Maki 7
7
Iesua muvikala lamana no anu lavuloto ane tamitema me'a mixalixu
1Xe mune'e la Tapalisi oli'a tamitema so lavulavu no anu lavuloto se'i me'a ne Ielusalemo mo mine'e mipita noxou Iesua. 2La ane'i mimaisi'a tatisaipeliou se'i mi'ani la i'uinu avo'a tei uasi. No anu xavutala noxi'a, loxo i'uninu avo'a uasi axone la anene masua no iou Mosinge ane. 3Xo Tapalisi oli'a Taiuta latala ilavusou i'ani vitanisi uasi, i'uinu avo'a tei u'isalili no anu ilixo noxi'a tatiatilasi'a tatei. 4Ilixo noxi'a axone iouiou misevile. Vile loxo ilai no maketi so ilotoxa'a la'ilali xe ilivu ixali la i'ulo tei kaio i'ani. Xe lavuloto se'i lexe i'uinu kapuxa'a xe lasopeni xe lisi axova kalumo.
5Ioxe, laso Tapalisi oli'a tamitema so lavulavu no anu lavuloto mitali'isou Iesua aloxo 'o, “Loxova so tatisaipelimeni imulinu ilixo noxi'a tatiatila uasio? Ane'i ilavusou i'uinu avo'a tei uasi, i'ani mi ne nuni'usio!” 6La Iesua muvikalane'i lexe, “Ngingi tamitema so kalavoi to! Vaikalaou polopeti Aisaia manina xo mukaukavu tatei lexe, 'Ane'i tamitema ano'o i'oxo tatilasilo no anaxa'asi ia opone'i uxolu va'axu noxilo. 7Ane'i i'itinu ualasilo vuluvulusi. Ane'i ivotovoto no anu lavuloto ane tamitema me'a mixalixusi.' 8Vaikalaou Aisaia ne manina, xo ngingi nge'italonu lo noxou Mosinge mo ngateteli no anu lo noxi'a tamitemasi.”
9La Iesua muvikalane'i aloxo 'ola, “Ngingi tamosou ilixo aloxo 'o. Lo noxou Mosinge aneva nga'osasou uasi la ngaxiunu to! Ngaxiunu mo so uvalaxu lavuloto noxi'a ta'ilusungengisi. 10Xo aloxo 'o. Mosisi mulemolu lo noxou Mosinge vile lexe, 'Ngingi ngataxane'i tamaminge xe taneninge mo ngamulinu vaikalai'a.' Xe vaikalaou Mosinge vile lexe, 'Loxo itema vile uvikala masua noxou momu o noxie nenu la ngavau itema ne usoli.' Anene lo noxou Mosinge. 11Ia ngingi la ngexiunu lo ne mo ngavikalane'i tamitema lexe, 'Ai, laixe so ngasu'uline'i tamaminge oli'a taneninge no anu lamoli ia umomomo uasi, xo anu masi ngasosovosou lexe noxou Mosingesi.' 12Ngingi ngexiunu lo axone laso anu loxo ngatanuxa'a tamitema so isu'uline'i tamami'a taneni'a. 13Laso ane. Ngamulinu lavuloto noxi'a ta'ilusungengi ane mune'e muxali noxinge mo ngexalixu vaikalaou Mosinge lexe mi vitanisi. Mi anene nge'oxonu no anu vote'i vilesisi anene uasi, nge'oxonu no anu votevote'i tavu'alo to!”
14Xe ili'i la Iesua mu'avali'a tamitema latala mine'e noxou mo muvikalane'i aloxo 'o, “Ngingi mukalusi ngalomunganiou vaikala ano'o mo so ngalamana. 15Loxo itema u'ou mi vile so u'una no vasimolu la umomomo so u'oxonu masua no iou Mosinge uasi. Ia mi ane a uxoxolu no anu itema oponu xe loxo uxalixu nene'axu, la anenesi u'oxonu masua no iou Mosinge. 16Itema ena'ei sangalou la ulomuxu vaikala ano'o.”#7.16 Tamitema so lavulavu se'i ixavutala lexe Maki molu ukaukavunu vaikala ane uxolu no anu 7:16 uasi, itema vilemo masi mukaukavunu.
17Xe Iesua mulutu muxexesi'a tamitema latala ne mo oli'a tatisaipeliou mi'unalai no tani. Mi'unalai la tatisaipeliou mitali'i no anu laxu latilovo ne. 18La anu muvikalane'i lexe, “Xo kisinge mutomu kalumo? Mi ane noale loxo u'unalai noxou itema la umomomo so u'oxonu masua no iou Mosinge uasi. Anene ngalavusou uasi? 19La'ilali ne umomomo so uxalixu xavutala o ilixo masua no anu itema oponu uasi, anu u'unalai no vasimolu ka usua no ilusi.” Iesua muvikala axone la mumaxa'u lexe la'ilali mukalusi ne laixe no iou Mosinge.
20Xe musolonu vaikalaou lexe, “Mi ane muxolu lumamo noxou itema loxo uxalixu nene'axu mo ula, la anenesi so u'oxonu masua no iou Mosinge. 21Mi e muxolu lumamo noxou itema uxalixu nene'axu aloxo 'o. Mimi loxo xavutala masua xe ilixo nuni'u olele xe pakali xe tamitema ive'a tamenexi'a xe tataula'i ilailai vitanisi. 22Xe isu'isu xe ili'ilixo ukilikalu iouiou xe kalavoi xe vaikala masumasua xe munumunu xe tamitema me'a i'itine'i xe xolaxola. 23Ilixo masumasua ano'o uxoxolu nonano no oponu itema xe ula, la anu anesi so u'oxonu itema masua no iou Mosinge.”
Iesua mukusaou angelo masua noxie sema Vonisia ilie
24Ioxe, mune'e la Iesua mu'umesou tuala anene mo mulai no xale lia ne Taili. Mulai la mu'unalai no tani vile la umasaxa lexe itema vile ulavusou uasi. Ia umomomo so utalumexa'a tamitema uasi, ane'i mitongonu mo milavusou ane. 25La sema vile milomu lexe anu a uxolu ne. Sema ne angelo masua vile mukasie ilie. Laso milomu lexe Iesua a uxolu ne la alaxu vilesisi milai mixali noxou mo milalusi no tava'u. 26Sema ne ane Iuta uasi, ane so noale'ale. Ane so laili Vonisia e mixolu no xale lia ne Silia. Milalusi no tava'u Iesua la milingalinga noxou lexe anu ukusaou angelo masua e mukasie ilie. 27La anu mutovone no anu latilovo aloxo 'o, “Laixe loxo tamolomolo ikalusou masaxa noxi'a tei. Xo mamu so tano'u la'ilalixa'a mo tapeinu noxi'a ta'a'a.” 28Ia ane mikolinu mulovo no anu latilovo ne lexe, “Ai tatila, anene manina. Ia ta'a'a kalumo ixolu no laxu lu. Mo so loxo tamolomolo i'ani xe utuxu ulapau la ane'i iloxu no lia ane.” 29La anu muvikalane lexe, “Nini nekoli laixe manina ane. Laso nalivu nalai xo angelo masua ne muxexesie iline mukalu.” 30Ioxe, ane milivu xo xe mixali no tasie la mimalei lexe ilie miai laixe no lu, mo mitongone lexe angelo masua muxexesie mukalu.
Iesua mupaipounu itema vile sangalou ilou anaxu mutomu
31Xe mukalu la Iesua mulutu mu'umesou xale lia ne Taili la mulai no xale lia ne Saitoni. Xe mupolo no apu ne Tekapolisi la mulai muxali avile no kupa Xalili. 32Mulai muxali la tamitema mine'enu itema vile sangalou mutomu xe anaxu muvikala vuluvulusi. Mine'enu noxou Iesua la milinga noxou lexe umulaxu avolu noxou itema ne. 33La anu muno'u mulaixu va'axu so ilousi mixolu. Mukalu la Iesua mumulaxu avolu simisou no sangalou itema ne, xalevile xe xalevile. Mukalu la mutuve se no avolu ka mumulaxu no levexu itema ne. 34La anu mutala telo no loxotolo xe muemuaxu la muvikala no anu vaikalai'a Taiuta lexe “Evata!” Anu laxu lexe, “Nakisi!” 35Sila sangalou itema ne mukisi mo levexu papaxexu so muvikala lamanasi. 36La Iesua mu'apixa'a tamitema lexe ia'aloxu mi anene uasi. Mu'apixa'a ia ilomuxu to uasi! Anu loxo upalusi'asi, xo mia'alo e mia'alosi. 37La ane'i latala ne tane'ilili noxou mo mivikala lexe, “Ai, mimi ma'ia u'oxonu la u'oxonu laixesi. Xo tamitema ane sangali'a utomu la ilolomusi. Xe ane'i loxo anaxa'a utomu la ivivikalasi.”
Tällä hetkellä valittuna:
Maki 7: ATA
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Copyright 1999 New Tribes Mission, Sanford, FL 32771-1487
