Matáyɔ 6
6
Gabea á ɓato á ɓuyɛnɛ
1Ɛ́ngɛphani! Ɓókogeɛ mɔnɔ kema ánjá mosá á ɓakpa ka gea, ɓɔ́ɔnɛkanɛ. Ámbé Abanu mmbɔ á na koba kánophendɛku. 2Mbenɔ nde oomopha nto á ɓuyɛnɛ kema, kɔɓɛtɛ mɔnɔ ɓongungu ka gea ɓakpa ɓákɔɔnɛ sumbia ɓî ɓato á maibe ɓámɔnɔ ogea k'éndu á madondanɔ ndea Ɓayúda ka nyɔngɔ á Mokonga na k'aphe ka gea ɓakpa ɓáebebɛ. Nenóngoɗi ɗoni gea, ɓágoɓi na ɓátɔi ophendɔ nɛɓɔ#Ɔna Isa 32.6. 3Aoɓá gǎkɛ, n'omophi nto á ɓuyɛnɛ kema, kákeni njaga á mǔku áúbɛ nnde njaga á nkei agi. 4Ambe ɔpha á ɓato á ɓuyɛnɛ kema ka ɓɔsɔmɛa, mpɔ Abakɔ mmbɔ aɔɔna kema nde oogea ka ɓɔsɔmɛa, akophendande.
Ɓɔphɛi ka phɔa ɛmɛmi
(Ɔna phɔtɔ Lók 11.2-4)
5Mbenɔ nde ɓɔɔmɛma, ɓókoɓɛmbɛ mɔnɔ ɓea ɓato á maibe ɓunde ɓámɔnɔ okonda mɛma na ɓámamege k'éndu á madondanɔ ndea Ɓayúda ka nyɔngɔ á Mokonga na k'aphe#Ɔna Lók 18.10-14 ka gea ɓakpa ɓɛ́ɓɔnɛ. Nenóngoɗi ɗoni gea, ɓá ye tɔi ophendɔ nɛɓɔ. 6Oɓɛ gǎkɛ, aoɓá n'ogea ɔ́mɛmɛ, ngia suɓi éndu nɛkɔ, óphatiɛ kǐo, ɔ́mmɛmɛ abakɔ mmbé a kó ka ɓɔsɔmɛa. Abakɔ mmbɔ aɔɔna kema ndɔ oogea ka ɓɔsɔmɛa, akophendande. 7Mbenɔ nde ɓɔɔmɛma, ɓɔ́kɔ́ɓɛmbɛ mɔnɔ osikiaga nyɔngɔ moci ɓea ɓato á kanga ɓeekea. Ɓɔ, ɓáokanisia te aoɓá na ɓáyɔngi ásii aunge Mokonga aɔ́kande ɛmɛmi nɛɓɔ. 8Ɓókǒkengeɛ mɔnɔ, ka nyɔngɔ nde Abanu aoúba mɔphɛ anu mosá á mɛma akɛ. 9Cɔ, mɛmani ndiu ɓe:
Abasu, ímbɔ ona koba,
ambe ɓáɗokomisɛ ina akɔ phɛɛ.
10Ambe koɓoamɛ nɛkɔ ábikɛ.
Ambe mɔphɛ nɛkɔ átɔtɔkɛanɛ ka mokonda ɓíndɔ á na koba.
11Ósopha eea nde akeni ka ɓesu kesande.
12Íma ɓojeɗe nɛsu, ɓíndɔ ɓesu ɓe phɔtɔ oíma ka ɓundɔ ɓásogǐí ɓojeɗe.
13Kosóɗeketɛmbɛ ngia ka tombaga, ósoamisa ndiu na Nketi.
[Nga koɓoamɛ, ɓukpɛkpɛ na ɓoombia ande akɔ ka saga na saga. Áɓɛ ɓó.]
14Nga, aoɓá n'oími ɓojeɗe nde ɓakpa ɓákogǐí, Abakɔ ímbɔ ana koba, aímande phɔtɔ ɓojeɗe nɛkɔ. 15A gǎkɛ oɓá na kóími ɓojeɗe nde ɓakpa ɓákogǐí, Abakɔ káímɛku ɓojeɗe nɛkɔ.
Ɓɔphɛi ka nyɔngɔ á ika kángá á eaga ka nyɔngɔ á mɛma á Mokonga
16Aoɓá na ɓoiki kángá á eaga ka nyɔngɔ á mɛma á Mokonga, ɓókóphindɛgɛmbɛ mɔnɔ kiki anu ɓea ɓato á maibe. Nga, ɓɔ, ɓáophindaga kiki aɓɔ ka ubisa ɓakpa gea ɓáiki kángá á eaga ka nyɔngɔ á mɛma á Mokonga. Nenóngoɗi ɗoni gea, ɓá ye tɔi ophendɔ nɛɓɔ. 17Cɔ, oɓɛ gǎkɛ, mbenɔ nde ooika kángá á eaga ka nyɔngɔ á mɛma á Mokonga, akeni ósokosɛ iso akɔ na óǒsia nkoki ka mɔ̌ 18ka gea ɓakpa ɓákáúbɛmbɛ gea te oiki kángá á eaga ka nyɔngɔ á mɛma á Mokonga. Abakɔ sisakɛ mmbɔ á kó ka ɓɔsɔmɛa aúbande. Abakɔ mmbé aɔɔna kema nde oogea ka ɓɔsɔmɛa, akophendande.
Akeni ɓóbisɛ ɛtɔi nɛnu na koba
(Ɔna phɔtɔ Lók 12.33-34)
19Ɓókǒtundukisiɛgɛmbɛ ɛtɔi ka mokonda ndee, ka nyɔngɔ nde ɓansɛngɛ na ɓánkɛngɛɔ ɓáújande ú, ɓakukuɓa ɓáɓunande endu ka uɓa í. 20Tundukisagani ndiu ɛtɔi nɛnu na koba, kuɓî ɓansɛngɛ na ɓánkɛngɛɔ ɓákáújɛku ú, ɓakukuɓa ɓákáɔtɔka ɓúna éndu ka uɓa í. 21Nga, ɔma nde ɛtɔi nɛkɔ a ɓei, wandɔ unge měma akɔ aɓande phɔtɔ.
Iso ande owanga á ka nyama
(Ɔna phɔtɔ Lók 11.34-36)
22Iso, ande ɔbɛa á ka nyama. Aoɓá iso akɔ n'aánjá, nyama akɔ áoɓá k'owanga. 23A gǎkɛ oɓá iso akɔ n'ana kukuwa, nyama akɔ áoɓá ka kindi. Aoɓá owanga nde a suɓi akɔ n'ande kindi, kindi kau aɓande kindi á kindi.
Kákeni bisa á mɔphɛ ka kema iɓɛ mɔngɔ ímoci
(Ɔna phɔtɔ Lók 16.13)
24Nna na nkpa nde aɔtɔka bɛɗaneaga á ɓakɔta ɓaɓɛ. Nga, ankangeande moci, áonkonda ɓaangbo. Kaɓɛ na nna ɓó, ajúkanande na moci, áomɓɛnjiaga ɓaangbo. Kɔ́ɔtɔka bɛɗaneaga á Mokonga na bɛɗaneaga á imɔna mɔngɔ moci.
Akeni ɓá na nseɓeɔ ka Mokonga
(Ɔna phɔtɔ Lók 12.22-31)
25Cɔ, kaɓondɔ unge nenóngoɗi gea: ‹Ɓókóianɛgɛmbɛ ka nyɔngɔ á enda anu, ka nyɔngɔ á kema á k'oea, á noa na á ɔla.› Nga, enda anyɛ́nyi eea na nyama áɔnyɛ́nya ngɔ́mbɛ, nna ɓo? 26Ɔ́ɛnjiani phɔ́ ɓambǔ á ka mpɛna! Ɓánáokonanaga, ɓánáoɗungua, ɓánáobisa eea k'égbóngbó. Abanu mmbé á na koba a gǎkɛ kǒisa. Cɔ, ɓenu ɓɔ́kɔ́ɛnyɛ́nyi phɔ́? 27Ka ɓenu moci sina mmbé ka ianaga akɛ sisakɛ aɔtɔka n'ayamei mbenɔ ábɔa ka enda akɛ?
28Ka nyɔngɔ sina nde ɓooianaga ka nyɔngɔ á ngɔ́mbɛ? Ɔnani phɔ́ maya á k'osaa nde ɓî atɛi kema ánjá, nnaɔbɛɗanaga, nnaophopha. 29Nenóngoɗi, nanga ɓî Sɔlɔmɔ́nɔ ɗá n'ɛtɔi#Ɔna 1 Ɓam 10 nɛkɛ bui, ɗákáɔ́li gǎkɛ ngɔ́mbɛ ánjá ɓea ka maya ndee. 30Mokonga aɔɔ́lisa maya á k'osaa nde asuwa ka kesande, mama í ɓáomaka ka nsa. Ɓenu ɓato á ɓeekea ábɔa, ɓákánɔɔ́lisae phɔ́ ánjá phɛɛ? 31Ɓókóianɛgɛmbɛ gea: ‹Ekende ɓeande? Ekende ɓenoande? Ekende ɓɛɔ́lande?› 32Ɓato á kanga ɓeekea ɓáunge ɓáokaɓaga kema ndɔ bui. Abanu mmbɔ á na koba aoúba kema bui nde ɓo na siki í. 33Kaɓani phɔ́ koɓoamɛ na koɗoni ndea Mokonga. Mpɔ, anóphande kema bubui nde anójiganei. 34Ɓókoianɛgɛmbɛ ka nyɔngɔ á kema ndea mama. Kema ndea mama, akeni tɔ ka mama. Esa n'esa akeni tɔ na nyɔngɔ ínɛkɛ.
Tällä hetkellä valittuna:
Matáyɔ 6: KMW
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2021, Wycliffe Bible Translators, Inc.
