MATHAI 8
8
Ngansae Kaman Longto A Hoihsak
(Mrk 1:40-45; Luk 5:12-16)
1Jesuh loa maenui bang hoitoah anghum tathuk na-ah mipui paroeai mah a hnukah baang o. 2Tona-ah ngansae kaman longto angzoh moa, Jesuh hma-ah khokkhu samkrawn moa tabok lamhoi, “Angraeng, na koeh nahaeloa na thoengsak thaih,” tiah a naa pae.#8:2 Na thoengsak thaih: Ngansae manhhaih mah kami hae bokhaih bangah thoengcaisak ai tiah dawn o.
3Jesuh loa ban pazang moa a sui, “Hoihsak ka koeh, thoeng lai ah” a naa pae. Vaipang ta-ah ngansae nathaih to a hoih roep. 4Topongah Jesuh mah anih khaeah, “Tahngai ah! Mita khaeah doeh thui hmah, to-e qaihma khaeah caeh poe aloa anih mah khen na soe. Topacoengah na hoih boah tito mi boih hma-ah amtuengsak hanah Mosi Tawklok batiah angbawnhaih to sah ah,” tiah a naa pae.#Lev 14:1-32
Risa Angraeng Ih Tamtoeh A Hoihsak
(Luk 7:1-10)
5Jesuh loa Kapernaum vang ah akun na-ah Rom risa angraeng longto loa angzoh moa anih khaeah tahmenhaih a hnik. 6“Angraeng, ka tamtoeh loa ngannat moa im ah angsong sut, nung parai moa angtawt angqoe thaih ai,” tiah a naa pae.
7Jesuh mah, “Kangzoh moa ka hoihsak han,” tiah a naa.
8Tona-ah Risa angraeng mah, “Angraeng, totih na ai ni, nang ka im ah nangzoh hanih hae ka krah ai. Lok khueh mah na thui halat ah, ka tamtoeh loa hoih tih hmang. 9Kai doeh ranui bang angraeng akaa thungah kaom kami ah ka oh moa kai hlimah doeh risanawk a oh toeng. Kaimah hlim ih risa longlongto to, ‘Caeh ah,’ ka naa boah loa a caeh; ‘Angzo ah,’ ka naa baloa angzoh. Ka misong doehsoe, ‘Hi hae sah ah,’ ka naa boah loa a sak halat,” tiah a naa pae.
10Toto Jesuh mah a thaih na-ah katingai dawn a rai moa angmah hnukah kabaang mipuinawk khaeah, “Loktang ta-ah kang thuih o, Israel kami thungah doeh hi kami ih taanghaih hae ka hnuh ai vop. 11Kamnoek ta-ah kang thuih: Niangzae hoi niduem bang hoitoah kami paroeai angzo o ueloa van Poenghaih thungah poi buh ah Abraham hoi Isaak hoi Jakob cae hoiah anghnu o nawn tih.#Luk 13:29 12To-e van Poenghaih thungih ka om han kaminawk to loa, poengbang vinghaih thungah vah ah om ueloa toah to qah ueloa haa pakuep tih,” tiah a naa#Mat 22:13; 25:30; Luk 13:28. 13Tona-ah Jesuh mah Risa angraeng khaeah, “Im ah amlaem aloa na taanghaih ih batiah sak pae ah om tih,” tiah a naa.
Tona-ah risa angraeng ih tamtoeh to loa ato tue thuem roeroe ah to a hoih roep.
Jesuh Mah Kami Paroeai A Hoihsak
(Mrk 1:29-34; Luk 4:38-41)
14Jesuh loa Piter im ah caeh moa Piter ih amsae nongpui angqaihaih hoiah ngan kana, iihkroeng ah kangsong to a hnuk. 15Jesuh loa a ban to a sui moa tak kabae haang to amding pae, angthawk moa Jesuh to abom ahlom.
16Duembang phak na-ah taqawk ka tawn kaminawk to Jesuh khaeah angzoh o haih. Lok pakhato hoiah taqawk kasaenawk to pathok moa ngannanawk boih to a hoihsak. 17Hitiah sak ih hae tahma Isaiah mah, “Angmah khaeh mah aicae nathaih ih to a phawh moa ngantuihaih ai ihnawk to a phawh boih boah,” tiah a thuih ih to acung boah.#Isa 53:4
Jesuh Hnukbang Ah Oh Ka Koehnawk
(Luk 9:57-62)
18Jesuh mah a taenghaek ah kaom mipui to a hnuk na-ah hnukbangnawk to tuili hapbang yaeh ah caeh hanah a thuih pae. 19Tawklok patukkung longto anih khaeah angzoh moa, “Patukkung, na caeh roekah kang bang han,” tiah a naa pae.
20Jesuh mah, “Tasui mah tabu a tawnh moa tavanawk doeh tabu tazi a tawnh o, to-e Kami Capa loa a lu koenghaih han boe doeh om ai,” tiah pathim.
21Angmah hnukbang kalah longto mah, “Angraeng, im ah amlaemsak rae aloa kam pa ih qok to aquihsak rae ah,” tiah a naa.
22Jesuh mah, “Na baang ah, kadueh kaminawk mah angmahcae kadueh tingtoi to aquih o na soe,” tiah pathim pae.
Jesuh Mah Takhipui A Ditsak
(Mrk 4:35-41; Luk 8:22-25)
23Jesuh loa palong thungah akun moa a hnukbangnawk mah a bang o. 24Mawnhoe aiah tuili ah takhipui a songh moa palong a tup dui. To-e Jesuh loa a iih ving. 25A hnukbangnawk loa Jesuh khaeah caeh o moa palawt o. “Angraeng, kaicae pahlong ah. Ka dueh o tih boah hae!” a naa pae o.
26Tona-ah Jesuh mah, “Tipongmaw na mawnh o? Na taanghaih tamsi o lawnlai!” tiah a naa pae. Topacoengah anih loa angthawk, takhipui hoi tuiphunawk to a zoeh moa a dit o cing.
27Mi boih mah a dawnrai o moa, “Hi kami hae kawbatih kami khruek khoe maw? Takhipui hoi tuiphu mah doeh a lok tahngaih pae o hae!” a ti o.
Taqawk Katawn Longhnetto A Hoihsak
(Mrk 5:1-20; Luk 8:26-39)
28Jesuh loa tuili hapbang yaeh Gadara prae a phak na-ah, to ih taprong hlung thung hoitoah ka tacawt longhnetto hoiah angqum o. Hi hnit loa taqawk ka tawn kami ah oh moa zitman oh parai pongah to loklam caeh han zit o. 29Cungkhang toah anih hnit mah, “Sithaw Capa, kaicae hae timaw na koehhaih ih a oh? Atue pha ai na-ah kai hnit hae raekrai hanah maw nangzoh?” tiah a hangh hoi.
30To hoitoah hla parai aiah rawkcak ka caa ok huto a oh. 31Taqawknawk mah Jesuh khaeah, “Kaicae hae na pathok o han nahaeloa ho ih oknawk ih tako thungah na kunsak ah,” tiah a naa pae o.
32Jesuh mah, “Akun oah,” tiah a naa pae. Tona-ah tacawt o moa oknawk thungah akun o. Ok huto loa amngoe khroeng ah amlet o bawn moa tuili thungah krak o moa a duek o hmen.
33Ok pacah ih khenzawn kaminawk to loa vangpui thungah a cawnh o moa to kawng boih hoi taqawknawk mah a sak ih kawng to a thuih pae o. 34Topongah vangpui thungih kami boih loa Jesuh angqum hanah a caeh o moa a hnuk o na-ah, anihcae prae to tacawt tak hanah tahmenhaih a hnik o.
Tällä hetkellä valittuna:
MATHAI 8: AKNT2023
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Asang Khongso New Testament in Eastern Khumi © Bible Society of Myanmar, 2023.
