Luke 20
20
Butome buni Sése asade maambe guni bua mate
1Letsuge lemochi va Sése àtɔsenge baate tsaange yiyibuɛ gutsɔ nzɔ Nzɛmbi, bivonde bia bavédi ba malage na basupili ba mangidi ma Nzɛmbi na bivonde bia baate biyade, nibiàdume Sése ndjide bo: 2«Lɛle bése wuwuvédi wɛ butome mu sade maambe muɛne.» 3Sése nàkale bɔ ndé: «Mɛ nɛme mɛ pa dume béne ndjide yiniyi mé, 4lɛlani mɛ wuwàvɛde Sa butome bua tube baate mu maambe. Nzɛmbi voki baate?» 5Bɔ bayambele pfuɛchi abɔ muɛne na bɔ muɛne, nibàlɛle bo: «Ti bése a béne lakale ndɛ ti Nzɛmbi, lɔlɔ lɔ ndɛ nakale bése a béne ndé béne kamuki lesàchilele maambe ma Sa vɛ? 6Tɔ ti bése a béne lakale ndɛ ti baate nibàbavɛde Sa butome, baate banebe mbégi lɔlɔ lɔ bàtɛtele bése a béne mamani mu bome bése a béne muti bɔ bàyabenge bo Sa mubigi a maambe ma Nzɛmbi.» 7Bɔ nibàkale Sése bo: «Bése lesayɛbi wuwàvɛde Sa butome bua tube baate mu maambe vɛ.» 8Avane Sése na ndɛ nàkale bɔ ndé: «Mɛ nɛme mɛ chilɛle béne wuwàvɛde mɛ butome bua sade maambe muɛne vɛ.»
Musame baséli bababi
9Vayulavane, Sése nàyole musame wunewu gulidi baate ndé: «Letsuge, mutu àvade mamvugu mamabote milonde mi batɛde vine gutsɔ nungi a ndɛ, ndɛ yɛnde gu muniale, nàvɛde nungi gulidi badiéndji. 10Lɛkɛse latɔle milonde letɔde, ndɛ nàtchindege muséli mumochi gulidi badiéndji ba ndɛ niàgele na nungi mu ndé bɔ batchindege lɛndi lekabe la milonde. Badiéndji bàbàkɛlenge nungi babome muséli wu ndɛ tchindege kobe, nibàgabese ndɛ miɔge na miɔge. 11Kumu a nungi nàbàtchindege muséli mukime, bàbàkɛlenge nungi, batoge ndɛ, babome ndɛ kobe, nibàgàbese ndɛ miɔge na miɔge. 12Ndɛ bàtchindege muséli wa mutate, awone na ndɛ, badiéndji bàbàkɛlenge nungi bànɛmese ndɛ mapode, nibàfunze ndɛ. 13Kumu a nungi atase, nàlɛle ndé, mɛ kabuni mɛ sade? Ka buédi mɛ tchindege muane a mɛ wa mutéme wu mɛ tɔnde. Bombe bɔ bágobese ndɛ. 14Tɔ badiéndji bàtalele muane a kumu a nungi, nibàyambele pfuɛchi abɔ muɛne na bɔ muɛne bo, wuwukásale na mikuani ndone ayade. Yadani lebomani ndɛ nungi yibade ka ya bése a béne.» 15Badiéndji babéte ndɛ gu pange a nungi, bɔ nibàbome ndɛ na gu leku.
Avane Kumu a nungi kabuni ákásade badiéndji muɛne? 16Va ndɛ káyade, nábome badiéndji ba nungi ba ndɛ niage, ákákise badiéndji bakime.
17Tɔ Sése akɛngese bɔ, nàlɛle bɔ ndé sopelani mɛ lebige lebakome gutsɔ ichange cha mabige ma Nzɛmbi le lalɛle ti:
«Lemani le batungi ba nzɔ bàsose va lembade,
lɔ kani lemani le laguase nzɔ?»
18«Mutu wotchi wuwarage gu yulu lemani muɛne, ndɛ ayoge ngɛngi. Namoni a mutu wu lemani muɛne larage gu yulu a ndɛ, ndɛ anigege.»
Ufute gua paga gulidi Sésare
19Basupili ba mangidi ma Nzɛmbi na bivonde bia bavédi ba malage nibiàsagenge ndile ka lesoge la kuate Sése muti bɔ bàyàbenge bo musame muɛne mu bɔ Sése ayuli. Tɔ bɔ nibàmɔne bɔɔme bua piti a baate.
20Basupili ba mangidi ma Nzɛmbi na bivonde bia bavédi ba malage nibiàkɛlenge Sése mu yoge maambe ma ndɛ yàmbelenge. Nimulɔ bɔ bàtchindege baate bàbàtasenge bo bɔ baate babayɛbene balidi gu sɔge Sése mu bo ndɛ pose lebige lelebi, bɔ bakabɛge ndɛ va busu ba bapɛchi ba mipame na wuwayumu va itini cha tsɛnge. 21Bɔ nibàdume Sése ndjide bo: «A Mulongichi, bése leyɛbi ti maambe ma wɛ lɔngese mɔ maambe mambuli. Wɛ sakɛngese baate mu madjime ma bɔ vɛ. Tɔ wɛ lɔngesenge ndile maambe ma Nzɛmbi atɔnde ndé baate basade. 22Lɛle bése, fute gua paga gulidi Sésare lɔ tchambe lelebuɛ voki lɔ tchambe lelebi?» 23Sése wuwàyabenge mataase ma bɔ, nàlɛle bɔ ndé: 24«Vɛdani mɛ dɔle. Indjime na ndoge bibilidi mu mbate a dɔle wunewu biɔ biane? Bɔ nibàkale ndɛ bo biɔ bia Sésare.» 25Ndɛ nàlɛle bɔ ndé: «Ka gabesani bia Sésare gulidi Sésare. Bia Nzɛmbi gulidi Nzɛmbi.» 26Gutsɔ maambe ma Sése àyàmbelenge, bɔ bàsàbakese lebige ti lemochi lelabome ndɛ mbɛle vɛ. Bɔ gambémbe mu maambe muɛne, bɔ nibàbade ndile ka lingii.
Sése alɔngese mu lesoge la baate bàbàkuade
27Baate ba lebuli la basaduséyin bàsàchilelenge bo baate bàbàkuade nibásoge vɛ. Avanekaniva bɔ bàdume Sése ndjide bo. 28A Mulongichi, gutsɔ maambe ma Muyise àkome balɛle bése a béne bo: «Lebagele akuɛle mukɛdi a ndɛ, ndɛ kuade baane na mukaase muɛne bote vɛ, muane a taate a ndɛ akabɔnge mukuili, mu bote muane a taate a ndɛ wuwàkuade baane. 29Tɔ gutsɔ itsuku niguàbade na baane ba tɛyi babagele tsaambe. Wa tsomi akuɛle mukɛdi, nàkuade baane bote vɛ. 30Wa duke àbɔnge mukuili, nàkuade baane bote vɛ. 31Wa mutate abɔnge mukuili, na ndɛ nàkuade baane bote vɛ. Nachi bɔ botchi ba tsaambe bàbɔnge mukuili, bɔ nibàkuade baane bote vɛ. 32Vayulavane mukaase na ndɛ nàkuade. 33Letsuge le baate bàbàkuade bákásoge gu leku, mulumi a mukaase muɛne vatsɔ bɔ botchi batsaambe kawuni ákábade?» Muti bɔ botchi batsaambe bàkuɛle mukaase muɛne. 34Sése nàkale bɔ ndé: «Babagele na bakaase ba bulɔnge bunebu bakuɛlene. 35Tɔ babagele na bakaase babayɛbene ba Nzɛmbi ákásole gu leku mu fuade moyi wa mubunamubu, básákabakuɛlene vɛ. 36Bɔ básákábákuade vɛ, muti bɔ ka ngane a batome ba Nzɛmbi ba gu yulu bákábade. Bɔ ka baane ba Nzɛmbi muti Nzɛmbi amapose bɔ gutsɔ leku mu fuade moyi wa mubunamubu. 37Muyise achigese gutsɔ ichange chi ndɛ kome ndé baate bàbàkuade nibásoge. Muti va Muyise àyole musame tchambe wu le lelimi la mbuage lelalolenge gutsɔ lekuake bimbe niɛnge vɛ, ndɛ Malumbi Nzɛmbi a Barame na Nzɛmbi a Isake na Nzɛmbi a Sakɔbe àtɛdenge. 38Nzɛmbi asalidi Nzɛmbi a baate bàbàkuade vɛ, tɔ ndɛ lidi Nzɛmbi, Nzɛmbi a baate babalidi moyi. Baate botchi bafuade moyi ndile mu ndɛ.» 39Basupili ba mangidi ma Nzɛmbi bakɛ, nibàlɛle Sése bo: «Mulongichi wɛ buédi wɛ yɛmbili.» 40Tɔ bɔ bàsàbàbage bungudi bua ba dume ndɛ mandjide makime vɛ.
Mutégede a Davide ni mutu wu Nzɛmbi àsɔle
41Sése nàlɛle bɔ ndé: «Baate kamuki bàlɛle bo Mutu wu Nzɛmbi àsɔle mutégede a Davide?» 42Sabone Davide ndɛ muɛne alɛle gutsɔ ichange cha mimbe ndé:
«Malumbi Nzɛmbi alɛle gulidi Mutu wu ndɛ sɔle ndé:
Yade gu tsagele va ngule a mbagele a mɛ.»
43Mɛ sáde mé bambɛne bawɛ bákábade ka bisuchili biawe bia matɛmbi.
44«Ti Davide atɛde ndɛ Kumu, kabuni Mutu wu Nzɛmbi àsɔle ákibade mutégede a Davide?»
Sése ndé yasadani maambe ngane a basupili ba mangidi ma Nzɛmbi
45Sése nàlɛle baate bɛndi va busu bua piti a baate bàbàyogenge maambe ma ndɛ yàmbelenge ndé: 46«Rambelani. Yabadani ngane a basupili ba mangidi ma Nzɛmbi. Bɔ kémbenge ndile na biluéti bibibuɛ. Bɔ tɔndenge ndile bo baate basolenge bɔ mu bitchige bia mikungi. Na tsagelenge mu bitchige bia tsomi gutsɔ manzɔ ma babɔnde Nzɛmbi na mu bitchige bia mikungi bibatchade. 47Bɔ yibenge mabuɛ ma bakaase ba bakuili na sokelenge mabɔnde mu muɛse ti bɔ baate babayɛbene va busu bua Nzɛmbi balidi. Nzɛmbi nátchise bɔ chigi yalotele.»
Tällä hetkellä valittuna:
Luke 20: NZB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
