Maki 3
3
1Xe voxo vilela la Iesua mu'unalai no tasou votovoto vile la itema vile avolu musoli a uxoxolu ne. 2La tamitema mixolu ituluxu Iesua lexe upaipounu itema ne no anu Voxo so Ma'ila. Xo axone la tava'u so itulusou no anu vaivaikala. 3La Iesua muvikalanu itema ane avolu musoli lexe, “Nane'e mo natulu no talaxa'a tamitema 'o.”
4Xe mukalu la anu muvikalane'i tamitema ne aloxo 'o, “Loxova? Mosinge u'osa loxo ta'oxo mi ma'ia no anu Voxo so Ma'ila? U'osa loxo ta'oxonu alauna o loxo tamasuane'i tamenexinge? Anu u'osa loxo tapamaulinu itema vile o loxo tavau usoli?” Ia tamitema ikolinu uasi mixolu tasiausi. 5La Iesua iou mukakai'a mukalusi la oponu ialuxu noxi'a xo opone'i pakia'u. La muvikalanu itema ne lexe, “Namexinu avone.” Xe itema ne mumexinu avolu sila avolu muxali laixe avile. 6Mukalu la Tapalisi milala xe no anu voxo nesi la mipita noxi'a laili e imoxo'a lexe Ta'eloti so oli'a ikamulinu vote'i so ivau Iesua usoli.
7Ia Iesua oli'a tatisaipeliou mixexesou tuala ne la milai no kupa toxoxu. Milutu xe milai la tamitema latala e latala so xale lia ne Xalili mimuline'i. 8Xe tamitema so xale lia ne Iutea milomusou a'alosou mimi ane Iesua mu'oxonu laso ane'i kalumo milailai noxou. Tamitema loxo Taielusalemo xe Ta'itumea xe ane'i so tuala xalevile ne Tiotani xe ane'i tatemanu tuala ne Taili xe Saitoni. 9Mine'ene'e la miveli e miveli laso Iesua muvikalane'i tatisapeli lexe ilalaxinu pouti vile. Ilalaxinu so loxo anu tanixu uasi mo tamitema ikapikapinu la utelo no anu pouti so usuku sevile ulai no kupa. 10Ikapikapinu axone xo anu mupaipoune'i tamitema pipiena iouiou mukalu. Laso ane'i tapipiena ane upaipoune'i uao la isousoune'i ngato'o so itovonu ikasi noxou. 11Xe tamitema ane loxo ta'angelo tamasua mikasi'a mixali mo isaxisou, la milalusi no talaxu mo miunga lexe, “Nini Mosinge Olu.” 12Ia utotomu Iesua mu'apixa'a pakia'u lexe mamu so ipala'anixu.
Iesua muiloune'i tatisaipeliou 12
13Ioxe, ili'i la Iesua mulai teitexi no la'olu vile. La tamitema ta'ei mumasaxai'a lexe imulinu la mu'avali'a so oli'a milai. 14Oli'a mitelai no la'olu mukalu la anu musosovosi'a 12 so ivaitami noxou utotomu. Xe muvikala lamana lexe ane'i so ta'aposeliou xo ili'i la upalusi'a so ixixao ilanu vaikalaou Mosinge. 15Mo mulosi'a xavi so ikusai'a ta'angelo tamasua ane ikasi'a tamitema.
16La tamitema 12 ane musosovosi'a ualaualasi'a aloxo 'o. Saimoni ane Iesua mulemolu lexe Pita. 17Xe Tiemisi ilou vimou Tioni e Sepeti ta'olu. Ane'i tamei ne Iesua muvotongalelene'i lexe Tapoanexesi xo laxu lexe tamitema so su. 18Xe Anitilu xe Pilipi xe Patolomiu xe Matiu xe Tomasi xe Tiemisi e Alipiusu olu xe Tatiusi xe Saimoni anu so laili noxi'a Taseloti. 19Xe Iutasi Isikalioti itema ane so upilixinu Iesua no avo'a tauluaou.
Tamitema mikalavoi lexe Iesua muxaxai no anu xavinu Uluaou
20Xe mune'e la Iesua muxali no tani mo mu'unalai. Mu'unalai la tamitema mine'e mipitapita. Mipitapita axone laso Iesuaena mi'au'au misevile mole i'ani uasi. 21A'alosou mi ne muxali noxi'a taminuminu laso ane'i milai so i'umenu xo mivikala lexe, “Anu masi xavutalaou mupaolu mane.”
22Xe tamitema se'i so lavulavu no anu lavuloto so tuala Ielusalemo milu'e mixali la mivikala lexe, “Ai, Velisevuli e tila noxi'a ta'angelo tamasua mukasou ane.” Ane'i mikalavoi lexe Uluaou mukasou Iesua axone mo mi'oxo lexe, “Ngamaisou. Anu ukusai'a ta'angelo tamasua no anu xavinu Velisevuli to!” 23Ane'i mivikala axone laso Iesua mupitane'i tamotu mo muvikalane'i no anu latilovo se'i aloxo 'o, “Xo axova? Umomomo so Uluaou anu molu ukusaou? 24O loxo tatemanu tuala vile ikalipalane'i so i'otoxa'a ngato'o la anu tuala ne umomomo so utulu pumuxu? 25O loxo tatemanu tani vile ixiliie'i ngato'o la ane'i ixolu opone'i vilesisi? Uasi, ane'i ipaxelele ane. 26Laso axova? Loxo vaikalamengi manina, la Uluaou oli'a tamenexu ixililie'i ngato'o ane. Mo axone la ane'i xavine'i ukalu mole imasua avile. 27Xo aloxo 'o. Loxo mosou tani xavinu musuku uxoxolu la itema vile umomomo so u'unalai mo u'umenu mimiou uasi. Ia loxo vote'i so usakisakinu mosou tani ne, laso ane. Anu u'unalai so utaxusou mimi no tani mo u'umenu avile.
28Ia ngalomu xo avikalangengi manina aloxo 'o. Loxo susu ma'ia o vaikala masua ma'ia tamitema ilemolu, la anu vote'i uxolu so Mosinge uiasou susu anene. 29Ia loxo tamitema ivikala masua so ixililiou Ulenu Laixe la anu vote'i so Mosinge uiasou susu noxi'a uasi manina. Susu noxi'a uxolu avile kaluxu uasi.” 30Iesua muvikala axone xo no anu vaikalai'a se'i ne lexe, “Angelo masua uxolu noxou”.
31Ioxe, no voxo anene la Iesua nenu oli'a tavimovimou mixali la mitulu noale. Mitulu noale la mikalanu vaikala mu'unalai lexe anu uuatu noxi'a. 32La ane'i tamitema tavu'alo mixolu mixixaosou ne mivikalanu lexe, “Ai nalomu. Nenine oli'a tavivine a ixolu noale mo ikakamulineni.” 33La anu mukoline'i lexe, “Xo ena'ei nenilo xe ta'ei tavivilo?” 34La iou mukakai'a mukalusi mo muvikala lexe, “Ngamalei. Ngingi tanenilo mo tavivilo. 35Xo tamitema ta'ei ane imulinu masaxa noxou Mosinge, la ane'i tavivilo mo tanenilosi ane.”
Tällä hetkellä valittuna:
Maki 3: ATA
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Copyright 1999 New Tribes Mission, Sanford, FL 32771-1487
