मरकुस 2

येशु द्वारा लाखवा रोगिही हाजु कोअलो

(मत्ती 9.1-8; लूका 5.17-26)

1खोब दीहो मेहे तो फाशु कफरनहूम मेहे आयु अने होम्बलील्यो का तो कोअमेहे होय. 2तेहलाम एवडे मांहे एकटा का बाअणाम तीयाहाभी तियाहा जागू नाहाउवतो तेहलाम येशु तियाहा संदेश आपित ओतु. 3अने मांहे एक लोखवु उवल्याहां चार जोआ मीलीत वीसीत त्याईही लेत आवे. 4तियाहा गर्दीवही त्याजागे जाता नेआवतली, कोईत तो जीही ओतु तीही छप्पर तिये विसित सेटे कोयोएने वात कोईत ज्या खाटलापो लखवा माहुहू हुव्यू ओतु ती खाटेलो निसे येशु जागे सोडीत 5तियाआ विश्वास पालीत येशु लखवा उवलो माहुंहु कोयु, “पोऱ्या, ताआ पापापो क्षमा उवी होय.” 6केते शास्त्री त्याजागापो बोह्ये ओते; तियाआ मोनामे एहेलू विचार आवयू का 7ओ एहेलू काहा गोगत्लू? ओ ताहा परमेश्वरोओ निंदा कोईत होय परमेश्वरावाचून कोडू पापापो क्षमा कोहू शकतो? 8येशु आपाआ आत्माम लागेज जाईत लेधलो का ओ मोनुमे कि विचार कोईत होय, तो तियाहा कोयु, आपाआ मोनामे तुमु एहलो विचार काहा कोअताहा? 9हीदू कि होय, ताआ पापापो क्षमा उवी होय, एहलो लखवा उवलो माहुंहु कोईओलो सोपो किंवा उठ, आपाआ खाटेलो विसित चालीलो लाग एहलो कोईओलो सोपो होय? 10पोन माअहा पोऱ्याहा धोरतीपो पापापो क्षमा कोईलाकाजे अधिकार होय ओ तुमामे होमजीवी कोईत तोओ लखवा उवलो माहुंहु कोयु, 11आय ताहु कोत्लू उठ, आपाआ खाटेलो विसित ले, अने आपाआ कोआ जा 12फासाडी तो उठ्यू अने लागेज आपाआ खाटेलो विसित आखाआ देखताआ निघाल्यू, यापोरोत आखे जोओ थक्क उवे अने देवोओ गौरव कोईत कोयु, आमाहा एहलो केधीज पालील्यो नाहा.

येशु द्वारा फालू लेनाराहा हाद्लोओ

(मत्ती 9.9-13; लूका 5.27-32)

13तो तिहीरोत निहित गोइत्लुताहा समुद्रकिनाराआ जागे गोल्यो अने आरन्यो लोकसमुदाय तिया जागे आवयू तेहलाम तिये तियाहा शिक्षण आप्लु. 14तिहीरोत जात ओयताहा तियाहा अल्फीई पोऱ्या लेवी जकातीइ नाकापो बोहीतरोल्यु देखायू अने तियाहा तिये कोयु, माफासाडी आव, तेहलाम तो उठित तिया फासाडी गोल्यो. 15फासाडी एहलो उवे का तो तियाआ कोआ खायलाकोत बोहयु, तीही वारुज जकातदार अने पापी माहाआ येशु अने त्याआं शिष्य याआ लाइनिम आविलो बोह्ये काहाके ते खूप ओमेत ते तियाआ फासाडी आव्ये ओते. 16तेहलाम परुश्यामरोत शास्त्री इये तियाहा जकातदार अने पापी मांहे त्याआरी खाअलावेले पालीत तियाआ चेलाहा कोयु, ओ जकातदार अने पापी मांहे याआ आरी काहा खात्लू? 17ओ होमलित येशु तियाहा कोयु, हाजलू वैदयाची गोरोज कायना ओतो, ताहा बिमारीवालाहा ओते आय नितीमानास नाहा ताहा पाप्याहा बोलावयास आवयू होय.

उपवास सी समंधित प्रश्न

(मत्ती 9.14-17; लूका 5.33-39)

18योहानाआ शिष्य अने परुसी उपास कोईत ओते, तेहलाम मांहे आविलो तियाहा कोयु, योहानाआ शिष्य अने परुश्याआ शिष्य उपास कोअता पण आपाआ शिष्य उपास कोईत नाहीत याआ काहाके नाहाकोत? 19येशु तियाहा कोयु, वेहवाला आरी उपो होय तोपोरोत उपास कोअला शक्य नाहा 20तेबी एहलो दीही आवे का उपो त्यांपोरोत काढीत लेदो जाइअलो तेहलाम तियाअ दिहोम ते उपास कोआ 21कोडु नव्यो कापडाआ ठिबकू जुनो डोगलाहा लागाडीत नाहा लागाडले ताहा धड कोइला कोअता लागाडल्यी ठिबकू तियाहा म्हणजे जुनाहा फाडीअलो अने सिडू वोडो ओते 22कोडु नवो द्राक्ष रोह जुनो बुधलाम काले नाहा पेरीला ताहा नव्यो द्राक्षरसावाही बुधले फुटणारु, द्राक्षरस वेरात्लू, अने बुधलेभी निकामी ओये कोईत नवो द्राक्षरस नवो बुधलाम काल्तले.

येशु सब्तओ प्रभु

(मत्ती 12.1-8; लूका 6.1-5)

23फासाडी एहलो उवे का तो शब्बाथ तेदीही खेतामे जाआत्लू तियाआ शिष्य सोडकोपो कोंहे वोडू लागाडीत. 24तेहलाम परुसी तियाहा कोयु, पाला, शब्बाथ तेदीही कोहू कायना ते ओ हाजो कोअता? 25तेहलाम येशु तियाहा कोयु, दाविदाला गोरोज पोड्यी म्हणजे तियाहा अने तियाआ आरीवालाहा भूक लागीई तेहलाम तिये नाहाकोत कोल्यु? 26अब्याथार महायाजक ओतलू तो देवाच्या मंदिरोम केहलु गोल्यो अने याजकाशिवाय कोडुबी खाऊ योग्य नयेत तियाअ समर्पित रोटा तिये केहला खाद्योओ अने आपाआ हेंगातीही ए केहला खाअहू आप्या ओ तुमु केधी वाचले नाहा के? 27फासी तो तियाहा कोयु, शब्बाथ मांहाकोअता उवलो होय, मांहु शब्बाथ कोअता उवलो नाहा 28कोईत माअहा पोऱ्या शब्बाथआ प्रभू होय.

Tällä hetkellä valittuna:

मरकुस 2: NOINT

Korostus

Jaa

Kopioi