer friite se pringe,
wayl Hërkot wil se aan nëme als sayn khiner.
10— Kliklich sin ti layt woo keyacht wëre wayl se Hërkots wile tuun,
wayl tëne wërt te Himels Raych sin.
11— Kliklich sayt teyer wën se aych ferxëne, yachte un ale sort liye saan keeche aych weche mich. 12Frayt aych un yuupelt, wayl en kroose loon is uf kehoop im himel fer aych. Wayl kraat soo hon se xon ti profëte pehantelt woo foer aych keleept hon.
Te sals un tas licht
Markus 9.50; Lukas 14.34-35
13— Teyer sayt te sals fer ti mënxheet; awer, wën te sals te kexmak ferleyert, is es khee sals mee un tiint fer niks mee. Wërt wech kexmis un ti layt woo torich keen tuun em fertreete.
14— Teyer sayt tas licht fer ti welt. Meyer khan net en xtat woo uf te përich kepaut kep is ferxtekle. 15Nimant macht en lamp aan fer unich en khorep se tuun. Kraat es keeche teel, ti lamp kept uf en aychne plats hiin ketuun tas es licht tii al woo im haus sin ilumineere tuut. 16Soo aach mus ayer licht xayne soo tas ti anere ayre Fater, woo im himel is, loope, wën ti siin tas kuutes woo teyer macht.
Em Mooses sayn kesets
17— Praycht net tënke tas ich khom sin fer em Mooses sayn Kesets neewe xtele ore was ti Profëte aych kelërnt hon. Ich sin net khom fer tii se fernichte, awer fer tii se kompleteere. 18Ich saan aych sicher tas tas woer is: soo lang wii ti eyert un te himel aan hale, niks wërt fon te kesetse wech kehool — net mool te kleenste puxtaawe, net te keringste phunkt. Un soo wils playwe pis am ën fon aler tings. 19Also, wëns tuu te kleenste kepoote net aan heere tuust un tas fer en anere lërne tuust tas selwiche mache, wërst tuu te kleenste fom Himels Raych kerechent. Awer, weyer ti Kesets noo keet un ti anere lërne tuut tas selwiche mache, kept kroos kerechent im Himels Raych. 20Wayl, ich saan aych sicher tas ploos in te Himels Raych khomt weyer ti Kesetse peser noo keet wii ti Kesets leerer un ti fariseyer.
Te has
21— Teyer hot keheyert was fer ayre foerkhomer kesaat kep is: “Pring net um. Weyer umpringe tuut wërt julkeyert.” 22Awer, ich saan aych tas yeete ëne woo wuutich wërt iwich sayne pruuter, wërt julkeyert. Weyer tsu sayne pruuter saan tuut: “Tuu pist niks weyert” wërt julkeyert uf em kericht. Un weyer sayne pruuter itiot ruuft is in kefaar fer in ti hel se khome. 23Also, wëns tuu foer em altaar tayn opfer fer Hërkot am mache pist un tënkst an en pruuter woo etwas keeche tich hot, 24los tayn opfer too, foer em altaar, un kee klaych friite xliise mit tayne pruuter. Tëm noo khom tsurik un mach tayne opfer fer Hërkot.
25— Wën yemant tich aan kept un uf es kericht ruuft, fereenich tich mit tëm soo lang wii es tsayt is, eep teyer uf es kericht khomt. Wayl, wën teyer uf es kericht khomt, kept tee tich fer te richter ap, te richter kept tich fer te kerichts tiiner ap un tee xtecht tich in ti katee. 26Ich fersichere tich tas tas woer is: tuu khomst net too raus pis tuu te letste nikel petsaalt host.
Ti hochtsayts pruch
27— Teyer hot keheyert was kesaat kep waar: “Tuu solst net ti hochtsayt preche.” 28Awer, ich saan aych: weyer en aner fraa pekeyerlich aan kukt, hot xon ti hochtsayt keproch in sayn hërts. 29Also, wën tayn rechts au tich in sinte fale macht, rop es aus un wëref es wech. Wayl is peser en teel fom khërwer ferleere als te kanse khërwer in ti hel keworef kewe. 30Wën tayn rechts hant tich in sinte fale macht, xnayt se ap un wëref se wech. Wayl is peser en teel fon tayne khërwer ferleere als te kanse khërwer in ti hel khome.
Hochtsayt ausnaner mache
Mateus 19.1-9; Markus 10.1-12; Lukas 16.18
31— Is aach kesaat kep: “Weyer sayn fraa ap xikt, mus tëm en tokumënt kewe woo ti hochtsayt aus naner kemach kept.” 32Awer, ich saan aych: yeete man woo sayn fraa fort xikt, sonst im fal fon hochtsayts pruch, is xult tas tii en eeye precher wërt, wën sii sich noch mool ferhayrate tuut. Un te man woo sich mit tee ferhayrat is aach en eeye precher.
Ti xwoerunge
33— Teyer het keheyert was kesaat këp is fer ayre foerkhomer: “Prech net tayn wort wëns tuu etwas ferxproch host, awer hal in was tuu kexwoert host fer Hërkot.” 34Awer, ich saan aych: xwoert net, uf khee aart. Xwoert net im himels naame, wayl is Hërkot sayne troon, 35net mool im eyerts naame, wayl tas is te xtuul woo Eyer sayn fiis ruue tuut; net mool in Yeruusalëms naame, wayl es is em kroose Kheenich sayn xtat. 36Xwoert net mool iwich ayre aychne khop, wayl teyer khënt net mool eene hoer faatem ways ore xwarts mache. 37Wëns tuu etwas ferxpreche tuust, saa ploos “yoo” ore “nee”, wayl yeete wort mee woo kesaat kept khomt fom taywel.
Au um au
Lukas 6.29-30
38— Teyer hot keheyert was kesaat kep is: “Au um au, tsaan um tsaan” 39Awer, ich saan aych: Tuut aych net keeche tëne weere woo aych xaate tuun. Wën yemant tich ins kesicht haue tuut, tuu ti aner sayt aan piite tas tee too aach truf haue sol. 40Wën yemant tich en protses uf setst fer tayne punx wech hoole, los em aach tayne punx mit hoole. 41Wën eene fon te frëmte soltaate tich tswingt en last traan en khilomeeter wayt, traa en tswaay khilomeeter. 42Wën yemant tich etwas ferlangt, kep es; un, wën yemant tich etwas fer se leene ferlangt, leen es.
Ti faynte liipe
Lukas 6.27-28,32-36
43— Teyer hot keheyert was kesaat kep is: “Liip tayn froynte un has tayn faynte.” 44Awer, ich saan aych: liipt ayre faynte un peet fer tii woo aych yachte, 45tas teyer als khiner fon ayre Fater wërt, tee woo im himel is. Wayl tee macht tas ti sun iwich ti kuute un iwich ti xlechte xaynt un kept te reen kraat soo fer tii woo tas kuutes tuun soo wii fer tii woo tas xlechtes tuun. 46Wën teyer ploos liipt tii woo aych liipe, warom waart teyer tas Hërkot aych etwas kept als prays? Sokaar ti xtayer kaseerer liipe ti persoone woo tëne liipe! 47Wën teyer ploos mit ayre froynte xprecht, was sayt teyer ekstra am mache? Sookar ti woo net an Hërkot klaawe mache tas! 48Also, sayt perfekt, soo wii ayre Fater, woo im himel is, perfekt is.
Tällä hetkellä valittuna:
Mateus 5: NTHunsrik
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
2022 Sociedade Bíblica do Brasil
