Mǒhtûlû̌hǎhtûsa 14
14
Khûabra ma̤hǎplǎbǎ Khûlòtǎ
1Bǎnukha, Sǐnagǎ khwǐdû̌ Araphè, Èlasagǎ khwǐdû̌ Ariyû, Ělagǎ khwǐdû̌ Khedò̌laûma kû̌ Kò̌igǎ khwǐdû̌ Tǐda sî tokhlǒ, 2Htò̌shě lô̌khô Wî̤̌sǐdû akhwǐ Bera, Wî̤̌gamû̌ra akhwǐ Bǐrasha, Wî̤̌aduma akhwǐ Shǐnaba, Wî̤̌sebûi akhwǐ Shǐmeba kû̌ Wî̤̌bela khwǐdû̌ tokhlǒ. Wî̤̌bela numî̌ kòyò kaǎ khô̌pe lû̌mi̤ kû̌ Wî̤̌sûra. 3Khwǐnu sò̌yè̤̌ sǎphlǒ ô̌ wô̤̌wô̤̌ lû̌û dě ma̤htò̌ lô̌khô aprṳ̂aphǎ tômṳ̌. Dě asî bè̌plǒ asî kliphû̌ tokhlǒ bǎ Sǐdi lô̤̌te̤kû nutôkû. Gûlǎ̤ nutôkûmî̌ khònò̤̌ a mè̤̌kû̌ Shishukaha shikoǒdû̌nu hǒ. 4Asî ô̌ lô̌khô dǒ Khwǐkhedò̌laûma ata̤pǒ alǎ̤ shǐginǐ̤ně hǒ, dě bǎ a behtò̌ shǐsuně akhanu asî sahtò̌ shěshǔgesô̌ lô̌khô khwǐ nutôpwa̤.
5Bǎ a behtò̌ shǐlǐ̤ně akhanu khwǐdû̌ Khedò̌laûma kû̌ khwǐ dǒ a bǒsû̌ kû̌ lû̌û nutokhlǒ htò̌shěpè̤̌kè Rephai khlilèphû̌ dǒ a ô̌ bǎ Wî̤̌ashǎtarû Kharanei akû nutokhlǒ, kû̌ Sǔsǐma khlilèphû̌ dǒ a ô̌ bǎ Wî̤̌hamakû nutokhlǒ, kû̌ Ěmǐ khlilèphû̌ dǒ a ô̌ lô̌khô bǎ Khirǐyase wî̤̌plǒcu ya̤dakhû̌ nutokhlǒ, 6kû̌ Hûrǐ khlilèphû̌ dǒ a ô̌ bǎ Sè̌ǐra khôlôkhû̌ nutokhlǒ, htokhôtô̤̌ a shěpè̤̌ cû̌tǒ̤ dǒ Wî̤̌ělapara gǎshashigǎ agǎkûhtunu. 7Htodě asî htû̌tiwǐ gesô̌ dě a cû̌ dǒ Emishaphè shipǒ̤htò̌ tôkhô, dě a cû̌ shěpè̤̌ nṳ̌bò Amalègǎ, htokhôtô̤̌ a cû̌ shěpè̤̌ pô̤̌ Amò̤̌rǐ khlilèphû̌ dǒ a ô̌ bǎ Wî̤̌hasarûtama akû nutokhlǒ. Emishaphè shipǒ̤htò̌nu khònò̤̌dě kòyò kaǎ kû̌ Kade shipǒ̤htò̌phû̌.
8Bǎ khwǐ nusò̌lǐ̤ shěpè̤̌ hto ta̤hǒo tokhlǒ akhanu, Wî̤̌sǐdû akhwǐ, Wî̤̌gamû̌ra akhwǐ, Wî̤̌aduma akhwǐ, Wî̤̌sebûi akhwǐ kû̌ Wî̤̌bela akhwǐ#14:8 Wî̤̌bela nî̌ kòyò kaǎ pe lû̌mi̤ kû̌ Wî̤̌sûra. hǒo sò̌yè̤̌ hǎhtò̌cû̌ dě cǐplǒhtǔplǒ bò asî kliphû̌ tokhlǒ dǒ Sǐdi lô̤̌te̤kûnu, 9Dě asî cû̌shě kû̌ Ělagǎ khwǐdû̌ Khedò̌laûma, kû̌ Kò̌igǎ khwǐdû̌ Tǐda, kû̌ Sǐnagǎ khwǐdû̌ Araphè kû̌ Èlasagǎ khwǐdû̌ Ariyû, dě khwǐ hǒo sò̌lǐ̤ shě kû̌ khwǐ hǒo sò̌yè̤̌. 10Bǎnukha dǒ Sǐdi lô̤̌te̤kû ahǎpèè̌ imětegle lo̤kǎkre tokhlǒ ô̌betibǐ bò bǎnu dě bǎ Wî̤̌sǐdû khwǐ kû̌ Wî̤̌gamû̌ra khwǐ kû̌ akliphû̌ tokhlǒ hǎhtò̌khlè̌ akhanu, tokhlǒkhlǒ dě a lò̤tě̤nṳ̌kè dǒ hǎpèè̌ imětegle lo̤kǎkre kû, tokhlǒkhlǒ dě a khlè̌htò̌ dǒ khôlôkhû̌. 11Dě khwǐnu sò̌lǐ̤ htò̌tô̤̌nṳ̌bò Wî̤̌sǐdû kû̌ Wî̤̌gamû̌ra ta̤phû̌ta̤li̤ tokhlǒ kû̌ shǎǎshǎô tokhlǒ dě asî hǎhtò̌cû̌ gekèsô̌. 12Htodě asî pṳ̂̌cû̌nṳ̌ Khûabra aphû̌dû̌ Khûlòtǎ dǒ a hǎhtò̌cû̌ô̌ bǎ Wî̤̌sǐdû nutôpwa̤, htokhôtô̤̌ ata̤kî̌ta̤kû̌ mî̌ asî phî̌cû̌nṳ̌ bò, htodě asî hǎhtò̌cû̌kè.
13Bǎnukha kòyò dǒ a khlè̌hǎhtò̌ hǎplǎ nutôpwa̤ ge shôbǐǐlṳ̌ bǎ ta̤we̤ta̤kè nutokhlǒ kû̌ Hebrǔ khlilèphû̌ Khûabra. Khûabra lǎ̤ô̌ gûlǎ̤ nî̌ a ô̌ phǔ kû̌ Amò̤̌rǐ khlilèphû̌ Khûmè̤mare sǒmṳ̌dû̌ plò̌shî̌ nutôkû. Dě Khûmè̤mare mî̌ Khûishakû kû̌ Khûana apṳ̌wè̤̌ dě lǒ̤bò asî tokhlǒnu a sǎphlǒ pa htobò lû̌û dě a ǎmě kû̌ Khûabra. 14Bǎ Khûabra ganǎ̤de kû̌ kòyò pṳ̂̌cû̌kè aphû̌dû̌ Khûlòtǎ akhanu, a kaǎplǒ kòyò dǒ ashěpě̤jò ta̤ pwa̤ suya̤ kû̌ shǐlǐ̤sô̌ dǒ a ô̌phijǎlò̤ dǒ ahǐdǒkû nutokhlǒ dě a gû̌ kû̌ khwǐ nu sò̌lǐ̤ akò tǒ̤dǒ Wî̤̌da. 15Bǎ asî gû̌lṳ̂ tǒ̤ lô̌khô dǒ Wî̤̌da akhanu, a bènǎ a kòyò tôsaprṳ̂ kû̌ tôsaprṳ̂ tokhlǒ dě bǎ lṳmṳ̌khǐ akhanu a nṳ̌shě lô̌khô pwa̤sǎkhě asî tokhlǒ. Dě a shěpè̤̌ bò pwa̤sǎkhě asî tokhlǒ, dě a gû̌lṳ̂ tǒ̤ asî dǒ Wî̤̌damase gǎcôcǐ Wî̤̌hûbanu. 16Dě a cû̌phî̌genṳ̌ bòsô̌ ta̤kǐta̤krû̌ dǒ kòyò phî̌cû̌gebò nutokhlǒ, htokhôtô̤̌ a kaageǐ sô̌ aphû̌dû̌ Khûlòtǎ kû̌ pwa̤mǒ̤ tokhlǒ kû̌ kòyò ashǔshawa̤ dǒ kòyò pṳ̂̌cû̌nṳ̌ tokhlǒ htodě atô̤̌genṳ̌ sô̌ ta̤kî̌ta̤krû̌nu tokhlǒ.
Pwa̤shû̌gǎ khwǐmalakhǐsedè̌ ǐshowî̤ Khûabra
17Bǎ Khûabra cû̌ shěpě̤ hto Khwǐkhedò̌laûma kû̌ khwǐ dǒ abǒsû̌ kû̌ lû̌û nutokhlǒ dě a ge akhanu, Wî̤̌sǐdû khwǐ hǎhtò̌cû̌ kè̌shǐshěshǔ lû̌û dǒ Shabe lô̤̌te̤kû nu. Shaba lô̤̌te̤kû numî̌ kòyò kaǎ pe lû̌û kû̌ Khwǐlô̤̌te̤kû.
18Htodě khwǐ Malakhǐsedè̌ nî̌ Wî̤̌shale̤ akhwǐ mî̌ amè̤̌mè̤̌, Cǒmara dǒ adû̌ahtûlǒ apwa̤lṳtòhtò̌ta̤ mî̌ amè̤̌mè̤̌. Dě a phî̌hè nǐ̤ shǎǎ kû̌ Sîpîshǐyô̤̌ dǒ Khûabra ô̌.#Hebrǔ 7:1-10 19Dě aǐshowî̤ Khûabra kû̌,
“Cǒmara dǒ adû̌ahtûlǒ,
dě a bô̌lò̤ mǒkhû̌ kû̌ hǎkhû̌ nutôpwa̤ ǐshowî̤ pû na nî̌.
20Cǒmara dǒ adû̌ahtûlǒ, dǒ a no shěpè̤̌ na kû̌ nakhuwè̤ tokhlǒ tôpwa̤nu,
kòyò htû̌sò̌htò̌ tûû̌ pû a nî̌.”
Htodě Khûabra phî̌ ta̤kǐta̤krû̌ dǒ lǒ̤bò a nǐ̤bǎ nutokhlǒ apû̌shǐ dě tôpû̌ dě a ǐ kû̌ khwǐmalakhǐsedè̌.
21A ma̤ hto pô̤̌nudě Wî̤̌sǐdû khwǐ hî̌ Khûabra kû̌, “Ǐ tîkhî he kòyò nutokhlǒ, dǒ ta̤kǐta̤krû̌ nutokhlǒ dě phî̌ bòtû̌ kû̌ nayanu nî̌.”
22Bǎbǎkǎlè Khûabra hî̌shǔ lû̌û kû̌, “He ǐsholò̤ hto heyô̤̌ kû̌ Cǒmara tûjû̌pwa̤, amè̤̌kû̌ Cǒmara dǒ a adû̌ahtûlǒ, a bô̌lò̤ mǒkhû̌ kû̌ hǎkhû̌ tôpwa̤ kû̌, 23He bǎ phî̌nṳ̌ nata̤kǐta̤krû̌ tôcǒ tô̤̌. Tǐ pwǎ lǔ tôbô pwǎ bǎbǎ, khò̌phěpli̤ tôbô pwǎ bǎbǎ, he bǎ phî̌nṳ̌ tô̤̌. Hî̌pě na hî̌ kû̌, ‘he mî̌ kòyò dǒ a ma̤dû̌yò̤̌ Khûabra,’ na hî̌ pô̤̌nu hè̌. 24Dǒ heyanu he phî̌ tôcǒ tô̤̌, bǎbǎkǎlè he phî̌ pwǎtǒ̤ he kòyò nějǎphû̌ tokhlǒ ǎ htokè nutokhlǒ pwǎ. Bǎbǎkǎlè Khûana, Khûishakû kû̌ Khûmè̤mare dǒ a cû̌tǒ̤ kû̌ he tokhlǒ aya dě bèpè̤̌ padô̌ asî ta̤kǐta̤krû̌ tokhlǒ nî̌.”
Tällä hetkellä valittuna:
Mǒhtûlû̌hǎhtûsa 14: KXF
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Wycliffe USA